Catre Jë Nyihlue i Iehova Ngöne La Madrin
PANE mekune jë la drai ka tru ne la mele i epun. Hapeu, kolo drai ne faipoipo i epun, maine drai ne mala ne lo pane nekö i epun? Nge hapeu la ijine kola bapataiso epun? Eje hi laka, celë hi lai drai ka tru ne la mele i epun. Ame la drai cili, tru la madrine ne la itre trejin ngöne la epuni a amamane laka, epuni a hnimi Akötesie cememine la hni, me u, me mekun, me trenge catre i epuni ka pexej!—Mareko 12:30.
Eje hi laka, tru la itre ijine madrin hnei epuni hna melën qaane lo kola bapataiso epun. Ngo kola mama fe laka, patre trootro hë la madrine thene la itre xa trejin. Pine nemen? Nge pine nemene fe matre tro pala hi sa nyihlue i Iehova cememine la madrin?
KEPINE MATRE THA MADRINE HË ANGATR
Jëne la maca ne la Baselaia hetre madrine së, ke Iehova a thingehnaeane ka hape, easenyi hë matre apatrene pi hë la fene ka ngazo celë, nge tro ha xome trongëne la itre ka meköt kowe la fene ka hnyipixe. Zefania 1:14 a amekunë së laka: “Eashenyi hë la drai ka tru i Iehova, eashenyi hë, nge saqe catë hë!” Ngo e traqa ju the së la mekune ka hape, qea pala ha la ijine hne së hna itreqe, tro hë lai a paatre la madrine së. Nge tro hë së lai a hunyinyi ngöne la huliwa i Iehova.—Ite Edomë 13:12.
E tro sa thele troa nyi sinatrongene la itre trejin, tro hë lai a hetre trenge catre së troa nyihlue i Iehova ngöne la madrin. Maine jë hnene la aqane ujë ne la itre hlue i Iehova hna ee së kowe la nyipi hmi me xatua së troa nyihlue i Iehova ngöne la madrin. (1 Peteru 2:12) Ngo nemene ju hë la ka traqa e amekötine ju la ketre trejin hnene la hna ena la wathebo i Akötresie? Maine jë, tro lai a akucakucane la itre xa trejin e hnine la ekalesia me apaatrene la madrine i angatr.
Hnene fe la aja mo matre patre pi fe the së la madrin. Hnene la fene i Satana hna upi së troa itö ewekë ngo tha ka nyipi ewekë pe. Haawe, loi e tro pala hi sa mekune la itre ithanata i Iesu, kola hape: “Pëkö ate ateine troa nyi hlue ne la lue joxu ; ke tro angeic’ a xelene la kete, me hanyine la kete ; nge troa fede kowe la kete, me jakalane la kete. Tha ’teine kö nyipunie troa nyi hlue i Akötesieti me mamona.” (Mataio 6:24) Thatreine kö së troa nyihlue i Iehova ngöne la madrin me thele fe troa hetrenyi la nöjei ewekë ne fen.
MADRINE NGÖNE LA HULIWA I IEHOVA
Tha hace kö kowe la itre ka hnimi Iehova troa huliwa koi Nyidrë. (1 Ioane 5:3) The thëthëhmine kö lo hna qaja hnei Iesu ka hape: “Trohemi koi ni, nyipunieti asë ange ka huliwa me hace, nge tro ni a amanonyi nyipunie. Xomejë la nyine isilikeunge hui nyipunie me inine theng ; ke menyike ni, nge ipië la hning ; nge tro nyipunieti a öhne la hna mano thatraqane la ite u i nyipunie. Ke uqa la nyine isilikeung, nge maloe la ehnefeng.” (Mataio 11:28-30) Ixatua ka tru nge ka thue madrin la troa nyihlue i Iehova. Hetre kepin matre easa madrine ngöne la huliwa i Iehova. Tro sa ce wange la könitre.—Habakuka 3:18.
Nyihluene jë së la Akötresie ka madrin nge ka thue mel. (Ite Huliwa 17:28; 1 Timoteo 1:11) Atre hnyawa hi së laka, Nyidrëti la qaane la mele së. Haawe, loi e tro pala hi sa catre nyihlue i Nyidrë ngöne la madrin ngacama nyimu macatre ju hë ne bapataiso së.
Héctor a madrin qa ngöne la hna lapa mekune la itre hna troa kuca hnene la Baselaia me catre huliwa i Iehova
Tro sa ithanatane la pengöi Héctor, ka iwai trootro koi 40 lao macatre. Ame hë la “qatë hë” nyidrë ke ka madrine pala hi nyidrë troa nyihlue i Iehova. (Salamo 92:12-14) Hna wezipo hnene la föi nyidrë ene pe, nyi ifegone jë hi la huliwa i nyidrë koi Akötresie, ngo tha patre pi kö la madrine i nyidrë; öni nyidrë: “Hace catre koi eni troa goeëne la föeng a kucakuca trootro nge jole troa thupë nyiidro. Ngo tha hnenge kö hna nue la itre ewekë cili troa thapa la madrineng troa nyihlue i Akötresie. Ame koi eni ke Iehova la qaane la meleng, nge hetre kepin matre xupe jë Nyidrëti la atr. Hnene hi lai matre tru la ihniming koi Nyidrë nge nyihlue i Nyidrëti jë ni hnene la hning ka pexej. Eni a thele catrëne troa cainöje trootro me mekune catrëne la hna troa kuca hnene la Baselaia, matre tha tro kö a paatre la madrineng.”
