Wulo Nimipa A Korɔ Dɔbɔ Naŋ Derɛ a Lantaapuoruu Weɛ Na

1. Bo yɛlɛ mine la ka Yezu e ko te?

NENSAALAA zaa ba kyebe a e yelsonne ko nensaaleba a gaŋ Yezu. Saŋa na oŋ da be a donɛɛ zuŋ na, o da maŋ erɛɛ yelseɛlɛ a sonnɔ noba. (Luk. 9:​12-17) O da kpieŋ a de o nyɔvore iri sareka a ko te kyɔɔtaa naŋ e kpoŋ gaŋ kyɔɔtaa zaa. (Gyn. 15:13) Yezu kũũ puoriŋ, o naŋ moɔ̃ la nimiri a erɛ yelsonne korɔ te. O da sɔrɛɛ Jehoova ka o de o vooroŋ soŋ na ko te ka o wulo te a kyɛ diire te sukyie aŋa lɛ oŋ da eŋ noɔre na. (Gyn. 14:16, 17; 16:13) A tuuro a lantaapuoruu lammore eŋɛŋ, o maŋ korɔ teŋ wulibo naŋ na baŋ soŋ te ka te wulo noba a Baabole poɔ yelmenne a donɛɛ lombori zaa, a sonnɔ ba ka ba wa leɛ o potuuribo.—Mat. 28:​18-20.

2. Nembobo la ka Efesu 4:​7, 8 yelka ba ko baŋ “kyɔɔtaare” na?

² Te lɛ nyɛ kyɔɔtaa kaŋa Yezu naŋ lɛ ko te. A bitontona Pɔɔl da sɛgɛɛŋ ka, saŋa na Yezu naŋ da wa do sazu na, “o da ko la o noba kyɔɔtaare.” (Kanne Efesu 4:​7, 8.) Pɔɔl da vɛŋɛɛŋ aŋ pɛle ka Yezu da ko la a noba ŋa kyɔɔtaare ka ba na baŋ de soŋ a lantaapuoruu soe yaga poɔŋ. (Efe. 1:​22, 23; 4:​11-13) Zenɛ ŋa, a noba na ba naŋ ko a “kyɔɔtaare” mine la a lantaapuoruu nembɛrɛ sonneba, a lantaapuoruu nembɛrɛ, ane a gbandige zukaareba.a Yelmeŋɛ la, a dɔbɔ ŋa ba pɛgeyi, azuŋ ba maŋ ŋmɛɛ gbɛɛ saŋa kaŋa. (Gyi. 3:2) Kyɛ te Daana Yezu Krista maŋ tu la ba eŋɛŋ kyɛ sonnɔ te; ba eɛ kyɔɔtaare a ko te.

3. Tere yelmannaa kaŋa a wuli lɛ teŋ zaa na baŋ soŋ a dɔbɔ ŋa Yezu naŋ tuuro ba eŋɛŋ kyɛ deɛrɛ te weɛ na.

³ Yezu ko la a dɔbɔ ŋa a ferebo toma ka ba eŋnɛ a lantaapuoruu faŋa. (Efe. 4:12) Kyɛ te zaa na baŋ soŋ baŋ ka ba toɔ̃ toŋ a toŋ nimizeɛ ŋa. Te na baŋ deɛ a yɛlɛ ŋa manne neŋ te Lammozie ba naŋ meɛrɛ. Noba mine maŋ tonɛɛ a meɛbo toma, ka ba mine meŋ maala bondirii korɔ noba naŋ tonɔ a meɛbo toma na bee a erɛ yɛlɛ mine a sonnɔ ba. A yi te yelyaga ane te yel-eree eŋɛŋ, te na baŋ soŋɛɛ a lantaapuoruu nembɛrɛ sonneba, a lantaapuoruu nembɛrɛ, ane a gbandige zukaareba ka ba moɔ̃ nimiri eŋnɛ a lantaapuoruu faŋa. Yɛ vɛŋ ka te nyɛ tɔnɔ na te naŋ maŋ nyɛ yi tonkpeɛne na ba naŋ maŋ tonɔ na eŋɛŋ, ane lɛ teŋ na baŋ wuli ba ane Yezu Krista naŋ ko a dɔbɔ ŋa “kyɔɔtaare” ka ba de sonnɔ te na ka te taa la nimipa ko ba.

