Mbad’a bwam ńa boṅsane̱ ndongame̱n.

Ka ne̱ni o maboṅsane̱no̱ jokwa lo̱ngo̱ la Bibe̱l na Mboń a Yehova, ye bwam ná o boṅsane̱ pe̱ kalat’a jokwa oboso ná o mukea o ndongame̱n, ná o tombwane̱. O ko̱lo̱ngo̱ne̱ te̱ bola nika, ponda na ponda, o matongwe̱le̱.

Po̱so̱ ponda na wuma ba do̱lisane̱ wa ońola jokwa. Njika ponda weno̱ ná wokwa esibe̱ mpungu e? Idibadiba oboso ná o mabotea ebolo, nga ebiamu ke̱ bana ba máko̱ iyo̱ e? Nga ngus’a minuti nde o matombise̱no̱ o jokwa o s’ese̱le̱ ná lambo di takise̱ wa ke̱ o mokwa. Wasa wuma mumban mu titino̱. Dimse̱ radio, tele na telefon ná to̱ lambo di si takise̱ wa. Oboso ná o mabotea jokwa, se̱le̱ kane̱ ná musango ma Loba mu kombe̱ mulema mo̱ngo̱ ná o bate so̱ṅtane̱ nje o mokwano̱ o Bibe̱l.​—Filipi 4:6, 7.

Maka mato̱ti ma mweńa o boṅsane̱ malabe̱. Se̱le̱ bia o mususu mao mwe̱se̱ nje di jokwa di makwaleano̱. Dutea ońola tem’a jokwa te̱. Ombwa ne̱ni to̱ti la jokwa te̱ di masue̱le̱no̱ tem’a di jokwa. Ombwa pe̱ mulatako oteten a maduta na mato̱ti ma mweńa ma di jokwa. Langa pe̱ myuedi ma ndimbisedi mi mombweye̱ mato̱ti ma mweńa. Ombusa nika, langa dongo te̱, o wase pe̱ jalabe̱ la myuedi. Langa bepasi be bolabe̱ o dongo te̱, o wase ne̱ni be masue̱le̱no̱ tem’a di jokwa. (Bebolo 17:11) O so̱i te̱ jalabe̱ la myuedi o dongo diwo̱, maka byala to̱so̱ mulo̱ṅ ma byala mwe ná mongwane̱ wa o jo̱nge̱le̱ jalabe̱. O to̱ndi te̱, ponda ndongame̱n, we ná o le̱ke̱ dia ná o bole jalabe̱ di mawe̱ wa o mulema.

O no̱ngi te̱ ponda o jokwa nje ye̱se̱ e makwalabe̱ o ndongame̱n te̱, so̱ṅtane̱ lo̱ngo̱ la betiledi di me̱nde̱ bata ńaka.​—Mateo 13:51, 52.

• Njika ko̱lo̱ngo̱ne̱ le ná longwane̱ wa o boṅsane̱ ndongame̱n e?

• Ne̱ni weno̱ ná o boṅsane̱ o bola jalabe̱ o ndongame̱n e?