Maŋ De Kɔkɔbaaloŋ Manna A Yelmeŋɛ Korɔ Noba

1. Ka teneeŋ boɔrɔ ka te e Jehoova yelmeŋɛ puorebiiri, wala aŋ seŋ ka te e?

KA TENEEŊ wa pɔge te Kristabitɔ kaŋa, soorebiri na kaŋa teŋ maŋ de weɛ soore taa la ka, wala hoŋ e a wa zanne a yelmeŋɛ naŋ be a Baabole poɔŋ na? Noba mine maŋ iree a noɔre ka, a yelmeŋɛ poɔŋ ka ba dɔgreba guoli ba. Ba mine meŋ maŋ yeliŋ ka, baŋ zanne a yelmeŋɛ naŋ be a Baabole poɔŋ na ba kɔɔre. Bon nanso teŋ maŋ yeli lɛ la ka, te vɛŋɛɛŋ ka a Baabole wulo te sori te zemmo poɔŋ. Bonso teŋ yeli lɛ? Te baŋɛɛŋ ka ka teneeŋ nɔŋ a yelmeŋɛ, a de yɛlɛ na meŋ teŋ zanna na tɔnɔ neŋ toma, te na eɛ Jehoova yelmeŋɛ puorebiiri. Azuŋ, aseŋ ka te e yelmeŋɛ deme te yelyelii ane te yel-eree poɔŋ.—Yiem. 15:​1-3.

2. (a) Bo yɛlɛ ka noba yaga da baŋ kyaare Yezu? (b) Bo ka yelmeŋɛ na Yezu naŋ da wulo noba na na de waneŋ?

² Yezu da maŋ yelee a yelmeŋɛ wagre zaa. Yezu dɔndɔnne da yeleeŋ ka, Yezu maŋ yelee a yelmeŋɛ, aneazaa ka ba ba boɔrɔ yɛlɛ na oŋ yele na. (Mat. 22:16) A kyaare a yɛlɛ ŋa, Yezu meŋɛ da yeleeŋ ka: “N waɛ la ka N tɔ zɔɔre eŋ bie ane o saa, a tɔ zɔɔre eŋ pɔgeyaa ane o ma, a tɔ zɔɔre eŋ naapɔge ane o serɛ ma.” (Mat. 10:35) A da ba e Yezu boɔbo ka noba zagre duorisoŋ na o neŋ o potuuribo naŋ da moɔlɔ na. Kyɛ, o da baŋɛɛŋ ka a yelmeŋɛ na wanɛɛ yelbawoŋtaa noba kpakyagaŋ. (Mat. 23:37) Yezu da baŋɛɛŋ ka noba mine na nɔŋ la a yelmeŋɛ, kyɛ ka ba mine meŋ kyiiroo.—2 Tɛs. 2:​9-11.

3. Bo yɛlɛ teŋ na zanne a zannoo ŋa poɔŋ?

³ Te meŋ maŋ tɔglɛɛ Yezu. Azuŋ te maŋ mɔɔrɔŋ ka te yele yelmeŋɛ wagre zaa, haali ka noba poɔŋ ba pɛle neŋ yɛlɛ na teŋ yele na. Te maŋ moɔ̃ la niŋe a manna a Baabole poɔ yɛlɛ korɔ noba, aneazaa ka noba mine ba maŋ boɔrɔ ka ba wono yɛlɛ na teŋ manna na. Kyɛ, a eɛ nimizeɛ yaga ka te baŋ sori ane saŋa na teŋ na maŋ yeli a yelmeŋɛ. A zannoo ŋa poɔŋ, te na deɛ weɛ a bɔ a soorebiri ŋa noɔre iribo, yenee teŋ na baŋ nyɛ a yelmeŋɛ? A puoriŋ, te na nyɛɛ a soorebie ama meŋ nɔɛ iribo, bonso aŋ seŋ ka te maŋ yele yelmeŋɛ? Sobuo aŋ seŋ ka te maŋ tu a yele a yelmeŋɛ? Ane bo saŋa aŋ seŋ ka te maŋ yeli a yelmeŋɛ? Ka teneeŋ baŋ a soorebie ama nɔɛ iribo, a na soŋ teŋ ka te maŋ de kɔkɔbaaloŋ, ane nimimaaroŋ yele a yelmeŋɛ wagre naŋ seŋ neŋ poɔŋ.

