Amamane Jë La Ole Së Kowe La Itre Jiane Huliwa Qaathei Akötresie
1 Ame ngöne la kola hnëkë troa nyihnyawane hmaca la ēnē, hnei Iosua joxu hna upe la itre hna acil troa kuca la huliwa, me qaja koi angatr ka hape: “Thaa hna ate hmekune thei angate lo hna hamëne la mani kow, ke hna thawa anyipicine hnei angatr.” (2 Ite jo. 22:3-7) Kola mama hnyawa la hni ne ole ne la itre atr celë kowe la itre ewekë ka hmitrötr, ngöne la aqane huliwane angatr la itre jiane huliwa, hna amë ngöne la ihnatrapaime i angatr. Enehila, easë fe a hane eatrëne la huliwa ka hmitrötr, ene la maca ka loi Akötresie, nge nyipi ewekë mina fe koi së troa amaman la aqane mele nyipici së, ngöne la easë a huliwan la itre jiane huliwa hna hamën koi së.
2 Ngöne La Hna Cainöje Trootro: Atraqatr la ole së kowe la maca ne iamele ka ej e hnine la itre itusi së, memine la etrune la huliwa me thupen ngöne la kola kuca itre ej, ene pe, kola upi së troa wangatrune hnyawa itre ej. Thaa tro pi kö së a hamën menun la itre itusi së, kowe la itre atr ka amaman laka, pëkö nyipi aja thei angatr troa kapa la maca qa hnine la Tusi Hmitrötr. Maine kola amaman hnene la ketre atr ka hape, hetre hnepe ajane i angeic kowe la maca ka loi, haawe, ka loi tro hi së a hamën koi angeic la ketre tarak.
3 Hamëne jë la itre itus kowe la itre atr ka amaman laka, angatr a wangatrun la enyipiewekën itre ej. Loi e tro së a thupën matre thaa tro kö a amë ngöne la itre götran gaa tru atr la itre itusi së, wanga tro itre ej a meköle menu. Loi e troa thupën matre thaa tro kö a aluuzin itre ej, celë hi matre, loi e troa pane wange me e la etrune la itre itusi asë ngöne la hnalapa së, nge thupene lai, easë a sipon la etrun la itre itus hna ajan troa kapa. Maine epuni a öhne laka, thatreine kö epuni troa hamëne asë la itre itus hnei epuni hna komaadën, haawe, nango acone ju la etrun nyine troa kapa.
4 Itre Sipu Itusi Së Pe: Loi e tro hmekuje hi së a komaadën la itre itus hne së hna nyipi ajan. Haawe, loi e tro sa xomehnöthe la aqane tro sa sipone lo itre Bible de luxe, Bible à références, me itre xaa itusi ju kö, tune la Index, lue volim Perspicacité, me itus Prédicateurs, itre itusi ka tru thupen.
5 Hapeu, hne së kö hna cinyihane hnyawa la ëje së me hnalapa së, ngöne la itre sipu itusi së? Kola xatua së lai troa thupën, matre thaa tro kö sa canga nyihnan la itre itusi ka paatr. Maine paatre hë la nyima së, maine Tusi Hmitrötr, maine itus nyine etid, maine jë tro sa öhne itre ej a hna xawaan hnine la Uma Ne Baselaia, maine ngöne la hnë asabele.—Luka 15:8, 9.
6 Thupëne hnyawa kö la aqane tro së a huliwan la itre itusi së. Celë hi aqane tro së lai a amamane hnyawa la aqane mele nyipici së, ngöne la easë a huliwan la itre jiane huliwa ne la Baselaia, hna amë hnei Iehova ngöne la itre ihnatrapaime së.—Luka 16:10.