Wesiula i Akötresie a Hamëne La Eamo
1 “Easë a mele enehila ngöne la fene ka tiqa hnei jol, nge xalaithe catre hi la itre nyin. Nyimutre catre la itre atr, a itre milio la etrun, ka mecijine pala hi. Ketre kola elë fe la etrune la itre atr ka thatreine nue la dorog. Nge kolo pala hi a tru catre hnei fami ka ethitr. Pëkö drai ne thaa qeje angazonyi kuku, me iakötrë, ngöne la itre zonal. Ketre, thaa mama kö ngo easë pala hi a mano jëne lue hnafiji la enyi me iji la timi hna apuingazon. Ame fe enehila ke, kola elë pala hi la ihumuth.”
2 Celë hi hna cinyihane ngöne la qaane la itus La Bible: Parole de Dieu ou des hommes? Kola nyipici catre enehila la itre pane mekune la itus, hune ekö lo kola nyiqaane amamane ej, a sevene hë lao macatre enehila. Itre atr a ajane troa atre laka, kola hamëne hnene la wesiula i Akötresie la itre eamo me itre nyin la nöjei jole asë ka angazone la mele i angatr. Celë hi matre ngöne la treu Diseba, tro hë së a catre xatua angatre me trofë la Traduction du monde nouveau memine la itus La Bible: Parole de Dieu ou des hommes? Ngo eje hi, thaa hnene kö laka, kola amë pe la ketre itusi kowe la ketre atr, ke tro hë angeice a kapa la itre eamo qa thei Akötresie. Loi e tro së a iwai hmaca matre troa nyiqaane etidi me angeic. Nge troa hetre ixatua koi së, e hne së hna catre huliwa tune lai. (Mata. 28:19, 20) Hanawange la itre xaa aqane tro fë ithahnata ka lolo:
3 Maine tro epuni a iöhnyi memine la ketre qatr, loi e tro epuni a qaja ka hape:
◼ “Eni a ajane troa pane hnyingë epun: Ngöne la epuni a thöthi ekö, tuneka la aqane imelekeu ne la itre atr e hnine la hunahmi? [Nue pi troa sa.] Ame enehila kola saze catre la itre hnedrai, hapeu, nyipici kö lai? Hapeue la mekune i epun, nemene la kepine matre kola saze la aqane mel? [Nue pi troa sa.] Easë a öhne enhila la kola eatre la hna perofetane hnei Tusi Hmitrötr. [E jë la 2 Timoteo 3:1-5.] Ngacama kola qeje pengöne hnyawa la engazone la fene hne së hna melëne enehila, ngo eje fe a hane thingehnaeane la ketre ihnadro nyine tro së a mele ngön ka sisitria, laka easenyi hë troa traqa. Celë hi kepine matre, eahuni a xatuane la nöjei atr troa e la Tusi Hmitrötr. Hapeu, öhne fe hi epuni la eloine la aqane cinyihane la Tusi Hmitrötre celë hnenge hna e ngön, ene la Traduction du monde nouveau, ketre, hmaloi e troa trotrohnine la itre mekune e hnine ej?” Qaja ju ka hape hna cinyihane ngöne qene Faras ne la hnedrai së, celë hi matre thaa jole menu kö troa trotrohnine hnyawa ej. Amamane ju la itus La Bible: Parole de Dieu ou des hommes?, nge fe jë kowe la mekene 10, e cili kola qejepengöne la ketre hna perofetane ka eatre ngöne la hneijine së. Hamëne ju la Tusi Hmitrötre cememine la itus koi 750 F.
4 Ngöne la epuni a bëeke hmaca troa wange lo qatre hnei epuni hna hamë Tusi Hmitrötre me itusi kow, öni epuni jë hi:
◼ “Caasi hi la mekune so ngöne lo nyiso a porotrikëne la aqane saze la itre atr enehila ngöne la nöjei götran, ngazo catre hë enehila la aqane mel, thaa tune kö lo itre hnepe macatre ka ase hë. Ngo eni a bëeke hmaca troa amamane koi epuni la itre ewekë nyine mejiune kow, hna hamëne hnei Tusi Hmitrötre thatraqane la ketre fene ka sisistria catr, a calemi hë. [E jë la Hna Amamane 21:3, 4.] Pine laka, trenge ewekë i Akötresieti lai, haawe, kola xatua së troa wangatrune la hna troa qaja hnei Tusi Hmitrötr.” Fe jë la itus Parole de Dieu kowe la mekene 14, nge e jë la paragarafe 3-4. Hnyingë nyidrëti jë ka hape ajane kö nyidrë troa hane etid.
