Itre Itus Ka Nyitrepene La Mel Me Huliwa Ne Cainöj Pepa Nyine Huliwan
6-12 JULAI
ITRE TRENGAMO QA HNINE LA TUSI HMITRÖTR | ESODO 6-7
“Tro Eö Enehila a Öhne La Ewekë Hnenge Hna Troa Kuca Koi Farao”
it-2-F 309 par. 5
Mose
Hna aca saze la itre trahmanyi e Isaraela. Ame ngöne lo qan, hnei angatr hna kepe Mose ceitu me ketre atr hna up hnei Iehova. Ngo ame e thupen, hnei angatr hna nuetriji Mose ngöne lo Farao a ahacene la huliwa i angatr. Ame hna décourage hnei Mose, me thith koi Iehova. (Es 4:29-31; 5:19-23) Ame e cili, hnene la Atr Ka Tru Trenge Men hna akeukawanyi angeic, me amamane la hnei Nyidrëti hna troa kuca, kolo hna lapa treqen hnei Aberahama, me Isaaka, me Iakobo. Tro Nyidrëti a amele Isaraela, me atiqane angatr ngöne la nöje hna thingehnaean. Troa mama e cili la aliene la ëje i Iehova. (Es 6:1-8) Ngazo pe, tha hna drei Mose kö hnene la itre trahmanyi ne Isaraela. Ngo, thupene lo hna 9ème akötr, hnei angatr hmaca hna ce me angeic me ce huliwa. Matre hmaloi hë koi Mose thupene la 10ème akötr troa hnëkë angatr, me ami angatr kösë trongene isi.—Es 13:18.
it-2-F 309 par. 3-4
Mose
Qëmekei Farao e Aigupito. Hnei Mose me Arona hna sine la ketre ‘isi i haze.’ Hnei Farao hna huliwane la mene la itre haze ne Aigupito jëne la itre magisië hna hëne ka hape, Iane me Iamebere matre troa cile kowe la mene i Iehova. (2Ti 3:8) Ame la pane iamamanyikeu hnei Mose hna upi Arona troa kuca, ke, kola amamane la ecatrene la mene i Iehova hune la itre haze ne Aigupito. Ngo, hnei Farao hna catre he. (Es 7:8-13) Thupene la hnakönine akötr, önine la itre magisië, ‘Celë hi wanakoime i Akötresie!’ Nge pine laka, hna lepi angatr hnene la itre thewek, thatreine kö angatr troa tro koi Farao matre troa cile koi Mose.—Es 8:16-19; 9:10-12.
Itre akötr ka axapone me ka aelëhnin. Hna upi Mose me Arona troa isa thuemacanyine la 10 lao akötr. Hna eatr la itre akötr, nge kola amamane laka, Iehova la ka upi Mose. Hna qaja atrune la ëje i Iehova e Aigupito. Ame la itre xa angetre Isaraela, me angetre Aigupito, kola axaponyi angatr hnene la ëje cili. Ngo, ame Farao me itre ka ce me angeic, kola aelëhni angatr. (Es 9:16; 11:10; 12:29-39) Tha mekune kö la angetre Aigupito laka, kola akötrëne la itre haze i angatr. Ngo ka xecie koi angatr laka, Iehova a amekötine la itre haze cili. Thupene la hna 9ème akötr, “hlemu atraqate Mose ngöne la nöje Aigupito, me thene la nöjei hlue i Farao, memine la nöj.”—Es 11:3.
Troa Sine Thel La Itre Mekune Ka Sisitria
it-2-F 1091 par. 4-5
Ka Tru Trenge Men
Hnei Iehova hna qeje Nyidrë ka hape, “Akötresie Ka Tru Trenge Men” (ʼEl Shad·daiʹ) ngöne lo Nyidrëti a thuemacanyi Aberahama ka hape, troa hnaho Isaaka. Nyipiewekë tro Aberahama a lapaune koi Akötresie, me kowe la mene i Nyidrë troa eatrën la hna thingehnaean. Ame e thupen, hna xome la aqane hëne cili matre troa qeje Akötresie, Atr ka troa amanathithi Isaaka me Iakobo, lue matran ka troa kapa la isisinyikeu me Aberahama.—Ge 17:1; 28:3; 35:11; 48:3.
