Isa Hnëkëne Jë La Aqane Troa Tro Fë Zonal
1 Ka madrine la hni së kowe la itre zonal, La Tour de Garde me Réveillez-vous! pine laka, hetrenyi e hnine itre eje la itre hna cinyihane nyine ithuemacanyi koi së nge thatraqane la hneijine së; ketre, itre hna cinyihane lai, ka qaja hnyawa la pengöne la fen, ketre tune fe la “nöjei ewekë ga jui Akötesie.” (1 Kor. 2:10) Qangöne lai, kola amekunë së hmaca ju lo nöjei mekune ka hnyipixe nyine ixatua koi së, hne së hna e hnine la itre zonale cili; Iehova hi a amamane trongëne la nyipici, jëne lai itre zonale cili. (Ite Edo. 4:18) Loi e atraqatre la ajane së matre hamëne atrune itre ej.
2 Pane Thele Jë Troa Atrepengöne La Teritoare i Epun: Tune ka la pengöne la itre atr ka mele ngöne la nöje i epun? Maine itre ka polepole palahi angatre pine laka, tru hnei jole i angatr, ma loi e tro epuni a hnëkëne la ketre aqane troa tro fë ithahnata ka xoxopatre hi, me canga qaja mekötine fe la aliene la tronge i epun. Nge maine epuni a mele ngöne la ketre götran, epuni a öhne laka, ka meije la aqane enijene la itre atr, ijije hi tro epuni a nango aqeane la aqane tro epuni a ithahnata. Maine alanyimu la itre atr ka huliwa ngöne la drai ka pexej, ma loi e tro epuni a bëeke troa wai angatre e hnaipajöhej, maine e heji lapa. Ketre, atreine hi tro epuni a öhnyi angatre ngöne la drai, e hnei epuni hna cainöje trootro ngöne la itre gojeny, maine troa xötrëne pena la itre magazë. Hetre thangane ka lolo catre qa ngöne la hna cainöje ngöne la nöjei ijine hnene la itre xaa trejin, ngöne la itre hna acili loto me ngöne la itre park, ezine la itre traon.
3 Thele Jë Epuni Troa Atrepengöne Hnyawa La Itre Zonal: Canga e jë la zonale ngöne la epuni a xötrei kapa. Iëne jë e hnine la itre hna cinyihane la itre mekune ka troa ketr la itre atr ngöne la götrane i epun. Nemene la itre mekune hnei angatre hna ajan? Thele jë ngöne lai hna cinyihane hnei epuni hna troa hnëkën, la ketre mekune ka tru nyine tro epuni a qaja atrun, nge sijihatrene ju. Hnëkëne jë la ketre hnyinge nyine troa ahlëne la aja ne lai atr. Iëne jë la ketre mekene tusi ka ijij, nyine troa e kowe la atr, maine hetre ijine koi epun. Mekune ju la aqane troa abone, nge nyi trepene ju la iwai hmaca hnapin.
4 Hnëkëne Jë La Itre Pane Trengewekë i Epun: Loi e tro epuni a iëne hnyawa la itre trengewekë nyine ibozu, jëne tro epuni a nyiqaane ithahnata. Nyimutre la itre ka öhnyi thangane ka loi qa ngöne la hna nyiqaane ithahnata ka tune la: “Hetre ewekë ka sisitria catre hnenge hna e ngöne la hna cinyihane hnine la zonale celë, nge eni a ajane troa hane ce thawa la itre mekune celë memine la itre xan.” Nyimutre la itre ka hyinge thenge la mekune hnei angatre hna hnëkëne hë, matre troa ce ithahnatan. Hanawange la ketre ceitun:
5 Maine kola troa ithahnatane hnyawa la hna cinyihan, ngöne la aqane manane la humuatr, pane hnyinge ju ka hape:
◼ “Nemene la ewekë hna troa kuca elany, ka aijijë së troa meköle tingetinge ngöne la jidr, matre thaa tro kö a xouene e atrekënö së jë maine akötrë së pena?” Qaja ju ka hape, hetrenyi thei epuni la ithuemacanyi ngöne la nyin la jole cili. Easenyi hë matre apatrene hnyawa pi hë hnene la nyin cili, lo nöjei pengöne ewekë ka azikozikone la aqane mel. Goeëne ju ngöne la zonal, la mekune ka hamëne la mejiune cili. Ame hë ngöne la epuni a bëeke hmaca, loi e tro epuni a amamane kowe lai atr la mekene 1 ne la itus Connaissance.
6 Maine epuni a hamëne la ketre hna cinyihane ngöne la mele ne la fami, atreine hi tro epuni a qaja ka hape:
◼ “Alanyimu la itre keme me thine ka öhne laka, ketre itupathi ka tru la troa hetrune la itre nekönatre ngöne la itre hnedrai enehila. Nyimutre la itre itusi hna cyinyihane thatraqane lai, ngo thaa hna kapa kö la itre mekunene hnene la itre atr ka waipengöne la itre jole e hnine la fami. Hapeu, hetre ka atreine kö troa hamëne la itre ixatua ka lolo nyine xomiujine hnyawa la mele ne fami?” Ithahnatane ju la ketre mekune ka ijije hna troa xome qa hnine la zonal, nyine troa amamane la aqane inamacanene la eamo ka eje e hnine la Tusi Hmitrötr. Maine epuni a troa iwai hmaca, ithahnatane ju la itre mekune qa hnine la Tusi Hmitrötr, ngöne aqane troa hiane la itre nekönatr, a hna qejepengöne ngöne la itus Connaissance götrane 145-8.