YENEE TEŊ NA BAŊ NYƐ A YELMEŊƐ

4. Bonso teŋ na baŋ yelka yelzaa naŋ yire Jehoova zie eɛ yelmeŋɛ?

⁴ Yelzaa naŋ yire Jehoova zie eɛ yelmeŋɛ. Aŋa mannoo poɔŋ, yɛlɛ na Jehoova naŋ yeli kyaare soŋ neŋ faaloŋ eɛ yelmeŋɛ. (Yiem. 19:9; 119:​142, 151) Ka onaŋ wa yelka yelkaŋa na eŋ nendaare kaŋa, a yɛlɛ maŋ nyɛɛ eebo. (Aiz. 55:​10, 11) O maŋ paalɛɛ o nɔ-ennee zaa meŋ. (Sor. 23:19) A Baabole gba vɛŋɛɛŋ teŋ baŋ ka Jehoova koŋ baŋ ŋma zirii. (Hib. 6:18) Azuŋ, a ba e te seɛlee a Baabole naŋ yelka Jehoova la a yelmeŋɛ Naaŋmen.—Yiem. 31:5.

5. Bonso aŋ ba e kpeɛŋaa ka te baŋ a yelmeŋɛ Naaŋmen? Wuli a muni. (Toma 17:27)

⁵ Noba mine maŋ yeliŋ ka a eɛ kpeɛŋaa ka te baŋ a yelmeŋɛ Naaŋmen Jehoova. Kyɛ, lɛ naane aŋ waa. Naaŋmen bonmaalee wuleeŋ ka o bebeŋ meŋɛmeŋɛ. (Uro. 1:20) Saŋa na bitontona Pɔɔl naŋ da manna Naaŋmen yɛlɛ korɔ a Giriki gaŋbanneba naŋ da be Atɛnse na, o da vɛŋɛɛŋ baŋ baŋ ka Naaŋmen boɔrɔŋ ka ba “bɔ” o, bonso “o ba e tɔɔre ne te kaŋa zaa.” (Kanne Toma 17:27.) Jehoova maŋ soŋɛɛ sigrimeŋɛ deme naŋ moɔ̃ niŋe boɔrɔ a yelmeŋɛ baŋ wa bamoo.—Gyn. 6:44.

6. Bo yelmenne mine la be a Baabole poɔŋ? Bonso ka ho poɔ pɛle ho naŋ baŋaa?

⁶ Sori na kaŋa teŋ na baŋ tu a baŋ Jehoova la teŋ na zanna a Baabole. Jehoova la de o vooroŋ soŋ na soŋ dɔba mine baŋ sɛge a Baabole. (2 Pit. 1:​20, 21) Azuŋ, te na baŋ sagɛɛ yelzaa naŋ be a Baabole poɔŋ di kpɛlɛŋkpɛlɛŋ. Te manne yɛlɛ na mine naŋ be a Baabole poɔŋ. A Baabole wuli teŋ lɛ a donɛɛ ane nyɔvore naŋ piili. (Mun. 1:​1, 26) A Baabole wuli teŋ bon nanso teŋ zaa taa faaloŋ te eŋɛŋ, ane bon nanso teŋ dire dɔgɛɛ a kyɛ kpiire. (Uro. 5:12; 6:23) A Baabole lɛ vɛŋɛɛŋ teŋ baŋ ka Naaŋmen na tu la o Bidɔɔ Yezu zieŋ a iri yelfaare na zaa a ‘zir-ŋmaareba zaa saa’ Setaana naŋ de waneŋ na. (Gyn. 8:44; Uro. 16:20) Ba lɛ sɛge eŋɛɛ a Baabole poɔŋ ka Yezu na sãã la neŋfaare zaa, a seŋ kũũni ka ba iri voorɔ, a leɛ maale a teŋgane ka o leɛ paradiisi, a lɛ soŋ nensaaleba meŋ ka ba pɛgeyi. (Gyn. 11:​25, 26; 1 Gyn. 3:8) Te na baŋ sagɛɛ a yɛlɛ ama zaa a Baabole naŋ yeli na di kpɛlɛŋkpɛlɛŋ. Nyɛ apoɔsori naŋ e kpoŋ seŋ lɛ Jehoova naŋ de ko te. O soŋ teŋ teŋ wa baŋ a yelmeŋɛ, a lɛ ko te apoɔsori ka te wulo te taaba a yelmeŋɛ meŋ.—Mat. 28:​19, 20.