Haawe, öni Iehova e thupen koi Mose ka hape: ‘Mama ha ni koi Aberahama, me Isaaka, me Iakobo, hnene la ëjene Akötresie Ka Tru Trenge Men [beʼÉl Shadday] ; ngo thatre ni kö hnei angatr ekö hnene la ëjenge Iehova.’ (Es 6:3) Tha kolo kö a qaja ka hape, thatre kö angatr la ëje i Iehova, ke, ekö hë angatr huliwane la ëje cili. (Ge 4:1, 26; 14:22; 27:27; 28:16) Ame ngöne la tusi Genese, kola qaja la hna melën hnene la itre hene ne fami. Ala sikisi hi lao mama la hna hape “Ka Tru Trenge Men,” nge ala 172 lao mama la sipu ëje i Iehova. Maine öhne hë hnene la itre hene ne fami laka, ijiji Akötresie troa xom la aqane hën hna hape, “Ka Tru Trenge Men,” ngo tha trotrohnine pala kö angatr la aliene la ëje i Iehova. Önine la ketre diksioner (The Illustrated Bible Dictionary (Vol. 1, p. 572)): “Ame lo pane ithanata i Nyidrë memine la itre hene ne fami, tre, kolo itre hna thingehnaean kowe la itre drai elany; nge loi e troa xecie koi angatr laka, ame Nyidrë, Yahweh, tre, Akötresie (ʼel) ka ijij (ketre aqane ujën la sadday) troa eatrën. Ame lo Nyidrëti a ithanata ngöne lo sinöe ka mel, kola mama la mene i Akötresie, nge ce Nyidrëti me angatr, me ëje i Nyidrë, ene Yahweh.”—J. D. Douglas, 1980.
it-2-F 308 par. 6
Mose
Tha hna xome kö la hnëqa qathei Mose ke, ka thatreine ithanata. Ngo, Mose a amamane la xoue i angeic troa ithanata, ke, öni angeic, ka thatreine ithanata angeic. Saze catre Mose; tha kolo kö lo Mose ka thel troa thepe Isaraela lo 40 hë lao macatre qëmeken. Hnei angeic palahi hna catre fë la mekuna i angeic koi Iehova, me sipo Nyidrë troa xom qathei angeic la hnëqa. Hnei Akötresie hna elëhni, ngo tha ase kö Nyidrë kapa la sipo i Mose. Hnei Iehova pe hna ië Arona troa porte-parole i Mose. Mose la porte-parole i Akötresie, kösë ketre “Akötesie” koi Arona, nge Arona a porte-parole i Mose. Iehova a qaja la itre hna amekötine koi Mose, nge Mose a qaja koi Arona. Ame lo nyidro a icasikeu memine la itre qatre ne Isaraela, me cil qëmekei Farao (lo Farao ka nyihnane lo ketre Farao hnei Mose hna kötrene lo 40 hë lao macatre), Arona la ka ithanata. (Es 2:23; 4:10-17) E thupen, Iehova a acili Arona jë troa “perofeta” i Mose, tui Mose lo perofeta i Akötresie. Ketre, hna qeje Mose ka hape “Akötesie koi Farao,” ke, thei angeic la men me mus hui Farao. Celë hi ka apëne la xoue i Mose.—Es 7:1, 2.
13-19 JULAI
ITRE TRENGAMO QA HNINE LA TUSI HMITRÖTR | ESODO 8-9
“Thatre Kö Farao Laka, Pi Tru i Angeic a Eatrëne La Aja i Iehova”
it-2-F 431
Catre Që
Hnei Iehova hna aijijëne la itre atr me itre nöje tro palahi a mel, ngacama itre ka troa mec. (Ge 15:16; 2Pe 3:9) Ame itre xan, hnei angatr hna kapa la utipine i Nyidrë (Io 2:8-14; 6:22, 23; 9:3-15), ngo ame pena itre xan, hnei angatr hna catre që, me icilekeu me Nyidrë me nöje i Nyidrë. (De 2:30-33; Io 11:19, 20) Tha Iehova kö a sawa la itre atr troa kuca la mekuna i angatr, öni Tusi Hmitrötr, Nyidrëti a “axetine la itre hni angatr.” Ame la Nyidrëti a të la ngazo kowe la itre ka catre që, kola mama la mene i Nyidrë, me atrune la ëje i Nyidrë.—Wange ju la Es 4:21; Ine 12:40; Ro 9:14-18.
