Meke Yehofa toosutu i

1. Fa a libi fu den Dyu di be de enke saafu a Babilon be de?

PAKISEI fa den Dyu di be de enke saafu a Babilon be sai fii. A kondee fu den be poli. Fu di den anga den afo fu den be sondu, meke Gadu be meke den feyanti fu den tyai den gwe enke saafu a wan taa kondee (2 Kolon. 36:15, 16, 20, 21). Winsi fa den be de enke saafu a Babilon, toku den Babilonsama be e gi den a okasi fu du son sani (Yel. 29:4-7). Ma a libi á be makiliki gi den. Noiti denseefi be o wani a libi de. Fa den be e fii di den be de anda? Wan fu den Islayelisama di be e dini Yehofa anga en hii ati be taki: ‘U be e sidon a den sikin liba fu Babilon. U be e kee te u be e pakisei Siyon’ (Ps. 137:1). Den Islayelisama be e fii booko-saka. Den be abi toosutu fanowdu. Ma sama be o toosutu den?

2-3. (a) San Yehofa be du gi den Islayelisama di be de a Babilon? (b) San wo luku aini a artikel ya?

² Yehofa na ‘a Gadu di e toosutu sama’ (2 Kor. 1:3). Yehofa lobi sama, neen meke ai fii bun te ai toosutu den mati fi en. A be sabi taki son wan fu den Islayelisama di be de a Babilon be o gi en a okasi fu a yeepi den, da den be o kon dini en baka (Yes. 59:20). Moo enke 100 yali fosi den Islayelisama be komoto a Babilon, Gadu be meke polofeiti Yesaya sikiifi a Beibelbuku di e tyai a nen fi en. Saide Gadu be meke a sikiifi a buku ya? Yesaya be taki: ‘“Toosutu mi foluku,” a so a Gadu fu u taki’ (Yes. 40:1). Yehofa be meke den sani di a polofeiti ya be sikiifi, gi den Islayelisama di be de a Babilon a taanga-sikin di den be abi fanowdu.

³ Son yuu useefi e abi taanga-sikin fanowdu, leti enke den Dyu di be de a Babilon. Aini a artikel ya, wo luku dii fasi fa Yehofa be toosutu den Islayelisama a Babilon. (1) A be paamisi den taki aw gi den paadon efu den soi taki den sondu di den be du e hati den. (2) A be gi a foluku fi en a howpu taki sani o go bun anga den baka. (3) A be taigi den tu taki aw meke den á feele moo. Te we taki fu den dii sani ya, gaantangi luku fa iseefi sa fende wini fu den sani di Yehofa be taigi den Islayelisama.

YEHOFA E GI U PAADON

4. Fa Yehofa be soi taki en a wan Gadu di abi tyali-ati? (Yesaya 55:7)

⁴ Yehofa na ‘a Dda di abi tyali-ati’ (2 Kor. 1:3). Di a be paamisi den Islayelisama di be wani dini en anga den hii ati taki aw gi den paadon, den be si taki en a wan Gadu di abi tyali-ati. (Leisi Yesaya 55:7.) A be taigi den taki: ‘Mio soi i taki mi abi tyali-ati anga i, bika a lobi di mi abi gii a fu teego’ (Yes. 54:8). Fa Yehofa be soi taki ai fii gi den? A be soi den taki winsi fa den be o fii a bakapisi fu den ogii di den be du, tokuso aa be o meke den tan a Babilon fu teego. A fu wan pisiten namo den be o de a Babilon (Yes. 40:2). Den wowtu fu Yesaya be musu gi den Dyu di be wani dini Yehofa anga den hii ati taanga-sikin.

5. Tei luku wi anga den Islayelisama, da saide u mu moo biibi taki Yehofa e gi u paadon te u meke wan fowtu?

⁵ San a toli ya e leli u? Yehofa de kabakaba fu gi den sama di e dini en paadon te den meke wan fowtu. Tei luku wi anga den Islayelisama, da nownow we fusutan moo bun saide u sa biibi taki Yehofa e gi u paadon. Bika u sabi san a du fu man gi u paadon. Omen ondoo yali baka di Yesaya be du en wooko enke polofeiti, Gadu sende en Manpikin kon a goontapu fu pai fu u sondu gi u. A di Yesesi dede gi u, meke Gadu man ‘sibi den sondu fu u puu’ (Toli 3:19; Yes. 1:18; Efe. 1:7). A Gadu fu wi abi tyali-ati tuutuu.