A LANTAAPUORUU NEMBƐRƐ SONNEBA MAŊ ERƐƐ YƐLƐ A SONNƆ A LANTAAPUORUU

4. Bo yɛlɛ mine la ka a nembɛrɛ sonneba da maŋ erɛ a sonnɔ a lantaapuoruu a dɛndɛŋ Kristabiiri na saŋa?

⁴ A dɛndɛŋ Kristabiiri saŋa na, ba da maŋ kaa iree te yɔɔdɔbɔ mine ka ba e a nembɛrɛ sonneba. (1 Tim. 3:8) Aminekaŋaŋ ba na la da tonɔ a “noba sommo” toma ka Pɔɔl da sɛge a yɛlɛ aŋ be 1 Korinti 12:28. A nembɛrɛ sonneba da maŋ tonɛɛ toma mine a sonnɔ a lantaapuoruu ka lɛ vɛŋ ka a lantaapuoruu nembɛrɛ nyɛ wagre a toɔ̃ de wulibo korɔ a lantaapuoruu noba a kyɛ eŋnɛ ba faŋa. Aŋa mannoo poɔŋ, aminekaŋaŋ a nembɛrɛ sonneba da maŋ soŋeŋ baŋ leɛ sɛge a Sɛgre poɔ yɛlɛ eŋ gama yaga poɔŋ a ko a lantaapuoruu deme, bee a soŋ baŋ da boma na baŋ da maŋ de tonɔ neŋ a toma ŋa na.

5. Zenɛ ŋa, bo toma mine la ka a nembɛrɛ sonneba maŋ tonɔ a sonnɔ a lantaapuoruu?

⁵ Leɛteɛre nyɛ toma na mine a nembɛrɛ sonneba naŋ tonɔ ho lantaapuoruu poɔŋ a sonnɔ a lantaapuoruu. (1 Pit. 4:10) Aminekaŋaŋ ba na ko baŋ toma ka ba kaara a lantaapuoruu libi-yɛlɛ zu, a sɛgre yɛlɛ kyaare zie a lantaapuoruu naŋ seŋ ka ba moɔlɔ a duorisoŋ, a maŋ toɔle de gama ko a lantaapuoruu noba, a kaara boma ba naŋ maŋ de ŋmeɛrɛ yiele ane vidiori a lammozieŋ zu, a tonɔ a attendants toma, bee ka a Lammozie ziiri mineŋ wa sãã, baŋ soŋ a leɛ maalaa. A yɛlɛ ŋa zaa maŋ soŋɛɛ a lantaapuoruu baŋ e ba lammore soŋ zaa lɛ, a kyɛ tonɔ a naaŋ moɔloo toma velaa zaa. (1 Kor. 14:40) A nembɛrɛ sonneba maŋ toŋɛɛ toma a daagbuli lammore meŋ saŋa, a maŋ tere yelyaga meŋ. Ba maŋ baŋ kaa iree nembɛrɛ sonneba ka ba sonnɔ naaŋ moɔloo sugu na poɔ ba naŋ be na zukaara. Saŋa kaŋa meŋ, a lantaapuoruu neŋkpoŋ kaŋa neŋ a nembɛrɛ sonneba kaŋa na baŋ te puoree te yɔɔ kaŋa a emoo faŋa.

