Wala Hoŋ Na Baŋ E A De Wuli Ka Ho Niŋe Paalɛɛ A Yɔɔdeɛbo Sareka?

1-2. Bo ka Yezu yɔɔdeɛbo sareka na seŋ ka o tɔ te sukyie ka te e? Bonso hoŋ yeli lɛ? (2 Korinti 5:​14, 15) (Kaa a foto.)

TE DE ka die kaŋa le ŋmɛ boŋ ka a daŋkyime dii bo biŋ hoŋ ire faana. Beŋ la ka neɛ kaŋa mɔɔ a wa iri bo yi neŋ be. Wala hoŋ na teɛre kyaare o soba? Haali ka neŋyaga la ka o soba faa, kyɛ ana somaŋ ka hooŋ meŋɛ gaa a te puore o soba bareka. Lɛ eebo na wuliŋ ka ho niŋe paalɛɛ yɛlɛ na oŋ e ko bo na.

² A zannoo naŋ pare na poɔŋ na, te zannɛɛŋ ka te koŋ baŋ faa te menne a yi faaloŋ na teŋ nyɛ yi Adama zie na. Te da lɛ zannɛɛŋ ka Yezu yɔɔdeɛbo sareka na vɛŋɛɛŋ ka Naaŋmen di suuri ko te, a lɛ vɛŋ teŋ taa teɛretɔ ka bebiri kaŋa te na eɛ noba naŋ pɛgeyi. A yɔɔdeɛbo sareka lɛ vɛŋɛɛŋ ka te neŋ Naaŋmen maale taa. A yɔɔdeɛbo zuŋ, te taaɛ teɛretɔ ka te na zeŋ la Paradiisi poɔŋ tegitegilɛ. Yelmeŋɛ zaa, a yɔɔdeɛbo sareka vɛŋɛɛŋ teŋ baŋ peɛlaaŋ ka Yezu taaɛ nɔmmo naŋ e zuluŋ ko nensaaleba. Saŋa na Yezu naŋ da e maleke a be sazuŋ na, o da taaɛ a nɔmmo ŋa ko nensaaleba. (Yeng. 8:​30, 31) Bitontona Pɔɔl da sɛgɛɛŋ ka “a Krista nɔmmo la teɛ te taa.” (Kanne 2 Korinti 5:​14, 15.) Lɛ wuleeŋ ka, a ba seŋ ka te daaŋ inni yɛlɛ na Yezu naŋ e ko te na zaa. A eɛ nimizeɛ ka te e yelkaŋa meŋ a de wuli ka te niŋe paalɛɛ yɛlɛ na oŋ e ko te na.

3. Bonso ka sori na te kaŋa zaa naŋ maŋ tu a wuli nimipa ko a yɔɔdeɛbo sareka na maŋ e o yoŋ?

³ Bo yɛlɛ hoŋ na e a de wuli ka ho niŋe paalɛɛ Yezu yɔɔdeɛbo sareka na? Te kaŋa zaa taaɛ yɛlɛ teŋ boɔrɔ ka te e. Aŋa mannoo poɔŋ, te de ka noba bata mine naŋ be ziyobo boɔrɔŋ ka ba tu sori gaa teŋkpɛŋ kaŋa. Ba zaa na tue soyobo a gaa a teŋkpɛŋ, kyɛ lɛ zaa naŋ la ba na taɛ be. Lɛ neŋ o zu la, te zaa boɔrɔŋ ka te wuli nimipa ko a yɔɔdeɛbo sareka. Kyɛ, yɛlɛ na te kaŋa zaa naŋ na e a de wuli te nimipa na koŋ yitaa. A zannoo ŋa poɔŋ, te na zannɛɛ lɛ na neŋ-sugu bata mine naŋ na baŋ e a de wuli ba nimipa ko a yɔɔdeɛbo sareka. Bana la, Baabole zannezanneba, noba naŋ de suobu, ane noba naŋ ba lɛ puoro Jehoova.