Qaathei Iehova la thupene mel matre ijiji së hë troa mele madrin. “Hnei Akötesieti hna hnime la fene hnengödrai, mate nyidëti a hamëne la Nekö i nyidëti ka cas, mate tha tro kö a meci la kete e angete lapaune koi nyidë, ngo tro ha hetenyi la mele ka tha ase palua kö.” (Ioane 3:16) Ijije hë troa nue la ngazo së me kapa la mele ka pë pun e hne së hna lapaune kowe la thupene mel, ahnahna i Akötresie trene ihnim. Kepine hi lai matre tro sa hetre hni ne ole! Nge tro la hni ne ole së a upi së troa nyihlue i Iehova ngöne la madrin.
Hnei Jesús hna ahmaloeëne la mele i angeic me nyihlue i Iehova ngöne la madrin, a itre macatre hë enehila
Öni Jesùs ka mel e Mexique ka hape: “Huliwange hi la ka musinëne la meleng. Ame itre xa ijin eni a aca tro huliwa koi 40 lao hawa ngo tha hna musinë huni pe. Eni hi a aja mani. Ame hë la eni a atre Iehova me atre la aqane nue Nyidrëti la nekö i Nyidrë kowe la nöjei atre, cia jë hi la aja e kuhu hning troa nyihlue i Nyidrë. Eni pë hë a nue pi la melenge koi Iehova nge thupene hë la 28 lao macatre ne huliwa ni kowe la societeng eni ha mekune jë troa qeje fenesi göi troa huliwa i Akötresie o drai.” Celë hi aqane nyiqaane huliwa i Akötresie hnei Jesús cememine la madrin.
Ka pë ethane la mele së matre hetre madrine së. Mekune pala kö epuni lo mele i epuni ekö qëmekene troa atre Iehova? Hnei Paulo hna amexeje koi itre trejin ne Roma ka hape, itre “hlue ne la ngazo [angatr] ekö” ngo “ite hluenë hë [angatr] la thina ka meköt.” Hnene laka, ka pë ethane la mele i angatr, matre ijiji angatre hë troa hane mejiun kowe la mele ka tha ase palua kö. (Roma 6:17-22) Ketre tu së fe, hnene laka easa trongëne la itre trepene meköti Iehova, matre paatre hë la itre ethanyine la mele së ekö. Drei la ketre madrine ka tru!
“Ame la itre macatre ne nyihlue i Iehova ni, tre, celë hi itre macatre lai ka lolo ne la meleng.”—Jaime
Tro sa wange la pengöi Jaime, ka tha lapaune kö koi Akötresie nge ka kapa la ini évolution, nge ka kuci boxe. Ame la kola xötrei sine hnei Jaime la itre icasikeu, hna ketri angeic hnene la ihnimi e cili. Xelë hë angeic ma melëne lo mele i angeic ekö ene pe angeic a thithi jë koi Iehova matre tro angeic a lapaune catre koi Nyidrë. Öni Jaime: “Eni pala hi a atrepengöi Iehova trootro, Keme ka ihnim nge ka utipine Nyidrë. Ketre ewekë lai ka thupë ni la eni a catre melëne la itre trepene meköti Nyidrë. Maine tha saze ju ni, meci hë ni enehila tune lo itre sinatrongeng ekö. Ame la itre macatre ne nyihlue i Iehova ni, tre, celë hi itre macatre lai ka lolo ne la meleng.”
THE KUCAKUCA KÖ!
Nemene la aqane tro sa ujë la kola easenyi trootro la pune la fen? Mekune pala kö, easa kuca la aja i Iehova nge easa trengeneune la mele ka tha ase palua kö. Haawe, “the kucakuca kö shë ngöne la huliwa ka loi ; ke tro ha sha menuëne ngöne la nyipi ijin, e tha kucakuca kö shë.” (Galatia 6:8, 9) Cile huti ju nge melëne jë la itre thiina ka troa aijiji së troa mele pe qa ngöne la “aköte atraqat” me nyihlue i Iehova pala hi ngöne la madrin.—Hna Amamane 7:9, 13, 14; Iakobo 1:2-4.
Tha luelue kö së laka, tro kö Iehova a nyithupene la aqane cile catre së ke tha sihngödri kö koi Nyidrë la itre hne së hna kuca me ihnim hne së hna amamane koi Nyidrë me kowe la ëje i Nyidrë. E tro sa catre nyihlue i Iehova, tro hë sa qaja tui Davita, atre cinyihane la Salamo, kola hape: “Hnenge pala hi hna ami Iehova qëmekeng ; tha tro kö ni a uk, ke nyidëti hë ngöne la götrane macang. Qa ngöne lai madinë hë la hning, nge aciaci la lolong ; kete tro ha la ngöneteing’ a lapa mejiun.”—Salamo 16:8, 9.