Tusi Hmitrötr—Qeqene Ne Ithuecatr, Me Mejiune Ngöne La Fene Hnengödrai Ka Gomegom
1 Kola traqa la nöjei pengöne jole kowe la fene hnengödrai enehila, matre loi e troa hetrenyi the së la ithuecatre me mejiun. Tusi Hmitrötre hmekujehi la qeqene ne la nyipi ithuecatr. Nge kola hamë së la mejiune kowe la ketre fene hnengödrai ka hnyipixe me ka meköt. (Rom. 15:4; 2 Pet. 3:13) Hna cinyihane e hnine la itus Auxiliaire, götrane 207, ka hape: “E pëkö Tusi Hmitrötr, ke, tha ijiji së kö troa atrehmekua Iehova, memine la itre manathithi ka sheminge ka xulu qa ngöne la thupene mele jëne la mele i Iesu ka pexeje hna hujën, nge thatreine kö së troa trotrohnine la itre hna amekötine hnei Akötresie ka troa nyijë së kowe la mele ka tha ase palua kö fene la musi ne la Baselaia ka mekötii Akötresie.”
2 Ame e treu nofeba, ke, easë a troa amamane hnyawaane la tulu qa ngöne la wesi ula i Akötresie, ene la Tusi Hmitrötr, matre troa xatuane la itre atr troa cile kowe la nöjei jole ka traqa kowe la fene hnengödrai. Easë a troa trofë la Les Saintes Ecritures — Traduction du monde nouveau, memine lo itus La Bible: Parole de Dieu ou des hommes? Nemene la nyine tro së a qaja matre hetre madrine i angatre troa hane sipu öhne la etrune la Tusi Hmitrötr?
3 Thupene la hne së hna qaja la eje së, ke, easë pë hë a qaja jë ka hape:
◼ “Nyipici, tha tingetinge hmaca kö la mekune së hnene la itre jole ka traqa koi së. Tro së a öhne eka la ithuecatre ka ijije matre atreine së cile kowe la itre jole celë? [Nue pi troa sa.] Öhne hë ni laka ixatua i Tusi Hmitrötre la ka troa thue madrine së. [E jë la Luka 11:28.] Ame la aliene la huliwa hun, ke, ene la troa ithuecatre kowe la nöjei atr troa e la Tusi Hmitrötr, matre ijiji angatre troa hane kapa la itre ithuemacany. Nge tro fe la sine itusi celë La Bible: Parole de Dieu ou des hommes?, a ketre ixatua ka sisitria göi troa inine la Tusi Hmitrötr. Hanawange la aqane qejepengöne la qaane la nöjei akötre enehila. [E jë la hnaluene xötre ngöne la paragarafe 9, götrane 187.] Hawe, maine hetre aja i nyipë troa e pe la sine itusi celë, ke, tru la madrinenge troa nu’eje koi nyipë.”
4 Iëne jë la ketre aqane trofë ka tha jole, tune la:
◼ “Ka sisitria catre koi hune troa xatuane la itre atr matre ijiji angatre fe troa metrötrëne la wesi ula i Akötresie, ene la Tusi Hmitrötr. Celëhi matre hetre madrinenge troa hamë nyipë la tarake celë, hna hape Pourquoi avoir confiance en la Bible. Hawe, ej’a amamane la eloine e tro së a e la Tusi Hmitrötre matre ijiji së troa hetrenyi la nyipi mejiune kowe la fene hnengödrai ka sisitria. [Fe jë ngöne la götrane 6, nge e jë la Salamo 37:29 ngöne la paragarafe ne nyipun.] Loi e tro nyipëti a e hnyawaane la tarake celë, nge ame ngöne la ijine eni a bëeke hmaca, ke, tro nyipëti a hane qaja la mekune i nyipë, kowe la mejiune hna thingehnaeane hnene la Tusi Hmitrötr.”
5 Hetre itre ka cainöje trootro ka canga ajane troa inine la Tusi Hmitrötre kowe la hnei angatre hna ithahnata memin, hanawange la ketre aqane nyiqaane cainöj:
◼ “Eni a wai epuni göi troa hnyingëne ka hape ajane kö epuni troa hane ini Tusi Hmitrötre ngöne la hnalapa i epun. Qa thene la Ua i Akötresie la Tusi Hmitrötr, nge itre hnen’eje hna eamon’a ameköti së. Ka maca la aqane ujëne la Tusi Hmitrötr, ene Les Saintes Ecritures — Traduction du monde nouveau, kola ahmaloinyi së göi troa ini tusi cas. Hna wai hatrene lai hnene la itre milio lao atr ka e la Tusi Hmitrötre e celë fene hnengödrai. Maine ajane nyipë, tro ni a amamane koi nyipë la itre pengön, me esisitrian’ej. [Fe jë kowe la götrane 1659 nge amamane hnyawaane jë lo taane 23A. Qanyine kö la aja i angatr, goeëne ju la caas, maine lue mekene tusi hna cinyihan, ce ithahnataane jë lai mekun. Qejepengöne jë la aqane amamane la itre mekene tusi hnei Akötresie hna mekune troa aeatrëne jëne la Baselaia.] Tru la madrinenge e troa bëeke hmaca, matre troa ithahnataane me nyipë la Baselaia nyine mejiune kow.”
6 Tusi Hmitrötre la qeqene ne ithuecatr, me qeqene ne la mejiune, nge nyipici ka tro xomi së lai kowe la mele ka tha ase palua kö. (Ioane 17:3, 17) Iehova la “ate ajane la nöjei ate asejëihë troa mel,” celëhi matre tru la madrine i nyidrë la easë a ithawakeune la atrehmekune ne la Tusi Hmitrötr.—1 Tim. 2:4.