Aqane Inine Me Hnëkëne La Itre Jini Ne La Baselaia

1-3. Nemene la aqane akökötrene Iesu la huliwa ne cainöj, nge nemene la itre hnyinge hna amejën?

LUE macatre ne cainöje Iesu e Galilaia. (E jë la Mataio 9:​35-​38.) Nyimu traon ka tru me ka co hnei nyidrëti hna wang, nge hnei nyidrëti hna hamë ini ngöne la itre sunago, me cainöjëne la maca ka loi ne la Baselaia. Ame la nöjei götran hnei nyidrëti hna cainöje ngön, tru catre pala hi hnei atr ka traqa troa drei nyidrë. Öni Iesu, “Atraqate la meledrai,” haawe, loi e troa tru hnei ka huliwa.

² Hnei Iesu hna thele troa akökötrene la huliwa ne cainöj. Hna tune kaa? Hnei nyidrëti hna upe la 12 lao aposotolo “troa cainöjëne la [B]aselaia i Akötesie.” (Luka 9:​1, 2) Maine jë hetre hnyinge ne la itre aposetolo göne la aqane troa eatrëne hnyawa la huliwa celë. Qëmekene tro Iesu a isa upi angatr, hnei nyidrëti hna pane hnëkë angatre tune la aqane hnëkë nyidrë hnene la Tretretro i nyidrë e hnengödrai.

³ Hetre itre hnyinge hne së hna pi atre enehila: Nemene la aqane hnëkë Iesu hnene la Tretretro i nyidrë? Nemene la aqane hnëkëne Iesu la ange aposetolo? Nge tune kaa fe enehila: Hnene fe kö la Joxu ne la Baselaia hna hnëkëne la itretre drei nyidrë troa eatrëne hnyawa la huliwa i angatr? Maine eje hi, ke, hnei nyidrëti hna kuca tune kaa?

“Ame Lo Hnei Tetetroti Hna Ini Ni, Te, Celë Hi Hnenge Hna Qaja”

4. Eue, nge ekaa la kola ini Iesu hnei Tretretro i nyidrë?

⁴ Hnei Iesu hna qaja hnyawane ka hape, hna ini nyidrë hnene la Tretretro i nyidrë. Ame ngöne la nyidrëti a tro fë la huliwa i nyidrë, öni nyidrë: “Ame lo hnei Tetetroti hna ini ni, te, celë hi hnenge hna qaja.” (Ioane 8:​28) Hna ini Iesu eue, nge ekaa? Hna nyiqaane hnëkë Iesu me kepe ini thupene hi la kola xupi nyidrë, pane xupuna i Akötresie. (Kol. 1:​15) Tha nyine e kö la etrune la itre macatre ne drenge me goeëne nyidrëti la Tretretro i nyidrë e hnengödrai, “Ate Ini” ka tru. (Iobu 36:22) Ame hë la thangan, hnene la Hupuna hna kapa la ketre ini ka sisitria catr göi itre thiina me itre huliwa me itre mekuna ne la Tretretro i nyidrë.

5. Nemene la aqane inine la Hupuna hnei Iehova göne la huliwa ne cainöj nyine troa kuca e celë fen?

⁵ Ame ngöne la ijine ka ijij, hnei Iehova hna inine la Hupuna i Nyidrë la huliwa nyine troa kuca e celë fen. Tro sa pane ce wange la ketre hna perofetan ka amamane la aqane imelekeu ne la Ate Ini Ka Tru memine la pane xupuna i Nyidrë. (E jë la Isaia 50:​4, 5.) Önine la hna perofetan, hnei Iehova hna ahlëne la Hupuna i Nyidrë “o hmakany.” Ame la hnëewekë celë, kola amekunë së la atre ini a ahlëne e sine hmakany, la nekönatr troa hamë ini koi angeic. Önine la ketre tus ka qeje pengöne la Tusi Hmitrötr: “Kösë Iehova a alö nyidrë ngöne la uma ne ini ceitu me nekönatr ka traqa ne troa ini, matre ini angeice la nyine cainöjën, me aqane troa cainöj.” Ame ngöne la “uma ne ini” cili e hnengödrai, hnei Iehova hna inine la Hupuna i Nyidrë la “nyine troa qaja, me aqane troa qaja.” (Ioane 12:49) Hnene fe la Tretretro hna hamë ithuemacanyi göi aqane troa hamë ini.a Ame lo Iesu e celë fen, hnei nyidrëti hna huliwane hnyawane lo ini hnei nyidrëti hna kapa ngöne la nyidrëti a cainöj, me ngöne fe la nyidrëti a inine me hnëkëne la itretre drei nyidrë troa eatrëne hnyawa la huliwa ne cainöje i angatr.

