Atraqatre La Manathithi Hna Troa Kapa Qa Ngöne La Icasikeu Ne Distrik e Macatre 1993 “L’enseignement divin”
1 “Iehova fe, ini ni jë” (Sal. 86:11), celë hi hna ewekë ka jui nyine troa qatixenyëne hnyawa hnene la nöjei atr ka ajane troa nyi hlue i Akötresie, matre loi e troa catre pala hi la mekune së, laka, tha tro jë kö së a nuetrije la itre hna ini, me sisihnyepeje troa xötrethenge la itre hna qaja. Mama hi koi së laka, easë a ajane pala hi la itre iameköti kowe la mele së, nge tuune la hna qaja koi së ngöne la tusi Salamo, nyipici laka easë a sipone catrëne koi Akötresie, matre tro së a hetrenyi la hni ka pexej, lo ka tha nyimu mekune kö. Ame lo porogorame ne la icasikeu katru ne Distrik “L’enseignement divin” (ini qa thei Akötresie) ke, kola troa hamëne koi së la itre ini me itre ihaji thatraqane la mele së, matre tro së a nyi hlue i Iehova cememine la lapaun, matre atreine së qëmeke kowe la itre ethanyine la itre aqane mele ne la nöjei atr enehila.
2 Kovasio, 4 lao drai: Troa kuca la icasikeu cili e Kaledonia me e tas. Troa nyiqaane la porogaram e drai kaco e 1h 20, nge troa afenesine e heji ne mecixen, e 4h 15. Nge troa fe la itre qëhnelö ngöne la nöjei drai ne Kovasio, e 7h 30 e makany. Kola sipone matre tha tro kö la ketre atr’a canga lö qëmekene e 7h 30, ngo kolo casi hi lo itre trene huliwa. Ame la Kovasio e Kaledonia, ke, hna hnene ej ngöne la iuma i omnispor e aze vata, qaane e drai 2 uti hë drai 5 semitrepa 1993. Ame la icasikeu e Tas, ke, troa kuca kö ngöne la qene Tas, hnine lo i uma ne icasikeu ne la hnapeti e Sato Lugavil, qaane 26 uti hë 29 ogas 1993.
3 Nemene la itre hna hnëkëne koi së? Itre xeni ne la ua ka nyimutre, hna amamane thenge la itre eqeane isa mekune ka isa pengön: itre cainöj, itre iamacany, itre hnying, nge lue daram. The sixaane kö la caa hnepe hna ini! ketre, Hnëkë jë pe së troa mekune hmaca lo itre hna atre hë me kapa madrine la itre hna troa dreng.
4 Hapeu, tro kö epuni a hane traqa fë la trengamo kowe la uma i Akötresie? Ngöne la tusi Malaki 3:10, ke, hnei Iehova hna qaja xönëxönëne koi angetre isaraela, laka, maine tro angatr’a tupathi Nyidrë, me tro fë kowe la uma ne ami mo, la itre trengamo ka pexej, ke, tro hë Nyidrëti a nenge koi angatre la manathithi uti hë la troa pë la jiin.
5 Ame koi itretre xou, ke, ame la kola hape: tupathi Iehova, ke, ene la troa canga ketre la maseta i angatr, troa sipo drai ne mano troa hane sine la Kovasio. Ngöne la itre xaa ijin, ke, hna luelue hnene la itre trejine troa sipo, ke, angatr’a mekune ka hape tha tro jë kö la maseta i angatr’a nue angatre troa sine la Kovasio. Ngo ame pe ngöne la itre xaa huliwa e trön, ke, tha qeje ejolene kö angatre troa sipone koi maseta i angatre la hnei angatre hna ajan.
6 Hawe, pane isa hnyinge ju së: maine tro la ketre sipu sinee së a faipoipo ngöne la ketre nöj, hapeu, tha tro kö së a sipo drai thei maseta troa hane sine la faipoipo? Nge maine maseta a nango luelu, hapeu tha tro kö së a ipië koi nyidrë troa qeje pengöne la enyipiewekëne la aja së troa tro? Ngo ame la kola troa drenge la hë i Iehova, ke, ka nyipi ewekë catre kö hune la troa sine la faipoipo! celë hi matre, maine easë a wang’atrune me trotrohnine hnyawa laka, emele së me ixatua atraqatre koi së lai Kovasio, ke, tro ha hmaloi koi së troa sipone hnyawaane la maseta së troa nue së troa hane sine lai Kovasio. — Iakobo 1:7, 8.
