Tɔglɔ Jehoova Sigrimennoŋ Gyogo Na

1. Bonso ka Jehoova sigrimennoŋ na yɛlɛ e bo seɛlee?

KA HOOŊ kaa gɔmenantere nembɛrɛ naŋ bebe zenɛ ŋa, ho na baŋ yeliŋ ka ba taaɛ sigrimennoŋ gyogo bee? Aminekaŋaŋ, ho na iree a noɔre ka ai. Kyɛ, Jehoova la a kpeɛ̃o zaa daana, kyɛ o sigree o meŋɛ. (Yiem. 113:​5-8) Neɛzaa kyebe a sigri o meŋɛ aŋa Jehoova. Jehoova daaŋ ba e yelyenaa gba naŋ wuli ka o zɛgrɛɛ o meŋɛ. Te na zannɛɛ gyog-sonne anaare mine Jehoova naŋ taa. Te na nyɛɛ lɛ na ana gyogri na naŋ wuli ka o sigree o meŋɛ. Te na zannɛɛ lɛ na Yezu naŋ tɔgle o Saa sigrimennoŋ gyogo na. Ka teneeŋ zanne a yɛlɛ ŋa, a na soŋ teŋ ka te tage peɛle Jehoova yaga, a lɛ eŋ te faŋa ka te maaleŋ sigri te menne yaga zaa.

A MAŊ EƐ MƆLƆ KA TE GAA JEHOOVA NIMITƆƆRE

2. Bo yelnimizeɛ ka Yieme 62:8 wulo te a kyaare Jehoova? (Kaa a foto.)

² A maŋ eɛ mɔlɔ ka ho gaa noba naŋ zɛgrɛ ba menne zie ka ho ne ba te di dama bee? Ai. Noba naŋ zɛgrɛ ba menne maŋ teɛreŋ ka ba naŋ seɛ ba taaba, azuŋ ba ba maŋ wulo ba taaba nimimaaroŋ. Lɛ maŋ vɛŋeŋ aŋ e kpeɛŋaa ka noba tage peɛle ba. Noba mine ba maŋ boɔrɔ ka ba be ba zieŋ togitogi. Jehoova yɛŋ ba waa lɛ. Jehoova sigree o meŋɛ, azuŋ o ko teŋ apoɔsori ka te puori sɔroo a manne yel la yelzaa naŋ fɛrɛ te koo. (Kanne Yieme 62:8.) Bi-saa naŋ taa nɔmmo maŋ moɔrɔŋ ka o baŋ yɛlɛ naŋ fɛrɛ o biiri. Lɛ meŋ la ka Jehoova maŋ e siri ka o kyɛlle o puorebiiri puori sɔroo. Ka hooŋ kaa a Baabole poɔŋ, ho na nyɛŋ ka Jehoova vɛŋɛɛŋ baŋ sɛge noba mine puori sɔroo eŋ be. Lɛ wuleeŋ ka Jehoova boɔrɔŋ ka te maŋ puoro sɔroo. (Joos. 10:​12-14; 1 Saa. 1:​10-18) Kyɛ, te de ka te ŋmɛɛ gbɛɛ mine ka lɛ vɛŋ teŋ teɛre ka te ba seŋ neŋ ka te puori sɔre Jehoova, wala aŋ seŋ ka te e?

