Nyiqaane Jë Së Troa Inine La Tusi Hmitrötre Ngöne La Itre Hnalapa
1 Ame la ketre madrine ka tru thene la itre keresiano, ke, ene la troa inine la Tusi Hmitrötre memine la itre atr ngöne la itre hnalapa i angatr. Ngöne la itre xaa ijin, tha ajane hnyawa kö la itre xane troa kuca la huliwa cili, ngacama ka sisitria ej, pine laka angatr’a mekune ka hape thatreine pala kö angatre nyiqaane ini Tusi Hmitrötre me ketre atr. Alanyimu la itretre cainöje me itre pionie ka hane mekune tune lai ekö. Ngo pine laka hnei angatre hna hni koi Iehova me kapa madrine la itre ini qa ngöne la Huliwa ne Baselaia, atreine hë angatre ini Tusi Hmitrötre memine la itre atr, matre tru la madrine i angatre enehila ngöne la huliwa ne cainöje trootro, ijije fe tro së a kuca tune lai.
2 Ketre aqane kuca, troa hnyingëne mekötine maine huliwaane la itre tarak: Ame la ketre aqane troa nyiqaane ini Tusi Hmitrötr, ke, ene la troa “hnyingëne mekötin”. Ame la ajane la itre atr, ke, troa nyipi angatre ngöne la kola könë angatre troa hane inine la Tusi Hmitrötr. Pane hnyingëne mekötine jë pena kowe la itre atr ka hape: “Hapeu, ajane kö epuni troa hane inine la Tusi Hmitrötre ngöne la itre hnalapa i epuni, matre atrepengöne me atrehmekune la aja i Iehova kowe la fen?” Qaja ju pena koi angeice ka hape hetre madrine së troa amamane koi angeice la aqane ini Tusi Hmitrötr e cili hnalapa i angeic. Ngacama alanyimu la ka thipën, ngo loi pe tro së a catre mejiune la madrin’atraqatre ka xulu qa ngöne la easë öhne la ketre atr ka ajan!
3 Hetre ketre aqane nyiqaane inine la Tusi Hmitrötr, ene, la troa huliwaane la itre tarak. Ngacama ka coco hi itr’ej, ngo ketre ithuemananyi ka hetre thangane nge ka tru catr. Nemene la aqane nyiqaane troa inine la Tusi Hmitrötre jëne la ca tarak? Hamëne ju fe la ketre tarak hnei epuni hna mekune, ka ihmeku memine la ajane lai atr. Nge thupene lai, qanyi epuni sipone kowe lai atr troa e lai paragarafe hnapan. Nge ce wange ju me angeice la itre mekene tus, nge ce ithahnataane jë la aqane tro së a trongëne la hne së hna inin. Loi e tro së a pane ce wange la casi maine lue paragaraf. E kapa madrine angeice la itre ewekë hnei angeice hna e, ke, ijiji së troa aqeane la porotrik.
4 Aqane huliwaane la Tusi Hmitrötre hmekuj: Ame la itre xaa atr, ke, tha ajane kö troa inine la Tusi Hmitrötr, maine troa kapa pena la itre itusi së, ngo ajane catre angatre troa ithahnata Tusi Hmitrötr. Ijije hi troa nyiqaane inine la Tusi Hmitrötre jëne la hnepe hna ewekë ka ihmekeu memine la aja i angatre qa hnine lo itus Vivre éternellement, loi e troa hnëkëne hnyawane matre ame la easë a iwai hmaca, ke, ijije troa a ithahnata me angatre jëne la Tusi Hmitrötre hmekuje hi. Ijije troa ithahnataane ngöne la 15 maine 20 lao menetre, maine aqeane pena, ngo qanyi së hi troa wang. Maine hne së hna majemine kuca la aqane ini Tusi Hmitrötre cili, ke, easë hë lai a nyiqaane etid, nge tro fe hë së a amë ngöne rapor. Thupene lai, ke, amamane jë hë la itus Vivre éternellement, nge inine jë hë.
5 Hapeu, hane kö epuni canga kapa la itre ijine hna hamëne koi epuni ngöne la epuni a cainöje trotro, me thele jëne troa inine la Tusi Hmitrötre memine la itre ka lapa ezi epun, itre sine ce elo i epuni, maine itre xaa sine i epuni pena? Hane kö epuni tupathe lai e cili lo? Eu la ijine hnei epuni hna tupathe hmaca? Maine tha hune kö la ketre aqane kuca, ke, tupathe kö epuni la ketre aqan?
6 Ijiji epuni fe troa nyiqaane inine la Tusi Hmitrötr e hnei epuni hna trongëne la itre ini hna amekötin, nge catre jë cainöje me lapaune kowe la itre manathithi qa thei Iehova. Tha tro pi kö a wangacone la menene la nyipici memine la ixatua i Iehova. Atraqatre la madrine e hne së hna nyiqaane me inine la Tusi Hmitrötr ngöne la itre hnalapa.