Xatuane Jë La Atr Troa Wangatrehmekune La Trengamo Ka Sisitria
1 Ame la ketre ewekë nyine tro së a huliwaane ngöne lo easë a cainöjëne la Maca ka Loi ne la Baselaia, ke, ene la tro së a xatuane la itre ka hni nyipici troa hnime me ajane la esisitriane me aliene la wesi ula i Akötresie (Fil. 3:8). Atraqatre la thangane la itre itusi së ka qeje pengöne la Tusi Hmitrötr, ke, kola iqajakeune la ithuemacanyi ne la Baselaia. Celë hi matre, hnene lai itusi Vivre éternellement hna xatuane la itre hadredre me itre thausane lao atr, matre troa nyihlue i Iehova thenge la meköti hnei angatre hna inine qa hnine la Tusi Hmitrötr.
2 Ame la huliwa i Akötresie hne së hna nyihluën, ke, tha ene casi kö la troa hamë itusi koi atr. Loi e tro fe së a inine trofë menyikëne la Maca ka Loi, me inamacanëne la aqane drenge së la hna qaja hnene la atr, nge thupene lai, troa atreine ‘ce ithahnataane me angeice la itre hna cinyihan.’ — Itre Hu. 17:2.
3 Troa kuca tune ka? Tro la aqane nyiqaane së a fe kowe la atr, la jëne tro angeic’a amamane la etrune la aja i angeice kowe la Tusi Hmitrötre me itre maca qa hin.
Qaja jë ka hape:
◼ “Hna upi hune troa ce ithahnataane me epuni la pengöne ne la itre ewekë ka traqa koi së enehila. Nyimutre la itre atr ka nuetrije la Akötresie me itre tulu ne mele qa thei Nyidrë hna amë hnine la Tusi Hmitrötr, matre angatr’a mele pë hë thenge la aqane ujë cili. Hane kö nyipëti wangatrehmekune lai? [Drenge ju la kola sa, nge ijije fe troa amexeje la tulu ne la itre xan.] Pane tro so a ce wange la aqane ujë cili hna cinyihane ngöne 2 Tim. 3:1-5, matre tro nyipëti a qaja ka hape, ceitune kö lai memine la melene la fene hnengödrai enehila. [E jë, drenge ju la kola sa.] Hapeu, hetre nyipi kepine kö, matre tro hmaca së a mejiune treqene la itre drai ka troa xulu?” Amamane jë la itre iatre götrane 12 me 13 ngöne la itus Vivre éternellement, nge ce wange jë la paragarafe 12 me 13.
4 Maine easë a itrohnyi me ketre keme maine thin, ke, ijije tro së a nyiqaane qaja ka hape:
◼ “Eahuni a ithahnata memine la itre atr ka ajane troa atrepengöne la aqane melëne la itre jole hnine la fami. Nyipici laka easë a isa kuca tune la hna atrein, ngo eje mina fe laka maine hetre ewekë ka sisitria nyine xatua së, ke, celë hi la ajane së, hapeu la mekune i nyipë? [Treqene ju la kola sa.] Tusi Hmitrötre la ka amamane la ewekë cili, ngöne la tusi Kolose 3:12-14 [E jë.] Hawe, nemene la ewekë ka ijije matre hetrenyi së la fami ka loixölen? Goeëne ju nyipëti la hna cinyihane ngöne la mekene ne la itusi celë, kola hape ‘Comment s’assurer une vie de famille heureuse.’ ” E jë la paragarafe 3 ngöne götrane 238 ne la itus Vivre éternellement. Maine hetre jolene lai atr, nge maine tha saqe kö angeice troa sa, ke, tupathe ju pena troa amamane la ketre zonale ka hnyipixe ka qejepengöne la fami, maine kolo tarak Une vie de famille agréable.
5 Nge eje hi laka tha tro kö a paatre ngöne la mele së la hnaqa së, ene la troa cainöjën’apexejene la Maca ka Loi ne la Baselaia. (Mat. 24:14) Loi e tro së a catre huliwaane la Tusi Hmitrötre memine la hnënge itusi Sasaiatri hne së hna hetreny, matre ijiji së troa mejiune la manathithi qa thei Iehova, ngöne laka easë a kuca hnyawane palahi la aja i Nyidrë ngöne la itre drai celë tha nyine thëthëmine kö. — Gal. 6:9.