it-2-F 240-241
Ngazo Thina
Iehova Akötresie a nyijëne la itre atr ka ngazo troa eatrëne la itre aja i Nyidrë. Ngacama itre ka icilekeu me Nyidrë, ngo Nyidrëti a sawa la itre huliwa i angatr matre tro la itre hlue i Nyidrë a mele nyipici koi Nyidrë. Ketre, Nyidrëti a kuca matre tro la aqane ujë i angatr a amamane la meköti Nyidrë. (Ro 3:3-5, 23-26; 8:35-39; Sa 76:10) Celë hi ka mama ngöne Ite Edomë 16:4, MN: “Hnei Iehova hna kuca asë matre troa eatr la aja i Nyidrë, me atr ka ngazo kowe la drai ngazo.”
Jëne Mose me Arona, hnei Iehova hna upi Farao troa nue la angetre Isaraela. Tha zöi Akötresieti kö matre ka ngazo la thina i Farao. Ngo hnei Nyidrëti pe hna nue angeic troa kuca la mekuna i angeic, matre mama jë la thina i angeic ka ngazo. Celë hi matre hna ahnëjinë angeic. Ame la aja i Iehova, kola mama ngöne Esodo 9:16: “Ngöne hi lai hnenge hna acilë eö nyine amamane la menenge göi ’ö, nge mate hlemu la ëjeng’ e celë fen’ asë.”
Kola mama la mene i Iehova jëne la 10 lao akötr ka lepi Aigupito, me humuthi Farao me trongene isi angeic ngöne la Hnagejë Ka Palulu. (Es 7:14–12:30; Sa 78:43-51; 136:15) Itre macatre thupen, kolo palahi a ithanatane lai hnene la itre nöje ezin, nge kola atrune la ëje i Iehova ngöne la fen asë. (Io 2:10, 11; 1Sa 4:8) Maine humuthi Farao ju hnei Iehova la ijine cili, tha tro kö a mama la mene i Nyidrë, me atrune la ëje i Nyidrë, me nue la nöje i Nyidrë.
Troa Sine Thel La Itre Mekune Ka Sisitria
it-2-F 1039
Aroba
Thatre hnyawa kö së la pengöne öni hna qaja e hnine la Tusi Hmitrötr, nge ka traqa ngöne lo 4ème akötr e Aigupito. Kolo pane akötr ka triane la angetre Isaraela e Gosena. (Es 8:21, 22, 24, 29, 31; Sa 78:45; 105:31) Hna ujëne la ʽA·rovʹ ka hape, “aroba” (Bible Lifu).
Ame ngöne la qene Drehu, ame la “aroba” ke, ketre pengöne neng ka ihej. Ame la itre xa aroba föe, itre ej a thine la öni maine atr matre troa iji madra. Ame la itre xa aroba, itre ej a hamë mec ngöne la kola heji së. Celë hi matre kola akötr me mec la itre xa angetre Aigupito me itre öni angatr ngöne la kola heji angatr.
w04-F 15/3 25 par. 9
Itre Mekun Ka Sisitria Ne La Tusi Esodo
8:26, 27—Hnauëne la Mose a qaja ka hape, ‘sisi angete Aigupito’ la itre huje i angetre Isaraela? Nyimutre la itre öni hna thili kow hnene la angetre Aigupito. Celë hi matre, hnei Mose hna iele Farao ka hape, loi e tro Isaraela a tro qa ngöne la nöje matre troa huje koi Iehova.
