Nemene La Hnei Epuni Hna Ajane Kowe La Itre Nekö i Epun?
1 E ajane së troa öhnyi loi ngöne la mel, ke, loi e tro së a amë la itre mekune hne së hna ajane troa aeatrën. Ame la itre atr ka thele la itre aja ka tha nyipi ewekë kö, maine itre aja i angatr, nge tha loi kö la alien, ke, tro angatr’a hleuhelu, nge tha tro kö a aejëne la itre aja i angatr. Kola hape koi së troa hetrenyi la inamacane matre troa waipengöne la itre aja hna troa eatrëne matre troa “xölehuje la nyipi mel.” (1 Tim. 6:19) Drei la ole së koi Iehova, pine laka, jëne la Wesiula i Nyidrë, memine la organizasio i Nyidrë, Nyidrëti a amamai së la nyipi gojenyi nyine troa xötrën!—Isa. 30:21.
2 Iehova a eatrongë së ngöne la ihnim, qa ngöne lai Nyidrëti fe a amamane la tulu ka loi kowe la itre keme me thin. Tha hnene kö la itre keme me thine ka inamacane hna nue la itre nekö i angatre ka thatre pengöne la mele troa ketre iëne la mele ka loi koi angatr, ngo hnei angatre pe hna eatrongë nyudrene kowe la gojenyi nyine tro angatr’a trongën, matre ame la angatr’a tru, ke, “tha tro kö angatr’a jea qa ngön.” (Ite Edom. 22:6) Atre hnyawa hi la itre keme me thine keresiano jëne la hnei angatre hna melëne laka, thatreine kö tro la nekö i angatre a mejiune kowe la mekune i angatr; ngo nyipiewekë tro angatr’a qale koi Iehova. (Ite Edom. 3:5, 6) Loi e troa sisitria la mekune celë kowe la itre nekönatr, pine laka tha tru palakö la atrehmekune i angatr, nge pë palakö hnei angatre hna melën.
3 Loi e tro la itre keme me thin’a amë panëne la itre ewekë nyine tro la itre nekö i angatr’a aeatrën, matre troa xatua angatre troa wangatrune la “nojei ewekë ka sisitria.” (NW) (Phil. 1:10) Loi e tro angatr’a nyiqaane inine la Tusi Hmitrötre memine la fami, matre troa xatuane la itre nekönatre fe troa kapa madrine la enyipiewekën’ej, me akökötrene la atrehmekune i angatr. Ewekë ka loi kowe la itre nekönatre troa majemi inine la Tusi Hmitrötre göi troa hane hnëkëne la la itre icasikeu ne la ekalesia, me hane hnëkë hnyawa matre troa qejemekune jëne la sipu trenge ithahnata i angatre kö. Ketre, nyipiewekë fe la troa catre cainöje trootro. Ijije tro fe la itre nekönatr’a trofë trongëne la itre tarak, troa e pena la itre xaa mekene tus, maine troa hamëne pena la itre zonal. E atreine hë angatre e tus, canga ee angatre jë kowe la Ini Ne La Huliwa Qa Thei Akötresie matre kökötre nyimenyime angatre ngöne la ua. Ejehi laka, ketre ewekë katru la kola kapa la ketre atr troa nyiqaane cainöj, maine bapataiso pena.
4 Pine laka, angatr’a easenyine la ijine qëmekene troa nyinekötrahmanyi, ene la kola 14 lao macatre, maine qëmekene troa traqa kowe la macatre cili, loi e tro la itre keme me thin’a ithahnataane hnyawa memine la itre nekö i angatre la hnei angatre hna troa kuca ngöne la angatr’a tru. Tha jole kö kowe la itre ka hamë eamo ngöne uma ne ini, maine itre sine ini pena troa ajojezi angatre matre melëne la itre aja ne fen, me aja ewekë. Loi e tro la itre keme me thin’a xatuane la itre nekö i angatre troa iëne la itre götrane qa ngöne uma ne ini, matre hamë angatre la ini ka troa hetre thangane koi angatr, maine göi troa huliwa thupene la itre hnei angatre hna ajan, ngo troa thupëne wanga wangacone pena la itre huliwa ne Baselaia. (1 Tim. 6:6-10) Kolo fe a xatua angatre troa pane melëne la “ahnahna” (NW), ene la tha tro kö a canga faipoipo, nge thupene lai, e angatr’a mekune troa faipoipo, ke, tro hë angatr’a atreine aeatrëne la itre hnëqa i angatre ka tru hnine la faipoipo. (Mat. 19:10, 11; 1 Kor. 7:36-38) E troa qaja aloine la huliwa ne pionie, maine troa huliwa ngöne la ketre nöje ka aja ixatua, maine huliwa ngöne Bethela, maine huliwa ne mesinare, ke, ijije tro la itre keme me thin’a amë e kuhu hni angatre e co petrekö angatr, la aja ne troa huliwaane la mele i angatre matre amadrinë Iehova, me xatuane la itre xan, me öhnyi loi ne la huliwa i angatr.
5 Tha sesëkötre kö së laka, alanyimu enehila la itre thöthi hnine la organizasio, angatr’a wangatrune la itre ewekë ne ua, nge ka melëne la itre aja qa thei Akötresie. Celëhi itre wene ne la hna huliwa hnene la itre keme me thine ka ihnim. E maine ketre keme maine thine epun, hapeue la itre nekö i epun, nemene la aja i angatr? Angatre kö a kökötre trootro ngöne la ua, matre atreine angatre amë panëne la itre huliwa ne Baselaia ngöne la mele i angatr? Pane mekuneju, ame la ketre ewekë ka sisitria nyine tro epuni a kuca, ke, ene la troa amë hutine la nyipici e kuhu hni ne la itre nekö i epun, me ithahnataan’eje palahi o drai. Tro epuni a kepe manathithi ngöne la epuni a öhne la neköi epuni a nekönatr, e tru me nyihluei Iehova ngöne la nyipici.—Deut. 6:6, 7; Ios. 24:15.