Loi e Troa Cainöje Kowe La “Nöjei Ate Asëjëihë”
1 Ame ngöne la easë a iöhnyi memine la nöjei atr, ka isa pengöne la aqane mel, maine ka isa hmi pena, easë hi a mekune jë lo trenge ewekë i Iehova, lo atre ajane “la nöjei ate asëjëihë troa mele me wangate hmekune la nyipici.” (1 Tim. 2:4) Ketre maine hna hnëkëne hë thatraqane la huliwa ne cainöj, la itre tarak me itre boroshür, ngo hetrenyi pala kö la itre xaa itusi ka lolo catr, hna troa tro fë trongëne ngöne la nöjei ijin, matre troa xatuane la itre atr, hna ngazo la aqane hamë ini kow hnene la itre hmi, me ngöne la nyipici göi Akötresie me Keriso.
2 Kola e ngöne la itre jiane huliwa cili, la itus, Le plus grand homme de tous les temps. Maine tro së a qaja atrune la mele i Iesu Keriso, ijije hi tro la itusi a hane xatuane la ketre atr troa atre hnyawa la hupuna i Akötresie me hane ketr la hni angeic, tune lo itre atr ka nyimutre ngöne la hneijine i Iesu. (Ioane 12:32) Maine ijije koi epun, tupathe jë troa xome cahu itre xaa mekune nyine troa amamane la itus.
3 Nyiqaane jë troa hnyinge ka hape:
◼ “Nemene la hnei epuni hna mekune ngöne la kola qeje Iesu Keriso? [Nue pi troa sa.] Nyimutre la itre ka qaja trongëne la mele ne la atr, ka wangatrehmekune laka, Iesu la atr ka tru hune la nöjei atr ka mele ngöne la nöjei ijin. [Hamëne jë la ketre ceitune hna xome qa hnine la itre mekune ka nyiqaane la itus Le plus grand homme.] Kola amamane hnei Tusi Hmitrötre ka hape, ame la mele i Iesu, ke, celë hi ketre tulu nyine tro së a xötrethenge.” E jë la 1 Peteru 2:21 memine la pane paragarafe ngöne la götrane ka nyipune la itre mekune ka nyiqaane la itus Le plus grand homme. Maine kola ajane hnene la atr troa hane atrepengöi Iesu hnyawa, hamëne pi lai itus. Qëmekene tro epuni a isa ije me angeic, e jë la Ioane 17:3 nge hnyingëne ju ka hape, “Nemene la aqane troa kapa la atrehmekune ka troa eatrongë së kowe la mele ka epine palua?” Isa pui ju matre troa bëeke troa sa lai hnying.
4 Ame ngöne la epuni a bëeke troa qeje pengöne la aqane troa kapa la atrehmekune ne iamele, öni epuni jë ka hape:
◼ “Hnenge lo hna ahnithe koi nyipë laka, tro ni a bëeke troa amamane la aqane tro nyipëti a hane kapa la atrehmekune ka eatrongë së kowe la mele ka epine palua.” Amamane jë la boroshüre Thele, nge xome jë la pane ini, nge nyiqaane etidi jë memine lai atr.
5 Ijije fe tro së a hamëne la itre tarak, ngöne la kola troa tro fë la itus, Le plus grand homme. Aqane huliwa lai ka troa xatua së troa atrehmekune la etrune la aja ka eje thene la atr, nge troa axeciëne maine ijije troa hamë angeice lai itus, maine ketre pena ka ihmeku memine la hna ajane hnene lai atr, ngöne la kola xötrei ithahnata me angeic.
6 Xome jë la tarak “Une vie paisible dans un monde nouveau” nge qaja ju ka hape:
◼ “Hapeue la hnei epuni hna mekun, ijije kö troa mele tingetinge la itre atr elany, tune la aqane amamane ngöne la icetröne la tarak celë? [Nue pi troa sa.] Pane wange ju la xötrehnaewekë tixenuë, ngöne la pane paragaraf, götrane 2. Kola hnyinge ka hape: ‘Ngo hapeu, ame la troa mejiune kowe la itre ewekë celë elanyi ngöne la fen, ke, kolo lai a pu?’ [Thupene lai, e jë la paragarafe thupen ngöne lai tarak.] Hna xome qa hnine la Tusi Hmitrötr, la itre mekune göi hnengödrai ka hnyipixe, me fene ka hnyipixe, ngöne 2 Peteru 3:13. Maine ijije tro epuni a ketre xome la Tusi Hmitrötre i epun, tro nyiso a e la Salamo 104:5 matre troa atre hnyawa la pengöne la fene ngöne la itre drai elany.” Maine pena e ju hi la xötre ngöne la Tusi Hmitrötre i epun. Maine hetre ajane la atr troa drei së, haawe, xome jë la itus Le plus grand homme, ngöne la mekene 133.
7 Maine easë a ajane troa etidi memine lai atr, haawe, loi e tro së a hnëkëne hnyawa la iwai hmaca. Qa ngöne lai, nemene la aqane troa nyiqaane la ketre etid, jëne la mekene 133?
8 Thupene la hna e la 2 Peteru 3:13, maine jë tro epuni a e maine troa qaja la ka ijij, ngöne la itre mekune ne la hnaaluene paragarafe ne la götrane 3 ne la tarak, me hape:
◼ “Tro Iesu Keriso, hupuna i Akötresie, a joxu ne la Baselaia i Iehova. Hanawange la aqane qeje pengöne hnene la itus Le plus grand homme de tous les temps, la pengöi Iesu, me thuemacanyi së la hnei nyidrëti hna troa kuca ngöne la itre drai elany.” Thupene lai, e asë jë lai meken. Xome jë la pane hnyinge ngöne la pune lai meken, nge hnyingë angeice ju ka hape: “ ‘Nemene la madrine ka troa eje elany, thene la itre ka troa mele pe e Amagedon, angatre me itre nekö i angatr?’ [Nue pi troa sa. Ka loi fe troa ithahnatane tune lai, la itre xaa hnying.] Hapeu, aja i epuni fe kö troa hane sine la fene ka hnyipixe, hna troa joxu ngön, hnei Iesu? Hetre ajane i eni troa xatua epuni ngöne la nöjei wiik, troa öhne jëne la Tusi Hmitrötr, la aqane troa hane eatre la ewekë cili koi epun.” Thupene lai, hamëne pi la boroshür Thele, nge sipone jë lai atr troa iëne la ini ngöne lo itre mekune nyine troa ce wang, a hnei epuni hna troa etidi ngön, e epuni hmaca a troa iwai.
9 Kolo asë hi a thele hnene la nöjei atr ka hni ka menyik, la nyipici göi Akötresie me Keriso. Ijije hi tro së a xatua angatr, jëne la huliwa ne cainöje së. Qa ngöne lai, loi e tro pala hi së a “huliwa, me cat, ke hne së hna mejiune koi Akötesie ka shewengönie, lo Ate amelene la nöjei ate asëjëihë.”—1 Tim. 4:10.