Ndolo ońola Loba e matute̱le̱ bato ba jemea o sesa dina lao na mulema mwe̱se̱. Kiṅe̱ David a ta a bia ná sesa la dina la Yehova, le nde sesa la Yehova mo̱me̱ne̱. Dina la Yehova di bambe̱ nja eno̱, bede̱mo bao ba bwam be̱se̱, na mambo ma betańsedi a mabolano̱. David a ta a pula sangise̱ na sesa dina la Yehova. A ta a pula bola nika na ‘me̱se̱ me oteten ao’, nika ńe nde na mulema mao mwe̱se̱. Bonalevi pe̱ ba sesi Yehova. Bembi na sibise̱ la ńolo ná byala babu ba besesedi be si ta be dongame̱n o sesa dina la bosangi la Yehova. (Neh. 9:5) Esibe̱ penda, Yehova a bo muńe̱nge̱ o senga ba bato ba mulema mu sibi ba masesa di dina. w24.02 9 § 6

Yehova a si me̱nde̱ lingane̱ wa yete̱na o si we̱li londise̱ lambo di buki ngud’ango̱. (2 Kor. 8:12) E̱ne̱ nde be bete̱medi ka belongedi bō̱ te̱nge̱. O̱nge̱le̱ mambo o málondise̱no̱. Bibe̱l mo̱ ná “Loba a titi nusite̱m na sim, o dimbea ebol’ańu.” (Bon. 6:10) To̱ wa pe̱ o si dimbea mo̱. O̱nge̱le̱ nje o málondise̱no̱ nate̱na wan; k’eyembilan o timbi diko̱m la Yehova, o malangwea bape̱pe̱ nja eno̱, o mádubisabe̱ pe̱ yen ebe. Ka nje te̱ o ńakino̱ o londise̱ pe̱ mambo ma mudī o tano̱ o te̱se̱, we ná o benga ńaka ná o we̱le̱ londise̱ nje o te̱se̱no̱ oteten a ponda. Na jongwane̱ la Yehova, we ná o tongwe̱le̱. Niponda weno̱ po̱ngo̱ miwe̱n o londise̱ lambo la mudī o te̱se̱no̱ o bola, wasa je̱ne̱ ne̱ni Yehova eno̱ jongwane̱ na namse̱ wa, o bwane̱ pe̱ nika muńe̱nge̱. (2 Kor. 4:7) Titimbe̱ ńo̱ngo̱ e me̱nde̱ lena wa minam minde̱ne̱.—Gal. 6:9. w23.05 31 § 16-18

Yehova e muńe̱nge̱ o lee̱ ba a to̱ndino̱ ná a do̱lisane̱ babo̱. Bibe̱l e makwalea ońola ngedi iba a langwedino̱ Yesu ná e nde Mun’ao ńa ndolo, a do̱lisanno̱. (Mat. 3:17; 17:5) Mo̱ o me̱nde̱ to̱ndo̱ senga Yehova a malangwea wa ná a do̱lisan wa e? Yehova a si makwalisane̱ biso̱ boso na boso, a makwalisane̱ nde biso̱ tongwea n’Eyal’ao. Je ná di “senga” doi la ndolo la Yehova tongwea na byala Yesu a langwedino̱ bokwedi bao. Yesu embilane̱ Sango ao o mbadi ńe ke̱nge̱nge̱. Di malanga so̱ te̱ ná Yesu a langwedi bokwedi bao ba jemea ba si ta ke̱nge̱nge̱ ná a to̱ndi babo̱, je̱ne̱ nde biana Yehova nde e o langweye̱ biso̱ nika. (Yohane 15:9, 15) Mitakisan mi po̱i te̱, nik’e si mapula kwala ná Loba a si do̱lisane̱ pe̱ biso̱. O diwengisan, mi mabola nde biso̱ epolo o lee̱le̱ nate̱na o njika dikala di to̱ndino̱ Loba di lakisanno̱ pe̱ mo̱.—Yak. 1:12. w24.03 28 § 10-11