Kola Nyiqaane Thawa La Itre Pepa Ne Ihë Göi Drai Ne Amekunën e 2 Eiperem
1. Ame ngöne la macatre celë, eue la ijine tro sa thawa la itre pepa ne ihë thatraqane la Drai Ne Amekunën, nge nemene la enyipiewekëne la huliwa ka ketrepengöne cili hna eköth ngöne la nöjei macatre?
1 Qaane e 2 Eiperem koi 17 Eiperem, easa troa thawa la itre pepa ne ihë thatraqane la ketre ijine ka sisitria ngöne la macatre, ene la Drai Ne Amekunën la meci Keriso. Ame ekö, nyimutre la itre atr ka hetre hni ne ajan, ka kapa la ihë cili hna tro fë ngöne la nöjei macatre. Drei la ketre ceitun, ame ngöne lo ijine kola atrune la Drai Ne Amekunën, hnene la ketre föe hna hëne la filial, me qaja ka hape: “Eni petre hi a traqa e celë hnalapang, nge traqa ju hi ni a öhne la ketre pepa ne ihë fene la qëhnelö i eni. Eni a pi tro, ngo thatre hnyawa kö ni la hawa.” Haawe, hnene la trejine trahmany hna qaja hnyawane koi eahlo la hnë tro eahlo a öhne la ithuemacanyi cili hune la pepa ne ihë. Hnene la föe hna nyipune la porotrike hnene la hna ahnithe ka hape, “Ngaa qanyinge pë hë e drae hej troa hane sine la ijine cili!”
2. Nemene la nyine tro sa qaja ngöne la easa tro fë la pepa ne ihë?
2 Aqane Tro Sa Xome La Huliwa Ne Ihë Cili: Pine laka hna sa la itre drai ne troa haöthe la teritoare së, haawe, thaa tro kö sa aqean. Maine jë tro sa qaja, ka hape: “Bozu së. Eahuni a könëne la hnepe lapa i nyipunie, matre troa hane sine la ketre ijine ka sisitria ngöne la macatre hna troa hnen e cailo fen, e Sabath 17 Eiperem. [Amamane jë la pepa ne ihë kowe la atrene la hnalapa.] Ame la ijine cili, tre, ene la ijine kola troa amekunëne la meci Iesu. Hetrenyi la ketre cainöj hna nyitrepene hnei Tusi Hmitrötr hna troa cile fë koi së, nge eje a troa amamane la aqane tro sa kepe thangane qa ngöne la thupene mele i Keriso. Kola mama ngöne la pepa ne ihë celë la hawa memine la götrane hnë troa eköthe la icasikeu cili.”
3. Tro sa könën tune kaa la itre atr ka nyimutre?
3 Maine atraqatre la teritoare ne la ekalesia i epun, haawe, tro la itre qatre thup a upi epun troa nango amë acone la itre pepa ne ihë ngöne la itre hnalapa ka pë atren. Loi e xecie koi epuni laka, hnei epuni hna könën la itre atr hnei epuni hna wange lapaan, me itre hnainin me itre sine huliwa, me itre sine ce ini, me itre xaa atre kö. Ame la epuni a thawa la itre pepa cili e mecixen me sabath, loi e tro mina fe a tro fë la itre zonale së. Hapeu, ijije kö tro epuni a pionie ka ixatua ngöne la treu Eiperem, me madrine troa catre xome la huliwa ka ketrepengön cili?
4. Pine nemene matre aja së tro la itre atr ka hni ka ajan a hane sine la Drai Ne Amekunën?
4 Drei la ketre nyine anyipicin ka sisitria hna troa kapa hnene la itre atr ka ajane troa sine la drai cili! Tro hë angatr a drenge la kola qeje pengöne la ihnimi atraqatre i Iehova hnene la hna hamëne la thupene mel. (Ioane 3:16) Tro mina fe angatr a atre la aqane troa kepe thangane ka loi hnene la itre atr asë qa ngöne la Baselaia i Akötresie. (Is. 65:21-23) Ketre, tro fe hë angatr a easenyi kowe la itre atrene la icasikeu, me sipo angatr troa inine la Tusi Hmitrötr, matre troa akökötrene la atrehmekune i angatr. Celë hi la ewekë hne së hna thithi fë, ene laka tro la itre atr ka hni ka meköt a kapa la ihë cili, me hane ce atrune me easë la Drai Ne Amekunën!