Amamane Trongëne Jë La Itus L’humanité à la recherche de Dieu
1 Iehova a hamë së la xeni ne la ua ka tru alien, nge ka mana. Ame ngöne la treu Januare, ke, easë a troa trofë trongëne la itus L’humanité à la recherche de Dieu. Loi troa wange hmaca la alien, me iëne la itre mekune ka ijije tro epuni a huliwaane ngöne la kola trofë trongën’ej.
2 E maine epuni a öhne la ketre atr ka hmi, ke, ijije tro epuni a nyiqaane tune la:
◼ “Lue thauzane hë lao macatre ne thithifë hnene la itre keresiano matre traqapi la Baselaia i Akötresie. Kola mama hnene la lapaune i angatre kowe la Baselaia ka hape tha ceitune kö la hmi i angatre me itre xan. Hapeue la mekune i epun, nemene la hna troa kuca thatraqane la itre atr hnene la Baselaia? [Nue pi troa sa. Fe jë kowe la itre götrane 243, me götrane 251. Qejepengöne jë la hna kuca hnei Iesu, nge amamane hnyawaane jë la itre xaa manathithe hna troa aeatrëne fene la musi ne la Baselaia.] Ngacama tru catre hnei hmi e celë fene hnengödrai, ngo ame pe, ke, hna thëthëhmine la mejiune ne la Baselaia celë. Kola qejepengöne hnene la itusi celë la kepine matre easë a treqene tro la Baselaia a traqa ngöne la itre drai ka calemi. Ej’a qaja la itre ewekë hna troa kuca hnene la Baselaia, nge kola qejepengöne la aqane tro epun, memine la itre hnei epuni hna hnim’a hane kepe thangan’itr’ej. E maine ajane epuni troa e ej, ke, tru la madrinenge troa amë pe la itusi celë, 400 F. la thupen.”
3 Ijije fe tro epuni a tupathe la ketre aqane trofë celë:
◼ “Ame la easë a ithahnata memine la itre ka lapa ezi së, ke, easë a öhne laka tru la itre ka hni catre kowe la hmi angatr, nge tha ajane kö angatre troa saze. Ngo, e maine hna pane hetre ijine la itre atr troa wange hnyawaane la itre ini ne la itre xaa hmi, hawe, hapeue la mekune i epun, tro kö lai a xatua angatre troa hetre itrotrohni, me pë imethinë e celë fene hnengödrai? [Nue pi lai atr troa sa.] Hanawange la hna qaja hnene la Tusi Hmitrötre thatraqane la itre ka hnimi Iehova, memine la aqane tro angatr’a waipengöi itre xan.” Thupene la hna e la 1 Ioane 4:20, 21, ke, amamane jë la paragarafe 15, me 16 ngöne la götrane 10 ne la itus L’humanité à la recherche de Dieu.
4 Maine pena tupathe jë troa qaja ka hape:
◼ “Ajane la nöjei atr’asë troa mele e celë fen, nge hetre imetrötrekeu, ngacama isapengöne la qenenöje ne la itre atr, memine la itre hmi angatr. Ngo ame pe, ke, tha hne së kö hna melëne utihë enehila. Hna sine la itre isi hnene la itre hmi. Hapeue la mekune i epun, nemene la nyine kuca matre hetrenyi la tingeting, memine la nyipi imetrötrekeu? [Nue pi troa sa.] Hetrenyi la mene ka ijije thei Akötresie ka troa hamëne la tingetinge e celë fen, nge hnei Nyidrëti fe hna thingehnaeane troa aeatrën.” Fe jë kowe la iatr ngöne la götrane 13, nge e jë la Mika 4:3, 4. Qejepengön’atrune jë la mejiune ne la Baselaia, hamëne jë lai itus, nge ce wange ju la ijine matre troa iwaihmaca.
5 Ijije tro epuni a iëne troa huliwaane la boroshüre hna hape “Dieu se soucie-t-il vraiment de nous?” E maine ejehi, ke, ijije tro epuni a qaja ka hape:
◼ “Alanyimu la itre atr ka isa hnyinge ka hape pine nemene la Akötresie a nue la akötre e celë fen. Pine laka Akötresie ka pucatin’asë Nyidrë, hnauëne laka tha nyipune kö Nyidrëti la akötre së? Nemene la mekune i epun? [Nue pi troa sa.] Tusi Hmitrötr’a anyipicine ka hape tha hnei Akötresieti kö hna nuetriji së.” Fe jë ngöne la götrane 27, paragarafe 22, nge e jë la Salamo 37:11, 29. Amamane hnyawaane jë la aliene la iatr ka lolo, ka amamane koi së la mele ka troa traqa. E kapa ha la boroshüre hnene lai atr, ke, wange ju matre troa bëeke göi troa amamane la aqane troa inine la Tusi Hmitrötre jëne la itus.
6 Hnene la itre itusi së hna thuejëne la itre thauzane lao atr troa ajuine la aqane inine la Tusi Hmitrötr. Hna hamë mejiune koi angatre hnene la hnei angatre hna inin. (Sal. 146:5) Ketre hnëqa së lai troa xatua angatr.