Itre Temoë i Iehova—Angetre Tro Fë Hnyawa La Evangelia
1 Hetrenyi la hnëqa hna hamëne hnei Iesu kowe la itretre drenge asë, ene la troa tro fë la evangelia; celë hi matre hnei nyidrëti hna upi angatre troa cainöjëne la maca ka loi ne la Baselaia. (Mat. 24:14; Ite Huliwa 10:42) Hna amamai tulu ka loi ngöne la huliwa cili hnene la itretre pane drei Iesu ekö, ngöne laka, thaa mano kö angatre cainöjëne la Baselaia—thaa ene hmekuje kö ngöne la itre uma ne hmi, ngo ngöne fe la nöjei götrane angatre a troa iöhnyi memine la itre atr, me ngöne la hna cainöje ngöne itre hnalapa trootro. (Ite Huliwa 5:42; 20:20) Ketre tu së mina fe itretre anyipici Iehova enehila, hne së hna amamane hnyawa fe ka hape, easë la itre nyipi keresiano ka tro fë la evangelia; easë a tro fë la maca ne Baselaia ngöne la 232 lao nöje ka tru, me bapataisone la itre atr ka xötrei lö, laka, waane milio nge sin, a ngöne hi lo köni macatre ka paatre hë! Qa ngöne nemene matre hetrenyi pi la itre thangane ka loi ngöne la huliwa së?
2 Thatreine Kö Së Lapa Fë La Maca Ka Loi: Ame la angetre tro fë la evangelia, ke, itretre cainöje angatr, maine itretre tro fë angatre la maca ka loi. Eje the së la hnëqa ka lolo catr, ene la troa iqajakeune la Baselaia i Iehova—celë hmekuje hi la nyipi maca ka loi nyine amenyikene la akötre ne la itre atr enehila. Atraqatre la madrine së qa ngöne laka, atre hë së la pengöne la hnengödrai ka hnyipixe, ka troa musinëne hnyawa elanyi la fene ka hnyipixe, ene la itre atr ka hnine la meköt, angetre troa lapaane la paradraiso hna troa acile hmaca. (2 Pet. 3:13, 17) Easë hmekuje hi la itre ka kapa la mejiune cili, nge loi tro fe së a canga hane ce thawa memine la itre xaa atr.
3 Loi e The Së La Nyipi Ihnim: Ame la tro fë evangelia, celë hi huliwa la ka troa hamëne la mel. (Rom. 1:16) Celë hi kepine matre, atraqatre la madrine së troa tro fë la maca ne Baselaia. Pine laka, easë a tro fë la nyipi evangelia, easë a hnime la itre atr, nge jëne la ihnimi cili, easë a canga thele troa hane ce thawa me angatre la maca ka loi—maine itre fami së, itretre lapa easenyi së, itre hne së hna atre, me itre xaa atr ju kö. Maine tro së a kuca la huliwa cili hnene la hni së ka pexej, haawe, celë hi ketre aqane tro së lai a amamane hnyawa la nyipi ihnimi së kowe la itre xaa atr.—1 Thes. 2:8.
4 Troa Xatua Së Hnene La Uati Hmitrötre i Akötresie: Kola acatrene la mejiune së hnene la Wesi Ula i Akötresie, laka, ame ngöne la easë a troa kuca la huliwa së, ene la troa trane me fie la itre itine feja ne la Baselaia, haawe, Iehova la ka troa “acian.” Celë hnyawa hi ewekë hne së hna öhne ngöne la organizasio së enehila. (1 Kor. 3:5-7) Eje hi laka, uati hmitrötre i Akötresie la ka xatua së troa tro fë la evangelia, me nyi thangane hnyawa la huliwa së.—Ioela 2:28, 29.
5 Kola xatua së ngöne 2 Timoteo 4:5 troa “kuca la qâ ne la ate amamane la maca ka loi,” nge pine laka, tru la trenge ihnimi së kowe la itre atr asë, loi e hetrenyi fe së la ajane troa hane tro fë la ithuemacanyi ka sisitria, ene la maca ka loi ne la Baselaia ngöne la nöjei ijin, me mejiune hnyawa laka, tro pala hi Iehova a amanathithine la huliwa së.