6. Bonso teŋ taa nimipa yaga zaa ko a nembɛrɛ sonneba ane tonkpeɛne na ba naŋ tonɔ na?

⁶ Sobuo ka toma na a nembɛrɛ sonneba naŋ tonɔ na na baŋ soŋ a lantaapuoruu? Te yɔɔpɔge Beberlyb naŋ be Bolivia paaloŋ yeleeŋ ka, “A nembɛrɛ sonneba maŋ soŋeŋ maŋ nyɛ tɔnɔ yi a lammore poɔŋ; N puoro baŋ bareka. Ba tonkpeɛne na maŋ vɛŋeŋ maŋ toɔ̃ yiele yiele, a iri yɛlɛ noɔre, a kyɛlle woŋ yelyaga, a kyɛ maŋ nyɛ tɔnɔ yi a vidiori na ba naŋ maŋ ŋmɛ a lammore saŋa na. Ba maŋ soŋeŋ ka gomeŋɛ bebe a lammore saŋa, a maŋ soŋ te yɔɔmine na meŋ naŋ koŋ baŋ wa a Lammozie na baŋ zeŋ dieŋ a kyɛ kyɛllɛ a lammo. Ka a lammoŋ wa baare, ba maŋ soŋeŋ a maale a Lammozie, a soŋ kaa a libie noba naŋ de eŋ a dagre poɔŋ, a kyɛ mɔɔ ka te nyɛ gama zaa te naŋ boɔrɔ. N puoro baŋ bareka yaga zaa!” Leslie naŋ be Colombia paaloŋ ka o serɛ e a lantaapuoruu neŋkpoŋ kaŋa yeleeŋ ka: “A fɛrɛɛŋ ka N serɛ nyɛ sommo yi a nembɛrɛ sonneba zie kyɛ na toɔ̃ toŋ o toma soŋ. Ka ba naŋ da ba kyebe, o toma da naŋ eɛ yaga te gaali, N puoro baŋ bareka yaga ane eŋnyagroŋ na ba naŋ maŋ de tonɔ ba toma na.” Te zaa puoree a nembɛrɛ sonneba bareka ane toma na zaa ba naŋ tonɔ na.—1 Tim. 3:13.

7. Wala teŋ na baŋ e wuli te nimipa ko a nembɛrɛ sonneba? (Kaa a foto meŋ.)

⁷ Aneazaa ka te taa la nimipa ko a nembɛrɛ sonneba ane ba tonkpeɛne na, kyɛ a Baabole yelko teŋ ka: “[Te] maŋ puoro bareka.” (Kol. 3:15) Te yɔɔdɔɔ Krzysztof eɛ lantaapuoruu neŋkpoŋ a be Finland paaloŋ, ŋaa oŋ maŋ e a wuli o nimipa, “N maŋ toɔlɛɛ card bee text message a sɛge Baabole sɛgre kaŋa yɛlɛ eŋ be, a sɛge yɛlɛ na a nembɛrɛ sonnɔ naŋ yel bee a e aŋ eŋ ma faŋa, ane ananso maŋ taa nimipa koo, ane toma na zaa o naŋ tonɔ na.” Pascal ane Jael naŋ be New Caledonia paaloŋ maŋ puoro korɛɛ a nembɛrɛ sonneba. Pascal yeleeŋ ka, “Beraayi ŋa, te maŋ puoroŋ yaga zaa a korɔ a nembɛrɛ sonneba ŋa, a puoro Jehoova bareka o naŋ de ba ko te, kyɛ puoro sɔrɔ ka o be ba zieŋ a sonnɔ ba.” Jehoova maŋ kyɛlle woŋee a puoro ŋa taa, ka lantaapuoruu zaa meŋ maŋ nyɛ tɔnɔ yi be.—2 Kor. 1:11.

A LANTAAPUORUU NEMBƐRƐ TONƐƐ TONKPEƐNE “YƐ POƆŊ”

8. Bonso ka Pɔɔl da sɛge ka o nembɛr-taaba na tonɛɛ tonkpeɛne? (1 Tɛsalonika 5:​12, 13)

⁸ A dɛndɛŋ Kristabiiri saŋa na, a lantaapuoruu nembɛrɛ da maŋ tonɛɛ tonkpeɛne korɔ a lantaapuoruu. (Kanne 1 Tɛsalonika 5:​12, 13; 1 Tim. 5:17) Ba da maŋ ‘kaarɛɛ’ a lantaapuoruu zu, a erɛ lammore korɔ a lantaapuoruu, a kyɛ derɛ gbɛɛ meŋ korɔ a lantaapuoruu. Ba da maŋ yi la nɔmmo meŋ poɔŋ a de kawane naŋ seŋ neŋ korɔ ba yɔɔmine ka ba toɔ̃ are ba sagediibu poɔŋ kpeɛŋaa. (1 Tɛs. 2:​11, 12; 2 Tim. 4:2) Kyɛ ba da naŋ maŋ tonɛɛ toma a kaara ba yideme zu, a kyɛ sonnɔ ba ka ba neŋ Jehoova niiloŋ e kpeɛŋaa.​—1 Tim. 3:​2, 4; Tit. 1:​6-9.

