Yɛlɛ Noba Naŋ Kanna Te Gama Naŋ Maŋ Soorɔ
Boŋ la a yɛlɛ na Jehoova naŋ na de eŋ a paalonne sukyie nendaare kaŋa naŋ koŋ kɔɔre kyɛ wa na poɔŋ?
A kyaare lɛ na a dɔgroŋ kpoŋ naŋ na piili, Yel-iriwulaa 17:16, 17 yeleeŋ ka: “Ka a eelɛ pie na ho naŋ da nyɛ, ana ane a wɛdoŋɔ na kyiire la a gyɛnterɛ; a na faa la o boma zaa kyɛ bare o ka o taa eŋkpoŋkpoli; a na ɔɔ la a o eŋnɛne a kyɛ nyege o ne vũũ. Bonso, Naaŋmen eŋ a la ba sukyie poɔ ka ba toŋ a O poboɔbo toma, ka a sage ka a de a ba naaloŋ ko a wɛdoŋɔ te ta lɛ saŋa a Naaŋmen yelbie naŋ tu a tuubu.” Saŋa kaŋa naŋ pare, te gama na yeleeŋ ka Jehoova na de eŋɛɛ a paalonne noba sukyieŋ ka ba sãã zirii puoruu.
Kyɛ, te wa nyɛɛŋ ka aseŋ ka te leɛre a wuluu ŋa. Jehoova na de eŋɛɛ a paalonne noba sukyie poɔŋ ka ba de “ba naaloŋ ko a wɛdoŋɔ.” Ka teneeŋ boɔrɔ ka te baŋ sori na a yɛlɛ ŋa naŋ na tu kyɛ nyɛ eebo, a na somaŋ ka te nyɛ a soorebie ama nɔɛ iribo.
Bo ka a boma na baŋ boɔle a daŋyelbo poɔŋ na are ko? A Baabole boɔlɛɛ “a gyɛnterɛ” ka “Baabilɔŋ Kpoŋ.” Baabilɔŋ Kpoŋ are ko la a donɛɛ zaa zirii puoruu. A “wɛdoŋ-zeɛ” are ko la United Nations. Yuoni 1919 baŋ da waneŋ a yelsɛgraa ŋa ka lɛ na vɛŋ ka emmaaroŋ be a tendaa zaa zuŋ. A piilee saŋa na, ba da boɔlooŋ ka League of Nations. Kyɛ, pampana ŋa ba boɔlooŋ ka United Nations. (Yel. 17:3-5) “A eelɛ pie” are ko la a teŋɛzu namine neŋ kpeɛ̃o deme naŋ are a United Nations puoriŋ na.
Bo yɛlɛ ka a gyɛnterɛ neŋ a wɛdoŋ-zeɛ laŋ? A gyɛnterɛ “zeŋ” la a wɛdoŋɔ zuŋ. Sobuoŋ? A gyɛnterɛ maŋ de la o maaloo ko a wɛdoŋɔ, a maŋ boɔrɔ ka o bɛnloo, bee a feroo ka o erɛ yɛlɛ o naŋ boɔrɔ.
Bo yɛlɛŋ na pɔge a gyɛnterɛ? A wɛdoŋɔ ane a eelɛ pie naŋ are o puoriŋ na na “kyiire la a gyɛnterɛ” yaga zaa, ka lɛ vɛŋ ka ba deɛ o boma zaa, a kyɛ lɛ vɛŋ ka neɛzaa baŋ ka o eɛ faa. Ba na sãã o la bare kpɛlɛŋkpɛlɛŋ, aŋa lɛ na Jehoova naŋ yeli na. (Yel. 17:1; 18:8) Zirii puoruu baaroo la lɛ. Kyɛ, sɛre ka a yɛlɛ ama na nyɛ eebo na, Jehoova na vɛŋeŋ ka a teŋɛzu namine e yelkaŋa naŋ daaŋ ba e nensaaleba zemmo poɔŋ zaa.
Bo ka Jehoova na vɛŋ ka a paalonne e? Jehoova na de eŋɛɛ a eelɛ pie na sukyieŋ ka ba “de a ba faŋa ane ba kpeɛ̃o ko a wɛdoŋɔ.” A wɛdoŋɔ la a United Nations. (Yel. 17:13) Teɛre a yɛlɛ soŋ a nyɛ. Ho teɛre ka a teŋɛzu namine ane kpeɛ̃o deme na yi la ba poɔ zaa a de ba faŋa ane ba kpeɛ̃o ko a United Nations bee? Akai! A daŋyelbo yeleeŋ ka Naaŋmen la na vɛŋ ka ba e lɛ. (Yeng. 21:1; de manne neŋ Aizeeya 44:28.) A teŋɛzu namine neŋ kpeɛ̃o deme na derɛɛ ba kpeɛ̃o na korɔ a United Nations fẽẽfẽẽ fẽẽfẽẽ bee? Ai. Ba na de la ba kpeɛ̃o na ko a United Nations tɔntɔbaalɛ. A United Nations pãã na de la kpeɛ̃o na baŋ de ko ba na sãã neŋ zirii puoruu, a baare o yɛlɛ kpɛlɛŋkpɛlɛŋ.
Bo yɛlɛ teŋ kaara soriŋ ka a nyɛ eebo nendaare kaŋa? Aseŋ ka te kyɛllɛ duorisaamma a boɔrɔ ka te woŋ ka a gɔmenantere derɛɛ ba kpeɛ̃o korɔ a United Nations fẽẽfẽẽ fẽẽfẽẽ bee? Ai. Yɛlɛ teŋ kaara soriŋ ka a nyɛ eebo la ka: Jehoova na de eŋ la a paalonne sukyieŋ tɔntɔbaalɛ ka ba de ba kpeɛ̃o ko a United Nations. Ka lɛŋ wa e, te na baŋeŋ ka a koŋ kɔɔre kyɛ ka a dɔgroŋ kpoŋ piili. Kyɛ pampana ŋa yɛŋ, ‘yɛ ta vɛŋ ka te gbire kyɛ baŋ te menne taabo velaa,’ bonso yɛlɛ mine waanaŋ ka a leɛre tɔntɔbaalɛ!—1 Tɛs. 5:6.