Itre Nekönatr—Epuni La Madrine Hun!
1 Itre nekö trahmanyi me jajiny, hapeu, epuni kö a hane melëne la hna amekötine hnei Akötresie, ene la troa hane sine la itre huliwa ne la ekalesia? (Deut. 31:12; Sal. 127:3) Drei la madrine ka tru, troa öhnyi epuni ezi hun, ngöne la easë a ce hmi koi Iehova! Tingetinge la itre hni hun, ngöne la epuni a lapa hnyawa ngöne la itre ijine icasikeu, me drenge hnyawa la itre hna qaja. Nge eahuni a aciac, ngöne la epuni a hane hamë mekun, thenge la hnei epuni hna atrein. Ketre atraqatre mina fe la madrine ne la ekalesia asë, ngöne la epuni a kuca la hnëqa hna hamëne koi epuni ngöne la Ini ne Cainöje Trootro Qa thei Akötresie, nge kola öhne laka hetre ajane i epuni troa hane ce cainöje trootro me eahun, me ngöne fe la eahuni a drenge ka hape, hnei epuni hna catre anyipicine qëmekene la itre sine ce ini me itretre ini epun.—Sal. 148:12, 13.
2 Loi e tro epuni a atre laka, atraqatre la madrine huni ngöne la eahuni a öhne la elolone la itre aqane ujë i epun, memine la eloine la aqane mele i epun, ketre lolo la thiina i epun, nge epuni a metrötrëne la itre ka tru. Ketre, tru catre la madrine huni ngöne la epuni a amamane ka hape, epuni a ‘mekune hnyawa la Atre ixupe ka pucatine asë,’ ngöne laka, epuni a thele me ajane la itre huliwa i Akötresie ngöne la mele i epun.—Ate cai. 12:1; Sal. 110:3.
3 Qaja Jë Koi Huni La Itre Aja i Epun: Hna qaja hnene la ketre nekönatre trahmanyi ka eitre lao macatre, kowe la atre thupëne la distrik, ka hape: ‘Ame la ewekë hnapan, eni a ajane troa xome la bapataiso, thupene lai, troa hane ixatua hnine la ekalesia, maine ngöne sono, maine troa tro fë la itre micro, maine troa ketre ka ixatua ngöne la itre hna hamë itus, maine troa e tus ngöne la itre ijine Ini Tus me ngöne la itre ijine ini ne La Tour de Garde. Nge, eni mina fe a ajane troa hane drikona, nge thupene lai troa hane qatre thup. Eni fe a ajane troa hane pionie, me hane sine la ini thatraqane la itre pionie. Ketre, eni fe a ajane troa lö kowe la Bethela, me troa hane ketre atre thupëne la sirkoskripsio maine distrik.’ Drei la hatrene ka amamane hnyawa la ajane i angeice troa nyihluei Akötresie!
4 Ame la madrine hun, ke, ene la eahuni a öhnyi epuni e tru trootro, me kökötre trootro ngöne la götrane la ua, nge epuni a eatrëne me traqa kowe lo itre hnei epuni hna mekune kow. (Wange ju la Luka 2:52.) Ame ngöne la nöjei macatre, ala nyimu catre la itre nekö trahmanyi me jajinyi ka tui epun, itre thauzan, ka thaa bapataiso petre kö ngo angatre hë a nyiqaane cainöj, nge thupene lai, angatre hë a hane xome la bapataiso matre troa amamane laka angatre a nue la mele i angatre ka pexeje troa hane nyihluei Iehova. Tro kö a elitrauje la madrine hun, ngöne la eahuni a troa öhnyi epuni elanyi e xome la huliwa ne pionie ka ixatua, me hane pionie hut. Haawe, itre nekönatr, epuni la madrine hun, me nyine iatrunyi ka sheminge kowe la Tretretro së e hnengödrai. Epi tro Iehova a amanathithi epuni hnyawa!—Ite edomë 23:24, 25.