Xatuane Jë La Itre Xane Troa Isa Öhnyi Loi
1 Iehova a thingehnaeane koi së laka, tro Nyidrëti a ini së la itre ewekë hne së hna ajane troa atre. Nyidrëti a anyipicine koi së ngöne Salamo 32:8 ka hape: “Tro ni a ini ö me köjane koi ö la jëne qa i ö troa trongën; tro ni a haji ö me alamekë eö.” Tha ajane kö së troa cipane la ixatua, ngo easë pe a ajane troa amamane kowe la itre atr la loi tro angatr’a kapa qa ngöne la hna nyipiine la itre eamo qa hnine la Tusi Hmitrötr, memine la itre hnei Iesu hna ini së. (Isa. 48:17; Ioane 7:46) Loi e tro së a xötrethenge la eamo cili e treu semitrepa, ngöne la easë a troa trofë trongëne la itus Le plus grand homme. Ngöne la easë a troa ithahnata memine la itre atr, ke, nyimutre la itre aqane trofë matre nyine troa amamane la etrune la thangane la itre ini qa thei Iesu.
2 Pine laka tru catre la itre jole hna öhne ngöne faipoipo enehila, loi e troa iëne la ketre mekune qa hnine la itus “Le plus grand homme”:
◼ “Alanyimu la itre trefëne hnenge hna ithahnata memine ka tha lapa loi kö hnine la faipoipo i angatr, me ka sei hna cil, nge kolo palahi a elë la etrun. Hapeue la mekune i epun? [Nue pi troa sa.] Nyimutre la itre ka tha trotrohnine kö la itre aliene ka tru ne la itre jole celë. Ngo ejehi laka, maine tro angatr’a catr, tro ha huti la faipoipo i angatr, nge tro fe a angatr’a hetrenyi la mele ka loi. Ame la kii ne atrein, ke, eje ngöne la hna xötrethenge la itre eamo qa hnine la Tusi Hmitrötr.” E jë la Efeso 5:28, 29, 33. Fe jë kowe la mekene 95, ithahnataane jë la itre paragarafe 3 me 6, nge thupene lai hamëne jë lai itus.
3 Loi e tro epuni a hamëne la ketre tarake matre nyijëi epuni troa amamane la itus “Le plus grand homme.” Qaja ju ka hape:
◼ “Ngöne la eahuni a porotrike memine la itre atr, ke, eahuni a öhne laka, alanyimu la itre ka qaja la ketre ewekë ka ketr la mele i angatr. . . [Iëne ju la ketre ewekë ka hnyipi traqa hna ithahnataane ngöne la itre nuvel]. Kola amamane laka, kolo jë petrehi ka hape ngazo catre jë la mele ngöne la fen. Itre xan’a isa hnyinge ka hape, tro jë kö a cile huti la fen. Hapeu, tuneka jë fe la mekune i epun? [Nue pi lai atr troa sa.] Tro epuni a öhnyi ixatua qa ngöne la tarake celë. [Loi e hetrenyi thei epuni la lue tarake Le monde actuel survivra-t-il?, liine ju lai ketre, nge lapa xome ju pë hë lai ketre ngöne la wanakoime i epun.] Pane goeëne ju la aqane perofetane Iesu laka. . . ” E jë qa ngöne la ketre paragarafe ne götrane 4 maine 5 ka ihmeku memine la ewekë ka traqa hna ithahnataane ngöne la xötrei. Thupene lai, loi e tro epuni a amamane la itus Le plus grand homme, nge fe jë kowe la itre xaa mekune ne la hna perofetaane hnei Iesu, hna qejepengöne hnyawaane ngöne la mekene 111.
4 E maine epuni a ajane troa trofë la itus “Le plus grand homme,” me amamane la aqane tro hmaca la fen’a paradraiso:
◼ “Eni a mekune laka, epuni fe a hane hnyingëne thele la pengöne la mele i epuni ngöne la itre drai ka troa xulu. Ngöne la Thithi Joxu, ke, hnei Iesu hna ini së troa thithifë la aja i Akötresie matre eatre ej’e celë fene tune e hnengödrai. Hapeu, tuneka jë la pengöne la fene ngöne la ijine cili? [Nue pi troa sa.]” Amamane hnyawaane ju la iatr ngöne la mekene 125, nge qejepengöne ju lo hna thingehnaeane hnei Iesu kowe lo atre ënö. Thupene lai, hnyinge ju ka hape ijije kö tro lo itre ka meci hë ka tune la atr celë a hane mele hmaca ngöne la fene ka troa xulu. Fejë kowe la iatr ne la mekene 133, nge e jë la paragarafe 4. “Hapeu, tha sheminge kö e troa mele ngöne la fene hnengödrai ka tune la? Tro la itusi celë a amamai epuni la aqane tro epun, memine la fami epuni a hane mele ngöne la paradraiso ka tune la.”
5 Maine hnei epuni hna canga hnëkëne la aqane tro epuni a ithahnata memine la itre atr, ke, tro ha hetre thangane ngöne la huliwa ne cainöje trootro ngöne la itre hnalapa, celëhi kii ne atreine lai. Qëmekene tro epuni a fenafena la qëhnelö, ke, loi e troa mama hnyawa koi epuni la ewekë nyine tro epuni a qaja matre troa amamane la ketre mekune qa hnine la Tusi Hmitrötr. Hawe, lapa mekune ju la nyine tro epuni a qaja, tha tro pe a aqean, me amamane la ketre mekune ka nyipiewekë qa hnine la zonal, maine qa hnine la ketre tarake hnei epuni hna mekune troa hamën, e tha hna kapa kö la itus. Huliwaane jë la nöjei ijine ka ijije nyine troa traane la itre itine ne la nyipici ne Baselaia e treu semitrepa. (Ate Cai. 11:6) Tro epuni a ketre ixatua kowe la itre xane matre tro angatr’a hane kapa la itre manathithi ka epine palua.