6, 7. (a) Nemene la aqane inine me hnëkëne Iesu la ange aposetolo, nge nemene la hna hnëkë angatre kow? (b) Ame enehila, Iesu fe kö a hane hnëkë së troa eatrëne la itre hnëqa ka nyipi ewekë?

⁶ Nemene la aqane inine me hnëkëne Iesu la itre aposetolo, tune lo hne së hna ce wange ngöne la qaan? Tune la hna qaja ngöne Mataio mekene 10, hnei nyidrëti hna hamëne la itre ithuemacanyi thatraqane la huliwa ne cainöj, memine fe la itre ithuemacanyi celë, ene la götrane hnë troa cainöje ngön (xötre 5, 6), me maca nyine troa qaja (xötre 7), me enyipiewekëne la troa amë la mejiune i angatre koi Iehova (xötre 9, 10), me aqane troa nyiqaane ithanata memine la itre atr (xötr 11-​13), me aqane troa elë hune la itre mekune qaathene la itre ka qeje jol (xötre 14, 15), me aqane troa ujë ngöne la kola akötrë angatr (xötre 16-​23).b Hnene la ini hnei Iesu hna hamë ange aposetolo hna hnëkë angatre troa cilë mekene la huliwa ne cainöjëne la maca ka loi ngöne lo hneijine i angatr.

⁷ Tune kaa fe enehila? Iesu, lo Joxu ne la Baselaia i Akötresie a athipe kowe la itretre drei nyidrë la hnëqa ka tru, ene la troa cainöjëne “la maca ka loi . . . ne la baselaia e cailo fene.” (Mat. 24:14) Hapeu, hna hane hnëkë së fe hnene la Joxu troa eatrëne la huliwa ka nyipi ewekë celë? Eje hi. Qaa hnengödrai, Joxu a thupëne matre tro pala hi a inine me hnëkëne la itretre drei nyidrë la aqane troa cainöje e tröne la ekalesia, me aqane tro itre xan a eatrëne hnyawa la itre hnëqa ka tru e hnine la ekalesia.

Aqane Hnëkëne Me Inine Troa Itretre Tro Fë Maca Ka Loi

8, 9. (a) Nemene la sipu kepine matre acile jë la Ini Ne Cainöj Qaathei Akötresie? (b) Nemene la aqane xatua epuni hnene la Ini Ne Cainöj Qaathei Akötresie göi troa maca hnyawa ngöne la hna cainöj?

⁸ Ekö hë la organizasio i Iehova xome la itre asabele, me itre icasikeu ne la ekalesia, tune la Icasikeu Ne La Huliwa, matre troa hnëkëne me inine la itre hlue i Akötresie kowe la huliwa ne cainöj. Ngo qaane lo itre macatre 1940, hnene la itre trejine ka elemekene la hnalapa ne xomi meköt hna nyiqaane acile la itre ini ka nyimutre matre troa hnëkëne me inine la itre trejin.

⁹ Ini Ne Cainöj Qaathei Akötresie. Tune lo hne së hë hna ce wange ngöne lo mekene ka ase hë, hna nyiqaane la ini celë lo 1943. Hapeu, hna hnëkëne hmekuje hi la ini celë matre troa maca hnyawa hnene la itre ka troa cile fë cainöj e itre ijine icasikeu ne la ekalesia? Ohea. Tha saze kö la kepine matre acile jë la ini cili; tro ej a hnëkëne me inine la itre hlue i Akötresie troa atreine ithanata matre troa atrunyi Iehova ngöne la hna cainöj. (Sal. 150:6) Hnene la ini cili hna xatuane la itre trejine asë trahmany me föe troa maca hnyawa ngöne la hna huliwa kowe la Baselaia.

10, 11. Hna kuca koi drei enehila la Ini Ne Gileada, nge nemene la kepine matre acile jë la ini cili?

¹⁰ Ini Ne Gileada. Hna nyiqaane kuca la Ini Ne Gileada lo Thupenehmi 1 Febuare 1943. Ame la kepine ekö matre acile jë la hna ini cili, tre göi troa hnëkëne la itre pionie me itre ka huliwa i Akötresie o drai troa mesinare e cailo fen. Ngo qaane ju hi lo Okotropa 2011, thatraqane pe hi la itre trejine ka kuca ha la itre hnëqa ka ketre pengöne kö o drai, tune la itre pionie hut, itretre thup ka iwai trootro me itre föi angatr, me itre ka huliwa ngöne la Bethela, me ka mesinare hë, ngo tha ka kuca petre kö la ini celë.