7 Ame ekö e Isaraela, ke, ame la trengamo ne hotr, ke, ene la troa hamë mo kowe la ene i Iehova. Ame enehila, ke, ame la trengamo, ke, ene la traeme së, me trenge catre së, me manie së, hna hamëne thatraqane hna nyi hlue i Iehova, me nyine göline la huliwa ne la Baselaia. Ketre, eje hnine la trengamo la tro së a zihnue kowe la itre reinio, itre icasikeu ka tru, itre Kovasio, ketre tune la easë a nyidrawane la itre göhnë ne reinio. Ame la Kovasio ne Distrik “L’enseignement divin”, ke, kola troa hamëne la itre jëne tro së a tro fë la hne së hna hetrenyi kowe la uma ne ami mo i Iehova ngöne la ua. Nemene la itre mo hne së hna hetreny?
8 Ame la trengamo ke, eje fe ngöne la easë a drenge hnyawane la porogarame ne Kovasio, ngöne fe la easë a ce thinge madrinëne la itre nyima e koho hnaa hmi, menyike la aqane qatingenyëne së la itre thith, celë hi matre ijiji nge pexeje la hni së troa hape: amen.
9 Tro së a atre trongëne pala hi la nyipici, e maine tro së a atreine hnangenyëne hnyawane la atre hmiin. Ame la easë a ce lapa memine la ka alanyimu ke, saqe hi koi së troa drei mejene pena ha lo itre ka lapa ezi së, celë hi la kepine matre loi e troa hatrengëne hnyawa la porogaram. Loi e tro së a hnëkë hnyawa, troa ce traqa me Tusi Hmitrötr, nyima, peeni me pepa, memine fe lo La Tour de Garde nyine troa ithahnataane ngöne la wiik. Hetre ixatua koi së, e troa fejaane la itre mekene tusi me itre trepene mekune hna amexeje hnei itre ka cainöj. Fejaane ju hi la itre mekun, nge hatrengëne ju së xötrëne la cainöj. Loi e tro fe la itre nekönatr’a inine lapa drenge hnyawa. Cele hi aqane tro nyudreni a hamëne fe la hnei nyudreni hna hetreny, cememine la itre trenge nyi nyudren, ene la tro angatr’a qatixenyëne la porogaram, thenge la hna atreine hnei angatr.
10 Nyipi ewekë tro la itre keme me thine a xome la ketre hnepe hawa ngöne la drai, matre xatuane la itre nekö i angatre troa e, maine troa ce wange pena me nyudreni la itre iatre hnine la itre itusi Sasaiatri. Ketre aqane kuca lai ka sisitria nyine troa hnëkëne la itre nekö i angatr, matre tha jole me majemine angatre troa lapa hnyawa ngöne la itre icasikeu me itre Kovasio. Hna qaja hnene la itre keme me thine ka hiane hnyawa la itre nekö i angatr, ka hape, tha nue kö angatre la itre nekö i angatre troa xome trongëne la itre nyiimo maine troa sijisiji pepa pena ngöne la itre ijine icasikeu. Ketre, ijije fe tro la itre nekönatre ka co petre kö, a atre la kepine matre angatr’a hane sine la itre icasikeu, ene la troa hmi koi Iehova. Qangönelai, loi e tro la itre keme me thine a inine hnyawa la itre nekö i angatre me qaja koi angatre la kepine matre ijiji angatre fe troa hane hamëne la trenge nyi angatre kowe la ēnē i Iehova!