BONSO AŊ SEŊ KA TE MAŊ YELE YELMEŊƐ?

7-8. Poteɛrɛ na teŋ maŋ de yele a yelmeŋɛ yɛlɛ fɛrɛɛŋ bee? Wuli a muni. (Marko 3:​11, 12) (Kaa a fotori.)

⁷ Aŋa lɛ na teŋ nyɛ a zannoo ŋa poɔŋ na, ka teneeŋ boɔrɔ ka te e Jehoova yelmeŋɛ puorebiiri, aseŋ ka te maŋ yele yelmenne. Kyɛ, a lɛ eɛ nimizeɛ ka te e yelkaŋa meŋ poɔ. Aseŋ ka te maŋ de poteɛre soŋ yele neŋ a yelmeŋɛ. A yɛlɛ ŋa eɛ nimizeɛ ko Jehoova. Te de yelkaŋa naŋ da e Yezu naaŋ moɔloo toma na poɔŋ wuli a muni. (Kanne Marko 3:​11, 12.) Saŋa na Yezu naŋ da tonɔ o naaŋ moɔloo toma a peɛle Galili Mane na, nembeɛoŋ mine da waɛ o zie. Noba malekefaare naŋ da dɔgrɔ meŋ da poɔ la be. Saŋa na baŋ wa nyɛ Yezu na, ba da le la o nimitɔɔreŋ a yelka: ‘Hooŋ la a Naaŋmen Bie.’ Bonso ka a malekefaare da yele a yelmeŋɛ a kyaare Yezu? Ba da boɔrɔŋ ka noba naŋ kyɛllɛ ba yɛlɛ na sage ba di ka ba eɛ yelmeŋɛ deme. Ka lɛŋ wa e, ba na toɔ̃ bɛnle baŋ ka ba bare Jehoova puoruu. Azuŋ, poteɛre-faa ka a malekefaare da de yele a yelmeŋɛ. Yezu yɛŋ da baŋɛɛ ba poteɛrɛ, azuŋ o poɔ da ba pɛle neŋ yɛlɛ na baŋ erɛ na. Yezu gba da yelko baŋ ka ba ta manna o yɛlɛ korɔ noba.

⁸ Bo yɛlɛ teŋ na baŋ zanne yi be? Poteɛrɛ na teŋ maŋ de yele a yelmeŋɛ na eɛ nimizeɛ yaga zaa ko Jehoova. Azuŋ, a eɛ nimizeɛ yaga zaa ka te maŋ de poteɛre soŋ a wulo noba a yelmeŋɛ. Ka ba naŋ wa pugiro te, aseŋ ka te de a pugibu zaa korɔ Jehoova.—Mat. 5:16; de manne neŋ Tom. 14:​12-15.

