Catre Jë Troa Ithahnata
1 Ngöne lo itre macatre ka ase hë, ke, nyimutre la itretre cainöje ngöne la itre xaa nöj, ka öhne laka jole catre hë troa ithahnata memine la itre atr ngöne la itre hnalapa i angatr. Kola qaja hnene la itre xane ka hape, ngöne la itre xaa ijine angaatr a cainöje trootro, ke, maine ala 100 lao hnalapa, ke, 50 lao ka pë atren. Qa ngöne lai, tru la traeme ne cainöje trootro, ngo co hi la thangan.
2 Ame ngöne la itre drai hnapan, ke, ijine mano la sabath kowe la itre atr. Ketre hnedrai hë la, nge saze fe hë enehila la itre hna majemin. Matre, ame enehila, itre xane pe kö a huliwa i maseta, maine trongëne la itre magazë ka tru troa itö ewekë thatraqane la fami angaatr, maine tro pena a ce tro qa ngöne la itre hnalapa i angaatre troa thele gaa uqa me itre ewekë nyine amadrinë angaatr. Drei la itre hnepe jole ka mama ngöne la cainöje trootro, ene la pë atr ngöne la hnalapa e itre sabath.
3 E pëkö atrene la itre hnalapa, ke, kola hape angaatre ngöne la itre xaa götran. Pine laka ame la aja së, ke, ene la troa ithahnata memine la itre atr, haawe, hnauëne laka tha thele jëne pe së troa ithahnata memine la itre hne së hna ixelë memine ecahu gojeny, ngöne la itre hna maketr, maine ngöne la itre hnë huliwa. Celëhi hna majemine kuca hnei Paulo, ene la troa “iöhnyi me nöjei atr o drai ngöne la hnaitö,” matre troa cainöje koi angaatr. (Ite Huliwa 17:17) Nyine tro lai a amamane koi së la ketre aqane cainöje ka hetre thangane ekö, nge ketre aqane cainöje ka hetre thangane fe ngöne la hneijine së.
4 Ame la easë a cainöje trootro ngöne la itre hnalapa, ke, easë a ixelë memine la itre atr ka troagö, maine pena angaatr a treqe ketre atr. Ame ngöne la ijine loi drai, ke, tru la ka lapa sine ta ngöne park, ame itre xan, angaatr a nyihnyawa la loto, maine kolo pena a wasin. Maine ka madrine la iqëmeke së, nge easë a canga ibozu memine lai atr, atreine së troa nyiqaane ithahnata. Maine angaatr a lapa ezi së, ke, qaja ju ka hape paatre kö angatre ngöne lo easë a traqa e cili lo, ngo ame enehila tru la madrine së laka ijije tro së a ithahnata me angaatr. Maine tro së a ketre sipu amamane la treng’aja së troa ketr la itre atr ka hni nyipici, alanyimu la angetre troa kepe thangane ka loi qa ngöne la hne së hna catr.
5 Loi e Troa Catre Troa Kepe Thangan: Hnene la ketre trejine hna qaja ka hape, angeic a easenyine la itre atr ka cile treqe kaar, maine ka troagö, maine ka lapa pena hune la itre loto i angaatr. Angeic a easenyi angaatr me hnyima me ithahnata amenyikeny kösë ketre sine ka ajane troa iwai. Celëhi matre, hetre thangane catre la huliwa i angeic, qa ngöne laka thaa itre itusi hmekuje kö la hna hamëne ngo hna nyiqaane fe troa inine la Tusi Hmitrötre memine la ka alanyim.
6 Hnene la ketre trejine memine la föe i angeice hna cainöje trootro ngöne itre hnalapa, nge ixelë ju hi nyidro memine la ketre föe ka xome trongëne la ca trenge xen. Nyidroti a nyiqaane ithahnata ju, me thuecatre koi eahlo pine la aqane catrei eahlo troa thele la itre aja ne la fami. Nyidroti a hnyinge ju ka hape “Ngo drei la ka ijije troa aejëne la itre aja ne la nöjei atr?” Drei la aqane amejëne la aja ne la föe. Matre thupene la hna nango porotrik, eahlo a alö nyidroti jë hnine la uma i eahlo, nge hnei nyidro hna nyiqaane tune lai troa inine la Tusi Hmitrötr.
7 Haawe, e epuni a mekune troa cainöje trootro ngöne itre hnalapa, maine e sabath, maine ngöne ketre drai ne la wiik, nge epuni a öhne laka pëkö atrene la itre hnalapa, ke, hnauëne laka tha xölehuje pe la itre ijine ka ijije matre troa ithahnata kowe la itre atr hnei epuni hna ixelë memin—ecahu gojenyi maine ngöne la itre xaa götrane pena? (1 Thes. 2:2) Ma tro jë epuni a öhnyi thangane la hnei epuni hna cainöje trootro, nge qaane madrine i epuni lai ngöne la huliwa ne cainöje i epun.