7 Maine kola troa ithahnatane la ketre hna cinyihane ka qaja la itre jole ka traqa kowe la mel, ijije hi tro epuni a qaja ka hape:
◼ “Nyimutre catre la itre atr ka hnengazo, hnene la ejolene la itre hnedrai hne së hna melëne enehila. Hapeu, aja i Akötresieti tro së a mele tune lai?” Amamai angeice ju la ketre hna cinyihane ka amamane la aqane troa cile kowe la itre jole ne la hnedrai së, maine pena ketre hna cinyihane ka troa hamëne la itre kepine ka aijijë së troa mejiune laka, pë hmaca kö troa hetrenyi la xou elany. Ithahnatane jë ngöne la kola troa iwai hmaca, la iatr me itre mekune hna fejane fene ej, ngöne la itus Connaissance, götrane 4-5, nge sisedrëne mekötine jë la porotrike kösë kolo hë lai a inine la Tusi Hmitrötre me angeic.
8 Loi e Troa Atreine Trotrohnine La Atr: Tro epuni a ixelë memine la itre atr ka isa pengöne kö la itre hna ajan, ketre tune mina fe la itre hnei angatre hna melën. Hnëkëne jë la ketre mekune hmekune la itre atr hnei epuni hna troa ithahnata memin. Mekune hnyawa ju fe la aqane tro epuni a qaja la itre ewekë cili, maine trahmanyi la hnei epuni hna troa ithahnata memin, maine föe, maine ketre atr ka qatre hë, maine ketre thöthi pena. Pëkö itre hna amekötine nyine troa qaja hnei ketre me ketre. Casi hi, troa qaja la ewekë hnei epuni hna öhne laka, ka hmaloi koi epuni troa ithahnatan, nge ka hetre thangan. Ngo eje hi laka, loi e troa mama laka ka madrine la hni së, tro fe a qaja la itre mekune qa kuhu hni, nge loi e tro fe a atreine drenge la itre xan. Ame koi itre atr ka “[itre hni ka ajan, NW]” tro hë angatre a öhne laka epuni a nyipici koi angatr, nge e cili tro hë angatre a ajane troa drei epun.—Ite Huliwa 13:48.
9 Ihamënekeune Ju La Ixatua: Ame ngöne la easë a ce thawakeune la itre xaa mekune memine la itre xan, easë a öhne e cili la itre xaa aqane troa ithahnata ka ketrepengöne kö koi së. Maine tro së a ce amacane memine la itre xane la itre aqane tro së a tro fë ithahnata, ijije hi tro së a hetrenyi la atrein, nge thaa tro kö së a luelue ngöne la easë a troa qaja la itre mekune cili, kowe la itre atr hne së hna cainöje kow. (Ite Edo. 27:17) Maine tro epuni a qaja lapaane la nyine tro epuni a ithahnatan, thaa tro hë epuni a hmengöhmengöne hnei xou, me ngönengöne qëmekene la itre hnalapa. Nyipiewekë tro la itre keme me thine a thele ijine troa xatuane la itre nekö i angatre troa hnëkë, troa drenge la nyudrene a cile fë la aqane nyiqaane ithahnata i angatr, me troa hamëne la itre xaa mekune nyine ixatua. Ketre, maine tro la itre ka xötrei cainöje a ce huliwa memine la itre trejine ka maca ha ngöne la troa tro fë la maca ka loi, atreine hi troa hetre thangane ka loi koi angatr.
10 Thaa loi kö e troa nyi ejolene menune pala ha la itre mekun, ngöne la epuni a hnëkëne la aqane tro epuni a tro fë la zonal. Tro hi a hneheene hnyawa la ketre mekune nyine troa ithahnatan, nge thupene lai, troa qaja la mekune cili cememine la thiina ka menyik. Maine tro epuni a atreine ketre xome la hnëqa i epun, me canga hnëkëne la nyine troa kuca, ijije hi tro epuni a kuca la ketre aqane tro fë ithahnata ka lolo, nge hna troa kapa hnyawa.
11 Ame la troa hamë zonal, ke, celë hi ketre huliwa ka sisitria catr, ke, jëne tro hi lai a haöthe la fene hnengödrai hnene la maca ne Baselaia. Maine tro epuni a amë La Tour de Garde me Réveillez-vous! ngöne la itre ihnatrapaimene la itre atr ka hni ka menyik, me abone angatr, tro pë hë la itre zonale a nyi trenge ithahnata i epun. Mekune hnyawa ju epuni la enyipiewekëne itre ej, memine la aqane tro la maca e hnine itre eje a amelene la itre atr. Nyine amadrinë Iehova la troa ‘kuca la loi nge troa ce thawa me itre xan’.—Heb. 13:16.