Ita Ne Thup göi 14 Semitrepa
Nyima 08 me 03 Qene Drehu
Aqane Troa Cile Kowe La Itre Jol Ngöne La Huliwa Ne Cainöj Trootro Ngöne Itre Hnalapa
“Nge catepi hë huni thupene lai göi Akötesi shë troa qaja koi nyipunie la maca ka loi Akötesie memine la aköte atraqat.”—1 THES. 2:2.
1. Nemene la itre jol hnei Ieremia hna qëmeke kow, nge hnei angeic hna atreine tune kaa troa cile kowe itre ej?
CEITU së me Ieremia, laka isa hetre aliene hni së asë hi. Ame la Iehova a thuemacanyi angeic la hnëqa nyine tro angeic a kuca, ene la troa nyi “perofeta kowe la ite nöj”, tre, kola hokötre hnei angeic, ka hape: “Ekölö hi ni Joxu Iehova, hana xajawatin, tha ’teine kö ni troa ewekë, ke nekönate ni.” Ngo ngöne laka angeic a mejiune koi Iehova, ene pe, hnei angeic hna kapa la hnëqa cili. (Iere. 1:4-10) Footre hë lao macatre, nge kolo pala hi a qëmeke hnei Ieremia kowe la itre atr ka pë hni ne ajan, ka xele ma iwai, me ka ahmahmanyi angeic, memine fe lo itre ka isi. (Ier. 20:1, 2) Ame ngöne la itre xaa ijin, tre, hnei angeic hna mekune troa nuetrije la hnëqa i angeic. Ngo thaa hnei angeice kö hna hmacahmaca, hnei angeice pe hna cainöjëne la ketre maca ka thaa hlemu loi kö nge hna xele ma dreng hnene la itre atr ka ala nyim. Hnene la trenge catre i Akötresie matre Ieremia a atreine kuca la hnëqa i angeic, eje hi lai laka thatreine kö angeic troa ketre sipu kuca la hnëqa cili.—E jë la Ieremia 20:7-9.
2, 3. Ame enehila, tune kaa la aqane cile hnene la itre hlue i Akötresie kowe la itre jol, ka tune lo itre hna qëmeke kow hnei Ieremia?
2 Ame enehila, tre, nyimutre la itre hlue i Akötresie ka canga mekun lo itre aliene hni Ieremia. Ame la kola goeëne hnene la itre xan, la hnëqa troa cainöje trootro ngöne itre hnalapa, tre, öni angatre jë hi ka hape, ‘Thaa ijiji ni kö troa kuca la hnëqa celë.’ Ngo ame la easa wanga atrehmekune laka, aja i Iehova la troa tro fë la maca ka loi, ene pe, paatre ju hi la hni ne xou së nge easë hë a hane catre cainöj. Ngo ame ngöne la itre xaa ijin, tre, hetrenyi la itre hnepe jole ngöne la mele së matre easa hunyinyi troa xome la huliwa ne cainöj. Nyipici laka, ketre jole la troa nyiqaane cainöje ngöne itre hnalapa trootro, nge troa cile huti ngöne la huliwa cili uti hë la pun.—Mat. 24:13.
3 Ngo tune kaa fe maine itre ka inine nyipunie la Tusi Hmitrötr memine la itretre Anyipicine i Iehova, nge ka hane sine fe hë nyipunieti la itre icasikeu ne la ekalesia, ngo luelue petre kö nyipunie troa nyiqaane hane cainöje trootro ngöne itre hnalapa? Nge tune kaa maine ketre Atre Anyipicine i Iehova hë epuni ka xome la bapataiso, nge epuni a öhne laka jole catre koi epuni troa cainöje trootro ngöne itre hnalapa, ngacama hetre trenge catre i epuni ju hë troa kuca la huliwa cili? Loi e troa xecie hnyawa koi epuni laka, ame la nöjei atr ka isa pengöne aqane mel, tre, hnei angatre fe hna hane cile kowe la ejolene la troa cainöje trootro ngöne itre hnalapa. Jëne la ixatua qaathei Iehova, ketre ijiji epuni mina fe troa hane ujë tun.
