Ce Kapa Madrine Jë Së La Neköne Haetrati i Iehova!
1 Ame la sabath, treu Nisan, drai 9 ne la macatre 33 thupei Iesu, ke, hnene la ka alanyimu catre hna kapa madrine la neköne haetrati i Iehova, ene la joxu Iesu Keriso, tune lo hna qaja ka hape “Manathithi la Joxu kola hlepëti ngöne la atesiwa i Joxu!”, nge hetrenyi ngöne la itre wanakoime i angatre la itre döne pama. (Luka 19:38; Heb. 1:6) Ame lai thupenehmi me maredi ne 10 me 11 Nisan, ke, hnei Iesu hna catre cainöje trootro, nge ejehi laka tru catre la huliwa i nyidrë, lo la itre drai cili hune la itre xaa ijine la mele i nyidrë e celë fen.
2 Ame enehila, alanyimu catre la itre atr hna aceitunëne memine la itre ka hetrenyi la itre dröne pama ngöne ihnatrapaime i angatre me qaja catrëne ka hape: “Ame la mele, te, qa thei Akötesi shë, ate tuenietine la theron, me qa thei Arenio.” (Hna ama. 7:9, 10) Ame la treu Maac drai 26, ke, easë a itronyi troa amekunëne la drai ne meci Iesu. Nge easenyi trootro hë la ijine cili, hane fe kö së catre matre tru fe la ixatua së kowe la huliwa ne cainöje, nge matre tro fe së a nyixane la thithi ne la ka alanyim?
3 Atrune jë së la huliwa ne cainöje trootro: Alanyimu catre la itretre cainöje ka saene troa pionie ka ixatua e treu Maac. Hapeu, ajane kö epuni troa hane cexome me angatre la huliwa cili? Maine eje hi, ke, canga nyialiene ju lo pepa ne sipo. Atraqatre la madrine ne la ketre e itre qatre thup troa sa la itre hnyinge i nyipunie göne la huliwa cili.
4 Eje hi laka maine ijiji epuni maine tha ijiji pena kö troa xomi pionie, ngo ame pe, ke, aja i epuni troa huliwa atruny, ene la troa tro lapa troa cainöje trootro la treu Maac. Ijije tro la ekalesia a hnëkëne matre hetre hna itronyine palahi göi cainöje trootro e nöjei drai ngöne la treu. Troa hnëkëne hnyawane la itre teritoar kowe la ijine cili, matre tro palahi a hetreny.
5 Tro la nöjei ekalesia a hnëkëne la ketre icasikeu ka ketre pengöne göne la huliwa ne cainöje trootro e mecixeni ne drai 26 treu Maac. Ngacama tru catre la itre nyine hnëkëne göne la drai ne Amekunën, hna amekötine koi së isa alacas, e ijije tro së a hane sine la huliwane cainöje trootro e hmakanyi ne mecixen. Nge, tro fe së a mekune hnyawa ka hape ame la itre hne së hna hëne troa hane sine la Drai ne Amekunën, ke, hetre gojenyi angatre kö me atre hnyawa kö angatre la traeme me hnë icasikeu.
6 Hëne jë la itre xaa atr me thuecatre koi angatr: Hnei Iesu hna ahnithe kowe la angetre drei nyidrë ka hape: “Kucajë la nyine mekune koi ni.” (1 Kor. 11:24) Tune la angetre drei Iesu hna iën’a trothenge la hna amekötine cili, tro la nöjei hlue i Iehova a hane sine la Drai ne Amekunën. Nge, loi e tro epuni a hane hëne la itre hnainin, memine lo itre ka ithahnata Tusi Hmitrötre me epuni, me itre hnei epuni hna atre ka tha lapaune petrekö, me itre sine huliwa i epun. Sija ju la itre ëje i angatre ngöne la ketre lis matre pëkö atr hna troa thëthëmin.
7 Ijije fe troa xatuane la itre xaa atr ka ajane ngöne la nöjei ijine ka ijije troa hane sine la Drai ne Amekunën. Mekune hnyawane ju laka, loi e tro së a canga traqa matre tro së a kapa me iatre memine lo itre ka xötrei sine la ijine cili. Maine alanyimu la itre hnei epuni hna inine ka hane sin, ke, loi e tro la ketre atre cainöj’a hane lapa ezine la itre xane. Hëne jë la itre ka xötrei traqa troa hane sine la itre icasikeu ne la ekalesia. Loi e tro lai qatre thupe hna iëne troa cilefë la cainöj’a hnëkë hnyawa matre keukawa hnine kowe la nöjei atr.
8 Ngöne la pune lai Drai ne Amekunën, tro së a ce nyimane lo nyima 105 kola hape “Ce hëne madrine jë së la pane nekö i Akötresie!”, matre tro së a mekune me madrine hmaca la treu celë ngöne la huliwa ne cainöje trootro ngöne la thithi koi Iehova!