3. Bonso teŋ na baŋ sagedi ka Jehoova boɔrɔŋ ka te maŋ puoro sɔroo wagre zaa?

³ Te na baŋ puori sɔrɛɛ Jehoova haali ka teneeŋ teɛre ka o ba lɛ nɔŋ te yɛlɛ. Yezu da terɛɛ yelmannaa kaŋa a kyaare bidɔɔ kaŋa naŋ zagre o saa noɔre a kyɛ yi a yiriŋ. Saŋa na a bidɔɔ naŋ da te zanne yɛŋ a leɛre o eebo a boɔrɔ ka o leɛ wa yiri na, o da teɛrɛɛŋ ka o ba seŋ neŋ ka o saa leɛ de o wa poɔ o biiri na poɔŋ. Wala ka o saa na da e o yɛlɛ saŋa na oŋ nyɛ a bie naŋ leɛ waana yiri na? Saŋa na a bi-saa naŋ wa nyɛ o na, o da “iri tuori nyɔge o la a kori, kyɛ moore o.” (Luk. 15:​17-20) Yezu da yeleeŋ ka lɛ ka Jehoova waa. Ka noba sukyiri naŋ kyɛre, kyɛbee noba naŋ e yelfaare aŋ dɔɔnɔ ba yaga zaaŋ wa puori sɔre Jehoova, o maŋ lonneŋ wieoŋ a kyɛlle ba puori sɔroo na. Jehoova naŋ sigri o meŋɛ zuŋ, o maŋ mãã la o meŋɛ a kyɛllɛ yɛlɛ na zaa baŋ yele na. (Laad. 3:​19, 20) Aŋa lɛ na a bi-saa naŋ be Yezu yelmannaa na poɔŋ naŋ zo tuore o bidɔɔ na, Jehoova meŋ maŋ zoe te nembaaloŋ a dii te sukyie, a kyɛ lɛ vɛŋ teŋ baŋ ka o sereŋ nɔŋ teŋ. (Aiz. 57:15) Sobuo ka Jehoova maŋ tu a e lɛ zenɛ? Gbɛɛ yaga o maŋ tu la a lantaapuoruu nembɛrɛ, te booree deme naŋ puoro Jehoova, ane te Kristabitaaba zieŋ a de sommo naŋ seŋ neŋ ko te. (Gyi. 5:​14, 15) Jehoova boɔrɔŋ ka te tage peɛloo, azuŋ oŋ maŋ erɛ a yɛlɛ ama korɔ te.

4. Wala teŋ e baŋ ka a da maŋ eɛ mɔlɔ ka noba wa Yezu zie?

⁴ Yezu da tɔglɛɛ o Saa. Yezu da sigree o meŋɛ aŋa o Saa. Saŋa na Yezu naŋ da be a teŋɛzuŋ na, a da maŋ eɛ mɔlɔ ka noba wa o zie. Ba da ba maŋ zoro dabeɛ̃ ka ba sooroo soorebie. (Mak. 4:​10, 11) Ka Yezuŋ wa soore ba ka ba wuli teɛroŋ baŋ taa kyaare yelkaŋa, ba da maŋ yi la ba poɔ zaa a manne yɛlɛ baŋ teɛre koo. (Mat. 16:​13-16) Ka banaŋ wa ŋmɛ gbɛɛ meŋ, ba da ba maŋ zoro dabeɛ̃ ka Yezu suuri na iriŋ. Ba da baŋɛɛŋ ka Yezu eɛ nimimaaroŋ, kannyiri, ane neɛ naŋ zoro noba nembaaloŋ. (Mat. 17:​24-27) Yezu naŋ da tɔglɔ o Saa yelzaa poɔŋ na zuŋ, a da vɛŋɛɛŋ ka o potuuribo na wa baŋ Jehoova velaa zaa. (Gyn. 14:9) A puoruu wedeɛreba naŋ da bebe ana saŋa na da zɛgrɛɛ ba menne, a e nimikuonii deme naŋ ba nɔŋ ka ba peɛlɛ noba. Jehoova yɛŋ ba waa lɛ fẽẽ zaa. Jehoova sigree o meŋɛ, azuŋ a maŋ eɛ mɔlɔ ka te gaa o nimitɔɔre.