Loi e Tro Sa Catr
4. Nemene la ka aijijë Paulo aposetolo troa catre cainöjëne la maca ka loi?
4 Easa atrehmekune hnyawa laka, ame la kola haöthe la fene hnengödrai hnene la huliwa ne cainöj, tre, thaa hnene kö la trenge catre maine inamacane i atr, ngo hnene la ua i Akötresie. (Zaka. 4:6) Kola eatre mina fe lai kowe la hna cainöj hnene la itre Keresiano, angatr isa ala caas. (2 Kor. 4:7) Tro sa ce wange la tulu i Paulo. Ame ngöne la nyidrëti a mekune hmaca, lo ijine kola qanangazo nyidrë memine la itre mesinare sine trongei nyidrë hnene la itre ka icilekeu, tre, hnei nyidrëti hna cinyihane, ka hape: “Hna pane akötë hun, me angazon’ e Filipi. . . , catepi hë huni thupene lai göi Akötesi shë troa qaja koi nyipunie la maca ka loi Akötesie memine la aköte atraqat.” (1 Thes. 2:2; Ite hu. 16:22-24) Pine laka Paulo la ketre atr ka catre cainöj, haawe, thaa mekune kö së, ka hape, hnei nyidrëti hna akötr troa xome la huliwa cili. Ngo ceitu së asë hi me Paulo, laka, hnei nyidrëti hna mejiune koi Iehova matre troa catre cainöjëne la maca ka loi. (E jë la Efeso 6:18-20.) Tune kaa la aqane tro sa xötrethenge la tulu i Paulo?
5. Nemene la ketre ewekë ka troa xatua së troa catre cainöj?
5 Ame la troa thith, tre, celë hi ka xatua së troa catre cainöj. Önine la ketre trejine föe ka pionie, ka hape: “Eni a thithi matre thaa tro kö ni a xou troa ithanata memine la itre atr; ketre, eni fe a thithi matre tro ni a atreine troa ketr la hni ne la itre atr, nge eni mina fe a thithi matre tro ni a öhnyi madrine ngöne la huliwa ne cainöj. Eje hi laka, huliwa i Iehova la hne së hna kuca, celë hi matre thaa ijiji së kö troa ketre sipu kuca caasine la huliwa cili e thaa hna xatua së kö hnei Nyidrë.” (1 Thes. 5:17) Nyipi ewekë tro asë hi sa catre thith matre tro la uati hmitrötre i Akötresie a xatua së troa catre cainöj.—Luka 11:9-13.
6, 7. (a) Nemene la hna meköle goeëne hnei Ezekiela, nge nemene la aliene ej? (b) Nemene la ini hna hamëne hnene la hna meköle goeëne hnei Ezekiela, kowe la itre hlue i Akötresie enehila?
6 Kolo fe a qaja amamane hnene la tusi Ezekiela, la ketre ewekë ka troa xatua së troa catre cainöj. Hnei Ezekiela hna meköle goeëne la kola hamëne koi angeic hnei Iehova la ketre tusi hna ewath, nge hna cinyihane ngön, la itre “teij, me latesi, me awe”, me qaja koi angeic troa xeni lai; öni Nyidrëti ka hape: “Nekö i ate fe, hneneju e kuhu hni ’ö, nge atiqane la hni ’ö hnene lai tusi hna ewathe lo ini a hamë eö.” Nemene la aliene la hna meköle goeëne cili? Kola hape, tro Ezekiela a atrepengöne hnyawa la maca nyine tro angeic a tro fë. Tro hë eje a mele e kuhu hni angeic, kösë tro eje a ketr hnyawa lo itre aliene hni angeic ka jui. Kola sisedrëne hnene la perofeta, me qaja ka hape: “Ame hnenge hna xeni ej, nge hnyapa eje ngöne la qenge tune la hani.” Ame la kola tro fë la maca i Akötresie kowe la nöjei atr, tre, celë hi ketre madrine ka tru koi së, kola aceitunëne lai memine la ehnyapan la hani koi Ezekiela. Hnei angeic hna atrehmekune laka, ketre hnëqa ka tru la troa anyipici Iehova me drenge la itre hnei Nyidrëti hna qaja, ngacama troa tro fë la maca ka catrehnine catr kowe la ketre nöje ka xele ma drei nyidrë.—E jë la Ezekiela 2:8–3:4, 7-9.
