Xatua Angatre Jë Troa Trongëne La Itre Hna Qaja
1 Ame la easë a cainöje trootro, ke, kola aijijëne la nöjei atr troa ‘drenge la nöjei wesi ula hna perofetan.’ (Hna Ama. 1:3) Ngo Loi e tro angatr’a trongëne la itre hna qaja, matre ijiji angatre fe troa mele qahnine lo “akötre atraqatr.” (Hna Ama. 7:14) Mekune ju së laka itre atr’a treqene la emele i angatr! Celëhi, matre loi e troa beëke palahi kowe la itre ka amamane laka hetre hnepe aja thei angatr, ngöne lo easë a kuca lo ketre aqane ithahnata hna amekötine koi së ngöne la treu celë.
2 Maine hnei epuni hna amë pe lo itus “Révélation: dénouement,” ke, ijije troa qaja ka hape:
◼ “Eni a madrine troa iöhnyi hmaca me nyipë. Ame lo easo a porotrike lo ketre ijin, ke, hnei easo hna ithahnataane lo ketre ewekë hna perofetane ngöne la tusi Hna Amaman, nge hnenge hna amë pe thei nyipë lo itus ka qeje pengöne la ewekë cili. Ma öhne hë hnei nyipë, laka ngacama ka jui la itre hna qaja ngöne la itusi Hna Amaman, ngo atreine hi së troa hetre trotrohnin, pine laka easë a goeëne la enyipicine la itre hna qaja cili, ngöne la itre hne së hna melëne ngöne la itre hnedrai celë, nge jëne fe la itre ini ka nyipici qa hnine la Tusi Hmitrötr. Celëhi matre eni a ajane troa ce wange me nyipë la itre xaa hnepe hna qaja hnei tus, göne la itre drai enehila.” Thupene la hna ithahnata, ke, xome jë la ketre itusi matre troa nyiqaane inine la Tusi Hmitrötr.
3 Maine hnei epuni hna amë pe lo tarak “Le monde actuel survivra-t-il?” ngöne la xötrei iöhny, ke, thupathe ju troa qaja ka hape:
◼ “Tru la madrinenge la eni a öhnyi nyipëti hmaca e celë hnalapa. Ame lo qange hnapane hna wai nyipë, ke, hnei nyiso hna ithahnataane lo itre ewekë ka traqa enehila, kösë hatrene laka easenyi hë troa nyipune la fen. [Ce wange jë la itre xaa pengönene lai hatrene ngöne Mataio 24:3-14] Ngo ma ketre öhne fe hë nyipëti e cailo fene maine ngöne la nöje së, la ketre ewekë ka nyipi traqa koi së, ka anyipicine la hatrene cili.” Amamane jë la itre iatr ngöne la itus Révélation: dénouement mekene 16, nge qejepengöne jë la enyipicine la itre hna perofetane hnei Tusi Hmitrötr. Ame la kola nyipune la ithahnata, ke, qaja jë la taane la cainöje hna troa kuca e ijine reinio, nge hëne jë fe lai atr troa hane sin.
4 Maine ase hë epuni ihë kowe lo Drai ne Amekunën, ke, troa qaja ka hape:
◼ “Ame lo ketre ijine, ke, hnei easo hna ithahnataane la enyipiewekëne la meci Iesu kowe la fene hnengödrai. Hnenge fe lo hna hë nyipë troa hane sine la Drai ne amekunëne la meci cili, ka troa eje e drai 26 maac. Eni a traqa hmaca troa hë nyipë matre troa hane sine la drai cili ka tru. [Qaja jë la traeme me göhnë ne kuca la reinio cili.] Nge maine tro së a mekune hnyawane la itre manathithi hne së hna kapa enehila me hne së hna troa kapa epin, la kösë thangane ne la huliwa i Iesu kowe la fen, ke, tro së a trotrohnin’atrune la aliene la drai cili.” Tupathe jë troa ce ithahnataane la itre hna qaja ngöne la itus Révélation: dénouement mekene 41. Amamane jë fe la itre iatr götrane 294, 299, 308. Maine ijij, ke, xatuane jë la itre atr ka ajan, göi gojenyi ne sine la Drai ne amekunën.
5 Maine ka drenge hnyawa lai atr, ngo hna hmaca hi e cili, ke, qaja jë koi angeice ka hape:
◼ “Katru la hnenge hna madrine lo nyiso a porotrikë Tusi Hmitrötre lo ketre ijin. Eni a beëke hmaca, ke, eni a ajane catrëne matre tro fe nyipë a öhnyi thangane la itre loi qathei Akötresie kowe la itre ka ajane troa atre nyidrëti hnyawa.” E jë la Ioane 17:3, nge qejepengöne jë lo tarak Une vie paisible dans un monde nouveau.
6 Epi tro la trenge aja i nyipunie troa mel, memine la aqane nyipiewekëne hnei nyipunie lo thupene mel, a upi nyipunie troa beëke troa wange hmaca la itre atr ka ajan. Xatua angatre jë troa trothenge la maca ne la tusi Hna Amaman ka ketre pengön. Nge the thëthëhmine kö laka “easenyi hë la ijin”! — Hna Ama. 1:3.