Poingkuro’d Monoguang dot Kobolingkangan

Soira kou nopo’d kopisasawo, kotoguang kou’d ogumu kobolingkangan. Okito iti i’d pisuaian dot pomusarahan, kopurimanan om i pinsamakan i’d koposion dokoyu. Toi ko kobolingkangan nopo doti ti nga kaantakan do monigowo om i koimbulai mantad labus.

Kosorou ko doti daa’d mogidu mantad do kobolingkangan, nga tutuduk nopo’d Bible nga maan toko toguango nga’i o kobolingkangan. (Matius 5:23, 24) Koihum ko’d ralan dot osonong poingkuro’d tumoguang do kobolingkangan soira’d tumanud ko’d prinsip do Bible.

1 PIBARASAI I’T KOBOLINGKANGAN

NUNU KA’D BIBLE: “Haro . . . maso’d mimboros.” (Gomponuduk 3:1, 7) Tontuon no’d haro maso nu’d monongkiboros do kobolingkangan dokoyu di. Om kada pongudut do koruhang nu. (Iposus 4:25) Alaiyo noh i’t pisongkiwalan. Sisimbar dit koinsasamod nopo nga kaanu’d mangantob do pitagadan.—Boros Dot Aralom 15:4; 26:20.

Mulong piya’d a’ ko daa kotumboyo, pokitono noh i kowoyo-woyoon nu’ddi tosonong, oupus om pantango noh koruhang nu. (Kolosi 4:6) Sikapai noh dokoyu mibabas di kobolingkangan, om kada kou tingkod do misuau.—Iposus 4:26.

NUNU WONSOIYON:

• Tontuon no maso’d osonong dot miboros dit kobolingkangan

• Soira nopo’d moro-boros o koruhang nu pokinongoho noh om kada sapado o boros dau. Om iya nondo nga asanang nogi’d monongkiboros

2 KINONGOHO OM ROTIO

NUNU KA’D BIBLE: “Mogiinsian-insian kou no . . . Mogisogulu-gulu kou nod sumuwau.” (Rum 12:10) Oponting kopio’d poingkuro ko’d mokinongou. Rotio no ot pomusarahan do koruhang nu dot “mogiinsian-insian . . .om mogiinsiriba-riba’ do ginawo.” (1 Pitrus 3:8; Yakub 1:19) Kada sangkarangahai. Milo nopo, tongkiadai po daa nunu wonsoiyon nu om kinongoho noh o koruhang nu toi ko uhoton yau ondung milo’d pibarasan do tohuri. Koruhang nu nopo nga tambalut okon ko saap nu om ‘kada kobintogod om kada kobingkaus.’—Gomponuduk 7:9.

NUNU WONSOIYON:

• Ukabo o pomusarahan do mokinongou, mulong piya’d amu asanang

• Kinongoho om rotio noh komoyon do boros dau. Intangai kowoyo-woyo’d tinan om loyuk do boros di koruhang nu

3 TONUDO

NUNU KA’D BIBLE: “Tumotos ko nopo do kumaraja’ om osimbayan no o koposi-posion nu; nga’ ondung poirikau tomod ko do mimboros noo, om osiliu ko nod tulun do mosikin.” (Boros Dot Aralom 14:23) Kopiokunan tomod nopo nga amu i kabagal. Tonudo noh i nopiokunan dokoyu ngoduo. Okon ko asanang iti, nga abarakatan i o kopogoton dokoyu. (Boros Dot Aralom 10:4) Pisokodung kou noh, om ‘osonong’ nondo o kootuson dokoyu.—Gomponuduk 4:9.

NUNU WONSOIYON:

• Tontuon noh laang dokoyu soira’d monoguang do kobolingkangan

• Intangai noh kasari koburuon nu