7 Ame ngöne la hna meköle goeëne celë, tre, hetrenyi la ketre ini ka nyipi ewekë kowe la itre hlue i Akötresie enehila. Hetrenyi fe së la ketre maca ne iamele ka sisitria kowe la itre atr ka wangacone la aqane huliwane së la trenge catre së. Qa ngöne lai, nyipi ewekë tro pala hi sa xeni hnyawa ngöne la götrane la ua, matre tro sa catre goeëne la huliwa ne Keresiano, ceitune memine la ketre hnëqa ka sisitria hna hamë së hnei Akötresie. Ngo nyipici laka, thatreine kö tro sa atrepengöne hnyawa la Wesi Ula i Akötresie nge troa gufa koi së, e thaa hne së kö hna trongëne hnyawa pala hi la porogaram ne ini Tusi së. Ijije kö tro nyipunieti a akökötrene la elolone maine la aqane troa isa ee me inine lapaane la Tusi Hmitrötr? Hapeu, nyipunieti kö a majemine sine thel la itre hnei nyipunie hna e?—Sal. 1:2, 3.
Loi e Tro Sa Nyiqaane Ithanatane La Tusi Hmitrötr
8. Nemene la ketre aqane cainöj ka xatuane la itre xaa ka cainöjëne la Baselaia troa nyiqaane ithanatane la Tusi Hmitrötr, ngöne la itre hnalapa trootro?
8 Ame la ewekë ka jol kowe la itretre ka cainöj trootro ngöne la itre hnalapa, tre, ene la troa xötrei iöhnyi memine la atren ne la uma. Nyipici laka ame ngöne la itre xaa götran, tre, ketre jole la troa nyiqaane ithanata memine la itre atr. Ame kowe la itre xaa ka cainöj, tre, hmaloi hnyawa hi koi angatre troa ithanata memine la itre atr ngöne la kola cainöje trootro ngöne itre hnalapa, e hnei angatre hna iëne hnyawane la itre trenge ithanata i angatr, nge thupene jë lai, angatr a hamëne la ketre tarak, tune la hna qeje pengön e cahu fen. Ame la taan la tarak maine la hane lai iatre ne ej, tre, ijije tro ej a ahlëne la aja ne la atren ne la hnalapa, ene pe kola aijijë së troa qeje pengöne la kepine la tronge së, nge amejëne la ketre hnying. Ame la ketre aqane troa cainöj, tre, ene la troa amamane kowe la atren ne la hnalapa la könitre maine foa lao tarak ka isapengön, nge thupene lai, troa sipo nyidrë troa iëne la ketre tarak hnei nyidrëti hna ajan. Nyipici ame la aja së, tre, thaa ene hmekuje kö la troa tro fë ju hi la itre tarak, maine tro pena huliwaane itre eje ngöne la itre qëhnelö, ngo ene la troa nyiqaane ithanatane la Tusi Hmitrötr uti hë la troa inine ej.
9. Pine nemene matre ka nyipi ewekë catre troa hnëkë hnyawa?
9 Ngacama easa troa huliwane la ketre aqane cainöj, ngo ame la ka troa xatua së troa madrine ngöne la huliwa ne cainöje trootro ngöne itre hnalapa, tre, ene la troa hnëkë hnyawa. Hna qaja hnene la ketre trejine trahmanyi ka pionie, ka hape: “Troa atraqatre la madrineng, e hnenge hna hnëkë hnyawa. Celë hi lai ka hamë aja koi ni troa huliwaane la hnenge hna hnëkë hë, matre troa ithanata kowe la itre atr.” Önine fe la ketre pionie, ka hape, “E atre hë ni la itre mekune ka sisitria ngöne la itre itus hnenge hna troa tro fë, eje hi laka, tro hë ni a hetre madrine troa huliwaane itre ej.” Hetre itre thangane ka loi troa wange thaupune hmaca la itre hne së hna troa qaja; loi pe, nyimutre la itre atr ka öhne laka, ketre jëne ixatua ka tru catre kö la troa anyimua amacane catrëne la aqane nyiqaane ithanata. Celë hi matre, ame la angatre a kuca tune lai, tre, kola xatua angatre troa hamëne la hnei angatre hna atreine hnyawa koi Iehova.—Kol. 3:23; 2 Tim. 2:15.