6. Sowtu wini we fende te u luku a fasi fa Yehofa e soi tyali-ati gi sama? (Luku a fowtow tu.)

⁶ Den sani di sikiifi a Yesaya 55:7, sa gi u taanga-sikin te u kosensi e fon u fu wan sani di u be du. Kande son wan fu u kosensi e fon wi ete fu den fowtu di u be meke den ten di pasa, winsi faw be taki anga den baala kaba. Te we fii den bakapisi fu a sondu di u be du, a sani ya sa meke u kosensi moo fon u. Ma efu u suku yeepi, neen u nai du a sondu moo, u sa biibi taki Yehofa gi u paadon. Te Yehofa gi wan sama paadon, a nai pakisei den sani di a sama be du moo. (Luku Yelemiya 31:34 tu.) Neen meke efu Yehofa nai denki a sondu di u du moo, useefi á mu denki en moo tu. A san we du nownow pelensipali gi Yehofa, a ná saw be du den ten di pasa (Eseik. 33:14-16). Dyonson a Dda fu u di abi tyali-ati o puu ala den bakapisi fu den sondu fu u fu teego.

7. Saw yeepi u fu suku yeepi a den owluman efu u be kibii wan sondu?

⁷ Saw mu du efu u kosensi e fon u fu di u kibii wan sondu? Beibel e gi u taanga-sikin fu suku yeepi a den owluman (Yak. 5:14, 15). Aa makiliki fu taigi taawan taki u meke wan fowtu. Ma efu ai hati u tuutuu taki u du wan sondu, da wo taki anga den owluman. Yehofa anga den baala ya o soi tyali-ati gi u. Luku a toli fu wan baala den e kai Arthur.a A baala ya kosensi be e fon mi en bunbun fasi. A taki: ‘Pikinmoo wan hii yali mi luku porno. Baka di mi yee wan lezing di be e taki fu a kosensi, neen mi taki a toli anga mi uman. Mi taigi den owluman tu. Di mi taigi den, mi fii moo bun. Ma toku mi be e fii booko-saka ete, te mi be e pakisei san mi be du. Den owluman be soi mi taki Yehofa á gwe fika mi. A di a lobi u meke ai puu kaasi gi u. Den taki switi anga mi. A sani ya yeepi mi fu kengi a fasi fa mi be e denki.’ Arthur a wan dinali nownow, ai pionili tu. Ai gi u taanga-sikin tuutuu fu sabi taki te u soi taki wan sondu di u be du e hati u, Yehofa e gi u paadon anga en hii ati.

YEHOFA E MEKE WI ABI HOWPU

8. (a) Sowtu howpu Yehofa be gi den Islayelisama di be de a Babilon? (b) Enke fa Yesaya 40:29-31 e soi, da fa den Dyu di be e dini Yehofa anga den hii ati be o fii, te den be pakisei den sani di Yehofa be paamisi den?

⁸ Efii luku a toli a libisama fasi, da noiti den Dyu be o komoto a Babilon. Te den Babilonsama be tyai den sama fu wan kondee gwe enke katiboman, den á be e meke den daai go a den kondee moo (Yes. 14:17). Tokuso Yehofa be paamisi a foluku fi en taki aw puu den ape, aw fii den, nawan sama be o man tapu en (Yes. 44:26; 55:12). Gi Yehofa Babilon be de enke fini santi (Yes. 40:15). A sani ya e soi taki aa be taanga gi Yehofa fu fii a foluku fi en puu a den Babilonsama ana. Fa den Islayelisama be fii di den yee a sani ya? A be musu gi den taanga-sikin. Ma a ná taanga-sikin namo a be gi den, bika Yesaya be sikiifi tu taki: ‘Den sama di e fitoow Yehofa, o fende kaakiti baka.’ (Leisi Yesaya 40:29-31.) A howpu ya be gi den kaakiti. A be de enke den be man ‘fee a tapu enke agaa’.