5. Sobuo ka sigrimennoŋ na baŋ vɛŋ ka a e mɔlɔ ka noba maŋ wa te zie?

⁵ Wala teŋ na baŋ e a tɔglɔ Jehoova? Ka teneeŋ sigri te menne yaga zaa, a na vɛŋeŋ ka a e mɔlɔ ka noba maŋ wa te zie. Ka teneeŋ ba taa sigrimennoŋ gyogo, te na zɛgrɛɛ te menne, a erɛ te taaba nyuuri, a maŋ zagre ka te di suuri ko ba meŋ. Noba ba maŋ nɔŋ ka ba peɛlɛ noba naŋ taa a gyogri ŋa. Kyɛ, sigrimennoŋ na baŋ soŋ teŋ ka te dire kannyiri korɔ taa, a dire suuri korɔ taa, a lɛ wulo taa nimimaaroŋ meŋ. Noba maŋ boɔrɔŋ ka ba peɛlɛ noba naŋ taa a gyogri ŋa. (Kol. 3:​12-14) A eɛ nimizeɛ ka a lantaapuoruu nembɛrɛ vɛŋ ka a e mɔlɔ ka noba maŋ toɔ̃ wa ba zie. Lɛ wuleeŋ ka aseŋ ka ba neŋ ba yɔɔmine maŋ laŋ erɛ yɛlɛ. Azuŋ, ka a nembɛrɛŋ na toɔ̃ yɛŋ, a na somaŋ yaga zaa ka ba maŋ wa a lammozie a gaŋ baŋ na maŋ kɔnɛt a lammo. Ka ba naŋ wa nyɛ vuo meŋ, ba neŋ ba yɔɔmine na baŋ laŋ toŋɛɛ a die neŋ die naaŋ moɔloo toma. A yɛlɛ ama na soŋɛɛ te yɔɔmine na ka ba baŋ a lantaapuoruu nembɛrɛ velaa. Azuŋ, ka ba naŋ wa boɔrɔ sommo, a na eɛ mɔlɔ ka ba gaa ba zie.

JEHOOVA YƐLƐ BA E TUO

6-7. Manne yɛlɛ mine naŋ wuli ka Jehoova da maŋ leɛrɛɛ o teɛroŋ saŋa na o puorebiiri naŋ wa sɔroo ka o e yɛlɛ mine.

⁶ A ba maŋ e mɔlɔ ka ho neŋ neɛ naŋ zɛgrɛ o meŋɛ laŋ erɛ yɛlɛ. Bonso ba yɛlɛ maŋ eɛ tuo. Jehoova yeltaree zaa maŋ toriŋ. O ba ŋmeɛrɛ gbɛɛ meŋ. Kyɛ, Jehoova naŋ sigri o meŋɛ zuŋ, o ba maŋ nyɔge yelkaŋa a tage a yɛlɛ lɛɛŋ a ba deɛ ka o bare. Ka a naŋ wa fɛre, o maŋ leɛrɛɛ o teɛroŋ. Aŋa mannoo poɔŋ, Moosis kpeɛma Miiriyam neŋ Eeroŋ da piili ŋmoonɔ kyaarɛɛ Moosis. Jehoova la da kaa iri Moosis oŋ derɛ a Izerayɛl biiri weɛ. Lɛ wuleeŋ ka Jehoova la ka Miiriyam da ba wulo gyeremɛ. Jehoova suuri da iree Miiriyam zuŋ, ka lɛ vɛŋ oŋ emoo kɔŋkɔnne baaloŋ. Eeroŋ da arɛɛ Miiriyam gbɛbɔgriŋ a sɔre Moosis sudi. Moosis meŋ da gaaɛ Jehoova nimitɔɔre a sɔroo ka o vɛŋ ka Miiriyam nyɛ laafeɛ. Wala ka Naaŋmen da e? Ka Naaŋmeneŋ da zɛgrɛ o meŋɛ, o da naŋ yeliŋ ka yelzaa kyebe ka neɛ na yeli bee a e, ka lɛ vɛŋ ka o leɛre o teɛroŋ. Kyɛ, Naaŋmen naŋ sigri o meŋɛ zuŋ, o da barɛɛ a yɛlɛ, a kyɛ saŋ Miiriyam baaloŋ na koo.—Sor. 12:​1-15.

⁷ Lɛ na Jehoova naŋ da kyɛlle woŋ Naa Hezekaiya puori sɔroo na wuleeŋ ka o sigree o meŋɛ. Jehoova da tu la o daŋyele Aizeeya zieŋ a yelko Hezekaiya ka o na kpiŋ. Kyɛ, Hezekaiya da koŋeeŋ a sɔre Jehoova ka o saŋ o baaloŋ na. Wala ka Jehoova da e? O da de la yuomo 15 a poɔ Hezekaiya nyɔvore poɔŋ. (2 Nam. 20:​1, 5, 6) Jehoova naŋ sigri o meŋɛ zuŋ, o da wulee Hezekaiya nimibaaloŋ, a da leɛre teɛroŋ na oŋ taa kyaaroo na meŋ.