10. Nemene la nyine troa kuca matre troa hetre thangane ka loi hna kapa qa ngöne la itre icasikeu göi cainöje trootro?
10 Ame la itre icasikeu göi cainöje trootro, tre, itre eje hi lai ka troa aijijë së troa maca me madrine ngöne la huliwa ne cainöje ngöne itre hnalapa trootro. Maine kola qeje pengöne la huliwa ne cainöj hnene la topik ne la drai, haawe, ka loi e troa ce e me ce ithanatane ej. Ngo loi e tro la trejine ka xomiujine la icasikeu göi cainöje trootro a eköthe hnyawa la traeme matre ijije troa ce ithanatan maine amamane pena la ketre aqane nyiqaane ithanata ka ihmeku memine la teritoar, maine troa ce wange pena la itre xaa mekune ka ixatua nyine troa cainöje fë ngöne la ijine cili. Celë hi ka troa xatuane hnyawa la itre ka traqa troa sine la icasikeu, matre troa hetre thangane la hnei angatre hna cainöj. Ngöne laka hna hnëkë hnyawa ha hnene la itre qatre thup memine la itre xaa ka xomiujine la itre icasikeu cili, haawe, ijije hi tro angatr a kuca la huliwa cili, me nyipune eje ngöne la traeme hna sa.—Rom. 12:8.
Eloine La Troa Atreine Dreng
11, 12. Tro la aqane drenge së cememine la utipin a xatuane tune kaa la itre atr matre troa ketr la itre hni angatr hnene la maca ka loi? Hamëne jë la itre ceitun.
11 Ame la ka xatua së troa nyiqaane ithanatane la Tusi Hmitrötr me ketr la hni ne la itre atr, tre, thaa ene hmekuje kö la troa hnëkë hnyawa, ngo ene mina fe la troa hane wanga atrunyi angatr. Ame la ketre aqane troa amamane laka, easa wanga atrune la itre atr, tre, ene la tro sa drei angatr. Hna qaja hnene la ketre qatre thup ka wange trongëne la itre ekalesia, ka hape: ‘Ame ngöne la easa drenge hnyawa la itre atr e ithanata, tre, kösë kola ketri angatr, nge celë hi ketre hatrene laka easa hane wanga atrunyi angatr.’ Ame la easa drenge hnyawa cememine la hni ka menyik, la mekune hna hamëne hnene la itre atr, tre, kolo hi lai a fe la itre hni angatr troa hane ithanatane la Tusi Hmitrötr, tune cahu hna melëne hnene la ketre föe.
12 Ame ngöne la ketre tusi hna cinyihane ngöne la zonal, hna hape Le Progrès qa Saint-Étienne, e Faras, tre, hnene la ketre föe hna qeje pengöne la ewekë ka traqa ngöne la kola iwai hnene la lue atr ka fenafena la qëhnelö i eahlo, thupene lo kola meci hnene la nekö i eahlo jajinyi ka köni treu hi. Hnei eahlo hna cinyihan, ka hape: “Canga wanga atrehmekunyi angatre hi ni, ka hape, Itretre Anyipicine i Iehova angatr. Ka tro hi ni a canga upi angatr cememine la hni ka menyik, ngo eni a öhne la ketre boroshür hnei angatre hna troa hamë ni. Ej a qaja la kepine matre Akötresieti a nue la akötr. Qa ngöne lai, hnenge hna hë angatr me thele troa lepe trij la itre mekune i angatr. . . Caa hawa ne porotrike i eahuni hi. Hnei angatre hna drei ni hnyawa cememine la utipine ka tru, nge ame ngöne la angatr a nue ni, lolo catre pala ha la aqane akeukawane, ene pe eni a sipone ju matre tro angatr a iwai hmaca.” (Rom. 12:15) Thupene lai, eahlo ha hmala troa inine la Tusi Hmitrötr. Kola mama hnyawa laka, ame la hnei eahlo hna mekune pala hi ngöne lo xötrei, tre, thaa ene kö lo itre hna qaja hnene la itre trejine föe, ngo ene lo aqane drei eahlo hnyawa hnei nyidro.