9. Sowtu sani be yeepi den Dyu fu biibi taki Yehofa be o puu den a katibo a Babilon?

⁹ Yehofa be soi den Dyu di be de a Babilon tu saide den be sa biibi den sani di a be paamisi den. Fa a be du a sani ya? Pakisei den polofeititoli di be kon tuu kaba. Den Dyu be sabi taki Asiriya be wini a noordse kownukondee fu Islayeli, neen den tyai den sama gwe enke saafu (Yes. 8:4). Den be si fa Babilon be poli Yelusalem. Den be si fa a tyai a foluku gwe enke saafu leti enke fa den polofeiti be taki (Yes. 39:5-7). Den be sabi tu taki na a kownu fu Babilon be booko kownu Sedekiya ain, neen a tyai en go a Babilon enke sitaafuman (Yel. 39:7; Eseik. 12:12, 13). Ala den sani di Yehofa be taki be pasa tuu (Yes. 42:9; 46:10). A sani ya be musu taanga a biibi fu den Islayelisama di be de a Babilon. A be musu yeepi den fu biibi taki Yehofa o fii den.

10. Saw yeepi u fu biibi taki sani o go bun aini a ten di e kon?

¹⁰ San a toli ya e leli u? Te we fii booko-saka, den sani di Yehofa paamisi we meke u fende kaakiti baka. Dei fu dei a libi e taanga namo. A omen ogii sama e du anga u fu di we dini Yehofa. Ma wa mu feele. Yehofa gi u wan moin howpu. A paamisi u taki dyonson wo boo, ala sani o go bun. U mu e pakisei a howpu ya ala yuu. Efu u nai poti pakisei na a howpu fu u, a sani ya sa meke u nai biibi den sani di Yehofa paamisi u moo. Aw kon de enke we luku wan moin peesi, ma u nai si en kiin, bika a gaasi fu a fensee pe u taampu e luku en tyobo. Faw sa ‘kiin a fensee’ fu u, fu wa feegete den sani di Yehofa paamisi u? U mu e teke ten pakisei faw libi o de aini a nyun goontapu. U sa leisi artikel, u sa luku felon efuso aliki den singi di e taki fu a howpu fu u. U sa begi Yehofa, daw taigi en fa we angii fu a ten di aw du den sani di a paamisi u.

11. Sai yeepi wan sisa di siki fu fende kaakiti baka?

¹¹ Meke u luku fa a howpu fu u yeepi wan sisa den e kai Joy. A sisa ya siki bunbun fasi. Joy taki: ‘Te mi e kusumi, da mi e taki anga Yehofa puu koko a mi ati. Mi sabi taki ai fusutan fa mi e fii. Ai aliki mi. Ai gi mi a “kaakiti di bigi pasa maiki”’ (2 Kor. 4:7). Joy e pakisei fa en libi o de aini a nyun goontapu, pe nawan sama o taki: ‘Mi siki’ (Yes. 33:24). Neen meke efu we taki anga Yehofa puu koko a wi ati, neen we pakisei den sani di a paamisi u, wo fende kaakiti baka.

12. Saide u sa biibi taki Yehofa o du den sani di a paamisi u? (Luku a fowtow.)

¹² Yehofa be du omen sani di be e yeepi den Islayelisama, fu biibi taki aw du den sani di a be paamisi den. A so a du omen sani aini a ten ya tu di e yeepi u fu fitoow en. Pakisei den polofeititoli di e kon tuu nownow. We si taki a goontapu makiti fu Ameekankondee anga Ingiisikondee ‘taanga a wanse, da a swaki na a taase’, leti enke fa polofeiti Daniyeli be taki a fesi (Dan. 2:42, 43). We yee nyunsu fu ‘seke-doti a omen peesi’ tu. Boiti dati, we paati a bun nyunsu ‘na a hii goontapu’ (Mat. 24:7, 14). Den polofeititoli ya anga omen taawan ete, e taanga a biibi fu u. Den e yeepi u fu si taki den sani di Yehofa paamisi u, o pasa tuu.

YEHOFA E YEEPI U FU WA FEELE

13. (a) Sowtu tesi be o miti den Dyu na a ten di Yehofa be o fii den? (b) Enke fa Yesaya 41:10-13 e soi, da fa Yehofa toosutu den Dyu di be de a katibo a Babilon?