11 Ngöne la trengamo hne së troa hamëne koi Akötresie, ke, eje fe la troa nue xeciëne la itre traeme së me trenge catre së troa hane sine la Kovasio i organizasio. Tuune lo hna majemine kuca, ke, ca drai maine luetre qëmekene lai Kovasio, ke, troa nyidrawaane la iuma ne icasikeu. Celë hi matre, maine epuni a lapa easenyi ne lai hnë Kovasio, ke, tuneka matre ce traqa asë pi pena epuni memine la fami i epun troa hane ixatua? Hnene la itre xaa trejine hna hane hëne la itre ka ini tusi me angatr, itre ka trotrohniine trongëne hë la itre hna inin, troa hane traqa ngöne la ijine cili, matre tro fe angatr’a atre me öhne la ketre aqane troa saajuëne la hmi i Iehova. Tru catre la itre nyine hnëkëne matre troa tro loi la Kovasio. Hapeu matre voloter’asë jë la fami?
12 Ame la ketre aqane tro së a tro fë la trengamo së, ke, ene la troa hamë hna hetreny. Hanawange la hna amekötine hnei Iehova göne la aqane troa hamëne la itre ahnahna thatraqane la hmi koi Nyidrë, hna qaja koi angetre Isaraela ka hape: “Tha tro kö angatr’a mama xajawa i Iehova nge pë ewekë. Troa isa hamëne thenge la hna hetreny, thenge la manathithi qa thei Iehova Akötresi’ö hnei Nyidrëti hna troa hamë eö.” (Deut. 16:16, 17) Eje hi laka madrine atraqatre Iehova la hna canga hnëkëne me hna troa hamëne hnei isa ala cas, ngacama co hi maine tru pena. Celë hi matre, nyimutre la itre trejine ka hamëne la ahnahna i angatre ngöne la hni angatre ka pexej, maine jëne mani, maine jëne shek pena (saenëne ju koi “Associations Les Témoins de Jehovah”). Hapeu, lapa hane kö epuni upe la itre nekö i epuni ka co troa hane kuiëne la ketre ahnahna hnine la keesi ne ami mani?
13 Xetrëne jë la ini i Akötresie lo atre amele së: Hnene la itre thina së ka loi memine fe la aqane ujë së ka lolo, ijije tro së a “hetrëne alolone ngöne la nöjei ewekë asëjeihë la Ini i Akötresie atre amele së.” (Tito 2:10) Ketre, loi e tro fe së a amamane laka easë a trongëne la Ini i Akötresie ngöne la mele së, celë hi aqane troa ujë ngöne la ijine Kovasio.
14 Tuneka la itre thina së? Kola wangatrehmekune enehila laka, pë hë imetrötrë ngöne la fene hnengödrai. Ngo hnene laka, angatr’a xötrethenge la Tusi Hmitrötr, tha hna isa wai ewekëne kö hnene la itretre anyipici Iehova, ngo angatr’a hane wangatrune la itre ewekë i itre xan (Fil. 2:4). Loi e tro së a mekune laka tha easë hmekuje kö ngöne la Kovasio. Tha tro kö së a ithepeqanagojenyi ngöne la easë a troa xomi xeni maine xomi itusi pena. Loi e tro së a metrötrëne la itre qatre me qatre föe, ketre tuune fe la itre nekönatr ka ce cile itreqe memine la itre keme me thine i angatr, pine laka sihngödri angatre e nyipine la ka alanyim, troa thupëne wanga penyi angatre pi nge eatre pi nyudren.
15 Nyipici laka, hetre thangane la aqane ujë ka metrötr kowe la itre atr. Celë hi matre, ngöne la ketre Kovasio hna kuca lo macatre hnapane ngöne la ketre nöj, ke, hna qaja hnene la ketre atr ka 21 hë lao macatre ngöne polis, ka hape: “Eni a sesëkötre la aqane ujë me aqane drengethengene la itre atre i epun. Lolo la aqane ujë i angatr; angatr’a isa sipu hleme la itre pepa maine itre xaa ewekë pena ka adrone la hnë icasikeu. Ketre, angatr’a xötrethenge hnyawa la itre hna amekötiin, nge hna hnëkëne hnyawa la Kovasio i epun.” angeic’a qaja fe, ka hape: “Ame la angatr’a öhnyi eahuni ke, angatr’a hnyima hnyima, matre canga mama hi koi hun, ka hape, hatrene ka loi. Nge aja i eahuni catre la aqane ujë cili. ketre hatrene ne ihnimikeu, nge pëkö iaö. Eahuni a wangatrehmekune fe laka itre nekönatre kö a isa ce tro me drengethenge la itre keme me thine i angatr. Eje hi laka eni a haine atraqatr. Ketre madrine catre ni la hna ami ni troa thupe e cili.”
