Ka Mene La Wesi Ula i Akötresie
1 Ka mele catre la Tusi Hmitrötre kowe la itre milio lao atr. Hnene la menen’eje hna enijëne la hni ne la nöjei atr ka e, nge pë hmaca ju kö ketre itusi ka tune lai. (Heb. 4:12) Isa wange ju hi la thangane koi së. Nyipici, ame la etrun’ej, ke, ka pëkö ka tun.
2 Ame la itretre anyipici Iehova, ke, celëhi ange ka nyipi inine la Tusi Hmitrötr, me cilë göliin. Loi e troa nyigöhnene hnyawa ngöne la porogarame së la traeme ne tro së a e la Tusi Hmitrötr, me amë panën’eje hune la televizio, me itre elo.
3 Nyine troa majemine kuca: Atrehmekune hi la nöje i Iehova ka hape ka hetre thangane catre e troa e palahi la Tusi Hmitrötr. Ame ngöne la ketre ngöneuma ne la hna kuci tusi Sasaiatri e Borokelin, ke, hetre itre macatre hë enehila la kola meköle la hna cinyihane celë kola hape: “E jë e nöjei drai la Tusi Hmitrötr, ene la wesi ula i Akötresie.” Hna sipone lai kowe la itre ka hnyipi lö koi Bethela, tro angatr’a e apexejene la Tusi Hmitrötre ngöne la pane macatre ne huliwa.
4 Ngacama tru palahi la huliwa së, ngo tuneka lo porogarame thatraqane la ini ne huliwa qa thei Akötresie, hne së kö hna e hnyawa la itre mekene ne la Tusi Hmitrötre hna athipe nyine troa e nöjei wiik? Maine hetre itre hnepe jole palahi, hnauëne laka tha tupathe pe e treu nofeba troa eatrëne hnyawa la itre hna amekötine ngöne la porogarame së? Ame la nyine troa e hna hnëkëne kowe la treu, ke, qa ngöne salamo 95 utihë Salamo 109, qa ngöne lai, ijije tro së a e la könitre maine foa lao götrane e nöjei wiik. Ame itre xan, hnei angatre hna thawa la itre xötre nyine troa e e nöjei drai, maine e hmahmakany, maine e heji pena qëmekene troa meköl. Isa qanyi së pë hë sa la ijin, ngo ame pe la ka nyipiewekë, ke, ene la tro së a menuë thangane ka loi, ene la mele qa ngöne la hna e lapaane la Tusi Hmitrötr.
5 Tro së a trofë trongëne la Tusi Hmitrötre e nofeba: Alanyimu la itre atr ka metrötrëne la Tusi Hmitrötr, nge ka drei së la easë a amamane la itre xaa xötre qa hnin’ej. Ame ngöne la treu nofeba, ke, easë a troa trofë la Tusi Hmitrötr, ene La Traduction du monde nouveau, memine lo itus La Bible: Parole de Dieu ou des hommes? Ijine hi lai ka ijije troa amamane kowe la itre atr ka hni ka loi, la esisitriane la wesi ula i Akötresie. Hawe, ange trofë jë cememine la madrin.
6 Hnëkëne hnyawaane jë la itre mekune nyine troa amamane la esisitriane la Traduction du monde nouveau, matre ijije tro la itre atr a ajane troa hetre tusi angatre fe. Qejepengöne hnyawa ju fe la eloine la Tusi Hmitrötre celë, ene la aqane kuca eje matre loi e tro së a huliwaan. Xome jë la ketre hna sija atrune qa ngöne lo taane hna hape “Sujets de conversation bibliques,” hna afedrene ngöne la pune la Tusi Hmitrötr, nyine nyijëne troa amamane lo itus La Bible: Parole de Dieu ou des hommes? Ame mina fe ngöne la pune la Tusi Hmitrötr, hna afedrene lo “Index” ka 102 lao götran, loi e troa amamane la aqane huliwaan’ej. Ixatua catr’eje kowe la itre ka e Tusi Hmitrötre göi tro angatr’a thele la itre xötre hnei angatre hna atre. Ame itre xaa ka cainöje trootro, ke, angatr’a pi amamane hnyawaane la enyipiewekëne la “Appendice,” maine pena lo “Table des livres de la Bible,” nge angatr’a qejepengöne la enyipiewekën’itr’eje ngöne la kola ini Tusi Hmitrötr.
7 Mekune kö qaja ka hape ame la Traduction du monde nouveau, hna ujëne kowe la qene Faras ka hmaloi koi nöjei atr troa trotrohnin. Xome jë la itre xötre tune la Mataio 5:3, maine 1 Korinito 10:25, nge iwangekeune ju memine lo itre xaa aqane ujëne ngöne lo itre xaa Tusi Hmitrötre hna ujëne hnyipixeen. Ame fe hnine la Traduction du monde nouveau, ke, 7210 lao hna sija la atresiwa i Akötresie, ene Iehova.
8 Ejehi laka, ame la Tusi Hmitrötr, ke, wesi ula i Akötresie. Tro së a kepe thangane ka loi, e tro së a e, me lapaune kowe ej, me trongëne la itre hna amekötine ngöne la mele së. Hna cinyihan’eje matre troa ini së, me hamë mejiune koi së. (Rom. 15:4) Nyipiewekë catre tro së a e ngöne la nöjei drai ne la mele së, nge tro fe a thelejëne troa inine la itre atr.