Pisasawaan Tasanang dit Ouhupan do Kinorohingan

Kinorohingan Yohuwaha noh i’t minonimpuun do pisasawaan. Nokoboros o Bible dati dot winonsoi dau i’ tondu’d kumoiso om ‘pootodo noh Dau kumaa i’d kusai.’ Osonong tomod o ginawo di Adam om boros ka dau, ‘Iti noh tikagangku om tonsi nogi’d tonsiku.’ (Kinawansayan 2:22, 23) Om baino nga manu nogi i Yohuwah dot asanang o pisasawaan do tulun.

Soira nopo’d kasawo kou, kosorou ko doti’d asanang tomod nopo. Nga id katapatan nopo, mulong piya’d sopiupus-upus o misasawo nga haro kasari o kobolingkangan. (1 Korintus 7:28) Id brusor nopo’d ti, nga poinsuang o’t boros toi ko prinsip dot Bible dit aanu’d wonsoiyon om kopongulud om papasanang nogi’d pisasawaan dokoyu.—Sinding 19:9-12.

1 ROMITO NOH OTURAN DI NITAHAK DIYA’D YOHUWAH

NUNU KA’D BIBLE: Sawo’d kusai nopo’d nga luguan dot sampaganakan.—Iposus 5:23.

Sobaagi’d sawo, manu i Yohuwah’d momogompi kopio ko’d sinawo nu. (1 Pitrus 3:7) Winonsoi Dau o tondu sobaagi’d ponokodung nu om pantangon om upuson nu nogi. (Kinawansayan 2:18) Apatut do poguluonon nu i’t kasanangan dau, om okon ko kasanangan nu.—Iposus 5:25-29.

Sobaagi’d sinawo, manu i Yohuwah’d mamantang kopio ko’d sawo nu tu monguhup ko dau’d popowonsoi dit apatut do wonsoiyon. (1 Korintus 11:3; Iposus 5:33) Sokodungo noh i’t kookunan dau’d miampai’d osombulu o ginawo. (Kolosi 3:18) Iti noh ot kounsub dot ounsikou om oondos o ginawo dit sawo nu om i Yohuwah.—1 Pitrus 3:1-6.

NUNU WONSOIYON:

• Uhoto no koruhang nu’d poingkuro ko’d osiliu’d sawo ko sinawo dit osonong. Pokinongho noh, om posimbano no kowoyo-woyoon nu

• Potoboyo noh ginawo nu. Ogumu maso’d onuon dokoyu minsingilo’d poingkuro’d papasanang tiso om tiso

2 GOMPIO NOH TOPURIMANAN DIT KORUHANG NU

NUNU KA’D BIBLE: Apatut do koilo ko’d nunu o pogoyo-goyoon kumaa’d koruhang nu. (Pilipi 2:3, 4) Toguango noh koruhang nu’d tososonong, om sorohon no’d manu i Yohuwah’d susuhuon dau’d ‘osuau ngai’d isai nopo tulun.’ (2 Timotius 2:24) Pomusorou no’d nunu i poboroson nu tu “boros nopod tulun dit oburuak om kosuhat i’ do ginawo do miagal di gayang; nga’ boros nopod tulun di kirongod om kolingos i’ do miagal do tubat.” (Boros Dot Aralom 12:18) Uhupan koi’d rusod dot olidang mantad di Yohuwah soira’d momoros ko’d koinsasamod om obinsianan.—Galatia 5:22, 23; Kolosi 4:6.

NUNU WONSOIYON:

• Sumambayang moi’d kaanu’d otoronong om oukab o ginawo soira’d pibarasan i’t awagat o kaantakan dot koruhang nu

• Sorohon noh kopio nunu ot poboroson nu om poingkuro ko’d popolombus do boroson nu

3 MISOMPURU ID POMUSARAHAN

NUNU KA’D BIBLE: Kopisasawo kou nopo, osiliu kou’d ‘iso noh tinan.’ (Matius 19:5) Nga, a’ kopiagal kanto pomusarahan dokoyu. Iri pogi’d minsingilo kou’d posompuru’d pomusarahan om korohian. (Pilipi 2:2) Pisompuruan nopo nga kiguno soira’d momonsoi’d nunu kotontuan. Boros ka’d Bible, ‘Pokianu no’d tutuduk i kowonsoi’d osonong.’ (Boros Dot Aralom 20:18) Pologoso noi’t prinsip do Bible do monokodung dokoyu.—Boros Dot Aralom 8:32, 33.

NUNU WONSOIYON:

• Piilangai topurimanan, okon nopo ko i noilaan toi sinorou toomod dokoyu

• Pibarasan po dokoyu’d maganu’d kotontuan