16 Hnene la itre xaa atre i musi hna sipo Betel troa kuca la ketre Kovasio ngöne la nöje i angatr. Celë hi matre hna kapa hnei Sasaiatri lai ihë cili, nge eje hi laka atraqatre la madrine ne la itre ka lapa e cili. Hna qaja hnene la ketre hene politik ka hape: “nyipi madrine huni la kola traqa itronyi la itre atre i epuni ngöne la nöje i eahun. Ketre madrine atraqatre eahuni, (...) nge tro huni a tupathe troa kepe epun.” Eje hi laka, ketre aqane anyipicine ka sisitria hna amamane hnene la aqane ujë ne la itre trejine asë.
17 Hapeu, tro kö epuni a isa hni kowe la ini qa thei Akötresie atre amele epun, jëne la aqane ujë i epuni ka meköt? Hane cahu itre ewekë nyine troa kuca:
Aqane troa heetre me aqane hnëkën: Tha tro kö së a xome ceituune la easë a troagö memine la easë a hnëkë koi Kovasio. Easë a troa tro koi Iehova matre tro Nyidrëti a ini së me haji së. Celë hi matre tro së a thupëne la aqane tro së a heetr, ngöne la easë a troa sine la itre icasikeu hnine la Uma ne Baselaia (1 Tim. 2:9, 10). Ketre, loi e tro fe së a heetre hnyawa thupene la hna icasikeu. Ngöne la easë a bëeke hmaca kowe la itre hne së hna munë, ngacama nyipiatre së maine nekönatre pena, hapeu, loi kö e troa ujëne la hna heetre ne Kovasio së ka ihmeku memine la hna heetre ne hmi, troa xome pena ha la hna heetre ka ceitune memine la itre wanaithihlë? Hapeu tha kolo kö lai a amamane laka ame la hna heetre ne hmi së ke tha ketre pengöne kö ej, hune la ketre hna heetre menu kö ka qaja qaja la aqane mele së? Mekune pala kö laka itretre anyipici Iehova së, nge loi e tro së isa ala casi a atre laka e troa qeje së, ke, aqane ujë së lai a thinge la gojenyi ne tro kowe la nyipici.
Tro la itre ka troa xome la bapataiso a mekune hnyawa laka, tha meköti kö ngöne la ijine ka hmitrötre cili troa hetrëne la itre inunu hna cinyihane la itre mekune ne la fen, itre aqane ithahnata, maine itre hna ewekë ne pibilisite. Qangönelai, loi e tro la itre qatre thup a canga ce wange hnyawa memine la itre trene aja kowe la bapataiso la itre hnyinge thatraqane la drai cili nge troa canga qaja koi angatre ka hape, ijije maine tha ijije kö troa kepe angatr. (Ame la kola kuca lai itre hnying, ke, loi e troa hamëne la itre xaa ixatua ka ijij, matre tha tro kö a heetre angazonyi ngöne la kola troa xome la bapataiso.) Tha ketre nyipi ewekë kö tro la itre ka troa xome la bapataiso, a hna kapa hë hnene la itre qatre thup, troa cinyihane la itre eje i angatr ngöne la ijine Kovasio.
Itre hna munë ka ikep: Amamane jë la thina ka meköti ngöne la epuni a lapa thene la itre trejiin. Tuneka matre ce ithahnataane memine la fami, troa hane kapa la itre trejine qa hnitr, maine qangöne la itre xaa götrane pena. Ame la ihnimi së kowe la itre trehnyiwa, ke, ketre aqane tro hi lai a hamëne la hotre së. Nyipi ewekë tro la itre keme me thine a ce ithahnataane memine la itre nekö i angatre qëmekene la Kovasio, la aqane tro angatr’a ujë, nge troa qaja hnyawa koi angatre la hnëqa i angatr, ene la troa xötrethenge la aqane ujë ne la keresiano.
