Nyiqaane Inine Jë La Tusi Hmitrötre Kowe La Itre Atr Jëne La Itus Vivre éternellement

¹ Tro la ihnimi kowe la itre atr a upi së troa canga wange la itre ka mecijin, me itre ka pi iji la nyipici. (Mat. 5:⁠6) Loi e tro së a nyipiewekën, me canga ipicone la eë ne la aja hne së hna öhn, e tha ajane kö së tro hmaca ej’a pi. Qanyine la aqane hnëkë së troa aeatrëne lai.

² Aja së, la troa nyiqaane inine la Tusi Hmitrötre kowe la itre xan. (Mat. 28:20) Ame ngöne lo itre itusi hnapane Vivre éter­nellement, ke, hanawange la aqane nyiqaan: “Ketre itusi ne ini ka sisitria nyine troa inine la Tusi Hmitrötre kowe la nöjei atr, kowe la itre thöth, maine kowe la itre qatr, ngacama ka isa pengöne la etrune la atrehmekune i angatr.” Ame pena la aqane cinyihan’ej, ke, tha jole kö koi së troa inine la Tusi Hmitrötre kowe la itre atr, nge kola xatuane la itre ka xötrei cainöje troa hane nyiqaane la huliwa cili. E easë a ajane troa nyiqaane inine la Tusi Hmitrötre kowe la itre xan, ke, loi e tro së a maca la aqane kuca la itre iwai­hmaca.

³ Nemene La Aqane Troa Nyiqaane Inine La Tusi Hmitrötre Kowe La Itre Atr? Ngöne la easë a bëek, ke, loi e tro së a xome hmaca la ketre mekun, maine ketre hnyinge hne së hna amë pe ngöne lo xötrei iöhny, nyine troa ce ithahnataan. E hnei epuni hna ithahnataane la pengöne la itre ka meci hë, nge qëmekene la tro epuni a tro, ke, ma ame la hnyinge i epuni kola hape “Nemene jë la mejiune kowe la itre ka meci hë hne së hna hnim?” Qejepengöne jë ka hape ame la melehmaca, ke, tha ketre mejiune menu kö ka pë trepen; Tusi Hmitrötr’a thue­macanyi së laka nyimu atr hë ekö hna amelene hmaca. Ce wange jë la itre iatr ne la itre götrane 167-9. Nge, ce ithahnataane jë la aliene la itre paragarafe 1, me 2, ngöne la götrane 166. E hetre aja ka mama thene lai atr, ke, qaja ju koi angeice ka hape easë a ajane tro hmaca së a bëeke matre sisedrëne la porotrik.

⁴ Maine jë, hnei epuni hna ithahnata memine la ketre kem, maine ketre thine pena ka kukehnine la itre jole hna öhne hnei angatre troa hiane la itre nekönatr. Ma ka loi e tro epuni a qaja, hnene la sipu trenge eweke i epuni la itre mekune celë, ka hape:

◼ “Ame la nöjei keme me thin’asë, ke, angatr’a ajane la mele ka loi kowe la itre nekö i angatr. Hawe, hnei Tusi Hmitrötre hna hamëne la itre ihaji matre tro la itre keme me thin’a xatuane la itre nekö i angatre troa öhne la mele ka loi, ka hetre alien. Celëhi la kepine matre eahuni a ahniithe kowe la itre fami troa ce inine la Tusi Hmitrötr. [Köjane jë la paragarafe 23, götrane 246.] Hawe, tro la atrehmekun’a thuejëne la fami asë troa kapa la itre manathithi ka tha ase palua kö.” E jë la Ioane 17:3. Qaja amamane jë la aja i epuni troa bëek, me amamane kowe la fami la aqane troa nyiqaane inine la Tusi Hmitrötr.

⁵ E ketre thöthi epun, maine ka xötrei cainöje pena, nge hnei epuni hna ithahnataane la mejiune kowe la Paradraiso, ngöne la xötrei iöhny, ke, fe jë la itusi ngöne la götrane 3, nge qejepengöne hnyawaane jë tune la ketre hna ithahnata celë:

◼ “Hnei Tusi Hmitrötre hna thingehnaeane ka hape ame la itre ka kuca la aja i Akötresie, ke, angatr’a mejiune troa melëne la fen, tune la hne së hna goeëne ngöne la iatr celë, ene la fene hna troa lapaane hnene la manathithi me tingeting. Tro la itusi celë a qejepengöne la nyine tro së a kuca matre troa hane kapa la itre manathithi celë.” Qejepengöne jë la aqane ininei epuni la Tusi Hmitrötr, the tro pe a aqean, nge pane amacaane jë.

⁶ Ame easë, angetre drei Iesu, ke, hnëqa së la troa xatuane la itre atr. (Rom. 10:14) E hne së hna amë pe la ketre itus, maine hne së hna ce porotrike pena, ke, hnëqa së la troa xupexatuane la aja. (Mat. 9:​37, 38) E hne së hna aeatrëne hnyawaane la hnëqa së, ke, eje hi tro asë hi së a kepe thangane ka loi.​—⁠1 Tim. 4:⁠16.