Loi e Troa Aupunyi Angetre Treij
1. Pine nemene matre nyipi ewekë troa akeukawane la hni ne la itre atr ka treij?
1 Ame kowe la itre atr ka pë mejiun, tre, ketre ewekë ka akötre catre la kola meci hnene la ketre sinee i angatr. (1 Thes. 4:13) Nyimutre la itre ka hnyinge, ka hape: ‘Pine nemene matre kola meci la itre atr? Nemene la ewekë ka traqa koi angatr ngöne la angatr a mec? Ijije kö tro ni a hane iöhnyi hmaca memine la sineng?’ Hane cahu itre xaa mekune nyine ixatua göne matre tro sa atreine akeukawane la hni ne la itre atr, hne së hna cainöje kow ka treije piine la ketre atrene la fami maine ketre sinee i angatr ka mec.—Is. 61:2.
2. Ame la kola qaja koi së hnene la ketre atrene la hnalapa, ka hape, nyidrëti a hnëmec, tro kö sa aqeane la aqane cainöje së?
2 Jëne La Hna Cainöj Trootro Ngöne La Itre Hnalapa: Ijije tro la ketre atrene la hnalapa a qaja koi së, ka hape hetre ka meci ngöne la fami angeic. Hapeu, hleuhleu kö angeic? Ka tiqa kö hnei atr ka hnëmec e hnine la hnalapa? Celë hi matre, thaa tro kö sa aqeane troa cainöje ngöne la hnalapa cili. (Ate cai. 3:1, 7) Loi pe tro sa amamane la utipine së me hamë angeic la ketre tarak ka ihmeku memine la ka traqa koi angeic, ketre zonal pena, maine ketre boroshür, nge loi e troa canga nue angatre cememine la hni ka menyik. Thupene lai, ijije hmaca tro sa wai angeic ngöne la ijine ka loi, matre troa ce thawa me angeic la itre mekune qa hnine la Tusi Hmitrötr, ka troa akeukawane la hni angeic.
3. Maine ijij, nemene la itre xötr qa hnine la Tusi Hmitrötr, nyine tro nyipunieti a amamane kowe la ketre atr ka hnëmec?
3 Ame ngöne la itre xaa ijin, loi e tro sa atrehmekune hnyawa la itre hna qaja hnene la itre atr, ngöne la kola xötrei iöhny. Ngacama, thaa ijine tro kö a lepe triji la itre mekune ka akötr, loi pe, ijije troa ce e me angatre la itre hna thingehnaeane hnei Tusi Hmitrötr göne la mele hmaca. (Ioane 5:28, 29) Maine pena, ijije tro sa ce thawa me angatr la hnei Tusi Hmitrötr hna qaja göne la pengöne la itre ka mec. (Ate cai. 9:5, 10) Tro fe a akeukawane la hni ne la itre atr hnene la hna cinyihane ngöne la Tusi Hmitrötr, nge ka qeje pengöne la itre xaa atr hna amelene qa hna mec. (Ioane 11:39-44) Ame la ketre nyine tro sa wanga atrune hnyawa, tre, ene lo itre trenge ewekë hna qaja hnei Iobu, ketre atr ka meköt, nge ka amamane la aqane mejiune nyidrë koi Iehova. (Iobu 14:14, 15) Qëmekene troa nue la atr, ijije hi tro sa hamëne la ketre boroshür hna hape, Nemene La Pengö Së Ngöne La Easë a Mec?, E Meci Hë La Atr Hne Së Hna Hnim, maine pena la ketre boroshür maine tarak ka ihmeku memine la ka traqa koi angatr. Ijije tro pena hamëne la itus Ini Tusi Hmitrötr, me pane amamane la itre mekune hna eköhagene ngöne la mekene 6, nge ame e thupen, tre, troa ce axeciëne memine la atr la drai ne ce ithanatane la ketre taan ngöne pala hi la götrane hna nyiqaane wange hë.
4. Nemene la itre xaa ijin ka aijijë së troa akeukawane la hni ne la itre atr?
4 Ngöne La Itre Xaa Ijin: Hapeu, ijije kö troa hane sine hnene la itre atr ka thaa hane kö anyipici Iehova la kola hmiine la wezipo e hnine la Uma ne Baselaia? Loi e troa hnëkëne la itre itus ka troa akeukawane la itre hni angatr. Nyimutre la itre xaa uma ne fetra ka madrine troa kapa la itre itus ka ijije troa xatuane la itre hnepe lapa ka hleuhleu piine la ketre sinee. Ame ngöne la itre xaa ijin, tre, kola ithuemacanyi jëne la itre zonal laka meci hë la ketre atr, ene pe, kola aijijë së troa hane cinyihane la ketre sine tus matre troa akeukawane la itre atrene la fami ka treij. Drei la ketre ceitun, thupene la hnene la ketre trahmanyi ka meci föen memine la nekö i nyidrëti jajinyi hna kapa la ketre tus memine la itre xaa tarak, hnei nyidroti hna tro kowe la hnalapa ne la atr ka cinyihane lai tus me hnyingë nyidrëti ka hape: “Nyipëti la ka iupi fë koi ni la tusi celë? Nga eni a ajane troa hane atrepengöne hnyawa la Tusi Hmitrötr!” Hna kapa hnene la trahmanyi cili memine la nekö i nyidrëti jajinyi troa inine la Tusi Hmitrötr, nge nyidroti fe a nyiqaane troa sine la itre icasikeu ne la ekalesia.
5. Pine nemene matre loi e tro sa thupëne la itre ijine matre troa akeukawane la hni ne la itre atr ka latresi pine la meci ne la ketre sinee i angatr?
5 Kola qaja ngöne Ate Cainöj 7:2, ka hape: “Loi troa tro kowe la uma e kola teije ngöne hune la troa tro kowe la uma e kola nyikeine ngön.” Ame la atr ka hleuhleu pine la meci ne la ketre sinee, tre, hetrenyi la hni ne ajane i angeic troa drenge la Wesi Ula i Akötresie, hune la itre atr ka nyinyape thele madrin. Loi e tro asë hi së a thupëne la itre nyipi ijine matre troa akeukawane la hni ne la itre atr ka hleuhleu ka meci sineen.