Jokwa 7

Sisea Be̱be̱ na Loba Tongwea na Muka

Ońola nje yeno̱ mueńa o kane̱ ponda ye̱se̱ e? (1)

Nja jangame̱nno̱ kane̱, na ne̱ni e? (2, 3)

Njika mambo mangame̱ne̱ o we̱le̱be̱ o muka e? (4)

Njika ponda wangame̱nno̱ o kane̱ e? (5, 6)

Mo̱ Loba a masenga mika me̱se̱ e? (7)

1. Muka mwe nde ekwad’edube na Loba. Wangame̱ne̱ o kane̱ Loba ponda ye̱se̱. Na nika, o mawe̱le̱ be̱ na mo̱ ka diko̱m la tiki. Yehova e bonde̱ne̱ na ngum, nde to̱ na nika a masenga te̱ nde mika masu! O makane̱ Loba ponda ye̱se̱ e?—Myenge 65:2; 1 Tesalonika 5:17.

2. Muka mwe nde dongo la jowe̱ lasu. Ońola di janda, jangame̱ne̱ nde o kane̱ buka te̱ Loba, Yehova. Niponda Yesu a tano̱ o mundi ma wase, a ta nde a kane̱ Sango ao buka te̱, seto̱ moto nupe̱pe̱. Jangame̱ne̱ bola mulemlem. (Mateo 4:10; 6:9) Nde, mika masu me̱se̱ mangame̱ne̱ nde bolabe̱ o dina la Yesu. Nika e malee̱ ná di mabola epol’a Yesu edube na ná dube̱ lasu di sikimedi nde o mo̱ń a jabea lao la diko̱ti.—Yohane 14:6; 1 Yohane 2:1, 2.

3. Niponda di makane̱no̱, jangame̱ne̱ o kwalisane̱ Loba na mulema masu mwe̱se̱. Di sangame̱n jokwa mika masu na mulopo to̱ langa mo̱ o kalat’a mika. (Mateo 6:7, 8) Jena di kane̱ o to̱ njika bete̱medi b’edube, to̱ njika ponda na to̱ njika wuma nde. Loba ena a senga na mika mi mato̱po̱be̱ o esoka o milema masu. (1 Samuel 1:12, 13) Ye bwam ná di makane̱ te̱ ońola biso̱ mo̱me̱ne̱ di wase wum’a musango etum na bato bape̱pe̱.—Marko 1:35.

4. Ońola njika mato̱ti weno̱ ná o kane̱ e ? To̱ nje ye̱se̱ yena e we̱le̱ takise̱ ebe̱yed’ango̱ ya diko̱m na mo̱. (Filipi 4:6, 7) Patan a muka e malee̱ ná jena di kane̱ ońola dina na ońola jemea la Yehova. Je pe̱ ná di baise̱ ná ńo̱ng’asu ń’eyobo e londisabe̱, myobe masu mi lakisabe̱ na ná di kuse jongwane̱ o buka makekisan. (Mateo 6:9-13) Mika masu mi sangame̱ne̱ o be̱ne̱ edī y’eko̱n. Jangame̱ne̱ nde o kane̱ buka te̱ ońola mambo me mulatako na jemea la Loba.—1 Yohane 5:14.

5. Wena o kane̱ ngedi ye̱se̱ mulema mo̱ngo̱ mu matute̱le̱no̱ wa ná o timbise̱le̱ Loba masoma to̱ sesa mo̱. (1 Myango 29:10-13) Wangame̱ne̱ o kane̱ ponda te̱ o be̱nno̱ mitaka na ńena dube̱ lo̱ngo̱ leno̱ o kekise̱. (Myenge 55:22; 120:1) E te̱nge̱ne̱ ná o kane̱ oboso ná o mada. (Mateo 14:19) Yehova a mome̱le̱ biso̱ o kane̱ “ponda ye̱se̱.”—Efeso 6:18.

6. E mapula na di kane̱ tobotobo yete̱na di boli bobe bwe bodilo. O ni ponda nde jangame̱ne̱no̱ so̱so̱me̱ye̱ ońola ndedi na milakisan ma Yehova. Di puse̱le̱ te̱ mo̱ myobe masu na bolane̱ ngud’asu ńe̱se̱ ná di si timba pe̱ oten, Loba a “le̱le̱m o lakise̱.”—Myenge 86:5; Minia 28:13.

7. Yehova a masenga nde mika ma bate̱m na sim buka te̱. Ná Loba a senge mika mo̱ngo̱, wangame̱ne̱ o bola miwe̱n mo̱ngo̱ me̱se̱ o dangwa kaponda mambenda mao. (Minia 15:29; 28:9) Wangame̱ne̱ sibise̱ ńolo ke̱ o makane̱. (Lukas 18:9-14) E mapula ná o bole ebolo jombwea nje yena ońol’ao nde o makane̱no̱. Na nika nde o me̱nde̱no̱ lee̱ ná o be̱n dube̱ na ná o madutea na mbale̱ o nje o makwalano̱. Ombusa nika buka te̱ nde Yehova a me̱nde̱no̱ jalabe̱ mika mo̱ngo.—Bonaheber 11:6.