9. Bo toma mine la ka a lantaapuoruu nembɛrɛ maŋ tonɔ zenɛ ŋa?

⁹ Zenɛ ŋa, a lantaapuoruu nembɛrɛ maŋ taa la toma yaga ka ba toŋ. Ba maŋ moɔlɛɛ a duorisoŋ. (2 Tim. 4:5) Ba maŋ deɛ eŋnyagroŋ a tonɔ a naaŋ moɔloo toma, a maŋ sɛgre a naaŋ moɔloo toma zie na ba naŋ be na, a kyɛ maŋ wulo a lantaapuoruu noba lɛ baŋ na toɔ̃ toŋ a naaŋ moɔloo toma soŋ. Ba maŋ diree sɛrɛɛ nimimaaroŋ soriŋ a kyɛ ba erɛ nɔnne. Ka lantaapuoruu neɛ kaŋaŋ wa e yelfaa kaŋa, a lantaapuoruu nembɛrɛ maŋ mɔɔrɛɛ ba moɔbo zaa ka ba soŋ o soba ka o neŋ Jehoova leɛ taa niiloŋ naŋ soma. Ba maŋ lɛ mɔɔrɔŋ ka ba vɛŋ ka a lantaapuoruu e forifori. (1 Kor. 5:​12, 13; Gal. 6:1) Kyɛ a maaleŋ gaŋaazaa, a nembɛrɛ eɛ pekyeeneba. (1 Pit. 5:​1-3) Ba maŋ narɛɛ ba menne a tere Baabole poɔ yelyaga naŋ soma, a kyɛ mɔɔrɔ ba moɔbo zaa ka ba baŋ neɛzaa soŋ a lantaapuoruu poɔŋ. A lantaapuoruu nembɛrɛ mine meŋ maŋ sonnɛɛ te Lammoziiri meɛbo ane a leɛ maaloo toma, a maŋ sɛgrɛ yɛlɛ kyaara te lammobɛrɛ, a maŋ sonnɔ a Hospital Liaison Committees ane Patient Visitation Groups toma na meŋ, a kyɛ naŋ maŋ tonɔ toma mine meŋ a poɔ. A nembɛrɛ maŋ tonɛɛ tonkpeɛne yaga korɔ te!

10. Bo yɛlɛ mine la vɛŋ hoŋ taa nimipa ko a lantaapuoruu nembɛrɛ naŋ tonɔ tonkpeɛne yaga zaa na?

¹⁰ Jehoova daŋyel biŋeeŋ ka pekyeeneba na kaarɛɛ te zu soŋ zaa, te “koŋ lɛ zoro dabeɛ̃ kyɛbee a miine.” (Jer. 23:4) Te yɔɔpɔge Johanna naŋ be Finland paaloŋ da wa nyɛɛŋ ka a yɛlɛ ŋa sereŋ eɛ yelmeŋɛ, saŋa na o ma naŋ da wa beɛrɛ baaloŋ nimizeɛ kaŋa na. O yeleeŋ ka: “Aneazaa ka a da eɛ kpeɛŋaa ko ma ka N manne yɛlɛ naŋ dɔnnɔ ma na ko N taaba, kyɛ a lantaapuoruu neŋkpoŋ kaŋa maŋ da ba minli yaga da di la kannyiri ko ma, o da vɛŋɛɛŋ ka o ne ma laŋ puore, kyɛ oŋ eŋ ma faŋa ka Jehoova nɔŋ maŋ. N ba lɛ teɛre yɛlɛ na oŋ da yel na, kyɛ a da vɛŋɛɛŋ ka N eŋkyoɔre na baare. N sagedieŋ ka Jehoova la da toŋ o ka o wa soŋ ma saŋa na maŋ da boɔrɔ sommo na.” Sobuoŋ ka a nembɛrɛ naŋ be ho lantaapuoruu poɔŋ na soŋ ho meŋ?