9. Bo yɛlɛ aŋ ba seŋ ka te e? Bonso aŋ ba seŋ ka te e lɛ?

⁹ Te lɛ de yelmannaa kaŋa wuli bon nanso aŋ ba seŋ ka te boɔrɔ gyeremɛ korɔ te menne. Te de ka a lantaapuoruu neŋkpoŋ kaŋa mannɛɛ yelnimizeɛ kaŋa neɛzaa naŋ ba baŋ ko te. A puoriŋ, teŋ meŋ de a yɛlɛ te manne ko te taaba. Ka te taaba naŋ wa nyɛ ka yɛlɛ na teŋ manne ko ba na eɛ yelmeŋɛ, a na vɛŋeŋ ka ba nyɛ ka te maŋ baŋɛɛ yɛlɛ sɛre ka neɛzaa wa baŋaa. Ba na lɛ teɛreŋ ka te baŋɛɛ yɛlɛ yaga noba naŋ ba baŋ. Lɛ na toɔ̃ vɛŋeŋ ka ba korɔ te gyeremɛ yaga zaa. Kyɛ, lɛ eebo na vɛŋeŋ ka ba maaleŋ taa gyeremɛ ko Naaŋmen meŋ bee? (Yeng. 11:13) Ho nyɛɛ, yɛlɛ na teŋ yelko ba na eɛ yelmeŋɛ, kyɛ te mannɛɛ yɛlɛ aŋ ba seŋ ka te manne ko neɛzaa ko ba. Ane meŋ, te de la poteɛre-faa yeli neŋ a yelmeŋɛ.

SOBUO AŊ SEŊ KA TE MAŊ TU A YELE A YELMEŊƐ?

10. Kolosi 4:6 yeleeŋ ka te maŋ yele yɛlɛ neŋ “kɔkɔbaaloŋ tegitegilɛ,” wala ka lɛ wuli?

¹⁰ Kanne Kolosi 4:6. Bitontona Pɔɔl da koɛ Kristabiiri naŋ be Kolosi kawane ka ba maŋ yele yɛlɛ neŋ “kɔkɔbaaloŋ tegitegilɛ.” Wala ka lɛ wuli? A Giriki yelbiri na Pɔɔl naŋ de toŋ neŋ toma a zie ŋaŋ na wulee neɛ naŋ yi nimimaaroŋ ane mɔgloo poɔŋ a yeli yɛlɛ ko o tɔsoba aŋ emoo faŋa yaga zaa.

11-12. Bonso aŋ seŋ ka te kaara soŋ saŋa na teŋ wa wulo noba a yelmeŋɛ na? De yelmannaa kaŋa wuli a muni. (Kaa a fotori.)

¹¹ Ka teneeŋ wa wulo noba a Baabole poɔ yelmenne, aseŋ ka te de Pɔɔl kawane na oŋ yelka te maŋ de kɔkɔbaaloŋ yele yɛlɛ tegitegilɛ na tonɔ neŋ toma. A Baabole de la yelmenne na teŋ maŋ wulo noba na manne ne zɔɔzɔɔsoɔ naŋ dire yaga, a maŋ toɔ̃ kpɛ te wɛl neɛ nyɔvore neŋ vooroŋ. Lɛ wuleeŋ ka a Baabole na baŋ wulee te poteɛrɛ ane neɛ na te naŋ waa meŋɛmeŋɛ. (Hib. 4:12) Kyɛ, ka teneeŋ ba maŋ de a Baabole tonɔ neŋ toma sori naŋ seŋ neŋ poɔŋ, te na baŋ dɔŋɛɛ noba suuri, kyɛbee a yeli yɛlɛ naŋ na waneŋ nɔkpeɛne. Sobuoŋ?

¹² Te de ka te be la a naaŋ moɔloo poɔŋ ka te neŋ dɔɔ kaŋa dire dama. A dɔɔ nɔŋɛɛŋ ka o maŋ tu bonmeɛree eŋɛŋ a puoro korɔ Naaŋmen wagre zaa. A lɛ nɔŋ ka o neŋ o booree deme maŋ dire Boronyɛ neŋ Isita tige meŋ. Ho na baŋ yuo la a Baabole a kanne zie kaŋa naŋ wulo ka a eɛ dambol yɛlɛ ka neɛ mɛ bonmeɛree biŋ a puoraa. Kyɛbee ka ho wuli o soba yi a Baabole poɔŋ ka bagmaalbaŋ da maŋ dire Boronyɛ neŋ Isita tige na. (Aiz. 44:​14-20; 2 Kor. 6:​14-17) Wala hoŋ teɛre? Ka hooŋ tu a sori ŋa poɔŋ a manne a yelmeŋɛ koo a dɛndɛŋ dama diibu poɔŋ, a na soŋɛɛ a dɔɔ bee? Yɛlɛ na hoŋ yeli koo na eɛ yelmeŋɛ, kyɛ sori na hoŋ tu a yeli a yelmeŋɛ koo na wuleeŋ ka ho ba de a Baabole toŋ neŋ toma sori naŋ seŋ neŋ poɔŋ.