BAABOLE ZANNEZANNEBA

4. Bo teɛroŋ ka Jehoova taa kyaare noba naŋ zanna a Baabole?

⁴ Ho neŋ Jehoova Sieree Deme zannɛɛ a Baabole bee? Ka hooŋ iri a noɔre ka ɛɛ, sɔrebo la te boɔrɔŋ ka ho baŋ a yelnimizeɛ ŋa. Jehoova boɔrɔŋ ka ho ne o nyɔge zɔmennoŋ, azuŋ oŋ sonnɔ bo hoŋ zanna o yɛlɛ. (Gyn. 6:44; Tom. 13:48) A Baabole yeleeŋ ka: “Jehoova la maŋ peɛre baŋ sukyie zaa yɛlɛ.” Lɛ wuleeŋ ka Jehoova baŋɛɛ lɛ na hoŋ moɔrɔ ka ho zanne o yɛlɛ na. Ka hooŋ wa de o sowuli tonɔ neŋ toma a leɛre ho eebo, o poɔ zaaŋ maŋ pɛle. (Yeng. 17:3; 27:11) A yɔɔdeɛbo sareka yuo la sori ko te ka te neŋ Jehoova na toɔ̃ taa niiloŋ naŋ e kpeɛŋaa. (Uro. 5:​10, 11) Daŋ ta wa inne a yelnimizeɛ ŋa zaa.

5. Sobuo ka Baabole zannezanneba na baŋ de yɛlɛ naŋ be Filipae 3:16 toŋ neŋ toma?

⁵ Baabole zannezanneba, wala yɛŋ na baŋ e a de wuli ka yɛ niŋe paalɛɛ a yɔɔdeɛbo sareka? Ka yɛneeŋ de kawane na bitontona Pɔɔl naŋ da ko a Filipae lantaapuoruu na toŋ neŋ toma, a na soŋ yɛŋ yaga. O da sɛge ko baŋ ka: “Zie na te naŋ nyɛ nimitɔɔre gaabo a ta na, yɛ vɛŋ ka te naŋ moɔ̃ niŋe a kyɛnɛ lɛ neŋ o zu soŋ zaa.” (Fil. 3:16) Azuŋ, yɛ ta wa vɛnɛ ka neɛzaa bee bonzaa pigre yɛ sori ka yɛ de yɛlɛ na yɛŋ zanna na tonɔ neŋ toma.—Mat. 7:14; Luk. 9:62.

6. Ka a naŋ e kpeɛŋaa ko Baabole zannezanneba ka ba e leɛroo mine, bo yɛlɛŋ na baŋ soŋ ba? (Duturoonomi 30:​11-14) (Kaa a foto.)

⁶ Te de ka ho zannɛɛ a Baabole poɔ yɛlɛ mine, kyɛ aŋ e kpeɛŋaa ko bo ka ho sagaadi, wala aŋ seŋ ka ho e? Peɛre yɛlɛ yaga a kyaare ana yɛlɛ na. Puore sɔre Jehoova ka o soŋ bo ka ho woŋ a yɛlɛ muni soŋ. (Yiem. 86:11) Ka hooŋ e a yɛlɛ ama kyɛ ka a naŋ e kpeɛŋaa ko bo ka ho woŋ a yɛlɛ muni, ta vɛŋ ka a dɔɔnɔ bo. Ho na baŋ sɛgɛɛ a yɛlɛ biŋ, kyɛ naŋ moɔ̃ niŋe zanna a Baabole. A eɛ kpeɛŋaa ko bo ka ho bare yelkaŋa a Baabole naŋ yelka a ba soma bee? Teɛre baŋ ka Jehoova daaŋ koŋ sage yelka nensaaleba naŋ ba pɛgeyi e yelkaŋa naŋ gaŋ ba faŋa. Azuŋ, ho na baŋ deɛ Jehoova sowuli na toŋ neŋ toma. (Kanne Duturoonomi 30:​11-14.) Jehoova eŋɛɛ noɔre ka o na soŋ boŋ. (Aiz. 41:​10, 13; 1 Kor. 10:13) Azuŋ, ta vɛŋ ka ho eŋɛ kyoɔre. A koŋ soma ka ho de ho teɛroŋ zaa eŋ yelkpeɛne na hoŋ tuoro na eŋɛŋ. De ho teɛroŋ eŋ lɛ na hoŋ na baŋ e a de wuli nimipa ko yɛlɛ na zaa Jehoova naŋ e ko bo, ane a yɔɔdeɛbo sareka eŋɛŋ. Ka nɔmmo na hoŋ taa ko Jehoova naŋ wa e zuluŋ, ho na wa nyɛŋ ka ‘Naaŋmen nɔɛ tuubu ba waa tuo.’—1 Gyn. 5:3.a

