Kola Sa La Itre Hnyinge i Nyipunie

◼ Pine nemene matre loi tro së a canga hamëne pala hi la rapore ne cainöje së, e nöjei treu?

Hetre madrine së asë hi ngöne la easë a drenge la itre ewekë ka lolo hna kuca ngöne la hna cainöjëne la maca ne la Baselaia. (Wange ju la Ite Edomë 25:25.) Kola qaja ngöne Ite Huliwa 2:41 ka hape, hetre thangane catre la cainöje hna cile fë hnei Peteru ngöne lo ijine penetekos, ngöne laka, “hna nyixane koi angat, kösë köni thausan.” Thupene ju fe kö lai, hna elë la etrune la itre atr ka kapa la nyipici, matre “tripi la o thausan.” (Ite Huliwa 4:4) Dei kö la madrine ka tru ne la itre keresiano ne la hneijine i Iesu, ngöne la kola kapa la itre rapore cili! Ketre tu së fe enehila, easë a hane madrine la itre rapore ka hane hamë ithuecatre koi së. Hna ketr la itre hni së, ngöne la easë a drenge laka, hetre thangane ka tru qangöne la hna trofë maca ka loi, hnene la itre trejine me easë e cailo fene hnengödrai asë.

Pine laka ketre huliwa ka tru la troa hleme la itre rapore e pune treu, nyipi ewekë catre tro la nöjei ka cainöjëne la maca ne Baselaia a xatuane la atrekë hnëqan. Hapeu, trotrohnine hnyawa kö epuni laka, troa canga hamëne la rapore i epuni e pune treu?

Atraqatre la madrine së ngöne la easë a atre jëne la itre rapor, laka, kola kökötre pala hi la huliwa i Akötresie. Ketre, nyine ixatua koi Sasaiatri la kola hamëne la itre rapor, ngöne laka, hna jëne lai, kola troa wange hnyawa la aqane kökötrene la huliwa e cailo fen. Kola axeciëne mina fe la itre mekune göi itre götrane gaa aja ixatua catr, maine pengöne me etrune itusi hna troa kuca. Jëne la itre rapore ne cainöje trootro, kola atrehmekune hnyawa hnene la itre qatre thupe ne la nöjei ekalesia la götrane hnei angatre hna troa hamë ixatua ngön. Ithuecatre ka tru la kola hamëne la rapore ka lolo ne la ekalesia asë, ngöne laka, kola upi së asë troa waipengöne la huliwa ne cainöje së isa alacas, göi troa akökötrene pala hi.

Nyipi ewekë tro asë hi la itretre cainöje a trotrohnine hnyawa la isa hnëqa i angatr, ene la troa canga hamëne la rapore ne huliwa e pune treu. Troa nango hmaloi kowe la itre ka xomiujine la ini tus troa amekunëne la itretre cainöje la hnëqa i angatr, hnene laka, canga saqe hi angatre hamë ixatua kowe la itre ka nango öhnyi jole troa cainöje pala hi ngöne la nöjei treu. Ithuemacanyi la nyine troa hamëne lapane ngöne la ini tusi ka nyipune la treu, maine ngöne pena la ketre ijine ka ijij. Maine pëkö ijine troa hamëne la itre rapore ngöne la uma ne Baselaia, atreine hi tro la atre xomiujine la ini tus troa hleme itre ej, me thele troa canga hamëne kowe la seketere matre troa hane amë e ijine petre kö ngöne la rapore nyine troa iupi fë koi sasaiatri e nöjei treu.

Maine tro së a canga hamëne pala hi la rapore së me nyipici la aqane tro së a kuca itre eje e pune treu, haawe, tro ha ahmaloeëne la huliwa ne la itre atrekë hnëqane la troa thupëne la mele së ngöne la ua.