“Kuca Jë La Nyine Mekune Koi Ni”
1 Kola mama ngöne la mele ne la atr, laka, thatreine kö angeice troa wangatrune pala hi la itre mekune ka nyipi ewekë. Celë hi ketre kepine matre ame ngöne la Iesu a acile la “xeni ne jidi ne la Joxu,” haawe, hnei nyidrëti hna upe la itretre drei nyidrë me qaja koi angatre ka hape: “Kuca jë la nyine mekune koi ni.” Qaane ju hi lai, ame göi troa atrune la ijine meci Iesu, haawe, kola drenge thenge hnene la itre keresiano me catre “amamane la elelengëti ne la Joxu uti hë e traqa ha nyidë.”—1 Kor. 11:20, 23-26.
2 Easenyi pala ha matre kapa jë hnei Iesu e koho hnengödrai la itre atrene tixenuë ne la “hnënge mamoe ka xalaith.” (Luka 12:32; Ioane 14:2, 3) Hetre madrine ka tru, ngöne la macatre celë, kowe la munëne ne la itre hna iën, pine laka, angatre hmaca a troa atrune la xeni ne jidi ne la Joxu, e 11 eiperem, cememine la ka ala nyimu ne la “itre xaa mamoe,” a kolo pala hi a kökötre la etrun. (Ioane 10:16; Hna ama. 7:9, 10) Tro ha acatrene hnyawa la aqane wange së la etrune la ihnimi Akötresie, ngöne la Nyidrëti a nue la hupuna i Nyidrë ka caas, thatraqane la nöjei atr asë. Tro ha amamane hnyawa la tulu i Iesu, me ihnimi nyidrë, memine la aqane mele nyipici nyidrë, ngöne laka, hna meci nyine thupene mel; ketre, troa amekunëne fe laka, nyidrëti hë enehila a musi ngöne la Baselaia i Akötresie, nge nyimutre la itre manathithi hna troa kapa hnene la itre atr, jëne la Baselaia cili. Nyipici laka, ketre ijine lai tro pala hi a amekunën!
3 Hnëkë Jë Enehila: Loi e tro së a kuca asë la hne së hna atreine matre troa tro loi la hneijine easë a hnëkë kowe la drai cili; ketre matre, troa ketre hnedrai ne madrin, me ole koi së, memine la nöjei atr asë ka troa ce me easë. Qa ngöne lai, loi e tro së a hnëkëne la itre hni së, maine troa e la itre xötre ne la Tusi Hmitrötr, ka qaja la itre hnepe drai tixenuë ne cainöje Iesu, memine lo itre ewekë hna kuca koi nyidrë uti hë la humuthi nyidrë. Ketre, nyipi ewekë fe troa ce wange hmaca la itre wiike qëmekene la drai ne Amekunën, ngöne la etid ne la fami, lo itus Le plus grand homme, götrane 112-16.
4 Ala ije la itre atr hnei epuni hna atre ka ijije troa traqa, e hnei epuni hna thele troa akökötrene la ajane i angatre troa traqa kowe la ijine cili, me könë angatr, me amamane la madrine i epuni troa iöhnyi me angatr? Fejane jë ngöne ketre pepa la itre ëje i angatr, nge thele jë la aqane troa kuca, matre tro fe angatre a hane sine lai icasikeu. Thupene lai, xatua angatre jë troa hane sine pala hi la itre icasikeu, matre troa kökötre ngöne la götrane la ua.
5 Hetrenyi la itre hna amekötine thatraqane la itre drai qëmekene la drai ne Amekunën; itre ijine hna hnëkëne nyine troa aijijëne la itre trejine troa catre cainöj. Thenge la porogarame i epun, hapeu, ijije kö tro epuni a pionie ka ixatua ngöne la treu eiperem? me mei? Ame la ketre hatrene ka sisitria ka troa amamane ka hape, easë a madrine troa mekune hmaca la nöjei eloine la mele hna hujëne hnei Iesu koi së, ke, ene la troa qeje Iehova Akötresi së kowe la itre xaa atr, me amamane koi angatre la itre manathithi hna troa hamëne hnene la Baselaia hna musi ngön hnene la hupuna i Nyidrë.—Sal. 79:13; 147:1.