Amamane Jë Ka Hape Epuni a Nyipiine La Itre Xaa Atr—Götrane 1
1 Tru la madrine së la easë a öhne la aqane amanathithine la nöje i Iehova, ene laka kola ciahlöë la itre ekalesia. Ame ngöne la itre xaa götran, ene ngöne la itre traone ka tru, ke, nyimu ekalesia ka icasikeu ngöne la ca uma ne Baselaia matre ame itre xaa ijin, ke, hetre la itre hnepe jol. Celëhi matre ame ngöne la pengöne cili, loi e troa tru the së la iwangatruny.
2 Tro la ekalesia ka ase icasikeu a nue kowe la itre xaa trejine ka icasikeu thupene la uma ne Baselaia hna nyidrawan. Hawe, loi e troa amë hnyawaane la itre icea, troa amë la itre sine itusi ngöne la itre göhnen’itr’ej; nge ame la itre ewekë hna thëthëhmine ngöne la Uma ne Baselaia, ke, loi e troa hleme itr’ej. Tha tro kö a thëthëhmine troa nyidrawaane la itre kabine, nge wange ju ka hape hetre soope kö, hetre itrawele kö, hna nyihnane kö la itre pepa ne kabine, nge hna nenge trije kö la aliene la itre pubel.
3 E hetre ketre ekalesia ka troa icasikeu thupen, nge iasenyi la traeme hna sa memine la hawa i itre ka fenes, hawe, loi e tha tro kö la itre thelene la icasikeu hnapan’a hunyinyi, matre troa thuejëne la itre xane troa hnëkëne la icasikeu hna troa xejë. E qea la hne së hna porotrik, tro lai a ilitre la qehnelö koi angetre traqa, nge jole koi angatre troa canga nyiqaane la itre hnëqa i angatr. Ame ngöne la itre hnë acili loto ezine la uma ne Baselaia, ke, hna tuluthe hi la etrun, celëhi matre e hetre imekunekeune së kowe la itre trejin, ke, loi e troa canga thue göhnene la itre loto i angatr. Ketre mina fe, tha tro kö la itre atrene la ketre icasikeu a canga traqa, nge tha fenesi hnyawa petrekö itre xan, wanga troa icacaxenyi menu jë ngöne la qëhnelö, maine pena ngöne la hnë ami loto.
4 Nyipiewekë catre kowe la itre ekalesia ka icsikeu ngöne la uma ne Baselaia ka caasi troa iöhnyine matre isa hetre wiike ne tro angatr’a nyidrawaane la hnë icasikeu. Hna majemine hnene la itre ekalesia troa isa thewe wiik. Hawe, e wiike i epun, thupëne hnyawa kö troa canga eatrëne la hnëqa i epun. Pëkö troa hetre nyine qaja hnene la itre xaa ekalesia ka icasikeu ngöne la uma ne Baselaia.
5 Ame itre xaa ijine hna saze la hawa ne icasikeu hnene la itre xaa ekalesia. Hna traqa tune lai, lo itre ijine iwai hnene la atre thupëne la sirkoskripsio. E Maine, ka hnyipixe la hawa së, ke, tro lai a ketr la ketre ekalesia, hawe, nyipiewekë catre la tro la itre qatre thupe ne lue ekalesia a canga iöhnyine matre axeciëne la hawa ka ijij, qa ngöne lai atreine angatre canga thuemacane la itre atrene la lue ekalesia. Ame itre xaa huliwa ka ijije troa hane kuca ngöne la uma ne Baselaia, tune la ini itre pionie, maine icasikeu ne la itre qatre thupe ne la sirkoskripsio, maine faipoipo pena, ke, loi e troa canga iöhnyine memine la ekalesia hna troa ajolën, me angetre thupëne la sirkoskripsio pena, matre tha tro kö a sa draine la itre huliwa ngöne la ijine ka caas.
6 Nyimutre la itre uma ne Baselaia hna hnëkëne thatraqane la itre ekalesia ne la isa pengöne sirkoskripsio. Nyipiewekë catre tro la itre atr thupe ka wange trongëne la itre ekalesia a iöhnyine la itre porogarame ne iwai i angatr. E hna athipe la lue porogarame hnene la lue atr thupëne la lue sirkoskripsio ngöne la wiike ka caas, nyipici troa traqa la itre hnepe jol.
7 Tro la iwangatruny, me aqane atreine ce wai mekun, me hna canga ithuemacanyine la porogaram, me atreine ce huliwa, a ixatua ka tru matre lapa huti la keukawa nyipine la itre ekalesia, nge matre loi e eje lo hna qaja ka hape: “Loi pe kuca alolone jë me amekötine la nöjei ewekë asë.”—1 Kor. 14:40.