7. Bo yɛlɛ ka baapaalba ba naŋ guoli a yelmeŋɛ poɔŋ seŋ ka ba teɛre?

⁷ Baapaalba ba naŋ guoli a yelmeŋɛ poɔŋ, wala yɛŋ meŋ na baŋ e a de wuli ka yɛ niŋe paalɛɛ a yɔɔdeɛbo? Yɛnee la yɛ dɔgreba Baabole zannezanneba naŋ e tegroŋ yaga zaa. A Baabole yeleeŋ ka: “Yɛ tage peɛle Naaŋmen, O na tage peɛle yɛ la.” (Gyi. 4:8; 1 Tun. 28:9) Ka hooŋ de gbɛre a moɔrɔ ka ho tagra peɛlɛ Jehoova, o meŋ na tage peɛle boŋ. Baŋ guoli bo a yelmeŋɛ poɔŋ zuŋ naane ka Jehoova boɔrɔ ho yɛlɛ. Kyɛ, Jehoova boɔrɔŋ ka ho ne o nyɔge zɔmennoŋ. Boŋ vɛŋ ka ho neŋ Jehoova na baŋ nyɔge zɔmennoŋ? A yɔɔdeɛbo sareka. Daŋ ta wa inne a kyɔɔta-tegroŋ ŋa Jehoova naŋ ko bo na yɛlɛ zaa. (Uro. 5:​1, 2) Azuŋ, sɛre hoŋ na gaa a Yezu kũũ Leɛteɛroo lammo na, a na somaŋ ka ho mãã ho meŋɛ a teɛre yɛlɛ na Jehoova neŋ Yezu naŋ e ko bo na yɛlɛ gaa tɔɔre. Vɛŋ ka a yɛlɛ eŋ bo faŋa ka ho de yɛlɛ biŋ ho nimitɔɔreŋ Jehoova puoruu poɔŋ. Lɛ eebo na wuliŋ ka ho niŋe paalɛɛ kyɔɔtaa na Jehoova naŋ tu o Bidɔɔ zie a de ko bo na.b

NOBA NAŊ DE SUOBU

8. Wala ka noba naŋ de suobu e a de wuli ka ba taaɛ sagediibu a yɔɔdeɛbo sareka eŋɛŋ?

⁸ Ho eɛ neɛ naŋ de suobu bee? Ka hooŋ iri a noɔre ka ɛɛ, lɛ wuleeŋ ka ho deɛ ho yel-eree wuli ka ho taaɛ sagediibu a yɔɔdeɛbo sareka eŋɛŋ. Aŋa mannoo poɔŋ, ho leɛrɛɛ ho eebo a leɛ erɛ yɛlɛ naŋ pɛlɛ Jehoova poɔ. Lɛ vɛŋɛɛŋ hoŋ wa leɛ Jehoova zɔmeŋɛ. Ho sagɛɛ Yezu noɔre a maŋ moɔlɔ a duorisoŋ korɔ noba. Ho lɛ de la ho meŋɛ ko Jehoova a de suobu meŋ. Jehoova puoruu zuŋ, noba erɛ boŋ yɛlɛ naŋ ba seŋ neŋ bee? (2 Tim. 3:12) Lɛ na hoŋ dire kannyiri na wuleeŋ ka ho nɔŋɛɛ Jehoova, a lɛ wuleeŋ meŋ ka ho taaɛ nimipa naŋ e zuluŋ ko o Bidɔɔ yɔɔdeɛbo sareka na.—Hib. 12:​2, 3.