11. Wala teŋ na baŋ e wuli nimipa ko a lantaapuoruu nembɛrɛ? (Kaa a foto meŋ.)

¹¹ Jehoova boɔrɔŋ ka te maŋ wulo nimipa yaga zaa korɔ a lantaapuoruu nembɛrɛ “a ba toma zuiŋ.” (1 Tɛs. 5:​12, 13) Henrietta meŋ naŋ be Finland paaloŋ yeleeŋ ka: “A lantaapuoruu nembɛrɛ maŋ yi la ba poɔ zaa a sonnɔ ba taaba, kyɛ lɛ ba wuli ka ba taa la wagre ane faŋa a gaŋ neɛzaa, bee bana yɛŋ ba tuoro yelkpeɛne ba zemmo poɔŋ. Saŋa kaŋa N maŋ yelko la a lantaapuoruu neŋkpoŋ kaŋa ka, ‘Ho eɛ lantaapuoruu neŋkpoŋ yɛlɛ naŋ soma yaga zaa. N deɛ yele korɔ boŋ ka ho baŋ.’” Te yɔɔpɔge kaŋa naŋ be Türkiyec paaloŋ ka o yuori di Sera yeleeŋ ka: “Aseŋ ka a lantaapuoruu nembɛrɛ maŋ nyɛrɛ faŋa emmo a toɔ̃ tonɔ ba toma na. Azuŋ te na baŋ sɛgɛɛ yɛlɛ eŋ card poɔŋ a ko ba, a toŋboɔle ba ka ba wa di bondirii te dieŋ, bee ka te neŋ ba laŋ gaa a naaŋ moɔloo.” A lantaapuoruu neŋkpoŋ kaŋa bebeŋ hoŋ taa nimipa yaga zaa koo ane tonkpeɛne na o naŋ tonɔ na bee? Maŋ wuluu ka ho taa la nimipa koo o tonkpeɛne na zuŋ.—1 Kor. 16:18.

GBANDIGE ZUKAAREBA MAŊ EŊNƐƐ A LANTAAPUORUU FAŊA

12. Nembobo ka Yezu da kaa iri ka ba eŋnɛ a lantaapuoruu faŋa a dɛndɛŋ Kristabiiri saŋa na? (1 Tɛsalonika 2:​7, 8)

¹² Yezu Krista da la ko la dɔbɔ mine toma ka ba maŋ sonnɔ a kyɛ eŋnɛ a lantaapuoruu faŋa. O da tu la a nembɛrɛ naŋ be Gyɛruzɛlɛm na eŋɛŋ, kyɛ toŋ Pɔɔl, Banabase, ane ba taaba mine ka ba te toŋ a gbandige zukaabo toma. (Tom. 11:22) Ba da iree ba meŋ ka ba tonɔ toma na a nembɛrɛ ane ba sonneba naŋ da tonɔ na: ka ba eŋnɛ a lantaapuoruu faŋa. (Tom. 15:40, 41) A dɔbɔ ŋa da maŋ de la yɛlɛ yaga iri sareka kyɛ na toɔ̃ toŋ a toma ŋa. Saŋa kaŋa, a gba da maŋ kyɛrɛɛ fẽẽ lɛ ka ba kɔŋ ba nyɔvoɛ.​—Kanne 1 Tɛsalonika 2:​7, 8.

13. Bo toma mine ka a gbandige zukaareba maŋ tonɔ?

¹³ A gbandige zukaareba maŋ tuuree sori yaga zaa. Ba mine maŋ tu la sori a gaa tɔɔre zaa ka ba te puore lantaapuoree naŋ bebe. Daa zaa, gbandige zukaara maŋ terɛɛ yelyag-tɛɛtɛɛ, a gaa te yɔɔmine deri a te puore ba a eŋ ba faŋa, a maŋ e paaneere lammo, lantaapuoruu nembɛrɛ lammo, ane a naaŋ moɔloo lammo. O maŋ narɛɛ o meŋɛ ko a yelyaga na zaa o naŋ taa, a kyɛ sɛgre yɛlɛ meŋ ko te gbandige lammore ane te lammobɛrɛ na. Ka ba naŋ wa erɛ paaneere sakuu, o maŋ eɛ a wulwulo kaŋa, o maŋ narɛɛ yɛlɛ ko a lammo naŋ e o yoŋ o neŋ a paaneere naŋ maŋ e na. Kyɛ Bɛɛtil maŋ kooŋ tonnimizeere mine meŋ ka o toŋ, saŋa kaŋa a maŋ fɛreŋ ka o toŋ a toma mine baare wieoŋ.

