Huliwane Hnyawane Jë La Itre Pepa Ne Ihë

¹ Nyipi ewekë catre la itre pepa ne ihë, pine laka, kola troa thuemacane la itre atr ka lapa ngöne la teritoare së, la aderesi ne la Uma ne Baselaia, memine la hawa ne la itre icasikeu. Celë hi matre, loi e troa hamëne itre eje kowe la nöjei atr asë hne së hna ithahnata memin. Haawe, loi e troa xome hnene la itre ekalesia asë, la nyimu pepa ne ihë. Ame koi itre ekalesia ka saze traeme ne icasikeu ngöne la nöjei macatre, e treu januare, loi e tro angatre a canga komadëne la itre pepa ne ihë ka hnyipixe, qëmekene la treu okotropa ne la nöjei macatre; jëne tro lai a atre la itre hawa ne icasikeu. Troa xome la pepa ne sipo, hna hnëkëne thatraqane lai. Nge e hetrenyi hë angatre la itre pepa cili, haawe, nemene la aqane troa huliwane hnyawa itre ej?

² Nyimutre la itretre cainöje ka öhne laka, hetre thangane ka loi la angatre a hamëne la pepa kowe la ketre atr, ke, hmaloi koi angatre troa ibozu, me nyiqaane ithahnata me angeic. Ketre, maine tro së a amamane la porogarame ne la itre icasikeu, maine qaja la ithuemacanyi ka eje ngöne la ketre götrane lai pepa, haawe, atreine hi tro së a hane ithahnatane fe la pengöne la huliwa së, memine la aliene ej. Ka lolo catre mina fe tro la itre keme me thine a hane nue la itre nekö i angatre troa hamëne la itre pepa ne ihë ngöne la hna cainöje trootro. Ketre, ame ngöne la angatre a cinyanyi troa qeje tus, loi e tro fe la itre trejine a hane amë hnine lai tusi angatre la ketre pepa ne ihë, me hane hëne la itre atr troa sine la itre icasikeu. Ketre, atreine fe hi tro së a amë pe la itre xaa pepa ne ihë fene la qëhnelö ne la itre hnalapa ka pë atren, ngo loi e troa line hnyawa itre ej, matre sihngödre kowe la itre ka tro agö ka easenyine lai uma.

³ Itre jiane huliwa ka lolo catre la itre pepa ne ihë, pine laka, itre eje a troa ea la itre atr ka menyik, kowe la nyipici. Hetrenyi la ketre föe ka olene la hna hane hamëne koi eahlo la caa pepa ne ihë, matre hnei eahlo hna eatrëne la aja ka eje hë thei eahlo, ene la troa trotrohnine la Tusi Hmitrötr. Thupene la jidri ka pexeje ne thithi nyidroti koi Akötresie, ame e hmakany, kola fenifeni qëhnelö hnene la lue trefën. Nyidroti a tue ngöne la gaa lailai ne la qëhnelö, me suene ka hape, thaa ijine tro pala kö a fe qëhnelö. Ame hnene la lue Temoë hna aline pe fene la qëhnelö la caa pepa. Hna cinyihane ka hape: “Atrepengöne jë la Tusi Hmitrötre i nyipunie.” Ene pe öhne ju eahlo lai, ame hna fe pi la qëhnelö. Canga nyiqaane ju fe kö la etid, nge thupene lai, eahlo fe a hane xome la bapataiso. The wangacone kö së la mene ne la uati hmitrötre i Akötresie, ngo catre pi pe së troa huliwane hnyawa la itre pepa ne ihë; aqane amamane hi lai ka hape, easë a kuca apexejene la huliwa ne cainöje së.​—Wange ju la Huliwa ne Baselaia ne febuare 1994, götrane 1.