Ka Tru Koi Iehova La Easa Qaja Ka Hape, “Amen”
KA tru koi Iehova la aqane tro sa atrunyi Nyidrë. Nyidrëti a ‘qatixenyëne me drenge’ la itre hlue i Nyidrë, nge Nyidrëti a wangatrune la nöjei ewekë hne së hna kuca matre troa amadrinë Nyidrë, ngacama co hi. (Mal. 3:16) Pane mekune jë la ketre hnepe hnaewekë hne së hna majemine qaja. Kola qaja la hnaewekë “amen.” Hapeu, Iehova kö a wangatrune la hnaewekë cili? Eje hi! Tro sa pane ce wang la aliene la hnaewekë cili, memine la aqane huliwane ej hnei Tusi Hmitrötr. E cili, tro hë sa atre la kepin matre ka nyipiewekë ej koi Akötresie.
“TRO LA NÖJ’ ASË A HAPE, AMEN.”
Ame la hnaewekë “amen” qene Papale, tre, kola hape, “epi troa ej” maine “eje hi.” Hna ujëne qa ngöne la hnaewekë qene Heberu hna hape, “lapaune ju,” “mejiune ju.” Hna huliwane la hnaewekë celë ngöne la itre hna kootr. Thupene la kola sisinyi hnene la ketre atr, angeic a qaja ka hape, “amen,” matre troa anyipicine la hnei angeic hna qaja. Aqane tro angeice lai a amamane la aja i angeic troa kepe thangane qa ngöne la hna sisiny. (Num. 5:22) Ame la angeic a qaja catrëne ka hape, “amen,” angeice hi lai a anyipicine laka, tro kö angeic a eatrëne la hna qaja.—Neh. 5:13.
Kola qaja ngöne Deuteronomi mekene 27, la ketre ijine hna huliwan menune la hnaewekë “amen.” Thupene la angetre Isaraela a lö hnine la Nöje Hna Thingehnaean, hnei angatr hna icasikeu nyipine la Wetre Ebala me Wetre Gerizim, matre troa dreng la Wathebo. Angatr a troa dreng me amamane laka, angatr a kapa la Wathebo. Tro angatr a qaja ka hape, “amen” ngöne la kola amexeje la itre ethan e troa tha idrei. (Deu. 27:15-26) Pane mekune jë la nine la itre trahmanyi me föe, me itre nekönatr, ngöne la angatr a qaja catrëne la mekuna i angatr! (Ios. 8:30-35) Tha thëthëhmine kö angatre la ijine cili. Öni Tusi Hmitrötr: “Hnei angete Isaraela hna nyi hlue i Iehova ngöne la nöjei drai Iosua asëjëihë, me nöjei drai asëjëihë ne la ite qate itetengekeu me Iosua, angete hane öhne la nöjei huliwa asëjëihë hnei Iehova hna kuca thatraqane la angete Isaraela.”—Ios. 24:31.
Ketrepengöne kö la aqane huliwane Iesu la hnaewekë “amen.” Hnei nyidrëti fe hna qaja la hnaewekë cili matre troa jelenyipicine la hna qaja. Ngo tha hnei nyidrëti kö hna qaja la hnaewekë cili thupene la kola hnying. Hnei nyidrëti pe hna qeje “amen” (hna ujëne qene Papale ka hape, “ka nyipici”) qëmekene troa qaja la ketre ewekë. Ame e itre xaa ijin, nyidrëti a anyimua qaja la hnaewekë cili me hape, “amen amen.” (Mat. 5:18; Ioane 1:51) Iesu a amamane kowe la itre ka drei nyidrë laka, ka nyipici la itre hnei nyidrëti hna qaja. Ijije hi tro Iesu a ithanata tune lai ke, nyidrëti la ka eatrëne lo itre hna thingehnaean hnei Akötresie.—2 Kor. 1:20; Hna ama. 3:14.
