Xatuane Jë La Itre Atr Hna Aceitunëne Me Itre Mamoe Troa Eköth Ngöne La Trepene Ka Catr
1 Ame la xupi uma, ke, nyipiewekë e hna pane hnëkëne, nge loi e troa ajane catrën. Thupene la hna siji tulun, kola nyidrawane la hnen, me amë la trepene ka catr. Kola mama trotro la huliwa, nge ej’a loixölene uti hnyawa ha la pexej. Ceitune lai memine la aqane tro së a xatuane la atr hna aceitunëne me mamoe, kösë tro angeic’a wangatrehmekune trongëne la nyipici. Catre jë së troa amejëne la aja ngöne la kola xötrei iöhny. Thupene lai, easë a bëeke hmaca troa iwai, matre amë la trepen, ene la troa ini angatre la itre pane nyipici göi Akötresie memine la hnei Nyidrëti hna amekötine thatraqane la atr. — Luka 6:48.
2 Qëmekene troa amë la trepen, loi e troa pane hnëkëne la hnen, ene la troa nyipiewekëne la itre hna mekune hnene lai atr. Nemene la ewekë hnei epuni hë hna ce wang? Nemene mekene tus? Nemene hnyinge hna sa? Nemene itusi hna amë? Ngöne la ijine kola bëek, loi e troa hnëkëne la itre mekune nyine troa eköthe trongëne la trepen. Ngöne la nöjei iwai, kola akökötrene palahi la wangatrehmekune ne la atr, nge kola tru trootro la lapaune i angeice koi Akötresie.
3 Nge maine hna amë la itus “Vivre éternellement,” qaja ju ka hape:
◼ “Madrine ni troa öhnyi nyipëti e celë hnalapa i nyipë. Mekune pala kö nyipë lo itre ithahnata i nyiso hnapan, hnei nyiso lo hna ce wange laka kola nanazije la aja Akötresie hnene la itre atrene la zi së. Ngo, kola qaja hnyawane hnene la Tusi Hmitrötre laka Akötresieti a nyipiewekëne la atr, nge tro la itre ka meköti a kapa la manathithe jëne la Baselaia. [E jë la Mataio 6:9, 10.] Jëne la Baselaia, tro ha musi hnene la nyipici me meköt.” E jë la Isaia 11:3-5, nge thupene lai, köjane ju kowe lai atr lo lue pane paragarafe ne lo mekene ne lo itus Vivre éternellement. Amamane ju la aqane inine la itre aliene la itus.
4 Nge maine hna amë ngöne la kola xötrei iöhnyi lo tarak Une vie paisible dans un monde nouveau, loi e troa ce wange hmaca lo itre mekune hna ce ithahnataane hë, ene lo itre aja së troa mele ka loi, memine lo itre hna thingehnaeane hnei Tusi Hmitrötr. Nyipiewekë catre troa amamane laka, e troa mele ngöne la nöje ka hnyipixe, ke, loi e tro së a hetrenyi la nyipi atrehmekun. E jë la Ioane 17:3. Qejepengöne jë ka hape, e hetrenyi hë la atrehmekune celë, ke, qa së la troa kuca la aja i Akötresie. E jë la 1 Ioane 2:17. Amamane ju ngöne la götrane 5 ne lai tarake la itre mekune ka ihmeku.
5 Maine hetre ewekë ka mama ngöne la aqane melene la fami ngöne lo epuni a amë la itus “Vivre éternellement” lo kola xötrei iöhnyi, ke, qaja ju ka hape:
◼ “Hnei nyiso lo hna ithahnataane lo eni a traqa hnapane la ketre mekune qa ngöne la aqane melene la fami. Ce xeci hë lo koi nyiso laka, loi e troa xötrethengene la itre hna amekötine qa hnine la Tusi Hmitrötre matre hetrenyi la mele ka loi hnine la fami. Nemene la hnei nyipëti hna mekune matre hetrenyi la manathithi ngöne la faipoipo? Nue pi troa sa. Amamane jë la itre mekune ka ijije qa hnine la itus Vivre éternellement götrane 243 uti hë 246. Sipo nyidrëti jë troa qejepengöne la itre iatr, nge iëne jë la itre mekune ka ijij. Amaman’atrune jë la thangane e troa melëne la itre hna amekötine hnei Tusi Hmitrötr.
6 Maine hne së hna amë lo tarak Une vie de famille agréable, ce wange hmaca ju lo itre tulu qa ngöne la Tusi Hmitrötr hna amamane ngöne la götrane 4 me 5. E ajane hë, ke, hamëne jë la itus Vivre éternellement. Köjane jë la mekene 29 “Comment s’assurer une vie de famille heureuse,” nge amamane jë la aqane troa xötrethenge hnene lai atr memine lai fami angeic.
7 Loi e tro së a isa kuci hnëqane göne la troa iwaihmaca. Ame e treu semitrepa, loi e tro së a bëeke hmaca matre nyipiewekëne palahi la itre atr ka ajan.