9. Bonso aŋ seŋ ka Kristabiiri kaara ba menne velaa?

⁹ Ka teneeŋ e noba naŋ de suobu gba, kyɛ aseŋ ka te kaara te menne velaa. Bonso wagre naŋ gɛrɛ poɔŋ na, ka teneeŋ ba kaa soŋ te koŋ lɛ taa nimipa naŋ e zuluŋ ko a yɔɔdeɛbo. Sobuo ka a yɛlɛ ŋa na baŋ pɔge te? Te nyɛ lɛ na Yezu naŋ da yeli kyaare Kristabiiri naŋ da be Efesu na. O da pugi baŋ neŋ lɛ na baŋ dire kannyiri na. Kyɛ, o da yelko baŋ ka: ‘Yeli ŋa la ka N taa ne yɛ, yɛ bare la a nɔmmo na yɛ naŋ da taa a piiluu saŋa.’ (Yel. 2:​3, 4) Yɛlɛ na Yezu naŋ yeli na wuleeŋ ka, ka Kristabieŋ ba kaa soŋ, o koŋ lɛ de nɔmmo tonɔ korɔ Jehoova. O soba maŋ puoro sɔrɔŋ, a gɛrɛ a lammore, a tonɔ a naaŋ moɔloo toma, kyɛ nɔmmo naŋ e zuluŋ o soba naŋ taa ko Jehoova zuŋ naane oŋ eraa. O soba ba maŋ lɛ nɔŋ Jehoova neŋ o sukyiri zaa. Ka hooŋ wa nyɛ ka nɔmmo na hoŋ taa ko Jehoova ba lɛ e kpeɛŋaa aŋa lɛ na oŋ da waa saŋa kaŋa naŋ pare na, wala hoŋ na baŋ e?

10. Sobuo hoŋ na baŋ de kawane na Pɔɔl naŋ ko Timoti na tonɔ neŋ toma? (1 Timoti 4:​13, 15)

¹⁰ Bitontona Pɔɔl da yelko la Timoti ka: “De a yɛlɛ ama tonɔ ne, a kpimare a ne ho poɔ zaa.” (Kanne 1 Timoti 4:​13, 15.) O da boɔrɔŋ ka o wuli ka, aseŋ ka Timoti de nimizeeloŋ tonɔ Jehoova toma. Wala hoŋ meŋ na baŋ e a de a kawane ŋa toŋ neŋ toma? Ho na baŋ teɛrɛɛ yɛlɛ na mine hoŋ na baŋ erɛ ka a soŋ bo ka ho de eŋnyagroŋ puoro neŋ Jehoova. (Uro. 12:11) Aŋa mannoo poɔŋ, ho na baŋ de biŋee ho nimitɔɔreŋ ka ho na maŋ narɛɛ ho meŋɛ velaa zaa serɛ kyɛ gɛrɛ a lammozie. Ka hooŋ wa gaa a lammozie meŋ, ho na baŋ mãã la ho meŋɛ a kyɛllɛ a yɛlɛ velaa. Ka hooŋ wa zanne a Baabole, ho na baŋ gaaɛ zie kaŋa ho yoŋ sɛŋ a te teɛre yɛlɛ na hoŋ zanne na yɛlɛ gaa tɔɔre. Ka hooŋ mare vũũ a naŋ woro daare eŋnɛ a vũũŋ, a vũũ naŋ na direŋ. Lɛ meŋ la, ka teneeŋ moɔ̃ niŋe erɛ a yɛlɛ ama, a na vɛŋeŋ ka nimipa na teŋ taa ko boma na zaa Jehoova naŋ ko te na, ane a yɔɔdeɛbo maaleŋ e zuluŋ. Ka hooŋ boɔrɔ, daaraawala mine sɛre ka a Yezu kũũ Leɛteɛroo bebiri na na ta, ho na baŋ mãã la ho meŋɛ a teɛre maaloo na zaa hoŋ nyɛrɛ ho naŋ e Jehoova puorebie zuŋ. A yɛlɛ ŋa na soŋ boŋ ka ho maaleŋ taa nimipa naŋ e zuluŋ ko a yɔɔdeɛbo. Bonso, a yɔɔdeɛbo la yuo sori ko bo ka ho neŋ Jehoova na baŋ taa niiloŋ.