20-26 JULAI
ITRE TRENGAMO QA HNINE LA TUSI HMITRÖTR | ESODO 10-11
“Aqane Catre i Mose Me Arona”
w09-F 15/7 20 par. 6
Nyitipu Iesu Jë—Catre Jë Cainöj
6 Pane mekune jë la catre ka ej thei Mose troa ithanata koi Farao. Tha hna xome ceitu Farao kö memine la ketre porte-parole i haze, ngo ceitu me ketre akötresie, nekö i Ra, haze ne la jö. Tune la itre xa Farao, ma angeice jë a thil kowe la hnasaatr ka amamane la qëmekei angeic. Ame la hnei Farao hna qaja, ke, eje hi lai. Xele angeic troa qeje angeic, ke, ka men, me catre që, me catre he angeic. Ngo, anyimua cil qëmekei angeic hnei Mose, ketre atre thupë mamoe, nge tha hna hë angeic. Nemene la hnei Mose hna qaja? Itre akötr ka tru. Nemene la sipo i angeic? Troa nue la itre milio lao hlue qa Aigupito! Ka catre Mose!—Nu 12:3; He 11:27.
it-2-F 309 par. 6
Mose
Nyipiewekë la catre me lapaune matre cile koi Farao. Hnei Mose me Arona hna eatrëne la hnëqa i nyidro jëne la catre i Iehova, me uati hmitrötr. Pane mekune jë la Baselaia i Farao, ketre atre mus ka tru ne la hneijine cili. Kola lapa xötreithi angeic hnene la itre ka hamë eamo, me itre tane isi, me itretre thup, me itre hlue i angeic. Kolo fe a cile hnene la itre hene ne hmi, me itre magisië, itre ka icilekeu me Mose. Itre atre lai ka catr ngöne la nöj. Angatr a cil xötreithi angeic matre troa ce xöl me angeic, me itre haze ne Aigupito. Anyimua traqa Mose me Arona koi Farao, ngo kolo palahi a catr la hni angeic, ke, xele kö angeic ma nue la angetre Isaraela. Hna helë Mose me Arona thupene la nyidro a thuemacanyine la 8ème akötr. Nge, thupene la 9ème akötr, hna upi nyidro me hape, tha tro kö nyidro a thel troa iöhnyi hmaca me Farao, wanga troa humuthi nyidro.—Es 10:11, 28.
Troa Sine Thel La Itre Mekune Ka Sisitria
w95-F 1/9 11 par. 11
Itretre Anyipicine Qëmekene La Itre Haze
11 Ame lo angetre Isaraela e Aigupito, hnei Iehova hna upi Mose koi Farao, me hape: “Trojë eö koi Farao ; ke ase hë ni axetine la hni nyën, me ite hni ne la nöjei hlue i nyën, mate tro ni a amamane qëmeke i nyëne la nöjei hatenenge celë ; nge mate tro eö a qaja kowe la lue hnangenyë ne la nekö i ’ö me api ’ö, la nöjei ewekë hnenge hna kuca e Aigupito, memine la nöjei hatenenge hnenge hna kuca koi angat, mate atejë angate laka Iehova ni.” (Esodo 10:1, 2) Tro la angetre Isaraela ka idrengethenge a qaja kowe la itre nekö i angatr la itre huliwa ka mene i Iehova. Nge tro la itre nekö i angatr a qaja kowe la itre nekö i angatr, me kowe la itre xötr e thupen. Matre, tha tro kö a thëthëhmine la itre huliwa ka mene i Iehova. Ketre tune mina fe enehila, loi e tro la itre keme me thin a qaja la hnei angatr hna öhne kowe la itre nekö i angatr.—Deuteronomi 6:4-7; Ite Edomë 22:6.
it-1-F 849 par. 6
Esodo
Haawe, hnene la huliwa ka mene cili, Iehova a atrune la ëje i Nyidrë, me nue la angetre Isaraela. Ame la angatr a traqa ngöne la ketre götrane la Hnagejë Ka Palulu, hnei Mose memine la itre trahmanyi hna thinge la ketre nyima. Nge Miriama, ketre perofeta föe, a xome la ketre tambourin me fiafia memine la itre föe, me sa kowe la itre trahmanyi ka nyima. (Es 15:1, 20, 21) Patre hë la itre ithupëjia me angatr. Ame la angatr a feke qa Aigupito, tha hna nue kö la ketre atr maine ketre öni troa angazo angatr; pëkö kuli ka ho me pi heji angatr. (Es 11:7) Tha hna qaja kö e hnine la tusi Esodo laka, hna ce lö hnei Farao memine la trongene isi angeic e hnine la hnagejë. Ngo, öni Salamo 136:15, hnei Iehova hna “kuië Farao memine la hnënge ishi angeice kowe kuhu hnagejë ka palulu.”