14. Bo yɛlɛ mine zuŋ teŋ taa nimipa yaga zaa a ko te gbandige zukaareba na ane tonkpeɛne na zaa ba naŋ tonɔ na?

¹⁴ Sobuo ka a lantaapuoruu maŋ nyɛ tɔnɔ yi tonkpeɛne na a gbandige zukaareba naŋ tonɔ na? Ŋaa ka te yɔɔdɔɔ kaŋa naŋ be Türkiye paaloŋ yelkyaare a gbandige zukaareba toma: “Ka ba naŋ wa puore te zaa, a maŋ eŋ maŋ faŋa maŋ de N wagre erɛ yɛlɛ sonnɔ N yɔɔmine. N baŋɛɛ gbandige zukaareba yaga, kyɛ ba kaŋa zaa daŋ ba vɛŋ maŋ nyɛ ka o toma gaalooŋ bee o ba boɔrɔ ka o yel yɛlɛ ko ma.” Johanna teŋ daŋ yel o yɛlɛ na neŋ gbandige zukaara kaŋa da laŋ gaa la a naaŋ moɔloo, kyɛ ba da ba pɔge noba ba deriŋ. O yeleeŋ ka, “N daŋ koŋ inni a lɛ daare na zaa. N yɔɔpɔgeba bayi da yi la zie na te naŋ be na, azuŋ ba vɔlaa da kpɛ maŋ yaga zaa. A gbandige zukaara da eŋ maŋ faŋa a soŋ ma maŋ nyɛ ka, pampana ŋa yɛŋ aminekaŋaŋ te koŋ baŋ laŋ kpeɛrɛ neŋ te yideme ane te zɔmenne, kyɛ a donpaalaa poɔŋ te na nyɛɛ a vuo ka te neŋ ba lanna wagre zaa.” Te yaga zie zaa meŋ taa la nimipa yaga zaa ko te gbandige zukaareba ane yɛlɛ ba naŋ e soŋ te.—Tom. 20:37–21:1.

15. (a) Aŋa lɛ na 3 Gyɔɔn 5-8 naŋ yel na, sobuoŋ teŋ na baŋ wuli nimipa a ko gbandige zukaareba? (Kaa a foto meŋ.) (b) Bonso aŋ seŋ ka te maŋ wulo nimipa korɔ bana naŋ tonɔ tonkpeɛne a lantaapuoruu poɔŋ na pɔgeba, ka sobuo teŋ na baŋ tu kyɛ e lɛ? (Kaa a daga ŋa, “Maŋ Teɛrɛ Te Yɔɔdɔba Naŋ Deɛrɛ Te Weɛ Na Pɔgeba Yɛlɛ.”)

¹⁵ A bitontona Gyɔɔn da eŋ la Gaayus faŋa ka o maŋ wulo saannoŋ korɔ dɔbɔ na naŋ da maŋ wa ka ba wa eŋ a lantaapuoruu faŋa na. O da yelkooŋ ka, “e aneɛ kyɛ bare ba sori ne lɛ naŋ seŋ Naaŋmen zie.” (Kanne 3 Gyɔɔn 5-8.) Sori na kaŋa teŋ na baŋ tu kyɛ e lɛ la ka, teŋ na maŋ tonɔ boɔlɔ a gbandige zukaara ka o wa te die a wa di bondirii. Sori na kaŋa teŋ na baŋ lɛ tu kyɛ e lɛ la ka, ka o naŋ wa wa ka o puore te lantaapuoruu na, te maŋ de te menne eŋ a naaŋ moɔloo yelsɛgraa o naŋ maŋ e na poɔŋ. Te yɔɔpɔge Leslie teŋ daŋ yel o yɛlɛ na maŋ lɛ tu la so yobo a kyɛ lɛ wuli o nimipa. O yeleeŋ ka, “N maŋ puoroŋ ka Jehoova soŋ ba ka ba nyɛ boma yɛlɛ naŋ ferɛ ba. N neŋ N serɛ maŋ sɛge la lɛtare, a yel lɛ na ba waabo naŋ maŋ eŋ te faŋa yaga zaa a ko ba.” Teɛre baŋ ka, a gbandige zukaareba meŋ maŋ baleŋ, a meŋ maŋ tuoro yelkpeɛne ba zemmo poɔŋ. Saŋa kaŋa, ba meŋ maŋ bɛŋ, teɛroŋ gyɛre maŋ baŋ kpɛ baŋ, ba enne meŋ gba maŋ toɔ̃ kyoɔreŋ. Aminekaŋaŋ, ka hooŋ yel yelbie naŋ toɔrɔ sukyiri koo, bee ka hooŋ koo kyɔɔta-fẽẽ kaŋa, a na baŋ eɛ a gbandige zukaara puoro noɔre iribo!—Yeng. 12:25.

