Otulid Kumaa’d Koruhang Nu

Manu i Yohuwah dati dot popokito’d kotulidan toko. (Mika 6:8) Iti nopo nga kiguno id suang do pisasawaan nu tu amu rumikot toomod o kotumbayaan dot aiso noh kotulidan. Kotumbayaan noi’t oponting dot poposuni’d piupusan.

Nga baino, osusa kopio’d potilombus di kotulidan id pisasawaan. Iri pogi’d, toboiyo noh o duo kaantakan do mongintirung dit pisasawaan nu.

1 POGULUONO NOH PISASAWAAN DOKOYU

NUNU KA’D BIBLE: Koilo kou nondo do momili dit osonong kopio. (Pilipi 1:10) Pisasawaan noi’t oponting id koposion dokoyu. Apatut dot iti noh o poguwonon.

Manu i Yohuwah ‘sopipurimon kou’d kasasanangan’ do misasawo. (Gomponuduk 9:9) Pinointalang dot Kinorohingan dot amu i apatut dot tolikudan o koruhang nu, nga miuhup kou nogi popoundar do ralan dit osonong. (1 Korintus 10:24) Mangai noh popurimono o koruhang nu’d mongunsikou om mananganu ko dau.

NUNU WONSOIYON:

• Soru-soruan dokoyu mitanud om intangai noh kopio it kasanangan dit koruhang nu

• Pomusorou noh, “dati” om okon ko “doho”

2 TAMANGAI NOH GINAWO DOKOYU

NUNU KA’D BIBLE: “Isai nopo o kusai di montong do tondu’ do mikuwo’d orohian daa do monokidudun di tondu’ddi; om nakapagampahu’ no dot id tondu’ddi dot id suang do ginawo dau.” (Matius 5:28) Ondung momusorou nopo sosongulun dit kowoyo-woyoon do araat, om iri noh komoyon dot a’ yau otulid kumaa’d koruhang dau.

Boros ka’d Yohuwah tamangai noh ginawo nu. (Boros Dot Aralom 4:23; Yoromia 17:9) Iri pogi’d, gompio noh mato nu. (Matius 5:29, 30) Tonudo no’i Ayub, i’t minomonsoi’d batos kumaa mato dau dot a’ yau montong om rumohian dot sumandak. (Ayub 31:1) Kada ontong dot ponografi, om kada ponongkiuhang do tulun suai ko i koruhang nu.

NUNU WONSOIYON:

• Pokitono noh kotulidan nu kumaa’d koruhang nu

• Hondomo noh pomusarahan do koruhang nu om tongkiadai noh ngai i’t poporuol dit pomusarahan dau