Göi itre aparei: Nyipi ewekë troa wangatrune pala hi la itre trejine me epun, e hna nue la itre kamera video. Tha loi kö e troa ithung, ngöne la epuni a filime la porogaram. Pëkö ejolene troa kuca lai qa ngöne la itre göhnë i epun. Ketre mekune pala kö laka, tha tro kö a huliwaane la itre ewekë thatraqane kö la Kovasio, maine göi tirisite, maine göi itre xaa ewekë pena, nge tha tro kö a thungejëne la itre atr hnene la itre ewekë së.
Göhnë: Kola sipone matre loi e troa AMI GÖHNENE HMEKUJE JU HI LA ITRE ATRE NE LA FAMI EPUN, ME ITRE XAA ATR KA CE TRO ME EPUNI HUNE LA LOTO I EPUN. Hetre göhnë kö hna hnëkëne thatraqane la itre qatre me qatre föe, me itre sinaatr, ngöne la nöjei Kovasio. Hna öhne ngöne la itre xaa Kovasio, la itre thöthi a lapaane menuune pena ha la itre göhnë ne la itre qatr; qangönelai, tha aqane tro kö lai a amamane la metrötr. Eahuni a pane ipië hnene laka, tha ijije kö troa amë casine la itre göhnë, maine itre hnahage thatraqane la itre ka kucakuca.
Göi itre sipu ewekë së: Hna amekötiine laka tha tro kö a xome atrune ju pë hë la itre ewekë i epuni kowe la hnë Kovasio. Nge maine tha ijije kö tro epuni a amë la ketre ewekë i epuni e kuhu fene la icea i epun, ke, amë ju pë hë e kohilo hnalapa maine hnine loto. Tha tro kö a xome la itre ikalepanyi ka tru e hnine la iuma ne drai, maine amë pena akawane la itre icea, pine laka nyimu ejolen, nge maine tro pena ami angatre hune la icea qëmeke i epuni ke, pë pëhë göhnene ne la itre xan.
18 ame la ketre aqane troa metrötrëne la itre xan, ke, ene la troa canga traqa ngöne la nöjei drai ne Kovasio, maine e drai ka co, matre hmaloi troa thele göhnë göi loto maine hnine pena la iuma ne drai.
19 Nyipici laka, ketre madrine atraqatre la troa ini së hnei Iehova! nge e tro së a huliwaane la traeme së me trenge catre së, me itre mo së thatraqane la Kovasio ne Distrik “L’enseignement divin” ke tro hë së me fami së a kapa la itre manathithi ngöne la götrane ne la ua.
Nyine amekunë së göi kovasio ne distrik
Aqane ujë ka loi: Loi e tro la nöjei atr ka sine la Kovasio, a hetrenyi la aqane ujë ka loi, ene la kola nyipi ewekëne la göhnë ne icasikeu, ceitune me “ene i Akötresie”. (Sal. 55:14) Ngöne la ijine kola cainöj, me daram, me nyima, memine fe la kola thith, ke, kola sipone matre tha tro kö a nyi mejen, wanga tro la icasikeu së a tha drenge hnyawa la pororgaram. Ame la atr ka enij, agö lapa, me ka ithahnata lapa, me ka thingejëne la ite atr pine laka angeic’a kuci foto, ke tha angeice kö lai a amamane la metrötre i angeice kowe la itre ka ajane troa drenge la itre hna cainöjëën. Epi tro la mekuthethewe së me thina ka loi së a anyipicine laka easë a ajan’atrune la wesiula i Akötresie, nge easë fe a sine la Kovasio matre troa kapa la itre ini qa thei Iehova.
Hnalapa: Kola olenene madrine koi nyipunie la aqane xötrethenge la itre hna amekötine hnene la serevisi ne hnëkë hnalapa.
