Amamane Jë La Itre Ithuemacanyi Ka Ketre Pengöne Kö Ne La Tusi Hna Amaman
1 Ame la götrane gaatrune la tusi Révélation: dénouement, ke, ene la troa xatua së troa trotrohnine la itre ithuemacanyi ka ketre pengöne kö, ene lo itre hna fejane hë ekö hnine la itusi Hna Amaman. Xatuane jë la itre xane troa trotrohnine la aqane tro la itre ithuemacanyi celë a upi angatre fe, troa trofë trongëne la itusi celë ngöne la huliwa ne cainöje ngöne la treu maac. Hanawange la itre mekune nyine xatua epuni ngöne la kola hnëkëne la cainöje trootro.
2 Thupene la aqane ibozu së memine lai atr, ke, qaja jë ka hape:
◼ “Hapeu, öhne fe hë nyipëti lo kola qaja lo eke hos ngöne lo tusi Hna Amaman hnine la Tusi Hmitrötr? [treqene ju la troa sa.] Nyimu pengöne hna amamane hnene la aliene la itre hos. Ngo hapeu, atre fe kö nyipëti laka, ame la aqane nyinyapene la itre hose enehila, ke, kola aeatrëne la itre ewekë hna perofetan, ene la itre ewekë ka troa traqa ngöne la sipu ijin, nge thatraqai së fe isa alacas? [Nue pi troa sa.] Ajane fe kö nyipë troa trotrohnine la hna perofetane celë memine fe la aliene la ewekë ka eatre koi së?” Amamane ju lo itre iatre ngöne la mekene 16 ne la itusi Révélation: dénouement, nge ce wange ju memine lo itre xötrene Tusi Hmitrötre hna cinyihane atrune. Maine pena, ke tro epuni a qejepengöne trongëne la itre xaa pengöne ewekë hna amaman, jëne la tarake Le monde actuel survivra-t-il? The cile kö troa hamëne lai itus, ngo wange ju pe matre troa ithahnataane la itre hna amamane me itre alien’eje ngöne la kola troa iwaihmaca.
3 Maine ajane pena epun, ithahnataane tupathe ju tune la:
◼ “Hapeu, hane fe hë nyipëti drenge lo ketre hna ithahnata lo kola qeje ‘Amagedo’? [Treqene ju la troa sa.] Alanyimu la ka mekune ka hape, ame la ëjene cili, ke kola hape tro la nöjei nöj’asë a isine la itre jiane isi angatre ka catre, nge hna mecin, lo hna hape nikeler, ngöne la hnedrai së. Matre ketre pengöne hë la aqane trotrohnine la ‘Amagedo’ enehila. Maine tro së a wange pe la hna qaja hnene la Tusi Hmitrötr, ke, ame la nyipi alien, ke, jëne troa xulu la itre ewekë ka loi, nge ame la thangane katru, ke, ene la tingetinge ka epinepalua.” Qangöne la aqane sa ne la atr, ijije tro epuni a amamane koi angeice la Tusi Hmitrötre ngöne la tusi Hna Amaman 16:16 maine Salamo 37:10, 11, nge thupene lai, nyijëne jë matre amamane koi angeice la mekene 39 ne la itusi Révélation: dénouement. Nge, e thupene lai, nue pi la itusi koi angeice memine la madrin.
4 Ijiji epuni fe troa amejëne la aja, jëne la itre mekune celë hna ithahnataane lapane:
◼ “Ame la itre drai celë ne la macatre, alanyimu catre ngöne la fene hnengödrai la ka mekune kowe la meci me melehmaca i Iesu Keriso. Hapeu, pi tro kö epuni a atre lo itre hna kuca hnei nyidrë thupene la hna melehmaca? Nyimu ewekë ka tru ngöne la hnedrai së, kola amamane la götrane qai Iesu enehila ngöne la aqan’ameköti ewekë i Iehova. Hna qejepengöne itr’eje ngöne la tusi Hna Amaman. Ajane hmaca kö epuni troa atre hnyawane la itre mekuana i Akötresie, ngöne laka hnei Nyidrëti hna upe la Hupuna i Nyidrë kowe la fen, nge nemene la aliene la itre ewekë celë koi së me itre sine së?” Ijiji epuni troa ce wange me angeice la xötre 1 me 2 mekene 41 ne la itus Révélation: dénouement.
5 The thëthëhmine kö troa könëne la itre ka hetre aja matre tro angatr’a hane sine lo Drai ne Amekunën. Ejehi, jëne la manathithi qathei Iehova, ijiji epuni troa xatuane la itre atr, ‘angetre drenge la nöjei wesi ula hna perofetan, me trongëne la nöjei hna cinyihane’ — Hna Ama. 1:3.