8. Bo yɛlɛ mine la wuli ka Yezu yɛlɛ ba e tuo? (Marko 3:​1-6)

⁸ Yezu tɔglɛɛ o Saa. Saŋa na Yezu naŋ da be a teŋɛzuŋ na, ka onaŋ wa nyɛ vuo ka o soŋ neɛ kaŋa, o da maŋ mɔɔŋ a soŋ o soba. Aŋa mannoo poɔŋ, a puoruu wedeɛreba naŋ da ba nɔŋ Yezu yɛlɛ na sukyie da koeŋ haali. Azuŋ, ba da ba maŋ sage ka Yezu saŋna noba baaloŋ a Pɛnnoo Bebiri. Kyɛ, Yezu da maŋ eɛ lɛ. (Kanne Marko 3:​1-6.) Yezu la a lantaapuoruu zusoba. Lɛ na oŋ kaara a lantaapuoruu zu na wuleeŋ ka o yɛlɛ ba e tuo. Ka a lantaapuoruu neɛ kaŋaŋ wa e yelfaa naŋ e nimizeɛ, Yezu maŋ kooŋ vuo ka o leɛre o eebo.—Yel. 2:​2-5.

9. Sobuo teŋ na baŋ tu te teɛroŋ ane te yel-eree poɔŋ a wuli ka te yɛlɛ ba e tuo? (Kaa a fotori.)

⁹ Wala teŋ na baŋ e a tɔglɔ Jehoova? Aseŋ ka te meŋ maŋ tu te yel-eree neŋ te teɛrɛ poɔŋ a wuli ka te yɛlɛ ba e tuo. Lɛ na wuliŋ ka te tɔglɛɛ Jehoova. (Gyi. 3:17) Aŋa mannoo poɔŋ, bidɔgreba na baŋ tɔglɛɛ Jehoova a sori ŋa poɔŋ. Yelmeŋɛ la, a ba seŋ ka ba bare ba biiri ka ba erɛ ba boɔbo. Kyɛ, bidɔgreba naŋ tɔglɔ Jehoova ba maŋ fɛrɛ ba biiri ka ba erɛ yɛlɛ naŋ gaŋ ba faŋa. Ka hooŋ kanne Munpiilee 33:​12-14, ho na nyɛŋ ka Gyekɔb da eɛ ewuli soŋ yaga a yɛlɛ ŋa poɔŋ. Bidɔgreba yɛlɛ naŋ ba e tuo ba maŋ de ba biiri na manna neŋ taa sori naŋ ba seŋ neŋ poɔŋ. A ba seŋ ka a lantaapuoruu nembɛrɛ vɛŋ ka ba yɛlɛ e tuo. Ka ba naŋ wa erɛ lammo kaŋa ka ba kpoŋ zie zaa sage ka ba de gbɛre kaŋa naŋ ba sãã Baabole sowuli zaa, a na somaŋ ka bana na naŋ kyɛre na sage ba gbɛ-de na. (1 Tim. 3:​2, 3) Ka te neŋ neɛ kaŋaŋ ba wa laŋ teɛroŋ, a na somaŋ yaga zaa ka te maŋ moɔrɔ ka te baŋ bon nanso a soba naŋ teɛrɛ yɛlɛ lɛ, a moɔrɔ ka te woŋ o yɛlɛ na muni. (Uro. 14:1) Yelmeŋɛ zaa, a ba seŋ ka tage kaŋ tage be a lantaapuoruu noba kpakyagaŋ, kyɛ aseŋ ka te taa taa neŋ sumaaroŋ.—Fil. 4:5.