27 JULAI–2 OGAS
ITRE TRENGAMO QA HNINE LA TUSI HMITRÖTR | ESODO 12
“Aliene La Paseka Kowe La Itre Keresiano”
it-2-F 485 par. 7
Paseka
Hnei Iesu hna eatrëne la itre xa götrane ne la Paseka, ene lo madra hna peidrëne hune la itre uma e Aigupito ka amelene la itre pane nekönatr qa ngöne la angela ka ihumuth. Paulo a qaja la itre keresiano hna iën ka hape, “ekalesia ne la itre haetra” (He 12:23), nge Iesu Keriso la ka amele angatr jëne la madra i nyidrë. (1Th 1:10; Ef 1:7) Tha tro kö a axeciëne la ketre ijun ne la mamoe ne la Paseka. Nge, hna perofetan ka hape, pëkö ca june i Iesu ka troa xecie, nge hna eatr ngöne la ijin nyidrëti a mec. (Sa 34:20; Ine 19:36) Matre, ame la Paseka hna atrune hnene la angetre Iudra qan ekö, ke, iahnue ne la itre ewekë ka troa traqa göi Iesu Keriso, “Neköi Mamoe i Akötresie.”—He 10:1; Ine 1:29.
Troa Sine Thel La Itre Mekune Ka Sisitria
it-2-F 484 par. 2
Paseka
Ame lo 10 lao akötr ka lepi Aigupito, ke, iameköti kowe la itre haze e cili, ene mina fe lo hna 10ème akötr, ka humuthe lo itre pane nekönatr. (Es 12:12) Thatraqane la haze Ra la nani trahmany. Matre, ame la kola peidrëne la itre hune qënehlö hnene la madra ne la mamoe ne la Paseka, ketre aqane ithaipië kowe la angetre Aigupito. Ketre, ka sisitria la itre kau, matre ame la kola humuth la itre pane nekö i kau, kolo hi lai a thaipiëne la haze Osiris. Hna atrunyi Farao kösë nekö i Ra. Ame la kola mec hnene la pane nekö i Farao, kola amamane ka hape, pëkö mene i Ra me Farao.
it-1-F 207 par. 1
Asabele
Ame ngöne la ijine “icasikeu ka hmitöt,” tha tro kö la nöj a kuca la ketre huliwa ka catr. Ame la pane me hna 7ème drai ne la Feet Ne La Itre Falawa Ka Pë Levenen, ke, “icasikeu ka hmitöt.” Öni Iehova: “Pëkö huliwa hna troa kuca ngöne la ite drai cili, loi pe la a i at, celë hmekuje hi la hna troa kuca hnei nyipunie.” (Es 12:15, 16) Ngo, ame ngöne la itre “icasikeu ka hmitöt,” tro la itretre huj a catre tro fë huje koi Iehova (Le 23:37, 38), tha angatre kö a eni wathebo. Ame ngöne la itre ijine cili, tha ijine pë jole kö kowe la nöj, ngo angatre pe a thel troa acatrene la aqane imelekeu i angatr me Iehova. Ame ngöne la nöjei sabath, kola icasikeu hnene la nöj matre troa hmi koi Akötresie, me hamë ini. Nge kola thuecatre i angatr hnene la hna e me qejepengöne la Itre Hna Cinyihan, celë hi hna kuca ngöne la itre sunago e thupen. (Hu 15:21) Nyipici laka, pëkö huliwa ka catr hna kuca hnene la angetre Isaraela ngöne la itre ijine sabath me “icasikeu ka hmitöt,” ngo angatr a catre thith, me lapa mekun la itre thina ne la Atre Xup, me itre aja i Nyidrë.—Wange ju ASABELE.