“TRO LA NÖJ’ ASË A HAPE, AMEN ME ATRUNYI IEHOVA JË”
Angetre Isaraela fe a qaja ka hape, “amen” ngöne la angatr a atrunyi Iehova me thithi koi Nyidrë. (Neh. 8:6; Sal. 41:13) Thupene la kola thith, angatr a qeje “amen” matre troa amamane laka, angatr a kapa la hna qaja. Ame asë hi la itre ka drenge la thith, tre, angatr a sa ke, madrine angatr troa atrunyi Iehova tune lai. Celë hi ka traqa ngöne lo Davita joxu a xome la pua ne isisinyikeu i Iehova a tro Ierusalema eë. Ame la angatr a feetëne la ijine cili, hnei Davita hna nyimane la thithi nyidrë, lo hna qaja ngöne 1 Aqane lapa ite joxu 16:8-36. Hna ketr la hni ne la itre ka sine la feete cili, ame hnene ‘la nöj’ asë hna hape, amen; me atrunyi Iehova.’ Eje hi, atraqatre la madrine i angatr troa ce atrunyi Iehova.
Hnene la itre hlue i Iehova hna qaja ka hape, “amen” matre troa atrunyi Nyidrë. Hnene fe la itre atre cinyihane la Tusi Hmitrötr hna qaja la hnaewekë celë ngöne la itre tusi angatr. (Rom. 1:25; 16:27; 1 Pet. 4:11) Kolo fe a qaja ngöne la tusi Hna Amamane la itre xaa angela, kola hape: “Amen; Haleluya!” (Hna ama. 19:1, 4) Ketre, hnene la itre pane Keresiano hna majemine qaja ka hape, “amen” thupene la kola thith ngöne la itre ijine icasikeu. (1 Kor. 14:16) Ngo, tha ketre hnaewekë kö nyine troa qaja menun.
KA NYIPIEWEKË LA HNAEWEKË “AMEN”
Haawe, atre hë së la aqane huliwane la itre hlue i Iehova ekö la hnaewekë “amen.” Tro hë sa trotrohnine la kepin, matre easa qaja ka hape, “amen” thupene la thith. Ketre aqane tro hi sa amamane laka, easa mekun la hne së hna qaja. Ame la kola thithi ngöne gaa tru atr, nge easa qaja maine mekun ka hape, “amen,” easë hi lai a amamane laka, easa kapa la hna qaja. Hane hi la itre xaa kepin, matre nyipiewekë troa hape, “amen.”
Ketre götranene la hmi së koi Iehova. Ame la thith, tre, celë hi ketre aqane tro sa atrunyi Iehova. Easa atrunyi Nyidrë jëne la itre hne së hna qaja ngöne la thith, me ngöne fe la aqane ujë së. Easa ajan e kuhu hni së troa qaja ka hape, “amen.” Celë hi matre easa thupëne la aqane ujë së, nge easa drenge hnyawa la thith.
Kola acasine la itre trejin. Loi e tro sa drenge hnyawa la kola thith ngöne la gaa tru atr ke, celë hi hna dreng hnene la itre trejin. (Ite hu. 1:14; 12:5) Kola acasi së memine la itre trejin ngöne la easa ce sa la thith. Drenge hi Iehova la easa ce qaja catrën maine e kuhu hni së ka hape, “amen.” Nge celë hi ka upi Nyidrëti troa sa la thith.
Easa atrunyi Iehova ngöne la easa qaja ka hape, “amen”
Easa atrunyi Iehova. Tha sihngödri kö koi Iehova la itre ewekë hne së hna kuca matre troa atrunyi Nyidrë. (Luka 21:2, 3) Öhne hi Nyidrëti la aliene la hni së. Ngacama easa sine la itre icasikeu jëne mobilis, ngo ame pe, drenge hi Iehova la easa qaja ka hape, “amen.” Ame la easa qaja ka hape, “amen,” easa ce atrunyi Iehova memine la itre trejin ka icasikeu.
Maine jë, tro sa mekun ka hape, tha ka nyipiewekë kö la easa hape, “amen.” Ngo ame pe, ka nyipiewekë catr. Önine la ketre tusi ka qejepengöne la Tusi Hmitrötr, ka hape: “Jëne la hnepe hnaewekë cili,” itre hlue i Akötresie a amamane “la mejiune i angatr me aliene hni angatr.” Haawe, catre jë së atrunyi Iehova me qaja catrëne ka hape, “amen.”—Sal. 19:14.