JEHOOVA EƐ KANNYIRI SOBA

10. Wala ka Jehoova e a de wuli ka o eɛ kannyiri soba?

¹⁰ Ka a naŋ wa fɛre ka zɛgemeŋɛ soba di kannyiri kyɛlle o taaba, o vooroŋ zaaŋ maŋ ŋmaara. Zɛgemeŋɛ deme ba taa kannyiri fẽẽ zaa. Kyɛ, lɛ naane ka Jehoova waa. Ka ba naŋ yelka kannyiri zaa soba yɛŋ, Jehoova la. Aŋa mannoo poɔŋ, Noowa saŋa na, Jehoova da di la kannyiri aŋa yuomo 120 sɛre kyɛ sããna a neŋfaare. (Mun. 6:3) Lɛ da ko la Noowa vuo oŋ guoli o biiri na baŋ baa, ka o ne ba neŋ ba pɔgeba zaa soŋ maale a daga. A puoriŋ, Jehoova maleke kaŋa neŋ Aboraham da di la dama. Aboraham da soorɛɛ a maleke soorebie mine naŋ tutaa a kyaare Sodom neŋ Gomora sããmmo yɛlɛ. Zɛgemeŋɛ soba da naŋ deɛ yelko la Aboraham ka, ‘Bare yɛlɛ na hoŋ yɔ soorɔ ma na. Ho teɛre ka N eɛ damboli naŋ ba baŋ yɛlɛ naŋ seŋ ka N e bee?’ Kyɛ, a maleke da tɔglɛɛ Jehoova, a di kannyiri a iri Aboraham soorebie na zaa nɔɛ.—Mun. 18:​20-33.

11. Aŋa lɛ na 2 Piita 3:9 naŋ wuli na, bonso ka Jehoova dire kannyiri te wagre ŋa poɔŋ?

¹¹ Jehoova yi la sigrimennoŋ poɔŋ a dire kannyiri te wagre ŋa meŋ poɔŋ. Jehoova narɛɛ bebiri na oŋ na sãã a donfaa ŋa biŋ. Kyɛ, o diree kannyiri ka ana bebiri na ta. Bonso ka Jehoova erɛ lɛ? A Baabole yeleeŋ ka, o “ba boɔrɔ ka neɛzaa wɛ, kyɛ O boɔrɔ la ka neɛzaa leɛ o eebo.” (Kanne 2 Piita 3:9.) Bo maalooŋ yi Jehoova kannyiri diibu na poɔŋ wa? A yuo la sori ko noba turituri baŋ zanne o yɛlɛ, a tage peɛloo. Te taaɛ teɛretɔ meŋ ka noba turituri mine meŋ na eɛ lɛ neŋ o zu. Kyɛ, kannyiri na Jehoova naŋ taa ko a donfaa ŋa na baareŋ. Jehoova nɔŋɛɛ nensaaleba, kyɛ o koŋ zeŋ kaara ka noba erɛ yelzaa ba naŋ boɔrɔ. Bebiri kaŋa o na sãã la neŋfaare zaa bare.—Hab. 2:3.

12. Sobuo ka Yezu tɔglɔ Jehoova kannyiri diibu na?

¹² Yezu tɔglɛɛ o Saa. Yuomo turituri la ŋa ka Yezu tɔglɔ Jehoova kannyiri diibu na. Yezu nimiriŋ la ka Setaana dɛge Jehoova neŋ nensaaleba naŋ e yelmeŋɛ deme zaa yoe. (Mun. 3:​4, 5; Joob 1:11; Yel. 12:10) Yezu la de la o nimiri a nyɛ dɔgɛɛ boorɔ zaa nensaaleba naŋ dire. Nɔkpeɛne zaa kyebe ka Yezu eŋɛ nyagraŋ yaga ka o ‘sãã a Dɛɛvul toma bare.’ (1 Gyn. 3:8) Yezu di la kannyiri a kyɛnlɛ bebiri na Jehoova naŋ na yelkoo ka o sãã a Dɛɛvul toma zaa kpɛlɛŋkpɛlɛŋ. Boŋ soŋ Yezu oŋ dire kannyiri? Yel na kaŋa naŋ somoo la sigrimennoŋ. Yezu baŋɛɛŋ ka Jehoova la neɛ naŋ na baŋ wuli wagre naŋ seŋ neŋ ka o sãã a donfaa ŋa.—Tom. 1:7.

13. Wala ka Yezu da e a de wuli ka o taaɛ kannyiri ko o bitontonee na? Bonso oŋ da e lɛ?

¹³ Saŋa na Yezu naŋ da be a teŋɛzuŋ na, o da diree kannyiri korɔ o bitontonee na. Aŋa mannoo poɔŋ, gbɛɛ yaga a bitontonee da maŋ zɔɔrɛɛ taa a kyaare neɛ naŋ la ba poɔ neŋkpoŋ. Lɛ da ba vɛŋ ka Yezu eŋɛ kyoɔre oŋ teɛre ka ba daaŋ koŋ leɛre ba eebo zaa. Yezu da naŋ diree kannyiri korɔ ba. (Luk. 9:46; 22:​24-27) O da taaɛ sagediibu ka wagre naŋ gɛrɛ poɔŋ na, ba na leɛrɛɛ ba eebo. Te buo soba la a ba maŋ ŋmɛ gbɛre a kyaare yelyenaa kaŋa gbɛɛ yaga? Ho ba nyɛ ka aseŋ ka te kyillɛ te naŋ taa Naa naŋ sigri o meŋɛ a maŋ dire kannyiri naŋ kaara te zu bee?