A FƐRƐŊ KA TE TAA DƆBƆ NAŊ E “KYƆƆTAARE” A LANTAAPUORUU POƆŊ

16. Aŋa lɛ Yeng Yelibie 3:27 naŋ yel na, bo soorebie la ka te yɔɔdɔbɔ na baŋ soore ba menne?

¹⁶ A donɛɛ lombori zaa, a ferɛŋ ka te nyɛ dɔbɔ naŋ na tonɔ tonkpeɛne a lantaapuoruu poɔŋ. Ka hooŋ wa e te yɔɔdɔɔ kaŋa naŋ de suobu, ka lɛ ho taa la a kpeɛ̃o ka ho soŋ a sori ŋaŋ bee? (Kanne Yeng Yelibie 3:27.) Ho mɔɔrɔŋ ka ho nyɛ nimitɔɔre gaabo a wa leɛ a lantaapuoruu nembɛrɛ sonnɔ kaŋa bee? Ka hooŋ wa e a nembɛrɛ sonnɔ kaŋa, ka lɛ ho mɔɔrɔŋ ka ho wa leɛ a lantaapuoruu neŋkpoŋ kaŋa bee?d Ka lɛ ho na baŋ sɛgrɛɛ yɛlɛ ho zemmo poɔŋ ka lɛ vɛŋ ka ho toɔ̃ fiili a Naaloŋ Duore-enneba Sakuu fɔɔm na bee? A sakuu ŋa na soŋ boŋ a kyɛ ko bo wulibo naŋ seŋ neŋ ka Yezu de bo toŋ neŋ toma yaga. Ka hooŋ wa teɛrɛ ka ho ba seŋ neŋ, puore sɔre Jehoova sommo. Sɔroo ka o ko bo o vooroŋ soŋ na ka ho toɔ̃ toŋ toma zaa baŋ na de eŋ ho nuuriŋ.—Luk. 11:13; Tom. 20:28.

17. A dɔbɔ te naŋ taa baŋ e “kyɔɔtaare” a lantaapuoruu poɔŋ na, boŋ ka lɛ wulo te a kyaare te Naa Yezu Krista?

¹⁷ Tonkpeɛne na te yɔɔdɔbɔ na Yezu naŋ kaa iri baŋ e “kyɔɔtaare” a lantaapuoruu poɔŋ naŋ tonɔ na wuleeŋ ka, Yezu la derɛ te weɛ a bebi-baaree ŋa poɔŋ. (Mat. 28:20) Te niŋe paɛŋ yaga zaa te naŋ taa Naa naŋ taa nɔmmo, a yuoro o nu, a baŋ te yelfɛree zaa, a kyɛ ko te dɔbɔ ka ba kaara te zu. Azuŋ maŋ bɔ soe hoŋ na baŋ tu a kyɛ wulo nimipa korɔ a dɔbɔ ŋa naŋ tonɔ tonkpeɛne a lantaapuoruu poɔŋ na. Daŋ ta wa inne ka ho puore Jehoova bareka, bonso, O zie ka “mennoŋ kyɔɔtaare teroo zaa ane kyɔɔtaa zaa naŋ soma” yi.—Gyi. 1:17.