13. Sobuo teŋ na baŋ tu a maŋ yele yɛlɛ naŋ seŋ neŋ?

¹³ Pɔɔl da koɛ o Kristabitaaba na kawane ka ba maŋ yele yɛlɛ ka a waa ŋa bondirii ba naŋ eŋ nyɛnnoo aŋ woŋ. Lɛ ba wuli ka aseŋ ka te maŋ de a yelmeŋɛ sɔgle. Kyɛ o da boɔrɔŋ ka o wuli ka aseŋ ka te maŋ de kɔkɔ-noɔ̃ a manna a Baabole poɔ yɛlɛ korɔ noba, ka a tɔ ba sukyie. (Joob 12:11) A na baŋ eɛ kpeɛŋaa ka te e lɛ saŋa kaŋa. Aŋa mannoo poɔŋ, te de ka neɛ boɔrɛɛ nyɛnnoo yaga. Ka neɛ kaŋaŋ maale bondirii a ba eŋ a nyɛnnoo seŋ lɛ na oŋ boɔrɔ na, neɛ naŋ boɔrɔ nyɛnnoo yaga na na baŋ yeliŋ ka a bondirii ba noma. Lɛ neŋ o zu la, te na baŋ teɛreŋ ka sori na teŋ maŋ tu a yele yɛlɛ korɔ noba na seŋ nɛɛŋ, kyɛ, aminekaŋaŋ ba ba boɔrɔ sori na teŋ maŋ tu a yele yɛlɛ korɔ ba na. Zie na neɛ naŋ yi, kyɛbee lɛ na baŋ guoloo na toɔ̃ vɛŋeŋ ka o maŋ yele yɛlɛ korɔ noba daadaalɛ. Kyɛ, zie na noba mine naŋ yi ane lɛ na baŋ guoli ba na zuŋ, ka neɛŋ wa yele yɛlɛ daadaalɛ korɔ ba, ba ba maŋ boɔrɔ lɛ. A maŋ toɔ̃ dɔŋɛɛ ba suuri gba. Pɔɔl da yeleeŋ ka, aseŋ ka te baŋ lɛ teŋ na maŋ “yeli sɔge neɛzaa.” Lɛ wuleeŋ ka, aseŋ ka te leɛre sori na teŋ maŋ tu a yele yɛlɛ, ka a seŋ neŋ lɛ na te kyɛllekyɛlleba naŋ boɔrɔ.

BO SAŊA AŊ SEŊ KA TE MAŊ YELI A YELMEŊƐ?

14. Saŋa na Yezu naŋ da be a teŋɛzuŋ na, o da wulee o potuuribo na yɛlɛ na zaa oŋ baŋ na bee? Wuli a muni.

¹⁴ Yezu da maŋ de la kɔkɔbaaloŋ yele neŋ yɛlɛ korɔ o potuuribo. O da maŋ yi la nimimaaroŋ poɔŋ a wulo ba yɛlɛ yaga. (Mak. 6:34) Kyɛ, yɛlɛ yaga da bebeŋ ka Yezu da boɔrɔ ka o wuli o potuuribo na. Kyɛ, Yezu da ba wuli ba yɛlɛ na zaa oŋ baŋ na. O da baŋɛɛŋ ka, ka onaŋ wuli ba yɛlɛ na zaa oŋ baŋ na, a na gaalee ba faŋa. Yezu da baŋɛɛŋ ka wagre soŋ naŋ ba ta ka o wuli ba yɛlɛ na zaa oŋ baŋ na. O gba da yeleeŋ ka ka onaŋ wuli ba yɛlɛ na zaa oŋ baŋ na, a na eɛ tuobu ko ba. (Gyn. 16:12) Bo teŋ na baŋ zanne yi be?

