Maine Hetre Thangane Ka Loi, Huliwane Jë!
1 Kolo pala hi a hamë së hnene la Huliwa ne Baselaia la itre aqane nyiqaane ithahnata ka nyimutre, nyine troa xatua së ngöne la huliwa ne cainöj. Celë hi matre, hetrenyi pala hi the së la itre mekune ka hnyipixe, ngöne la aqane troa aciane la aja ne la itre atr kowe la maca ne Baselaia. Maine jë epuni a isa catre troa xome me inine la caasi maine nyimu aqane nyiqaane ithahnata ngöne la nöjei treu. Ngo kola öhne hnene la itre xaa trejine laka, thaa qea petre kö hnei angatre hna tro fë la caas qa ngöne itre ej, nge kola traqa la ketre Huliwa ne Baselaia, cememine la itre xaa aqane nyiqaane ithahnata ka hnyipixe. Qa ngöne lai, ma nyipi jole koi së e troa inine la ka hnyipixe, ke, thaa maca hnyawa pala kö koi së troa huliwane lo hnapan.
2 Eje hi laka, nyimutre catre la itre pionie, itre thauzane la etrun, nge tune mina fe la itretre cainöj, nyimu traeme hnei angatre hna xome troa cainöje trootro. Ketre nyimutre la itre ekalesia ka kuca asë la itre teritoare i angatr, ngöne hi la itre hnepe wiik. Celë hi matre, atraqatre catre la madrine ne la itretre cainöje troa kapa la itre aqane nyiqaane ithahnata ka hnyipixe, me itre mekune nyine troa xome ngöne la kola tro fë la maca. Haawe, itre ixatua lai, ka troa akökötrene la atreine i angatr, matre maca troa cainöjëne la maca ka loi. Ketre, tro hë angatre a hetre ajane trootro troa xome la huliwa ne cainöj, ke hetre thangane catre eje koi angatr; nge kola xatua angatre fe troa cile kowe la itre jole ka eje ngöne la hna cainöje trootro.
3 Ngo eje hi laka, maine kola canga drei së hnene la itre atr, pine laka, lolo la aqane nyiqaane ithahnata hne së hna hnëkën, haawe, loi e tro së a xome me huliwane pala hi ej! Thaa nyipi ewekë kö troa saze la ketre aqane nyiqaane ithahnata, e easë a öhne laka, ka loi la thangane ej. Caasi hi, tro pe së a wange la aqane tro së a ce huliwane eje memine la itusi nyine troa tro fë ngöne la treu. Ame ngöne la easë a wange hmaca la itre mekune nyine ixatua hna hamëne hnine la Huliwa ne Baselaia, haawe, loi e troa thele la itre mekune ka tru hne së hna ajane troa ce huliwane memine la aqane nyiqaane ithahnata së.
4 Haawe, ame hë la easë a kapa la Huliwa ne Baselaia ka hnyipixe, loi e tro pala hi së a mekune hnyawa laka, hetrenyi e hnine eje la itre aqane nyiqaane ithahnata ka hmaloi troa huliwan, nge itre mekune lai nyine ixatua koi së. Pëkö engazon, tro së a xome itre ej. Ngo maine easë a öhne laka, hetre thangane catre la aqane nyiqaane ithahnata hne së hna huliwane hë ngöne la teritoare së, haawe, the canga saze kö, ngo lapa fë ju! Ame la nyipi ewekë, ke, ene la tro së a “kuca asë la qâ” së thenge la thiina ka loi, me thele la itre atr ka menyik, matre troa xatua angatre troa hane itretre drei Iesu.—2 Tim. 4:5.