5 Maine epuni a troa ithahnata kowe la ketre thöth, ijije tro epuni a qaja ka hape:
◼ “Eni a pi ajane troa atre la mekune i epun: Pine laka, ketre thöthi epun, hapeu, ijiji epuni fe troa hetrenyi la mejiune laka, troa lolo la itre drai ka troa xulu? Nemene la aqane goeëne i epuni la itre drai ka troa traqa? [Nue pi troa sa.] Eloine pe, hetre nyipi trepene ka catre matre ijije troa mejiune kowe la itre drai ka loi ka troa xulu. [E jë la Salamo 37:10, 11.] Pine laka, nyimu aqane wange hnene la itre atr la Tusi Hmitrötre memine la aliene ej, haawe, eahuni a thele troa amamane la itusi celë, La Bible: Parole de Dieu ou des hommes? Pane goeëne ju la itre kepine hnene eje hna hamëne nyine iupi troa e la Tusi Hmitrötr. [E jë la paragarafe 16-17 ngöne götrane 10-11.] Eahuni a lapaune hnyawa laka, nyipici la hnei Tusi Hmitrötre hna qaja, haawe hetrenyi hë la mejiune huni laka, lolo la itre drai hnapin. Maine epuni a ajane troa hane e la itusi celë, atraqatre la madrinenge troa hamë epuni la ketre.”
6 Maine epuni hmaca ha a bëeke troa wange lo thöthi ka kapa lo itusi hna hape, la “Parole de Dieu” atreine tro epuni a qaja ka hape:
◼ “Atraqatre catre la madrinenge laka, epuni a hane hnengazone la itre ewekë ka troa xulu. Mekune hi epuni lo xötre qa hnine la Tusi Hmitrötr hnenge hna amamane koi epun, kola thingehnaeane koi së la eloine memine la etingetingene la fene elany. Hanawange hmaca la ketre xötr. [E jë la Hna Amamane 21:3, 4.] Ame la itusi hnenge hna hamëne koi epun, ke, eje a anyipicine laka, wesiula i Akötresie la Tusi Hmitrötr, ngo thaa qa thei atr kö. Nyipi ewekë catre la itre aliene la mekune celë. Tro sa ce wange la aqane qejepengöne itre ej. [E jë la itre paragarafe 1-2 ngöne götrane 184-5.] Maine ajane epun, atraqatre la madrinenge troa inine la Tusi Hmitrötre me epun, nge thaa nyine nyithupene kö.” Maine ajane hi angeice troa etid, hnyingë angeice ju fe ka hape, hetre Tusi Hmitrötre i angeice jë fe kö. Maine pëkö, amamane ju koi angeice la Traduction du monde nouveau.
7 Atreine hi troa pi hane drenge hnene la ketre atr ka thatre kö la nyine troa kuca, matre troa cile kowe la itre ejolene la mel; kola hape:
◼ “Easë a melëne enehila la ketre hnedrai ka tru ejolen, pë ju pë hë atr hna thaa ketr. Alanyimu la angetre ujë kowe la itre atr ka hamë nöjei pengöne eamo. Itre xane a thele ixatua thene la itre droketre ne mekun, lo itre hna hëne ka hape, psychologue. Ngo tro epuni a öhne eka la itre nyipi eamo nyine loi koi epun? [Nue pi troa sa.] Tusi Hmitrötre a amamane koi së asë la ketre mekune ka nyipi ewekë catre nyine tro së a trotrohnin.” E jë la Ieremia 10:23. Fe jë la itus La Bible: Parole de Dieu ou des hommes? ngöne götrane 187, nge e jë la paragarafe 9. “Tro hë la itusi celë a xatua epuni troa trotrohnine la aqane troa apaatrene hnene la Baselaia i Akötresie, la nöjei jole së asë. Ajane kö epuni troa hane e?”
8 Maine ngöne lo epuni a xötrei traqa, hnei epuni hna ithahnatane la enyipiewekëne la troa hetre eamo thatraqane la atr, epuni a sisedrëne ju la porotrike ngöne la epuni a iwai hmaca, jëne la aqane tro fë celë:
◼ “Ame lo iöhnyi nyiso hnapan, ihmeku hnyawa ju hi lo lue mekune i nyiso laka, maine easë a ajane troa atreine cile kowe la itre ejolene la mel, haawe nyipi ewekë tro së a thele eamo thei Akötresie. Qa ngöne lai, eni a mekune laka, tro hë epuni a madrine la itre hna cinyihane ngöne pune lo itusi hnenge hna hamë epun. [E jë la itus Parole de Dieu ngöne la itre paragarafe 12-13, götrane 189.] Atraqatre fe la madrinenge troa nyiqaane inine me epuni la Tusi Hmitrötr, ase hë ni hnëkë troa pane amamane koi epuni enehila la aqane troa tro xome ej.”
9 Tro hë Iehova a amanathithine la trengecatre hne së hna kuca, ngöne laka, easë a xatuane la itre thöthi me itre qatr trahmanyi me föe, matre tro fe angatre a hane kapa madrine la enyipiewekëne la wesiula i Akötresie memine la aliene ej, thatraqane la mele së.—Sal. 119:105.