15. Aseŋ ka te wuli te Baabole zannezanneba yɛlɛ na zaa teŋ baŋ bee? Wuli a muni. (Yeng Yelibie 25:11) (Kaa a foto.)

¹⁵ Yezu ewuli soŋ na vɛŋɛɛŋ teŋ baŋ ka, a ba seŋ ka te maŋ wuli te Baabole zannezanneba yɛlɛ na zaa teŋ baŋ na tɔntɔbaalɛ. Wala teŋ na baŋ e a tɔglɔ Yezu ewuli soŋ na? Aseŋ ka te maŋ kaa te Baabole zannezanna na zemmo yɛlɛ sɛre kyɛ baŋ yelmenne na aŋ seŋ ka te manne koo. Te baŋɛɛŋ ka bagmaalba la da maŋ dire Boronyɛ ane Isita tige na, azuŋ Naaŋmen ba boɔrɔ ka te dire a tige ŋa. Ho teɛrɛɛ a dɔɔ na teŋ manne o yɛlɛ ka o nɔŋɛɛŋ ka o neŋ o booree maŋ dire Boronyɛ neŋ Isita tige na yɛlɛ bee? Te de ka pampana ŋa o leɛ la ho Baabole zannezanna. Te de ka a kyɛrɛɛ daaraawala mine ka Boronyɛ diibu na ta. Ka hooŋ gaa o zie a te manne yɛlɛ na a Baabole naŋ yeli kyaare Boronyɛ, a ba seŋ ka ho teɛre ka bebie awala mine kpakyagaŋ o na barɛɛ Boronyɛ diibu. Yelmeŋɛ la, ka noba mineŋ wa baŋ a yelmeŋɛ, ba maŋ de aŋ tonɔ neŋ toma wieoŋ. Kyɛ, a maŋ de la wagre sɛre ka noba mine toɔ̃ leɛre ba teɛroŋ neŋ ba yel-eree. Ka teneeŋ maŋ wuli te Baabole zannezanneba a yelmeŋɛ wagre naŋ seŋ neŋ poɔŋ, a na eɛ mɔlɔ ko ba ka ba de yɛlɛ na teŋ wulo ba na tonɔ neŋ toma.—Kanne Yeng Yelibie 25:11.

16. Wala teŋ na baŋ e soŋ te Baabole zannezanneba ka ba “naŋ kyɛnɛ a yelmeŋɛ poɔ”?

¹⁶ Ka teneeŋ wa soŋ te taaba ka ba wa baŋ a yelmeŋɛ, a maŋ vɛŋeŋ teŋ taa popeɛloŋ yaga. Azuŋ, e ewuli soŋ ko ba ka ba tɔglɔ. (3 Gyn. 3, 4) Vɛŋ ka yɛlɛ na hoŋ erɛ ho zemmo poɔŋ na wuli ka ho sagɛɛ nɔ-ennee naŋ be a Baabole poɔŋ na di. Maŋ de poteɛre soŋ yele a yelmeŋɛ. Maŋ de kɔkɔbaaloŋ ane nimimaaroŋ wulo ho taaba a yelmeŋɛ wagre naŋ seŋ neŋ poɔŋ. Maŋ de pugibu zaa korɔ Jehoova. Ka teneeŋ moɔ̃ niŋe erɛ a yɛlɛ ama, te na baŋ soŋɛɛ te Baabole zannezanneba ka ba “naŋ kyɛnɛ a yelmeŋɛ poɔ.” Lɛ eebo meŋ na wuliŋ ka te sereŋ puoree a yelmeŋɛ Naaŋmen Jehoova.