“Tha Gufa Kö La Huliwa i Nyipunie”
1 Hane hi la ketre ithanata ka hamë ithuecatr! Tha gufa kö la huliwa së koi Iehova. (1 Kor. 15:58) Ngo easë pe a mekune la itre atr ka catre huliwa matre hetre manie i angatr, me öhnyi loi thatraqane la mele i angatr. Angatr a tro kowe la itre uma ne ini ka tru, a ije macatre ne ini jë kö; maine pena, angatr a huliwa meci matre hetre mo i angatre jë. Ngazo pe, traqa pi koi angatr “la ijine memine la ewekë ka xulu,” nge triane ju hi angatre lo ewekë hnei angatr hna thele troa hetreny, maine pena, thatreine hë angatr troa kapa la etrune la manie hnei angatre hna ajan. Kösë lo angatr a “xeni la eny.” (Ate cai. 1:14; 9:11) Celë hi kepine matre ka loi kö la troa sa xome la huliwa ka tha tro kö a gufa enehila, me epin!
2 Huliwa Ka Hetre Thangan: Ame la huliwa ka sisitria catr nyine troa kuca e celë fen, tre ene la troa cainöjëne la maca ka loi ne la Baselaia i Akötresie. Drei së ju hë hnene la itre atr, maine tha idrei pena, ngo huliwa lai nyine tro sa kuca. Ke aja së troa hane qaja tui Paulo ka hape: “Gufa kö ni ene la madra ne la nöjei ate asë.”—Ite hu. 20:26, 27.
3 Ame la itre atr a drenge la maca ne Baselaia me kapa, tre easa madrin! Hna meci la treetre ne la ketre nekö jajiny. Nge thatre kö angeice maine eahlo ngöne la ifereno maine e hnengödrai? Ame hë la angeic a thithi koi Akötresie troa xatua angeic, tre hnei angeice hna qaja la ëje i Iehova, tune la aqane ini angeice hnene la trejine me angeic. Tha hmitre ju kö nge angeice hë a ini Tusi Hmitrötr me sine la itre icasikeu. Saze pi hi la aqane goeëne angeice la mel, nge angeice pë hë a tro trije pi lo itre sine tronge i angeic ka sine lo itre hna hape gangs de rue. Triji sixa me doroge ju hi angeic, nge tha atrekënö hmaca kö. Öni angeic: “Casi hi la ewekë ka atreine xomi ni qa ngöne la itre hna majemine ka ngazo, a ihnimi koi Iehova. Iehova hmekuje hi la atre utipi ni, me hamë ni la mejiune ka hape, hetre mele ka pë pun.” Tha nyenyape thele hmaca kö angeice la itre ewekë ka gufa.
4 Ngacama tha drei së kö hnene la itre atr ngöne la itre xa ijin, ngo tha gufa kö la huliwa së. Atre hi la angatr laka, qa së Itretre Anyipici Iehova thei angatr. Nge huliwa lai ka ithuecatre koi së troa catr, me mele nyipici, nge celë hi lai ka akökötrene la ihnim i së. Matre hapeu, ka gufa kö la troa huliwa i Joxu? Ohe!