ISA TUPATHE JË NGÖNE LA HNA CAINÖJ
Aqane Troa Maca Ngöne La Hna Cainöj—Aqane Kuca i Epun Matre Troa Tro Fë La Zonal
ENYIPIEWEKËN: Maine hetre itre aqane nyiqane ithanata hë nyine ixatua koi së, hna hamëne hnine la pepa nyine huliwa, ngo ame pe, tre, itre tulu hi. Loi e tro epuni a sipu thele la itre hnëewekë ngo tha tro kö a e gufane la itre aqane ithanata cili. Maine jë tro epuni a thele la ketre tane mekun, nyine troa ithanatan ka ihmeku memine la hna hnehengazone hnene la itre atr ne la nöj. Maine celë hi hnei epuni lai hna troa kuca, thupene la hna e la zonal, me pane goeëne la itre aqane nyiqane ithanata, me goeëne la itre video, ijije hi tro epuni a xome la itre mekune nyine ixatua, matre troa ketre sipu eköthe la aqane nyiqane ithanata i epun.
AQANE TROA KUCA:
Isa hnyinge jë, ka hape, ‘Ka loi kö tro ni a xome la ketre aqane nyiqane ithanata hna hamëne hë?’
ÖÖ
Hnëkëne jë la itre pane trengewekë nyine troa qaja. Thupene la hna ibozu, canga qaja jë la kepin la tronge së. (Ceitun: “Eni a traqa, ke . . .”)
Wange jë la aqane troa ijelekeune la hnying memine la xötr memine la nyine troa tro fë. (Ceitun: Maine easa pi troa amamane la ketre xötr, qaja jë ka hape, “Kola troa sa hnyawa la hnying hnene la xötre celë.”)
WAEA
Iëne jë la ketre tane mekune qa hnine la zonal ka loi koi epun nge ka troa hetre thangane kowe la nöje së
Iëne jë la ketre hnyinge ka troa ahlëne la mekun me upe la atr troa ithanata, ngo tha hnyinge kö ka troa ahmahmanyi angeic. (Ceitun: Itre hnyinge ngöne la götrane 2 ne la itre zonal.)
Iëne jë la ketre xötr nyine troa e. (Maine epuni a troa tro fë la Réveillez-vous ! tha nyipiewekë kö troa e la ketre xötr, pine laka, ame la zonale celë, tre, thatraqane la itre atr ka thatre hnyawa la Tusi Hmitrötr nge ka sixele ma wange la hmi.)
Eköthe jë la ketre xötrehnëewekë maine luetre, ka troa qejepengöne la aqane tro la atr a kepe thangane ka lolo qa ngöne la hnei angeice hna e la tane mekun
NGÖNE LA KETRE GÖTRAN
Hnëkëne jë fe la ketre hnying nyine troa sa ngöne la kola troa iwai hmaca
Fejane jë la itre ithuemacany nyine troa xatua epuni troa hnëkë troa iwai hmaca