13. Tro sa cainöj me eköthe tune kaa la aqane nyiqaane ithanata së hmekune la aja ne la itre atr hne së hna ixelë memin?
13 Ame la easa drenge cememine la utipin, tre, eje hi laka, easë lai a nue jëne la itre atr troa qaja koi së la kepine matre ka nyipi ewekë koi angatre la Baselaia. Celë hi ka aijijë së troa ce thawa la maca ka loi me angatr. Maine jë hnei epuni hna öhne laka, ame la itre ka maca troa cainöj, tre, kolo hi lo itre ka atreine drenge hnyawa la itre xan. (Ite edomë. 20:5) Angatr a wanga atrune hnyawa la itre atr hnei angatr hna cainöje kow. Ketre, thaa angatre hmekuje kö a fejane la itre ëje memine la itre hnalapa ne la itre atr, ngo ene mina fe lo itre aja i angatr. Ame la kola qaja hnene la ketre atr la ketre ewekë hnei angeice hna hnehengazon, haawe, kolo hi a canga thele ju hnene la itre ka cainöj la itre mekune ka ijij, nge thupene lai, kola bëeke hmaca troa ce thawa me angeic la itre mekun. Angatre fe a hane tui Paulo aposetolo, laka kola eköthe la aqane nyiqaane ithanata i angatr, hmekune la aja ne la itre atr hnei angatre hna ixelë memin. (E jë la 1 Korinito 9:19-23.) Ame la aqane iwanga atrunyi cili, tre, celë hi ka troa ea la itre atr kowe la maca ka loi, nge ketre aqane ujë lai, ka amamane hnyawa “la nyipi ihnimi ka menyike i Akötesi shë.”—Luka 1:78.
Loi e Troa Eje The Së La Aqane Ujë Ka Loi
14. Tune kaa la aqane tro sa amamane la itre thiina i Iehova ngöne la easa xome la huliwa ne cainöje së?
14 Kola mama laka Iehova a nyipi së, qa ngöne laka Nyidrëti a nue së troa isa axecië mekun. Ngacama Akötresie Ka Pucatin asë Nyidrë, ngo thaa Nyidrëti kö a upe iele së isa ala caas troa nyihlue i Nyidrë; ngo hnene la ihnimi Nyidrë, matre kola tro koi Nyidrëti la itre atr, me kapa la itre manathithi qa ngöne la hnei angatr hna wanga atrune la itre hnei Nyidrëti hna hnëkëne ka lolo. (Rom. 2:4) Pine laka easë la itre hlue i Nyidrë, ame ngöne la nöjei ijine easa cainöj, loi e tro sa hnëkë troa tro fë hnyawa la maca ka loi cememine la thiina ka ijiji ne la Akötresi së ka ihnim. (2 Kor 5:20, 21; 6:3-6) Haawe, nyipi ewekë catre troa eje the së la aqane ujë ka loi kowe la nöjei atr ka lapa ngöne la götran hne së hna mele ngön. Nemene la ka troa xatua së troa elë hune la jole cili?
15. (a) Nemene la ini hnei Iesu hna hamëne kowe la itre aposetolo, ngöne la kola thipetrije la maca hnene la itre atr? (b) Nemene la ka troa xatua së, ngöne la easa catre troa thele la itre atr ka hetre hni ne ajan kowe la nyipici?
15 Thaa hnei Iesu kö hna inine la itretre drei nyidrë troa hnehengazo menu ngöne la kola thipetrije la maca hnene la itre xaa atr, ngo loi e tro pe a thele la itre atr ka hetre hni ne ajan kowe la nyipici. (E jë la Mataio 10:11-15.) Ame la ka troa xatua së troa kuca lai, tre, ene la troa nango eköthe amë la itre ewekë ka ijije tro sa eatrën. Hnene la ketre trejine hna aceitunë nyidrëti kö memine la ketre atr ka trongëne la itre götrane matre troa thele la itre gaa hetre karesin, me gool, maine itre xaa etë ka tru alamekene pena. Öni nyidrëti e qaja e kuhu hni nyidrë, ka hape, “Pi a öhne ju hi ni la ketre gool enehila.” Ame la hna thele troa eatrën hnene la ketre trejine trahmany, tre, ene la troa “öhne ngöne la nöjei wiik la ketre atr ngöne la hna cainöje trootro, nge troa canga bëeke hmaca troa eköthe hnyawa pala hi la aja ne lai atr.” Ame la itre xaa ka cainöj, tre, maine ijij, angatr a catre thele troa ce thawa la ketre xötre ne la Tusi Hmitrötr memine la itre atrene la hnepe lapa. Nemene jë la ketre ewekë ka ijije tro nyipunieti a thele troa eatrën?