11-12. Ka saŋa kaŋaŋ wa ta ka ho eŋnyagroŋ sigi teŋɛ, lɛ wuleeŋ ka Jehoova ba lɛ de o vooroŋ soŋ na sonnɔ bo bee? Wuli a muni. (Kaa a foto.)

¹¹ Te de ka wagre mine ho eŋɛ ba maŋ nyagra ka ho tonɔ Jehoova puoruu toma, wala aŋ seŋ ka ho e? Ka lɛŋ wa pɔge bo, ta vɛŋ ka ho eŋɛ kyoɔre. Ta wa teɛre meŋ ka ho ba lɛ taa Jehoova vooroŋ soŋ na. A yɛlɛ ŋa taa daaŋ pɔgɛɛ Pɔɔl. O da sɛge te koɛ a Korinti lantaapuoruu noba ka: ‘Ka maa meŋɛ poboɔbo naane, kyɛ, feroo toma la ka ba de ko ma.’ (1 Kor. 9:17) Wala oŋ da boɔrɔ ka o wuli?

¹² Pɔɔl meŋ da eɛ neɛ naŋ ba pɛgeyi, azuŋ saŋa kaŋa yɛlɛ mine da maŋ vɛŋeŋ oŋ ba lɛ taa eŋnyagroŋ ka o moɔlɔ a duorisoŋ. Aneazaa ka o da ba maŋ taa eŋnyagroŋ wagre mine ka o tonɔ a naaŋ moɔloo toma, kyɛ o da naŋ maŋ moɔ̃ la niŋe a toma poɔŋ. Ho meŋ na toɔ̃ eɛ lɛ. Ka hooŋ ba taa eŋnyagroŋ ka ho e yelsoŋ kaŋa, kyɛ, hooŋ naŋ moɔ̃ niŋe erɛ a yɛlɛ. Puore sɔre Jehoova ka o soŋ bo ka ho taa a boɔbo ka ho erɛ o boɔbo. (Fil. 2:13) Moɔ̃ niŋe erɛ yɛlɛ naŋ na vɛŋ ka ho neŋ Jehoova niiloŋ na e kpeɛŋaa. Wagre naŋ gɛrɛ poɔŋ na, nɔmmo na hoŋ taa ko Jehoova na na leɛ eɛ kpeɛŋaa, ka lɛ vɛŋ ka ho leɛ taa eŋnyagroŋ meŋ.

13. Wala teŋ na toɔ̃ e baŋ ka te sereŋ erɛɛ yɛlɛ na Jehoova naŋ boɔrɔ ka te erɛ?

¹³ Wagre mine a na somaŋ ka te maŋ de yɛlɛ naŋ be 2 Korinti 13:5 toŋ neŋ toma. Be yeleeŋ ka: “Yɛ gyɛle yɛmenne nyɛ ka yɛ be la a yeldeebo poɔ be? Yɛ tegre yɛmenne nyɛ.” Gbɛɛ yaga, te na baŋ soorɛɛ te menne a soorebie ama. ‘N deɛ Jehoova puoruu yɛlɛ de weɛ N zemmo poɔŋ bee?’ (Mat. 6:33) ‘Yɛlɛ na maŋ de pɛlɛ N niŋe wuleeŋ ka N kyiiree faaloŋ bee?’ (Yiem. 97:10) ‘N yel-eree maŋ vɛŋeŋ ka emmaaroŋ neŋ noɔreyeni be N neŋ N yɔɔmine kpakyagaŋ bee?’ (Efe. 4:​2, 3) A Yezu kũũ Leɛteɛroo saŋa, te maŋ taaɛ a vuo ka te leɛteɛre a yɔɔdeɛbo na Jehoova naŋ ko te na yɛlɛ. Azuŋ, a na wagre na la wagre soŋ aŋ seŋ ka te peɛre te menne a soorebie ama a toɔ̃ baŋ peɛlaaŋ ka te eɛ noba naŋ erɛ a Krista boɔbo, kyɛbee ka te menne boɔbo la teŋ erɛ.