14. Boŋ na baŋ soŋ te ka te maaleŋ dire kannyiri?

¹⁴ Wala teŋ na baŋ e a tɔglɔ Jehoova? Ka teneeŋ moɔrɔ ka te maŋ teɛrɛ yɛlɛ aŋa Krista, a na soŋ teŋ ka te maŋ teɛrɛ a kyɛ erɛ yɛlɛ aŋa Jehoova. (1 Kor. 2:16) Boŋ na baŋ soŋ te ka te maŋ teɛrɛ yɛlɛ aŋa Krista? A noɔre iribo naŋ e ŋmaaŋmaa la ka, aseŋ ka te maŋ kanna a Duorisoŋ Gama na. Ka hooŋ wa kannaa, maŋ mãã ho meŋɛ a teɛre a yɛlɛ gaa tɔɔre a nyɛ lɛ na Yezu naŋ maŋ teɛrɛ yɛlɛ sigrimennoŋ soriŋ. A na fɛreŋ ka te maŋ puori sɔre Jehoova ka o soŋ te ka te taa sigrimennoŋ ane kannyiri aŋa Yezu. Ka teneeŋ maŋ teɛrɛ yɛlɛ aŋa Krista, te na erɛɛ yɛlɛ aŋa Jehoova. A na vɛŋeŋ ka te taa kannyiri kpoŋ ko te menne ane te Kristabitaaba.—Mat. 18:​26-30, 35.

JEHOOVA NƆŊƐƐ SIGRIMEŊƐ DEME

15. Manne yɛlɛ mine naŋ wuli ka Jehoova nɔŋɛɛ sigrimeŋɛ deme. (Yieme 138:6)

¹⁵ Kanne Yieme 138:6. Teɛre a yɛlɛ ŋa soŋ a nyɛ. Jehoova la neŋtegroŋ a gaŋ neɛ la neɛzaa naŋ be a aŋdonnɛɛŋ. Kyɛ, a Baabole yeleeŋ ka o teɛroŋ maŋ be la sigrimeŋɛ deme zieŋ. Te manne sigrimeŋɛ deme mine Jehoova naŋ nɔŋ ba yɛlɛ bawala mine yɛlɛ. Ba mine gba, ka hooŋ ba kaa soŋ ho koŋ baŋ ka ba yɛlɛ be la a Baabole poɔŋ, kyɛ Jehoova vɛŋɛɛŋ baŋ sɛgaa eŋ be. Jehoova da de la o vooroŋ soŋ na soŋ Moosis oŋ sɛge toŋtonɔ kaŋa baŋ boɔlɔ Deebora yɛlɛ eŋ a Baabole poɔŋ. A toŋtonɔ ŋa da bebeŋ Aziki neŋ Gyekɔb saŋa na. O da de la yuomo aŋa 125 a toŋ ko Aziki neŋ Gyekɔb yideme zaa. A Baabole ba manne yɛlɛ yaga a kyaaroo, kyɛ Jehoova vɛŋɛɛŋ ka Moosis sɛge ka o da eɛ pɔge ba naŋ nɔŋ o yɛlɛ yaga zaa. (Mun. 24:59; 35:8) Yuomo yaga mine puoriŋ, Jehoova da kaa iree pekyeenɛ kaŋa baŋ boɔlɔ Deevid ka o e a Izerayɛl paaloŋ naa. (2 Saa. 22:​1, 36) Saŋa na baŋ wa dɔge Yezu na, pekyeeneba mine da be la zie kaŋa naŋ peɛle Bɛtelɛhɛm. A da ba kɔɔre kyɛ ka Jehoova da toŋ malekere ka ba te manne ko a pekyeeneba naŋ sigri ba menne na ka ba dɔgɛɛ a Mɛzaaya. (Luk. 2:​8-11) Saŋa na Gyoosɛf neŋ Mareya naŋ da taa Yezu waneŋ a ŋmenpuoredie na, Jehoova da ko la Siimiyoŋ neŋ Ana naŋ da e neŋnyaane apoɔsori baŋ nyɛ Yezu. (Luk. 2:​25-30, 36-38) Serɛzaa, ‘aneazaa ka Jehoova be la sazuŋ, kyɛ o teɛroŋ maŋ be la noba naŋ sigri ba menne zieŋ.’

