Loi e Tro Së a Ketre Hujëne Xanë Së
1 Hna perofetane hnene la atre cinyihane la Salamo, ene Davita, ka hape, tro la nöje i cilie a “hujëne xanë angate kö”; a kösë kola troa “canga hetre hni ne ajan.” (Sal. 110:3, Ithuemacanyi fene la hna cinyihan, NW) Ewekë la ka mama ngöne la aqane mele ne la itre trejine me easë ngöne la fene hnengödrai asë. Ngöne lo foa lao macatre ka paatre hë, hna catre pala hi hnene la nöje i Iehova troa haöthe la fene hnengödrai hnene la maca ka loi ne la baselaia, celë hi matre hna sasaithe ngöne hi la caa macatre la miliare lao itre hawa ne cainöj. Eje hi laka, thaa easë hmekuje kö a hujë së jëne la easë a cainöje memine la troa inine la itre atr, ngo nyimutre kö la itre xaa aqane troa xatuane la itre xan.
2 Itre Aqane Troa Hujëne Xanëne La Mele Së: Nyimutre la itre atr ka aja ixatua troa hane sine la itre icasikeu. Hnauëne kö la thaa tro kö troa trothei angatr? Ame itre xane ke, ka wezipo angatr, nge uti ipië trootro hë la mele i angatr, maine hna cipa angatre pena e pital. Tuneka matre hane vizitë angatre fe hnei epun, maine troa thele la itre xaa aqane troa ixatua? Troa aja ixatua hnene la ketre atr, maine hnene pena la ketre fami. Hapeu, hane kö epuni mekune troa hane hë angatre troa hane sine la etidi epuni memine la fami i epun? Ma troa ajane hnene la ketre pionie maine ketre ka cainöj, troa thele sinatro kowe la hna cainöje trootro. Hapeue matre ce huliwa pena me angeic, ngöne la hna cainöj? Celë hi itre xaa aqane tro lai a saenëne la mele së matre troa kuca la loi kowe la nöjei sinee së ngöne la lapaun.—Gal. 6:10.
3 Loi e tro la itre trejine trahmanyi a amamane la hni ne ajane i angatr, matre tro la organizasio i Iehova a acili angatre ngöne la itre hnëqa ne atre thup, me drikona. (1 Tim. 3:2-10, 12, 13; Tito 1:5-9) Nge pine laka, kolo pala hi a kökötre la etrune la itretre cainöj, kola ajane catrëne fe troa hetre trejine trahmanyi ka trongëne hnyawa la itre hna amekötin, nge ka hetre ajane troa elemekene la huliwa ne cainöje me ini, me troa thupëne la itre ekalesia.—1 Tim. 3:1.
4 Maine tro pena a alanyimu the së la itre ka thele troa akökötrene la aqane kuca i angatre la aja i Iehova, maine hnene la troa pionie ka ixatua ngöne la itre xaa ijin. Nge maine hne së hna thele troa saze hnyawa fe la porogarame së, ijije hi tro së a xome lapaane la huliwa cili, maine tro pena a saene troa pionie lapa. Hapeue la aqane mele së, eje kö a aijijë së troa nue la nöje së me tro kowe la ketre götrane gaa aja ixatua? Hapeu, ijije kö tro së a hane huliwa hnine la Bethela me hane ixatua troa akökötrene la huliwa ne cainöje ngöne la fene hnengödrai asë? Ketre hetre nyine tro mina fe a kuca ngöne la itre hna xupi Uma ne Baselaia, Uma ne Asabele, me hnë bethela; kola ajane troa tru hnei ka saene thatraqane la itre huliwa cili. Atraqatre catre la madrine së kowe la itre atr ka saene kowe la itre huliwa ka loi cili, nge tru catre la itre manathithi hnei angatre hna kapa!—Luka 6:38.
5 Itre nyine haine la itre ijine celë. Jëne la uati hmitrötre i Nyidrë, kola kuca hnei Iehova cememine la nöje ka saene koi Nyidrë la ketre huliwa ka sisitria, a ka jilapane enehila la fene hnengödrai asë! Ngo eje hi laka, jëne la organizasio i Nyidrë, Iehova a catre könë së asë troa akökötrene la aqane cainöjëne së la Baselaia; qa ngöne lai, nyipi ewekë tro së a isa hnyinge me hape, ‘Hapeu, eni pala kö a hane hujëne xanëne la meleng?’ Thupene lai, loi e tro së a waipengöne hnyawa ngöne la thith, la aliene hni së me aqane troa mel. Tro la aqane catre së troa nyihlue i Iehova a canga upi së troa kuca asë la hne së hna atrein thatraqane la huliwa ka hmitrötr, nge celë hi ka troa amadrinëne la hni i Iehova!—Zef. 3:17.