NOBA NAŊ BARE JEHOOVA PUORUU

14. Boŋ vɛŋ ka Jehoova puorebiiri mine bare Jehoova puoruu?

¹⁴ Jehoova puorebiiri mine bebeŋ a de yuomo yaga puore neŋ Jehoova. Kyɛ kyuuri kyɛbee yuomo mine naŋ wa pare, ba ba lɛ laŋna neŋ a lantaapuoruu noba. Ananso la wala? Tɔɔ, ba mine a ‘teŋɛzu nyɔvore yɛlɛ la dɔɔnɔ’ ba yaga zaa. (Luk. 21:34) Ba mine meŋ, ba Kristabitɔ kaŋa yelyelii bee yel-eree la sãã ba poɔ, ka lɛ vɛŋ baŋ bare Jehoova puoruu. (Gyi. 3:2) Ba mine meŋ bebeŋ a e yelfaa kaŋa naŋ e nimizeɛ, kyɛ aŋ e kpeɛŋaa ka ba gaa a lantaapuoruu nembɛrɛ zie a te bɔ sommo. Lɛ zaa naŋ la, boŋ na toɔ̃ soŋ a noba ŋa ka ba leɛ wa Jehoova zie? Sobuo ka a yɔɔdeɛbo sareka na baŋ tɔ ba sukyie ka ba e yɛlɛ naŋ soma?

15. Wala teŋ e baŋ ka Jehoova ba gyɛ noba naŋ ba lɛ laŋna neŋ a lantaapuoruu na bare? (Iziikiel 34:​11, 12, 16)

¹⁵ Bo teɛroŋ ka Jehoova taa kyaare noba naŋ ba lɛ laŋna neŋ a lantaapuoruu? Jehoova suuri ba iri ne ba. O ba gyɛ ba bare meŋ. Jehoova moɔ̃ la niŋe a boɔrɔ a noba bama taa. O boɔrɔŋ ka o soŋ ba ka ba leɛ wa o zie, ka o eŋ ba faŋa. (Kanne Iziikiel 34:​11, 12, 16.) Ka hooŋ e neɛ na kaŋa naŋ bare Jehoova puoruu a kanna a yɛlɛ ŋa, ho na baŋ sagediŋ ka Jehoova boɔrɔŋ ka ho leɛ wa o zie. Te baŋɛɛŋ ka ho boɔrɔŋ ka ho erɛ yɛlɛ naŋ soma, azuŋ hoŋ kanna a yɛlɛ ŋa. Jehoova nyɛɛ yelsonne ho eŋɛŋ, azuŋ oŋ soŋ bo hoŋ wa a yelmeŋɛ poɔ. Jehoova naŋ nyɛrɛɛ ana yelsonne na ho eŋɛŋ, azuŋ o boɔrɔŋ ka o soŋ bo ka ho leɛ wa a lantaapuoruu poɔ.