16. Wala ka Yezu e a de wuli ka o tɔglɛɛ o Saa?

¹⁶ Yezu tɔglɛɛ o Saa. Azuŋ, o meŋ da nɔŋɛɛ sigrimeŋɛ deme yɛlɛ. Yezu da deɛ wuluu a ko noba naŋ ba gaa sakuubɛrɛ baŋ manna Naaŋmen Naaloŋ na yɛlɛ korɔ noba. (Tom. 4:13; Mat. 11:25) Yezu da maŋ saŋɛɛ noba baalonne meŋ ko ba. Sori na oŋ da maŋ tu a saŋ a baaloŋ maŋ vɛŋeŋ ka a noba baŋ ka o nɔŋɛɛ ba yɛlɛ, a taa gyeremɛ meŋ ko ba. (Luk. 5:13) Zisoɔree na baŋ na nyɔge Yezu te ko na, o da leɛ la o meŋɛ gbaŋgbaa a pɛge o bitontonee na gbɛɛ. (Gyn. 13:5) Sɛre oŋ da do sazu na, Yezu da wuleeŋ ka o nɔŋɛɛ o potuuribo naŋ sigri ba menne naŋ da bebe ana saŋa na, ane bana na zaa naŋ na tu ba puoriŋ a wa na. Sobuoŋ? O da de la toma naŋ e tegroŋ gaŋ toma zaa eŋ ba nuuriŋ, ka ba te soŋ noba ka ba nyɛ nyɔvore naŋ ba taa baaroo.—Mat. 28:​19, 20.

17. Wala teŋ na baŋ e a de wuli ka te taaɛ gyeremɛ ko noba? (Kaa a foto.)

¹⁷ Wala teŋ na baŋ e a tɔglɔ Jehoova? Ka teneeŋ moɔlɔ a duorisoŋ korɔ nemboorɔ zaa, a wuleeŋ ka te taaɛ gyeremɛ ko ba. Lɛ zaa neɛ zemmo naŋ waa, zie o naŋ yi, o eŋgane kala, kyɛbee lɛ zaa oŋ baŋ gane aseŋ, kyɛ aseŋ ka te moɔle a duorisoŋ koo. Apoɔsoe bee yelbaŋ zaa te naŋ taa, kyɛ ka teneeŋ maŋ teɛre ka te yɔɔmine seɛ teŋ, a na wuliŋ ka te taaɛ gyeremɛ ko ba. (Fil. 2:3) Ka teneeŋ maŋ vɛŋ ka te noba emmo maŋ “zuo” te taaba deni a yɛlɛ ŋa neŋ a taa poɔŋ, Jehoova poɔ zaaŋ maŋ pɛle.—Uro. 12:10; Zef. 3:12.

18. Bonso hoŋ boɔrɔ ka ho tɔglɔ Jehoova sigrimennoŋ gyogo na?

¹⁸ Ka teneeŋ moɔrɔ a tɔglɔ Jehoova sigrimennoŋ gyogo na, a na vɛŋeŋ ka a e mɔlɔ ka noba maŋ wa te zie, a vɛŋ ka te yɛlɛ koŋ e tuo, a lɛ e noba naŋ dire kannyiri yaga. A na vɛŋeŋ ka te wulo te taaba gyeremɛ aŋa lɛ na Jehoova naŋ erɛ na. Ka teneeŋ moɔrɔ te moɔbo zaa ka te tɔglɔ te Naaŋmen naŋ sigri o meŋɛ na, a na vɛŋeŋ ka te e neŋtegrɛ yaga zaa o nimitɔɔreŋ.—Aiz. 43:4.