Bonso Ka Politics Yɛlɛ Waana Neŋ Wɛltaa Noba Kpakyagaŋ Lɛ?​—Bo Ka A Baabole Yel Kyaare A Yɛlɛ Ŋa?

A yi a donɛɛ lombori zaa, politics yɛlɛ wanɛɛ wɛltaa noba kpakyagaŋ paalonne yaga poɔŋ. Yuoni 2022, tomazie kaŋa baŋ boɔlɔ Pew Research Center da peɛrɛɛ yɛlɛ naŋ erɛ paalonne mine poɔŋ. Ba yeleeŋ ka “a yi paalonne naŋ ta 19 poɔŋ, gbɛɛ yaga, dɔba ane pɔgeba naŋ ta ŋa 65% neŋ ba taaba naŋ be paati yobo maŋ taaɛ yelbawoŋtaa ba kpakyagaŋ.”

A yi zie na hoŋ be na, ho meŋ nyɛɛŋ ka politics yɛlɛ waana neŋ la wɛltaa noba kpakyagaŋ yaga zaa bee? Bonso ka lɛ erɛ? A yɛlɛ ŋa daŋ na baareŋ bee? Te nyɛ lɛ a Baabole naŋ yeli.

Gyogri naŋ waana neŋ wɛltaa

A Baabole yeleeŋ ka te wagre ŋa la “a bebi-baaree saŋa.” A Baabole lɛ vɛŋɛɛŋ aŋ pɛle ka te saŋa ŋaŋ, noba na taaɛ gyogri naŋ na vɛŋ ka a e kpeɛŋaa ka noɔreyeni be ba neŋ ba taaba kpakyagaŋ.

• “A bebi-baaree saŋa, zie na maaleŋ eɛ kpeɛŋaa yaga zaa. Nensaaleba na eɛ ba menne nɔŋneba, . . . ho ne ba koŋ baŋ laŋnoɔre.”​—2 Timoti 3:1-3.

Aneazaa ka noba mɔɔrɔŋ yaga zaa ka ba soŋ ba gɔmenantere ka ba erɛ yɛlɛ soŋ zaa, kyɛ lɛ ba toɔ̃ nyɛrɛ eebo. Ka nobaŋ ba taa teɛroŋ yeni, ba daaŋ koŋ toɔ̃ laŋ toŋ toma a maale yelzaa. Yɛlɛ na naŋ erɛ na vɛŋɛɛŋ teŋ baŋ peɛlaaŋ ka yɛlɛ na a Baabole naŋ yeli takoreŋ saŋa na eɛ yelmeŋɛ.

• “Nensaalaa maŋ di [la] naaŋ o tɔ zuŋ a peroo.”​—Ikilisiasitiz 8:9.

Kyɛ, a Baabole vɛŋɛɛŋ teŋ baŋ ka a yɛlɛ ŋa na baareŋ. A Baabole wuli teŋ ka, gɔmenante kaŋa bebeŋ a taa wedeɛrɛ kaŋa naŋ taa kpeɛ̃o, o na baŋ iree yɛlɛ na zaa naŋ vɛŋ ka nensaaleba dire dɔgɛɛ zenɛ ŋa.

Wedeɛrɛ naŋ taa noba yɛlɛŋ

A Baabole wuli teŋ wedeɛrɛ kaŋa naŋ taa kpeɛ̃o a na baŋ iri nensaaleba yelwonii zaa bare: Ona la Yezu Krista. Yezu taaɛ a kpeɛ̃o, apoɔsori, ane a boɔbo ka o soŋ nensaaleba ka ba taa noɔreyeni ane emmaaroŋ ba kpakyagaŋ.

• “O bebie na poɔŋ, sontuuribo yɛlɛ na maaleŋ soŋ zaa. Maaroŋ na bebeŋ yaga zaa.”​—Yieme 72:7.

• ‘A paalonne noba zaa na tonɔ korooŋ.’​—Yieme 72:11.

Yezu eɛ wedeɛrɛ naŋ soma yaga zaa, bonso o taaɛ noba yɛlɛŋ, a kyɛ lɛ boɔrɔ ka o soŋ noba meŋ. Yezu eŋɛ nyagraŋ ka o soŋ noba naŋ tuoro daŋkyagre.

• “O na faa la nandaaneba naŋ kono boɔrɔ sommo na, O na deɛ la nembaalba meŋ ane noba na naŋ ba taa sonnɔ na. O na zoe nembaalba ane nandaaneba nembao, O na faa la nandaaneba meŋ nyɔvoɛ. O na deɛ baŋ yi dɔgrebo ane kpaŋkpaŋkpeɛ̃o toma poɔŋ, Ba zĩĩ na eɛ tegroŋ yaga o nimieŋ.”​—Yieme 72:12-14.

Zanne yɛlɛ yaga a kyaare Naaŋmen Naaloŋ na. O eɛ gɔmenante naŋ be sazuŋ, Yezu la Naaŋmen Naaloŋ na wedeɛrɛ. Zanne nyɛ maaloo hoŋ na baŋ nyɛ yi Naaŋmen Naaloŋ na poɔŋ, ane lɛ hoŋ na baŋ e a de wuli ka ho arɛɛ a naaloŋ puoriŋ.

• Kaa a vidio ŋa, Bo La Naaŋmen Naaloŋ?

• Kanne a yelzu ŋa meŋ “God’s Kingdom​—A Government With No Corruption.”