16. Boŋ na toɔ̃ soŋ neɛ naŋ bare Jehoova puoruu ka o leɛ wa Jehoova zie? (Kaa a foto.)

¹⁶ Ka hooŋ kaa a Return to Jehovah gambile na poɔŋ, ho na nyɛɛ a yɛlɛ ŋa naŋ toɔrɔ sukyiri ŋa. Ba sɛge eŋɛɛ o poɔŋ ka: “Taa sagediibu ka Jehoova na soŋ boŋ ka ho leɛ wa o zie. O na soŋ boŋ ka ho are ho yelwonii zaa noɔreŋ, a di suuri ko ho yɔɔmine naŋ e bo yɛlɛ naŋ ba seŋ neŋ na. O na di la suuri ko bo, a soŋ bo ka ho taa sukyirimaaroŋ neŋ teɛroŋ yeni. A yɛlɛ ama zaa na toɔ̃ vɛŋeŋ ka a e mɔlɔ ko bo ka ho de gbɛre a wa poɔ ho yɔɔmine eŋɛŋ ka yɛ zaa laŋ puoro Jehoova.” A lantaapuoruu nembɛrɛ meŋ eŋɛ nyagraŋ ka ba soŋ bo. Sommo na baŋ na de ko bo na na waa ŋa baŋ ‘e lirizie a yi sasekpeɛŋaa eŋɛŋ, a e sɔglezie a yi saa saseɛ eŋɛŋ.’ (Aiz. 32:2) Ho na baŋ soorɛɛ ho meŋɛ ka: ‘Bo gbɛɛ maŋ na toɔ̃ de pampana ka lɛ vɛŋ ka N neŋ Jehoova maale taa?’ (Aiz. 1:18; 1 Pit. 2:25) Aŋa mannoo poɔŋ, ho na baŋ deɛ gbɛre a gaa a lammozie. Ho na baŋ sɔrɛɛ a nembɛrɛ ka ba soŋ bo. Ba na baŋ kaa iree neɛ kaŋa ka o ne bo zanna a Baabole. Ka hooŋ puore sɔre Jehoova ka o soŋ bo ka ho e a yɛlɛ ama a de wuli ka ho taaɛ nimipa ko a yɔɔdeɛbo, ho na baŋ sagediŋ ka Jehoova na iree ho puore sɔroo na noɔre ko bo.

WALA HOŊ NA BAŊ E A DE WULI HO NIMIPA?

17-18. Wala teŋ na baŋ e a de te wagre toŋ neŋ toma soŋ sɛre ka a Yezu kũũ Leɛteɛroo bebiri ta?

¹⁷ Yezu yeleeŋ ka Naaŋmen yɔɔdeɛ teŋ ka lɛ na vɛŋ ka “neɛ na zaa naŋ na sage de O yɛlɛ na ta wɛ, kyɛ nyɛ nyɔvore naŋ ba taa baaroo.” (Gyn. 3:16) A yɔɔdeɛbo eŋɛŋ ka Jehoova na tu a faa te yi kũũ ane faaloŋ gbaŋgbaaloŋ poɔ. A ba seŋ ka te kaŋa zaa daaŋ boɔle a yɔɔdeɛbo sareka zaala zaa. (Uro. 3:​23, 24; 2 Kor. 6:1) Sɛre ka a Yezu kũũ Leɛteɛroo bebiri na ta na, mɔɔ a bɔ wagre a teɛre nɔmmo na Jehoova neŋ Yezu naŋ wuli bo na. Ka hooŋ e lɛ, a na tɔɛ ho sukyiri ka ho e yelkaŋa a de wuli ho nimipa.

¹⁸ Wala hoŋ na baŋ e a de wuli ka ho niŋe paalɛɛ a yɔɔdeɛbo sareka? Aminekaŋaŋ, ho noɔre iribo neŋ ho taaba nɔɛ iribo koŋ yi taa. Kyɛ, lɛ zaa naŋ la, ho na baŋ taaɛ sagediibu ka ka hooŋ wa poɔ noba turituri poɔ ka yɛ zaa leɛteɛre Yezu kũũ na, Jehoova poɔ na pɛleŋ yaga. Bonso te eɛ noba naŋ koŋ lɛ ‘zeŋ ko te menne, kyɛ te na zeŋeŋ a ko soba na naŋ kpi ko te na.’—2 Kor. 5:15.