¹¹ Nemene la kepine matre acile jë la Ini Ne Gileada? Hna sa hnene la ketre ka hamë ini ngöne la hna ini cili ka hape: “Kolo matre troa acatrene la lapaune ne la itre hnainin jëne la hna inine ajuine la Wesi Ula i Akötresie, nge matre tro fe a akökötrene thei angatre la itre thiina i Akötresie ka nyipi ewekë matre atreine angatre cile kowe la itre jole ka troa traqa koi angatre ngöne la hnëqa i angatr. Ketre, ame la ketre kepine matre acile jë la ini cili, tre göi troa acatrene catrëne la aja i angatre troa tro fë la maca ka loi.”​—Efe. 4:​11.

12, 13. Nemene la thangane la Ini Ne Gileada kowe la huliwa ne cainöje e cailo fen? Hamëne jë la ketre ceitun.

¹² Nemene la thangane la Ini Ne Gileada kowe la huliwa ne cainöje e cailo fen? Qaane lo 1943, ase hë sasaithe la 8 500 lao trejine hna hnëkëne ngöne la hna ini cili,c matre ame la itre mesinare ka qa hna kuca la ini Gileada, tre angatr a nyihlue i Akötresie ngöne la 170 lao nöje e cailo fen. Hnei angatre hna huliwane hnyawane la hnei angatre hna inin, ene la hna catre ngöne la hna cainöje trootro me inine la itre trejine troa hane kuca tui angatr. Ame ngöne la itre götrane ka nyimutre, tre angatre la ka pane nyiqaane la huliwa ne cainöj.

¹³ Tro sa pane ce wange la ewekë ka traqa e Zapo, lo ijine kola cile la huliwa ne cainöje pine laka, kolo hi lo ijine Hnaaluene Isi Ka Tru. Ame lo Ogas 1949, tha traqa kö koi treen lao ka cainöj e Zapo. Ngo ame hë lo pune la macatre cili, 13 lao mesinare ka qa hna ini Gileada a huliwa catre ngöne la hna cainöje e Zapo. Tru hnei mesinare ka traqa hmaca e thupen. Ame lo xötrei, hnene la itre mesinare hna cainöje hi ngöne la itre traone ka tru; thupene hë, angatre fe hë a hane tro kowe la itre xa traon. Hnene la itre mesinare hna thuecatrene la itre hnei angatre hna ini tusi kow me itre xane ju kö troa hane pionie. Tru catre la thangane la hna huliwa catre hnene la itre mesinare. Ame enehila, ase hë sasaithe la 216 000 lao itretre cainöjëne la Baselaia e Zapo, nge maine ala 100 lao ka cainöj, ala 40 qaathei angatre la ka pionie!d

14. Nemene la hna amamane hnene la itre ini qaathei Akötresie? (Wange ju fe la itre mekune hna eköhagen, “Itre Hna Ini Thatraqane La Itre Jini Ne La Baselaia,” götrane 188.)

¹⁴ Itre xa ini qaathei Akötresie. Hnene la Ini Thatraqane La Huliwa Ne Pionie, me Ini Thatraqane La Itre Trefëne Keresiano, me Ini Thatraqane La Itre Trejine Trahmanyi Ka Pë Föen, hna xatuane la itre ka qa hna inine la itre ini cili troa acatrene hnyawa la aqane imelekeu i angatre me Iehova, me troa weje mekene la huliwa ne cainöj.e Kola mama jëne la nöjei ini cili qaathei Akötresie ka hape, Iesu Joxu së a hnëkëne la itretre drei nyidrë göi troa eatrëne hnyawa la huliwa ne cainöj.​—2 Tim. 4:5.

Itre Trejine Trahmanyi Hna Hnëkëne Göi Itre Hnëqa Ka Tru

15. Nemene la aqane tro la itre trejine trahmany ka cilë hnëqa a nyitipu Iesu?

¹⁵ Pane mekune hmaca ju lo hna perofetane hnei Isaia, kola qeje Iesu atre hna inine hnei Akötresie. Ame ngöne “hna ini” e hnengödrai, hnene la Hupuna hna inine “troa hajine la ka kucakuca hnene la tenge ewekë.” (Is. 50:4) Hnei Iesu hna trongëne la hna ini cili. Haawe, ame lo nyidrëti e celë fen, hnei nyidrëti hna aegöcatrene la “ange ka huliwa me hace.” (Mat. 11:​28-​30) Loi e tro fe la itre trejine trahmanyi ka trene hnëqa ka tru a nyitipu Iesu, ene la troa thele troa thuecatrene la itre trejine trahmanyi me föe. Haawe, hna eköthe la itre hna ini ka nyimutre matre troa xatuane la itre trejine trahmanyi ka ijije troa maca hnyawa göi troa ce huliwa memine la itre trejin.

16, 17. Nemene la kepine matre acile jë la Ini Ne Cainöjëne La Baselaia? (Wange ju fe la ithuemcany.)