16. Nemene la itre kepine ka amamane laka, nyipi ewekë tro sa catre cainöjëne la maca ka loi?
16 Ame la kola tro loi la huliwa ne cainöje ngöne la itre hnalapa trootro, tre, thaa hnene hmekuje kö la aqane ujë ne la itre atr ngöne la götran hne së hna cainöje ngön. Nyipici laka ame la huliwa ne cainöj, tre, jëne mele lai kowe la itre ka hni ka menyik, ngo hetrenyi mina fe la itre xaa kepine ka sisitria ka uku së troa xome la huliwa cili. Ame la huliwa ne cainöj ne la Keresiano, tre, ej a aijijë së troa amamane la ihnimi së koi Iehova. (1 Ioane 5:3) Kola aijijë së fe matre thaa tro kö a zö së la meci ne la itre atr. (Ite Hu. 20:26, 27) Eje mina fe a ithuemacany kowe la itre atr ka thaa lapaune kö laka, “traqa ha la ijine hnyingëne hnei [Akötresie].” (Hna ama. 14:6, 7) Ngo ame la ka nyipi ewekë catr, tre, jëne la hna cainöjëne la maca ka loi, ene pe kola atrune la atresiwa i Iehova ngöne la fene hnengödrai asë. (Sal. 113:3) Qa ngöne lai, nyipi ewekë tro sa catre troa tro fë la maca ne la Baselaia, ngacama troa dreng maine thaa drei së pena hnene la itre atr. Eje hi laka, ame la trenge catre hne së hna kuca matre troa cainöjëne la maca ka loi, tre, celë hi ewekë lai ka nyipi lolo xajawa i Iehova.—Rom. 10:13-15.
17. Easenyi hë tro la itre atr a atrehmekune la ketre ewekë, nemene la ewekë cili?
17 Ngacama ame enehila, tre, nyimutre la itre atr ka wange sixane la huliwa ne cainöj, ngo easenyi hë matre ketrepengöne jë la aqane waiewekë i angatr elany. (Mat. 24:37-39) Hnei Iehova hna qaja hnyawa koi Ezekiela, ka hape, ame lo itre hna amekötine hnei angeic hna cainöjën, tre, itre ka troa eatr, nge eje hi laka tro la lapa i Isaraela ka icilekeu, “a ate laka qa ha thei angate la perofeta.” (Ezek. 2:5) Ketre tu së mina fe, ame la Akötresieti elanyi a axulune la itre hna amekötine i Nyidrë kowe la fene ka ngazo celë, tro hë la itre atr asë a atrehmekune hnyawa laka, ame la maca hna tro fë hnene la Itretre Anyipicine i Iehova ngöne la itre götrane gaa tru atr me ngöne la hna cainöje ngöne itre hnalapa trootro, tre, celë hi ketre maca i Iehova, Akötresieti ka caas me ka nyipici; nge kolo mina fe a amamane laka, angatre hi lo itre hlue i Nyidrë. Drei la ketre manathithi ka tru, ene la tro sa xome la atresiwa i Nyidrë me tro fë mina fe la maca i Nyidrë ngöne la itre drai ka nyipi ewekë catr enehila! Epi tro pala hi së a catre cile kowe la itre jol hne së hna qëmeke kow ngöne la huliwa ne cainöj ngöne itre hnalapa trootro, nge eje the së la mejiune ka catr laka tro Iehova a xatua së.
Tune Kaa La Aqane Troa Sa?
• Tune kaa la aqane troa hetre trenge catre së troa cainöj?
• Nemene la ka troa xatua së matre troa nyiqaane porotrikë Tusi Hmitrötr ngöne la easa cainöj ngöne itre hnalapa trootro?
• Tune kaa la aqane tro sa amamane laka easa wanga atrune hnyawa la itre atr?
• Nemene la ka troa xatua së matre thaa tro kö sa goeëne angazone la itre atr ne la teritoare së?