Qa Thei Iehova La Men Ngo Thaa Qa The Së Kö
1 Hna hamëne kowe la itretre drei Iesu asë, la ketre hnëqa ka sisitria thatraqane la hmi, ene la huliwa ne la keresiano, laka, troa cainöje trootro. (Mat. 24:14; 28:19, 20) Ngo kola traqa la itre xaa ijin, easë a mekune ka hape, thatreine kö së troa xome la huliwa cili, pine laka, itre atr ka ngazo së, nge catrehnine pala ha la itre jole ka eje ngöne la fen.
2 Maine kola traqa koi së la mekune cili, haawe, atreine hi troa akeukawane la itre hni së hnene la tusi hna cinyihane hnei Paulo aposetolo kowe la itre keresiano hna iëne e Korinito. Hnei nyidrëti hna cinyihane ka hape: “Nge hetenyi hë huni la tenga mo celë hnine la ite inege dro.” (2 Kor. 4:7) Hetre mejiune thei Paulo, öni nyidrë: “Hetenyi hë huni la huliwa celë . . . , tha kucakuca kö hun.” (2 Kor. 4:1) Nyipici laka, ketre itupathi ka tru koi së isa ala caas, itre hna iën, maine “itre xa mamoe” pena, troa catre qaja trongëne pala hi la maca ka loi ne la Baselaia, nge “tha kucakuca kö.” Nge nyipi ewekë tro sa thele la trenge catre thei Akötresie, Nyidrë Atre hamëne “la men, ngo tha qa the [së] kö.”—Ioane 10:16; 2 Kor. 4:7b.
3 Eje hi laka, nyine ithuecatre koi së la easë a öhne la itre Temoë ka nyimutre, angatre a catre tro fë la evangelia, ngacama catrehnine la icilekeu, maine hetrenyi pena angatre la itre meci ka tru, maine hetre itre ejolene pena göi mani. Loi e tro asë hi së a atrehmekune hnyawa laka, Iehova a amanathithine la huliwa hne së hna xom, ene la troa cainöje trootro. Qa ngöne lai, thaa tro kö së a nue la kucakuca, memine la xoue icilekeu, troa anazijëne la aja së troa cainöj, ngo loi e tro pe së a “cate thei Joxu, hnene la tenge cate ne la mene i Nyidë.”—Efe. 6:10; Ite edomë 24:10.
4 Nemene La Aqane Troa Kapa La Mene i Akötresie: Catre pi troa thith, me sipone koi Akötresieti la ixatua memine la trenge catr. (Rom. 12:12; Fil. 4:6, 7) Ketre, lapaune jë së koi Iehova hnene la hni ka pexej, ke, Nyidrëti la Atre troa hamëne la men, ngo thaa ka qa the së kö. (Ite edomë 3:5) E jë la aqane melëne hnene la itre trejine ngöne la hnedrai së enehila, la itre ithuemacanyi hna hamëne jëne la itre zonale së; kola amamane hnyawa hnene la itre ewekë hna melëne hnene la itre trejine me easë, laka, Iehova a xatuane la itre hlue i Nyidrë troa cile kowe la itre itupathi ka traqa koi angatre enehila. Ketre, loi e tro pala hi a caasi memine la itre trejine e hnine la ekalesia, nge the nue trije kö la itre icasikeu ne ej.—Rom. 1:11, 12; Heb. 10:24, 25.
5 Epi kuca asë hi së la hne së hna atrein, matre tro fe së a hane kapa la mene qa thei Akötresie—ene la mene ka thaa qa the së kö; celë hi ka troa xatua së lai, matre thaa tro kö së a kucakuca troa xome la huliwa ka sisitria catr, ene la troa cainöjëne la Baselaia.