¹⁶ Ini Ne Cainöjëne La Baselaia. Hna nyiqaane la pane ini cili lo 9 Maac 1959, e Lansing götrane kolojë, Neweiok. Hna hëne la itretre thup ka iwai trootro me itre qatre thup ne la ekalesia troa hane sine la hna ini ka ca treu la eqean. Ame hë e thupen, hna ujëne la hna ini cili qa ngöne la Qene Papale kowe la itre xa qene hlapa, ame hna nyiqaane inine me hnëkëne la itre trejine e cailo fen.f

¹⁷ Hane hi la kepine matre acile jë la Ini Ne Cainöjëne La Baselaia hna qaja hnene la Annuaire 1962 des Témoins de Jéhovah (qene Papale): “Ame ngöne la fene celë ka tru catre hnei huliwa, nyipi ewekë tro la atre thupëne la ekalesia ne la Itretre Anyipici Iehova a atreine eköthe hnyawa la mele i angeic matre troa nyipiewekëne la nöjei atrene la ekalesia, nge tro angeic a ketre atre ixatua ka tru koi angatr. Nge tha tro kö angeic a wangatrune la ekalesia nge tro pë hë a wangacone la sipu hnepe lapa i angeic, ngo loi e tro pe a atreine tulu ewekë. Ketre manathith ka tru kowe la itre qatre thup ne la itre ekalesia e cailo fen troa ce traqa troa sine la Ini Ne Cainöjëne La Baselaia. E cili, angatr a kapa la ini ka troa xatua angatre troa kuca la hnei Tusi Hmitrötr hna qaja thatraqane la itre ewekë nyine troa eatrëne hnene la atre thup!”​—1 Tim. 3:​1-7; Tito 1:​5-9.

18. Nemene la aqane kepe thangane hnene asë la itre atrene la nöje i Iehova qa ngöne la Ini Ne Cainöjëne La Baselaia?

¹⁸ Hnene asë hi la itre atrene la nöje i Iehova hna kepe thangan la Ini Ne Cainöjëne La Baselaia. Hna kepe thangane tune kaa? Ame la itre qatre thup me itre drikona a trongëne la hnei angatre hna inin, angatre hi lai a xötrethenge la tulu i Iesu, ene la troa ketre ixatua ka tru kowe la itre trejin. Hapeu, madrine kö epuni la kola qaja la ketre ithanata ka menyik, me drei epuni hnyawa, maine tro pena a wai epuni hnene la ketre qatre thup me drikona göi troa hamë ithuecatr? (1 Thes. 5:​11) Manathithi ka tru la itre trejine trahmanyi cili kowe la itre ekalesia!

19. Nemene la itre xa ini hna eköth hnene la Kometr ne ini, nge nemene la kepine matre acile jë la itre ini cili?

¹⁹ Itre xa ini qaathei Akötresie. Hnene la Komite Ne Ini Ne Lapa Ne Xomi Meköt hna eköthe la itre xa ini ka hnëkëne la itre trejine ka trene hnëqa ngöne la organizasio. Hna eköthe la itre ini cili troa xatuane la itre qatre thup ne la itre ekalesia, me itretre thup ka iwai trootro, me itre atrene la Kometr ne la filial matre tro angatr a maca ngöne la aqane eatrëne angatre la itre hnëqa i angatr ka nyimutre. Kola xatuane la itre trejine jëne la itre hna ini troa acatrene la aqane imelekeu i angatre me Iehova. Kolo fe a xatua angatre troa trongëne la itre trepene meköt ne la Tusi Hmitrötr göi troa ce huliwa memine la itre mamoe hna ahnithe koi angatre hnei Iehova.​—1 Pet. 5:​1-3.

20. Pine nemene matre ijije tro Iesu a qaja ka hape, ‘hna ini së hnei Iehova,’ nge nemene la hne së hna ajane catrën?

²⁰ Kola mama laka, Iesu Joxu a thupëne matre tro pala hi a inin me hnëkëne hnyawa la itretre drei nyidrë. Kola xulu qa koho la ini cili: hnei Iehova hna inine la Hupuna i Nyidrë, nge Hupuna i Nyidrë a inine la itretre drei nyidrë. Haawe, ijije tro Iesu a qaja ka hape, ‘hna ini së hnei Iehova.’ (Ioane 6:​45; Is. 54:13) Epi troa tru la aja së troa kepe thangane la ini hna hamë së hnene la Joxu së; kola qaja la Ini Ne Cainöj Qaathei Akötresie, me itre xa icasikeu ne la ekalesia, maine itre xa ini hna ithanatane ngöne la mekene celë. Nge epi tro fe sa mekune pala hi laka, ame laka kuca jë la nöjei ini celë, tre nyine troa acatrene la lapaune së, matre tro sa eatrëne hnyawa la huliwa ne cainöje së.