Xatua Angatre Jë Troa Drenge “Hmaca Ngöne La Ewekë Cili e Ketre Ijin”
1 “Tro huni a dei eö hmaca ngöne la ewekë cili e ketre ijin.” (Ite Huliwa 17:32, NW) Kolo aqane sa ne lo itre xane koi Paulo la nyidrëti a cainöj e Areopago. Hawe, enehila fe, hetre itre atr ka ajane troa atrepengöne hnyawa göne la maca ne la Baselaia hne së hna ithahnataane ngöne la kola xötrei iöhny.
2 Tro la ini hne së hna trofë a sisitria catre e hne së hna hmaca troa xatuane la itre trene aja. Nge, e loi la hne së hna hnëkë, ijije tro fe a hetre thangane ka loi. Hanawange la hna qaja ngöne la itus Manuel pour l’Ecole, götrane 41, ka hape: “Ame la ewekë hnapan, ke, loi e ka lai hnyawa ngöne la he së la mekune ne la atr. Troa thelejëne troa atre ka hape pine nemene matre hetrenyi thei angeice la mekune cili. Wange jë fe troa amexeje la mekune hnene la sipu aqane ewekë i epun. Tro fe a trotrohnine hnyawa la itre xötre nyine anyipicin. Nge, troa atreine qaja la aqane troa trongëne la itre xötre ne la Tusi Hmitrötr.”
3 E hnei epuni hna amë pe lo itus “La Bible: Parole de Dieu ou des hommes?,” ke, qaja ju ka hape:
◼ “Ame lo traqa hnapane ni, ke, hnei nyiso lo hna ithahnataane la kepine matre tro së a mejiune kowe la Tusi Hmitrötr. Ame ngöne lo sine tusi hnenge hna amë pe thei nyipë, ke, hetre hnyinge hnen’eje hna amexej, kola hape: ‘Pine nemene matre troa e la Tusi Hmitrötr?’ [E jë la itre mekune nyine nyiqaane la itusi ngöne la götrane 5, nge loi e troa drenge hnyawa la hnei nyidrë hna qaja, nge drenge ju la hna sa göi troa nyipun.] Tusi Hmitrötr’a qaja koi së ka hape easenyi hë tro Akötresieti a hamëne la nyin thatraqane la nöjei pengöne jole ka traqa kowe la atr, nge ka tro lai a eatrongë së ngöne la gojenyi nyine tro së a trongëne matre troa kapa la itre loi qa ngöne la ijine manathithi cili. [E jë la Salamo 119:105.] Ame la itusi celë, ke, ketre itusi ne inine göi troa isa inine caasin, maine pena göi troa ce inine memine la fami. Ka madrine ni, maine nyipëti a ajan, tro ni a amamai nyipëti la aqane inin’ej.”
4 E easë a wange hmaca la ketre atr hne së hna amë pe lo tarake hna hape “Pourquoi avoir confiance en la Bible,” ke, qaja ju ka hape:
◼ “Easë asë a kukehnine la itre ewekë ka troa traqa ngöne la itre drai ka troa xulu. Ngo e tro epuni a goeëne la itre ewekë ka traqa enehila, hapeu, nemene la mekune i epuni göne la itre drai ka calemi? [Nue pi troa sa.] Kolo hi a mekuhnine la itre ewekë ka troa xulu hnene la atr, ngo ame Akötresie, ke, atrehmekune hnyawa Nyidrëti la ewekë ka troa traqa. [E jë la Isaia 46:10.] Ma epuni a sesëkötre la epuni a atre laka Tusi Hmitrötr’a perofetaane ka hape easenyi hë tro së a kapa la itre manathith, me madrine ngöne la paradraiso, ene la fene hnengödrai ka hnyipixe. [E jë la hnaakönine paragarafe ngöne la götran 4.] Eni a sipo nyipë matre tro ni a qejepengön’atrune la hna thingehnaeane ka sheming.”
5 E maine easë a wange hmaca la ketre atr hne së hna amë pe lo “Traduction du monde nouveau,” ke, ma ijije tro së a trongëne la hna qaja celë:
◼ “Ame lo ketre traqa ni, ke, hnenge hna amë pe thei nyipëti lo ketre Tusi Hmitrötr, nge hnenge hna qaja ka hape tro hmaca ni a bëeke matre tro ni a xatua nyipëti la aqane troa huliwaane hnyawaan’ej. Ame itre xaa ijin, ke, kola traqa koi huni la itre hnying, tune la ka hape, tuneka la aqane troa thupëne la imelekeu i eni, memine la itre atr. Tusi Hmitrötr’a hamë ihaji ka sisitria, nge jëne la Traduction du monde nouveau, ke, hmaloi catre koi së troa öhne la hne së hna ajan. [Fe jë kowe la götrane 1543-4, nge goeëne ju ngöne lo taane hna hape “Amour.” Amamane hnyawaane jë la itre mekene tusi tune la 1 Korinito 13:4; Kolose 3:14; me 1 Peteru 4:8. Qejepengöne jë ka hape troa hetre thangane ka loi qa ngöne la hna trongëne la itre hna amekötin, tha tro pe a aqean.] Ketre ceitune lai nyine amamane la aqane hamëne la Tusi Hmitrötre la itre nyin la itre jole hne së hna ixelë memin. Ame hmaca la tro ni a traqa, ke, eni a ajane troa amamai epuni la aqane tro la Tusi Hmitrötr’a xatua së troa öhne la manatith, me tingeting.”
6 Pëkö trengamo ka tru nyine tro së a ithawakeune hune la atrehmekune la wesi ula i Akötresie. Tro la atrehmekune cili a hamëne la qoue Iehova, me xatua angatre troa xötrethengen’ej, nge tro ej’a hamëne la itre manathithi ka pë pun.—Ite Edo. 2:20, 21.