¹³ Yehofa be soi den Dyu di be de a katibo a Babilon taki a be o fii den. A sani ya be e gi den taanga-sikin. Ma tokuso Yehofa be sabi taki tesi be o miti den na a pisiten di a be o fii den. A be piki den a fesi taki di a yuu be o doo fu den go a den kondee baka, wan tiiman be o wini Babilon anga omen taa kondee (Yes. 41:2-5). Den Dyu be mu feele? Yehofa be gi den taanga-sikin fosi a ten de doo. A be taigi a foluku fi en taki: ‘Ná feele, bika mi de anga i. Ná booko yu ede, bika a mi a yu Gadu.’ (Leisi Yesaya 41:10-13). San a be wani soi den di a taki ‘mi a yu Gadu’? A ná soi a be e soi den taki den mu dini en, bika den be e dini en kaba. Ma a be e membee den taki a de anga den ete.​—Ps. 118:6.

14. San a wan fasi fa Yehofa be yeepi den Dyu fu den á feele moo?

¹⁴ Wan taa fasi fa Yehofa gi den Dyu taanga-sikin, a di a membee den taki en a wan Gadu di koni, a abi makiti. A taigi den fu den luku den sitali. A soi den taki neen meke den, ma a ná meke namo a meke den. A sabi ala den nen fu den tu (Yes. 40:25-28). Neen meke a musu sabi den nen fu ibiiwan fu den sama di e dini en tu. Boiti dati, efu Yehofa abi a makiti fu meke ala den sitali, da a musu abi a makiti fu yeepi a foluku fi en tu. Den sani ya e soi taki aa be de fu den Dyu feele seefiseefi.

15. Fa Yehofa be seeka den Dyu fosi tesi be miti den?

¹⁵ Yehofa be seeka a foluku fi en fosi tesi be miti den. Gadu be taigi a foluku fi en aini wan fu den taa kapitel fu a buku Yesaya taki: ‘Mi foluku, u go aini u kambaa, da u tapu u doo. U go kibii fu wan pisiten, te enke mi ati nai boon moo’ (Yes. 26:20). A gei enke na a ten di Kownu Sirus go feti anga Babilon a tekisi ya kon tuu fu a fosi leisi. Wan man fu Giikikondee di be e sikiifi sani fu fositen taki, di Sirus doo a Babilon, ‘a taigi den suudati fi en fu kii ala den sama di den si a doose’. A sani ya be musu meke den sama fu Babilon feele. Ma den Dyu di be wooko anga san Yehofa be taigi den be tan a libi.

16. Saide wa mu booko wi ede tumisi te we pakisei a gaan banowtu? (Luku a fowtow.)

¹⁶ San a toli ya e leli u? Dyonson wan gaan banowtu o doo di noiti be de ete senten di goontapu sete. Di a banowtu ya o bigin, gaanse sama o buuya, ná pikin feele den o feele. Ma a foluku fu Yehofa naw buuya, den naw feele, bika u sabi taki Yehofa a wi Gadu. Wi o opo taampu leti-opu, bika ‘a yuu di Gadu o fii wi de koosube’ (Luk. 21:28). Di den kondee di o kon a wan fu puu a foluku fu Gadu a pasi, o kon fu feti anga u, u naw buuya. Yehofa o meke den engel fi en feti gi u. Aw soi u saw mu du tu fu pasa a gaan banowtu. Fa Yehofa o soi u saw mu du di a ten de o doo? Wi abi fu wakiti te enke a ten de doo, fu man sabi a sani ya. Ma winsi fa, a gei aini den kemeente Yehofa o meke u yee saw mu du. Neen meke u sa si den kemeente ya enke den ‘kambaa’ pe Yehofa o kibii wi. Faw sa teke seeka fosi den sani ya pasa? U mu meke moiti fu wi anga den baala anga sisa fu u toon mati. U mu de kabakaba fu aliki den baala di e teke fesi tu. Boiti dati, u mu biibi taki a Yehofa e tii a olikanisâsi fi en.​—Heb. 10:24, 25; 13:17.

17. Faw sa meke Yehofa toosutu u?

¹⁷ A libi á be makiliki gi den Dyu a Babilon, ma Yehofa be gi den a toosutu di den be abi fanowdu. Na aseefi sani ya Yehofa o du gi u tu. Neen meke winsi fa sani o waka aini a ten di e kon, meke Yehofa toosutu i. Ná feegete a sani ya: Yehofa abi tyali-ati tuutuu, neen meke u sabi taki aw yeepi u. Meke moiti fi ya feegete den sani di Yehofa paamisi u. Holi a pakisei taki solanga Yehofa a yu Gadu, aa de fii feele nawan sani.