Loi e tro la itre seketere ne la itre Ekalesia a akötrehnine troa canga iupifë lo itre pepa ne sipo hnalapa me thue hnalapa. Maine hetre ka tha xome kö la hnalapa hna hamëne hnene la serevisi ne hamë hnalapa, ke, canga thue macane jë la serevisi cili matre troa nue pena la hnalapa koi itre xan.
Itre nyine uku medreng: Tha hna majemine kö troa traqa fë la itre nyine uku medrenge ngöne itre hna icasikeu ne la ka alanyim. Wathebo i sekirite göi eë, la troa amë itr’ej nyipine la itre kuloar, itre xötre uma trootro, maine akawane la hnënge icea. Nge eje hi laka e troa ipepetrenyi la ka alanyim, ke troa hetre ethane la itre nyine uku medreng, tha koi nyëne casi kö, ngo kowe fe la ketre atr troa kei hnen. Celë hi matre kola sipone matre tha tro kö a ce traqa memin kowe la hnaa Kovasio. Tha hna wathebone fe kö lo nekö i cea i nekönatr, maine nyine amekölen, e maine ej’a të hune i cea ezi keme me thin. Kola olene la hnei epuni hna ixatuanekeun.
Bapataiso: Tro la itre ka xomi Bapataiso a canga lapa ngöne la itre göhnë hna hnëkëne thatraqai angatr, qëmekene la kola nyiqaane la porogarame e mecixeni e hmakany. Troa traqa fë la ihetre ne si ka tha sisi kö troa goeën, nge ca itrawele fe hnene la itre hna troa bapataisoon. Thupene la cainöje me thithi ne bapataiso, ke, tro la ceamëni a hamëne la itre hna amekötine koi itre ka troa xomi bapataiso nge e ase hë ke, kola thinge la nyima. Nge ngöne la xötre hna tixenuën, ke, tro la itre ka thupëne la icasikeu a tro fë la itre ka thele bapataiso kowe la göhnë ne bapataiso angatr, maine kowe la itre loto ne ami angatre e cili. Ame la bapataiso, hatrene la mele së hna hamën, ke, isa easë casi kö me Iehova. Celë hi matre tha meköti kö troa itrohmaeë me ie i wanakoimë hnei itre ka xomi bapataiso e kuhu hne tim.
Serevis Voloter: Kola sipone la itre volotere kowe la Kovasio ne Distrik, kola aja epuni ngacama hnei epuni hna saene ijije hi la ketre hnepe ijin. Maine ijije hi tro epuni a hane ixatua, ke, mekune kö thuemacane la servisi volotere la ijine Kovasio. Ijije fe tro la itre nekönatre ka tha 16 pala kö lao macatre, a hane ixatua ngöne la ijin ne Kovasio, ngo tro pe nyudreni a ce huliwa me ketre atrene kö la fami, maine ketre nyipi atr.
Baj: Kola sipone matre troa isa athipe ngöne ihetre la itre baji hna hnëkëne koi Kovasio ngöne la easë a tro koi Uma ne Kovasio me bëeke hmaca. Celë hi jëne tro së e itre xaa ijin, a qeje pengöne koi itre xane la Maca ka Loi e cahu gojeny.
Aqane atre pengönyisë: Hetre itre karte ne la Kovasio: “L’enseignement divin”, nge kola sipone matre troa hetrenyi pala hi the së lo karte ne thuemacanyi droketre göi madra. Ketre , tro fe lo itre atrene la fami i betel me itre pionie a hetrenyi thei angatre lo itre karte nyine atre pengöi angatr.
Itre nyine troa hmekën: Ngöne la nöjei hne i epuni hna acili loto, ke tro pala hi a kiine la loto, nge the amë amamane kö la ketre ewekë i epuni e koho hnin, maine kiine ju pena la itre ewekë i epuni ngöne ipuni matre sihngödr. Ketre, the amë caasine kö la ketre ewekë i epuni ka tru thupene hune ketre icea e koho hna Kovasio. Hna thuemacanyi huni fe laka loi e troa hmekëne la itre xaa atr ka ngazo thinan, kola thele jëne troa thenge la itre nekönatre a tro kuhu tröne la hna Kovasio. Kola sipone matre troa isa thupën.